Makakasarig gud ba kita nga matutuman an tanan nga saad han Dios? Kombinsido hito hi Jesus, ngan an iya katutdoan nag-aghat ha iya mamarati hin pagtoo. Tagda an iya ilustrasyon ha Sermon ha Bukid nga mababasa ha Mateo 5:18: “Kay ha pagkamatuod, susumatan ko kamo nga bisan mawara an langit ngan an tuna, diri gud mawawara an usa nga gigutiayi nga letra o usa nga bahin han Balaud tubtob nga diri pa ito natutuman.”

An pinakagutiay nga letra ha Hebreo nga alpabeto amo an י (yod), nga amo an siyahan nga letra ha Tetragrammaton, an sagrado nga ngaran han Dios nga Jehova. * Labot la han aktuwal nga mga pulong ngan mga letra ha Balaud han Dios, gintatagad han mga eskriba ngan Pariseo nga importante hinduro an tagsa nga “bahin” han usa nga letra.

Hi Jesus nasiring nga mas posible pa nga mawara an langit ngan an tuna kay han diri matuman bisan an pinakaguti nga detalye han Balaud. Kondi ginpapasarig kita han Biblia nga magpapabilin an literal nga langit ngan tuna ha kadayonan. (Salmos 78:69) Salit ginpapabug-atan hinin mapwersa nga mga pulong nga matutuman gud bisan an pinakagutiay nga detalye han Balaud.

Importante ba kan Jehova an gudtiay nga detalye? Oo. Tagda ini: Ginsugo an mga Israelita hadto nga diri magbari han tul-an hin karnero durante han Paskua. (Eksodo 12:46) Baga hin gutiay la ini nga detalye. Maaram ba hira kon kay ano nga diri hira sadang magbari hin tul-an? Bangin diri. Kondi, maaram hi Jehova nga Dios nga ini nga detalye magigin bahin han katumanan han tagna nga an Mesias diri mababarian hin bisan usa nga tul-an kon patayon hiya ha pasakitan nga kahoy.—Salmos 34:20; Juan 19:31-33, 36.

Ano an aton mahibabaroan ha mga pulong ni Jesus? Makakasarig gud kita nga matutuman an tanan nga saad ni Jehova nga Dios, bisan an pinakagutiay nga detalye hito. Mapwersa gud ito nga pasarig tikang ha pinakagutiay nga letra ha Hebreo!