HI David nangalimbasog nga diri matumba samtang natutudol han nandadadlagan nga kasundalohan. Nanagku an ira mga mata tungod ha kahadlok, ngan nagdadagmit nga napahirayo ha patag-awayan. Kay ano nga nahahadlok hira? Sigurado nga pauroutro nga hinbabatian ni David an ira kahadlok ha usa nga tawo nga hito nga takna, hambog nga natindog ha kapatagan han walog, bangin ito na an pinakadaku nga tawo nga nakita ni David.

Hi Goliat! Nasabtan ni David kon kay ano nga nahadlok an kasundalohan ha iya—diri katoohan an iya kadaku. Bisan kon waray an iya hinganiban, bangin mas mabug-at pa hiya kay ha duha nga dagku nga tawo. Armado gud hiya, makusog hinduro, ngan eksperyensyado nga girriro. Hi Goliat nagsisininggit ngan nagpipinangayat. Handurawa an iya daku nga tingog nga nalanog ha kabukiran samtang iya gintitinamay an kasundalohan han Israel ngan an ira hadi, hi Saul. Iya gin-aayat an bisan hin-o nga makig-away kontra ha iya—nga hira la nga duha an mag-aaway—basi matapos na ini nga girra!—1 Samuel 17:4-10.

Nahadlok an mga Israelita ngan hi Hadi Saul. Ini nga sitwasyon, hinbaroan ni David, sobra usa ka bulan na! Waray nahihimo an kasundalohan nga mga Pilisteohanon ngan mga Israelita samtang nagpipinangayat hi Goliat kada adlaw! Nakapasubo gud ini kan David. Nakakawara gud hin dignidad nga an hadi han Israel ngan an iya kasundalohan, upod na an tulo nga magurang ni David, nangungurog ha kahadlok! Para kan David, labaw pa ha panginsulto ha kasundalohan han Israel an ginbubuhat hinin pagano nga hi Goliat; iya gin-iinsulto an Dios han Israel, hi Jehova! Kondi ano an mahihimo ni David nga usa la nga batan-on? Ngan ano an aton mahibabaroan tikang ha iya pagtoo?—1 Samuel 17:11-14.

Balikon anay naton an usa nga panhitabo, damu ka bulan na an naglabay. Nagtitikagab-i na ngan nagbabantay hi David ha kakarnerohan han iya tatay ha kabungtoran hirani ha Betlehem. Gwapo hiya ngan posible nga tin-edyer pa la. Mapula-pula an iya panit, ngan makaruruyag ngan intelihente pagkit-on an iya mga mata. Ha mamingaw nga mga takna, iya ginpapalabay an oras pinaagi ha pagpatokar han arpa. An kahusay han mga linarang han Dios nagkaada daku nga impluwensya ha iya, ngan an iya kaabtik ha musika padayon nga nag-uswag tungod han damu nga makalilipay nga panahon ha pagpraktis. Kondi hito nga gab-i, iginpatawag hiya han iya tatay. Karuyag han iya tatay nga makita dayon hiya.—1 Samuel 16:12.

Nakita niya an iya tatay nga hi Jesse nga nakikiistorya ha lagas—an matinumanon nga propeta nga hi Samuel. Ginsugo hiya ni Jehova basi dihogan an usa han mga anak ni Jesse sugad nga an sunod nga hadi han Israel! Nakita na ni Samuel an pito nga magurang ni David, pero iginpatin-aw ni Jehova kan Samuel nga waray Hiya ginpili ha ira. Kondi han umabot hi David, hi Jehova nagsiring: “Dihugi hiya; kay amo hiya.” Ha atubangan han kabugtoan ni David, gin-abrihan ni Samuel an sungay nga puno hin espesyal nga lana ngan ginbuboan an ulo ni David. Ngan katapos han pagdihog ha iya, nagbag-o na gud an iya kinabuhi. An Biblia nasiring: “An espiritu ni Jehova kinmada nga makusganon kan David tikang hadto nga adlaw ngan ha tiarabot pa.”—1 Samuel 16:1, 5-11, 13.

 Nagtubo ba kan David an ambisyon nga magin hadi? Waray. Kontento na hiya ha paghulat han paggiya han espiritu ni Jehova kon san-o hiya makarawat hin mas daku nga responsabilidad. Kondi hito nga takna, iya iginpadayon an iya ordinaryo nga trabaho ha pagbantay han panon. Usa ito nga trabaho nga iya ginbubuhat hin sinsero ngan may kaisog. Duha ka beses nga gintarhog an panon han iya tatay—an siyahan hin usa nga leon, an ikaduha hin oso. Ito nga mga hayop, waray la basta tabuga ni David tikang ha hirayo. Lugod, nakigdulong dayon hiya hito basi mapanalipdan an panon nga diri makakadepensa ha ira kalugaringon. Hiton duha nga higayon, nagsusolo nga ginpatay niya iton ihalas nga kamanampan!—1 Samuel 17:34-36; Isaias 31:4.

Ha usa pa ka higayon, iginpatawag na liwat hi David. An iya abilidad nabatian ni Hadi Saul. Bisan kon maopay la gihapon nga girriro, nawara ni Saul an pag-uyon ni Jehova tungod han iya pagrebelde. Ginkuha ni Jehova an Iya espiritu kan Saul, salit agsob nga naabat hi Saul hin maraot nga espiritu—kasina, pagsuspetsa, ngan pagin bayolente. Kon naabat hiya hin sugad, musika la an nakakapakalma ha iya. May mga kasundalohan ni Saul nga nahibaro nga hi David musikero ngan girriro. Salit iginpatawag hi David, ngan nagin usa hiya han mga musikero ngan paradara han kutamaya ni Saul.—1 Samuel 15:26-29; 16:14-23.

Damu an aton mahibabaroan, labi na an mga batan-on, tikang ha pagtoo ni David. Tigamni nga iya gin-gamit an iya bakante nga mga oras ha pangalimbasog nga magin mas duok kan Jehova. Dugang pa, mapailubon nga nagkultibar hiya hin praktikal nga mga abilidad basi hiya makatrabaho. Kondi labaw ha ngatanan, ginios hiya uyon ha paggiya han espiritu ni Jehova. Mapulsanon gud ini nga mga leksyon para ha aton ngatanan!—Eklesiastes 12:1.

Bisan kon nagtatrabaho para kan Saul, agsob nga nauli hi David basi atamanon an panon, ngan usahay nagagab-ihan hiya tungod hito. Makausa durante hito nga higayon, ginsugo ni Jesse hi David basi panginanoon an iya tulo nga magurang nga kasundalohan ni Saul. Sumugot hi David ngan nagdara hin pagkaon para ha iya kabugtoan nga aadto ha Walog han Ela. Pag-abot didto, nasubo hiya nga makita inin duha nga grupo nga aada ha magkaatbang nga bungtod nga waray nahihimo, sugad han gin-unabi ha tinikangan hini nga artikulo.—1 Samuel 17:1-3, 15-19.

Para kan David, diri angay balewarayon an sitwasyon. Kay ano nga an kasundalohan han buhi nga Dios, hi Jehova, nahahadlok ha usa la ka tawo, nga pagano pa gud? Para kan David, an panamay ni Goliat direkta nga panginsulto kan Jehova. Salit nagtikang hiya mag-inistorya ha kasundalohan mahitungod ha pagpirde kan Goliat. Waray pag-iha, hinbatian ito han iya magurang nga hi Eliab. Ginsaway hiya ni Eliab ngan gin-akusaran nga kumadto la hiya basi makita an nagkamatay ha girra. Kondi binaton hi David: “Ano ba an akon ginbuhat? Nagpinakiana man la ngani ako!” Ngan nagpadayon hiya pag-inistorya nga iya pipirdihon hi Goliat, ngan may nagsumat hito kan Saul. Tungod hito, iginpatawag han hadi hi David.—1 Samuel 17:23-31; An Baraan nga Biblia.

Ginparig-on ni David an hadi pinaagi hini nga mga pulong: ‘Ayaw paluyaha an kasingkasing han usa tungod ha iya.’ Sigurado nga hi Saul ngan an iya kasundalohan nanluya na tungod kan Goliat. Bangin naapektohan hira han sayop nga tendensya ha pagtanding  han ira kalugaringon hiton daku hinduro nga tawo tungod kay tagahawak la hira hito. Nahahanduraw nira nga masayon la hira pirdihon hiton armado nga higante. Kondi diri ito an panhunahuna ni David. Sugad han aton makikita, gintagad niya an sitwasyon ha iba nga anggulo. Salit nagpresentar hiya nga makig-away kan Goliat.—1 Samuel 17:32.

Kondi hi Saul nagsiring: “Diri ka takos ha pagkadto patok hini nga Pilisteohanon pakig-away ha iya pa la, kay ikaw batan-on, ngan hiya usa ka tawo ha pakig-away tikang ha iya kabata.” Bata pa gud ba hi David? Diri, pero bata pa hiya basi magin sundalo, ngan bangin bata pa an iya hitsura. Kondi hi David kilala sugad nga maisugon nga girriro ngan bangin hirani na mag-20 anyos hito nga panahon.—1 Samuel 16:18; 17:33.

Ginpasarig ni David hi Saul pinaagi ha pagpahinumdom ha iya mahitungod han nahitabo ha leon ngan oso. Naghahambog ba hiya? Diri. Maaram hiya kon kay ano nga nagdaog hiya. Hiya nagsiring: “Hi Jehova nga nagluwas ha akon tikang ha kulo han leon, ngan tikang ha kulo han oso, hiya magluluwas ha akon tikang ha kamot hini nga Pilisteohanon.” Nakombinse hi Saul ngan nagsiring: “Kadto, ngan hi Jehova maupod ha imo.”—1 Samuel 17:37.

Karuyag mo ba magkaada pagtoo pariho han kan David? Tigamni nga waray la igbasar ni David an iya pagtoo ha kon ano an iya karuyag hunahunaon. May pagtoo hiya ha Dios tungod han iya kahibaro ngan eksperyensya. Kilala niya hi Jehova sugad nga mahigugmaon nga Parapanalipod ngan Paratuman hin saad. Kon karuyag naton magkaada sugad nga pagtoo, kinahanglan padayon kita nga kumuha hin kahibaro mahitungod han Dios ha Biblia. Samtang nagkikinabuhi kita uyon han aton hinbabaroan, makikita naton nga an mag-opay nga resulta magpaparig-on han aton pagtoo.—Hebreo 11:1.

Ha siyahan, iginpasul-ot ni Saul kan David an iya kutamaya. Pariho gud ito ha tumbaga nga kutamaya ni Goliat, ngan posible may-ada puthaw nga pantungbaw nga bado. Kondi, ginkurian hi David ha pagkiwa-kiwa han ginsul-ot niya iton daku ngan mabug-at nga kutamaya. Diri hiya sundalo, salit diri hiya hiara ha pagsul-ot hito, labi na an kutamaya ni Saul—an pinakahitaas nga lalaki ha nasud han Israel! (1 Samuel 9:2) Iya ginhukas ito ngan ginsul-ot an iya nahiaraan nga bado kon nagbabantay ha panon.—1 Samuel 17:38-40.

Gindara ni David an iya balbag, usa nga bag ha iya sugbong, ngan usa nga labyog. An labyog baga hin gutiay la nga butang, pero ha pagkamatuod, usa ito nga maopay nga armas. May-ada ito gutiay nga panapton nga nakasumpay ha duha nga anit nga kordon ngan maopay ito nga hinganiban para ha parabantay hin karnero. Ginbubutangan an panapton hin bato, malaksi nga ginpapalibot-libot ito ha igbaw han iya ulo ngan ginbubuhian an usa han mga higot hito. Tungod hini, an bato makusog nga malatos ngan makakaigo ha puntirya. Epektibo gud ini salit usahay nagamit an kasundalohan hin grupo hin mga paralabyog.

Hito nga paagi, nasangkapan hi David ngan nagdagmit pag-atubang ha iya kaaway. Mahahanduraw naton hi David nga kinasingkasing nga nag-aampo samtang namumurot hin lima nga gudti ngan maghamis nga bato ha hubas nga salog. Katapos, kumadto hiya ha patag-awayan nga nagdadalagan!

Ano an nahunahuna ni Goliat han makita niya an iya kaaway? “Iya hiya gintamay; kay hiya batan-on pa la, ngan gimula, ngan matahom an pangahimo.” Hi Goliat nagsinggit: “Ayam [ba] ako, nga nakanhi ka ha akon upod an mga balbag?” Matin-aw, nakita niya an balbag ni David, kondi waray an labyog. Ginpanhimaraot niya hi David ha ngaran han mga dios han mga Pilisteohanon ngan nagsaad nga ipapakaon niya an lawas han iya waray pulos nga kaaway ha katamsihan ngan kamanampan ha tuna.—1 Samuel 17:41-44.

Tubtob yana, an baton ni David usa nga daku nga kapahayagan han pagtoo. Handurawa la an usa nga batan-on nga nasinggit kan Goliat: “Nakanhi ka ha akon nga may dara nga kampilan, ngan hin bangkaw, ngan hin budyak: kondi nakanhi ako ha imo ha ngaran ni Jehova han mga kasundalohan, an Dios han kasundalohan han Israel, nga imo pinangangayat.” Maaram hi David nga an gahum han tawo ngan an hinganiban waray gud pulos. Hi Goliat nagpakita hin kawaray-pagtahod kan Jehova nga Dios, ngan hi Jehova ginios patok hito. Sugad han siring ni David, “an pakiaway kan Jehova.”—1 Samuel 17:45-47.

Nakita ni David an kadaku ni Goliat, pati an iya mga hinganiban. Kondi waray niya tuguti an iya kalugaringon nga mahadlok. Waray niya subara an sayop  ni Saul ngan han kasundalohan hito. Waray niya itanding an iya kalugaringon kan Goliat. Lugod iya igintanding hi Goliat kan Jehova. Hi Goliat mga 9.5 piye an kahitaas, mas hitaas ha bisan hin-o nga tawo, kondi hitaas gud ba hiya kon itanding ha Soberano han uniberso? Ha pagkamatuod, sugad han iba nga tawo, pariho la hiya hin insekto—hini nga kahimtang, usa nga insekto nga hirani na poohon ni Jehova!

Hi David dinalagan tikadto ha iya kaaway samtang nakuha hin bato ha iya bag. Ginbutangan niya hin bato an iya labyog ngan ginpalibot-libot ha igbaw han iya ulo tubtob nga sumagitsit ito ha kalaksi. Humirani hi Goliat kan David, posible nga hirani na ha iya paradara han taming. Bangin an iya duro nga kahitaas nagin disbentaha ha iya kay an paradara han taming nga may igo nga kahitaas makukurian ha pag-alsa han taming basi mapanalipdan an iya ulo. Ngan ito gud an ginpuntirya ni David.—1 Samuel 17:41.

Ginbul-iwan ni David an bato han iya labyog. Handurawa samtang nagdurodiretso ito ha iya puntirya. Waray ruhaduha nga ginsiguro ni Jehova nga maigo gud hi Goliat han bato. An bato nahilubong ha agtang ni Goliat ngan hiya natumba nga nakahapa ha tuna! Posible nga pinalagiw an paradara han taming ni Goliat tungod ha kahadlok. Ginkuha ni David an kampilan ni Goliat, ngan iya ginpugot an ulo hito.—1 Samuel 17:48-51.

Tungod hito, nagkaada kaisog hi Saul ngan an iya kasundalohan. Hira nan-gugliat ngan ginlanat an mga Pilisteohanon. Nahitabo gud an ginsiring ni David kan Goliat: “Iya [Jehova] kamo igtutubyan ha amon mga kamot.”—1 Samuel 17:47, 52, 53; An Baraan nga Biblia.

Yana, an mga surugoon ni Jehova diri na nakikigbahin ha literal nga girra. (Mateo 26:52) Kondi, kinahanglan gud la gihapon naton subaron an pagtoo ni David. Sugad ha iya, kinahanglan naton hunahunaon nga tinuod hi Jehova—an amo la nga Dios nga sadang singbahon ngan kahadlokan. Usahay, inaabat naton nga gutiay la kita kon itanding ha aton problema, kondi an aton problema gutiay la kon itatanding ha waray tubtoban nga gahum ni Jehova. Kon pipilion naton hi Jehova sugad nga aton Dios ngan magkaada pagtoo pariho han kan David, waray kakurian o problema an magpapaluya ha aton. Waray gud bisan ano nga malabaw han gahum ni Jehova! ▪