Ginhuhulagway ni apostol Pablo hi Jehova * sugad nga “an Dios han ngatanan nga pagliaw, nga nagliliaw ha aton ha ngatanan nga kasakitan.” (2 Corinto 1:3, 4) Hito nga paagi, ginpapasarig kita han Biblia nga waray tawo nga diri mahimo mabuligan han Dios ngan waray trahedya an sobra kadaku nga diri na kita niya maliliaw.

Syempre, may-ada kita kinahanglan buhaton kon karuyag naton makarawat an pagliaw han Dios. Paonan-o kita mabubuligan hin doktor kon diri kita makikigkita ha iya? Hi propeta Amos nagpakiana: “Mag-uupod ba paglakat an duha, gawas la kon hira magkauyon?” (Amos 3:3) Salit an Kasuratan nag-aaghat ha aton: “Magin duok kamo ha Dios, ngan magigin duok hiya ha iyo.”—Santiago 4:8.

Paonan-o kita makakasiguro nga magigin duok an Dios ha aton? Siyahan, tungod kay pauroutro hiya nga nasiring nga karuyag niya buligan kita. (Kitaa an  kahon.) Ngan ikaduha, tungod han makakombinse nga testimonya han mga tawo nga ginliaw han Dios—tinuod nga mga tawo ha aton panahon ngan ha naglabay.

Pariho ha damu yana nga nagkikinahanglan han bulig han Dios, hi Hadi David nakaeksperyensya liwat hin damu nga trahedya. Makausa, nakimalooy hiya kan Jehova: “Pamatii an tingog han akon mga pag-ampo, kon ako ha imo magguliat.” Ginbaton ba hiya han Dios? Oo. Hi David nagdugang: “Ako nabuligan: Salit an akon kasingkasing nagmamalipay hin daku.”—Salmo 28:2, 7.

Katuyoan han Dios nga magkaada hi Jesus importante nga papel ha pagliaw ha mga tawo. Usa han iya toka amo an “pagbugkos han mga samad an kasingkasing” ngan “paglipay hadton ngatanan nga masurub-on.” (Isaias 61:1, 2) Sugad han igintagna, interesado gud hi Jesus ha mga tawo nga “kinakapoy ngan binubug-atan.”—Mateo 11:28-30.

Ginliaw ni Jesus an mga tawo pinaagi ha paghatag ha ira hin maaramon nga sagdon, pagtratar ha ira ha buotan nga paagi, ngan ha pipira nga kahimtang, ha pagtambal han ira sakit. Usa ka adlaw, nakimalooy ha iya an usa nga may leprosi: “Kon karuyag mo, matatambal  mo ako.” Hi Jesus nalooy ngan nagsiring: “Karuyag ko nga matambal ka.” (Marcos 1:40, 41) Ngan natambal an may leprosi.

An Anak han Dios waray na ha tuna basi personal nga liawon kita. Pero an iya Amay nga hi Jehova, “an Dios han ngatanan nga pagliaw,” padayon nga nabulig ha mga nanginginahanglan. (2 Corinto 1:3) Tagda an upat nga nangunguna nga paagi nga ginagamit han Dios basi liawon an mga tawo.

• An Biblia. “An ngatanan nga iginsurat hadto iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.”—Roma 15:4.

• Baraan nga Espiritu han Dios. Waray pag-iha katapos mamatay hi Jesus, nagkaada kamurayawan an Kristiano nga kongregasyon. Kay ano? Kay hira ‘nagkinabuhi nga may kahadlok kan Jehova ngan may pagliaw han baraan nga espiritu.’ (Buhat 9:31) An baraan nga espiritu, an aktibo nga pwersa han Dios, gamhanan gud. Mahimo ito gamiton han Dios ha pagliaw ha mga tawo ha bisan ano nga kahimtang.

• Pag-ampo. “Ayaw kamo kabaraka ha bisan ano,” an Biblia nagsasagdon. Lugod, “ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna.”—Filipos 4:6, 7.

• Igkasi-Kristiano. Mahimo hira makagtagana hin pagliaw durante hin makuri nga sitwasyon. Iginhulagway ni apostol Pablo an iya mga kaupod sugad nga ‘naghahatag gud hin daku nga pagliaw’ ha panahon han “kasub-anan ngan kasakitan.”—Colosas 4:11; 1 Tesalonica 3:7.

Kondi bangin ka maghunahuna kon paonan-o ini natutuman. Tagdon naton an mga eksperyensya han mga tawo nga inatubang hin mga problema nga gin-unabi kanina. Pariho ha ira, mahibabaroan mo nga gintutuman la gihapon han Dios an iya makapabantad nga saad: “Pagliliawon ko kamo . . . sugad hin usa nga iroy nga nagliliaw han iya anak.”—Isaias 66:13, Maupay nga Sumat.