TIKANG HA IBA-IBA NGA DAPIT HAN KALIBOTAN
Mahitungod ha Relihiyon
An relihiyon an ginlalaoman nga mag-aaghat han pagkaurosa. Kondi agsob gud nga ito lugod an nagigin hinungdan han samok ngan kawaray-pagtapod.
BUG-OS NGA KALIBOTAN
Sobra 75 porsyento han populasyon ha kalibotan an naukoy ha mga nasud nga may mga pagdiri ha relihiyon, tungod man ito ha pagkontra han gobyerno o han komunidad. Ha naglabay pa la nga lima ka tuig, haros nadoble an kadamu han nasud nga may mga insidente hin pag-abuso ha gudtiay nga mga grupo hin relihiyon.
ALAYON HUNAHUNA INI: Kay ano nga an pipira nga tawo nasisina ha relihiyon?
INGLATERA
Ha peryodiko nga Observer, iginsurat han primero ministro hadto nga hi Tony Blair nga “an pag-abuso ha relihiyon” agsob nga amo an hinungdan han mga terorismo nga diri pa la maiha nga nahitatabo. Hiya nagsiring: “An mga girra hini nga siglo posible nga diri tungod han nakagamot nga mga ideolohiya ha politika, sugad han nahitabo han ika-20 ka siglo. Kondi mas posible nga tungod ito ha mga isyu may kalabotan ha kultura ngan relihiyon.”
ALAYON HUNAHUNAA INI: Kay ano nga an relihiyon agsob gud magin hinungdan han pagkabahin-bahin?
AUSTRALIA
An Australian Bureau of Statistics nagreport nga 1 ha 5 nga Australiano an nasiring nga waray hira relihiyon. Ini nga report nagdugang nga bisan adton “may relihiyon diri nangangahulogan nga aktibo [hira] ha mga buruhaton hito.” Kinse porsyento la ha kalalakin-an ngan 22 porsyento la ha kababayin-an an nasiring nga aktibo hira ha ira relihiyon.
ALAYON HUNAHUNAA INI: Ano an negatibo nga mga kalidad an matin-aw nga nakikita ha kadam-an nga relihiyon yana?
