HI Natalya ngan an iya noybe anyos nga anak nga hi Aslan sumuksok kan Zarina ngan ha iya dose anyos nga anak nga hi Anzhelika. Sobra 1,000 nga iba pa nga kabataan ngan mga adulto an nalingkod ha ira sapit samtang ginbabantayan hira han armado nga mga terorista.

Han aga hito nga Mierkoles, Septyembre 1, 2004, an mga kabataan ngan mga kag-anak nakadto ha gawas basi mangandam ha pagselebrar han siyahan nga adlaw han klase ha Beslan, usa nga gutiay nga bungto ha Alania, Rusya. Kondi tigda la nga may nagkaabot nga armado nga mga kalalakin-an ngan mga suicide bomber, nagpabuto hira ha igbaw ngan nangugliat. Ginpasulod han sobra 30 nga terorista an nahahadlok nga mga tawo ngadto ha gimnasyum han eskwelahan ngan ginbutangan ito hin mga bomba.

Hito nga paagi nagtikang an tulo ka adlaw nga waray maglampos nga negosasyon han mga terorista ngan han mga sundalo. “Waray pa gud ako mag-ampo hin sugad hito,” siring ni Natalya, nga nag-aaram han Biblia kaupod han mga Saksi ni Jehova.

Katpaso hadto, salit mapaso hinduro an gimnasyum. Tikang ha aga han ikaduha ka adlaw, waray na pakaona ngan painoma han mga terorista an ira mga hostage, ngan han Biernes, han ikatulo ka adlaw, may mga hostage nga ininom na la hin ihi ngan kinaon han mga bukad nga dara han kabataan nga para unta ha ira mga titser. “Usa nga bata nga lalaki nga nalingkod ha amon sapit an nagbutang hin dahon ha akon palad,” siring ni Natalya. “Gintunga ko ito ngan iginhatag kanda Anzhelika ngan Aslan.”

 Ha kulop han ikatulo ka adlaw, nagtikang na an duro nga samok. “Natumba ako tungod han makusog hinduro nga mga pagbuto,” siring ni Natalya. “Naputos hin aso an palibot, ngan nagtikang an puropsilay.” Samtang napupuropsilay an mga sundalo ngan an mga terorista, nagkamang tipagawas hira Natalya ngan Aslan. Ginbuligan hira ni Alan nga taga-Ossetia basi makapalagiw. Pero damu an waray makapalagiw.

Ginatos nga kabataan ngan mga adulto an nagkamatay, upod na hi Anzhelika. Ha sulod hin mga semana, mababatian an mga pagbakho ngan mga pangaraba ha Beslan. Tikang ha apartment nira Natalya, nakikita an eskwelahan, ngan bisan han may gintukod na nga bag-o nga eskwelahan ha kahirani hito, nadiri pa gihapon hi Aslan pagsulod. Nadiri liwat hiya pag-uyag ha gawas. “Nanginyupo kami kan Jehova nga buligan hiya nga madaog an iya kahadlok,” siring ni Natalya. Ha urhi, nagkaada hiya kaisog nga umiskwela utro.

Nakurian hi Natalya ha pagtambong ha mga katirok ha Kingdom Hall. “Kon kaupod ko an damu nga tawo ha usa nga bilding, pag-abat ko baga hin susulungon kami,” siring niya. “Nag-aampo ako nga waray unta maraot nga mahitabo. Umabot an panahon, waray na ako tumambong. Masakit liwat ha akon nga hunahunaon nga damu an namatay, samtang kami natalwas.”

“Mapasalamaton gud ako ha mga kabugtoan ha kongregasyon nga padayon nga nabulig ha akon,” siring ni Natalya. “Ha kada tulo ka adlaw, ginbibisita ako han Saksi nga hi Tatyana. Ha urhi, nag-upod hiya hin usa pa nga Saksi nga hi Ulyana. Buotan hiya, matinalahuron, kalmado magyakan, ngan maaram gud ha Biblia. Ginkumendasyonan niya an akon mga pangalimbasog, ngan namati gud hiya ha akon.

“Ginbasa ni Ulyana ha akon an ginsiring ni apostol Pablo ha 2 Corinto 1:9. Katapos han makuri nga gin-agian ni Pablo ha Asia, hiya nagsiring: ‘Kombinsido kami nga nakarawat namon an sentensya nga kamatayon.’ Iya liwat ginbasa an Isaias 40:31: ‘Hira nga naghuhulat kan Jehova magbabag-o han ira kusog; hira masaka pinaagi hin mga pako sugad hin mga agila.’ An sugad hini nga mga teksto, upod na an padayon nga suporta ha emosyon tikang kan Ulyana ngan ha iba pa, nagparig-on ha akon nga tumambong utro ha mga katirok kaupod han akon mga anak. Kondi diri pa gihapon ako komportable ha sugad nga mga lugar.”

Hi Zarina nagin Saksi ni Jehova, ngan ginpapamulat niya nga tapoon hi Anzhelika kon banhawon na hiya ha maopay ngan murayaw nga tuna nga pagmamandoan han Ginhadian han Dios. (Mateo 6:9, 10; Buhat 24:15) Hi Natalya ngan han iya mga anak nabawtismohan han 2009. Naukoy la gihapon hira hirani ha naguba nga gimnasyum pero ginkalimtan na nira an ira makangingirhat nga eksperyensya. “Naiistorya ko na yana ito nga panhitabo nga diri nasasakitan o nahahadlok,” siring ni Natalya. “Ginbubuligan kami han Dios nga matambal an amon kasakit.”