1, 2. (a) Ano an panhunahuna nira Elipas ngan Bildad mahitungod han aton mga pangalimbasog ha aton pag-alagad ha Dios? (b) Paonan-o iginpahibaro ni Jehova an iya panhunahuna?

‘MAY kapulsanan ba ha Dios an tawo? O may kapulsanan ba para ha iya nga imo ginhihingpit an imo panulus [o, integridad]?’ (Job 22:1-3) Nahunahuna mo na ba an baton han sugad hini nga mga pakiana? Han iginpakiana ini ni Elipas nga Temanitanhon kan Job, sigurado nga para kan Elipas diri an baton hito. An iya kaupod nga hi Bildad nga Suhitanhon nangatadongan pa ngani nga imposible nga magin matadong an mga tawo ha atubangan han Dios.—Basaha an Job 25:4.

² Inin diri tinuod nga mga paraliaw nangatadongan nga waray pulos kan Jehova an aton mga pangalimbasog nga magin maunungon ha iya, ngan para ha Dios an aton bili pariho la han insekto, o ulod. (Job 4:19; 25:6) Ha siyahan nga pagkita, bangin makasiring kita nga mapainubsanon hira Elipas ngan Bildad. (Job 22:29) Oo, kon kikitaon naton an ginbubuhat han tawo tikang ha hitaas nga bukid o ha bintana han usa nga eruplano, masisiring naton nga gutiay gud la ito o diri ito importante. Pero sugad ba hito an panhunahuna ni Jehova ha aton mga ginbubuhat para ha Ginhadian samtang ginkikita kita niya tikang ha iya hitaas hinduro  nga urukyan ha langit? Diri. Han ginsaway ni Jehova hira Elipas, Bildad, ngan Sopar tungod han pagyakan hin buwa, iginpahibaro niya an iya panhunahuna mahitungod hito. Pero nalipay hi Jehova kan Job ngan gintawag hiya nga “akon sorogoon.” (Job 42:7, 8) Matin-aw, an usa nga tawo ‘may kapulsanan ha Dios.’

3. Ano an ginsiring ni Elihu mahitungod han aton pangalimbasog ha pag-alagad kan Jehova, ngan ano an iya karuyag ipasabot?

³ Waray tadonga ni Jehova hi Elihu han hiya nagsiring: ‘Kon ikaw matadong, ano an imo maihahatag ha Dios? O ano an iya makakarawat tikang ha imo?’ (Job 35:7) Iginpapasabot ba ni Elihu nga waray pulos an aton pangalimbasog ha pag-alagad ha Dios? Diri. Karuyag niya ipasabot nga diri nakadepende hi Jehova ha aton pagsingba tungod kay may-ada na Hiya han ngatanan. Diri naton hiya mahihimo nga mas riko o mas makusog. Ha kabaliktaran, anoman nga mag-opay nga kalidad, abilidad, o talento nga may-ada kita, tikang ito ha Dios, ngan ginkikita niya kon paonan-o naton ito ginagamit.

4. Ha ano iginpariho ni Jehova an aton pagpakita hin pagkabuotan ha iba?

⁴ Kon nagpapakita kita hin maunungon nga gugma ha iya mga magsiringba, gintatagad ito ni Jehova nga ha iya mismo kita nagpapakita hin maunungon nga gugma. An Proberbios 19:17 nasiring: “Hiya nga may pagbati han kablas naalayon [“napautang,” Maupay nga Sumat] kan Jehova, ngan han iya maopay nga buhat iya hiya pagbabayaran liwat.” Ini ba nga teksto nagpapasabot nga gintitigamnan ni Jehova an tagsa nga higayon nga nagpapakita kita hin pagkabuotan ha mga kablas? Masisiring ba naton nga gintatagad han Maglalarang han uniberso nga may utang hiya ha mga tawo nga nagpapakita hin kalooy? Gintatagad ba niya ito nga utang nga kinahanglan niya bayaran pinaagi han pagpakita ha ira hin pag-uyon ngan paghatag hin bendisyon? Oo, ngan ginpamatud-an ito han Anak mismo han Dios.—Basaha an Lucas 14:13, 14.

5. Ano nga mga pakiana an aton hihisgotan?

⁵ Gin-imbitar ni Jehova hi propeta Isaias nga magrepresentar ha Iya; iginpapakita hini nga nalilipay hi Jehova ha matinumanon nga mga tawo nga nakikigbahin ha pagtuman han iya katuyoan. (Isa. 6:8-10) Kinasingkasing nga ginkarawat ni Isaias ito nga imbitasyon pinaagi ha pagsiring: “Iini ako; pakadto-a ako.” Yana, yinukot an nagsusubad hito nga disposisyon ni Isaias pinaagi ha pagkarawat bisan han baga hin magkuri nga toka ha pag-alagad kan Jehova. Pero bangin maghunahuna an usa: ‘Makalilipay gud nga gintagan ako ni Jehova hin higayon nga magboluntaryo ngan makigbahin ha iya buruhaton. Pero importante gud ba an akon mga pangalimbasog? Anoman an akon nahihimo ha pag-alagad ha iya, diri ba hiya magtatagana han ngatanan nga ginkikinahanglan basi matuman an iya katuyoan?’ Hisgotan naton kon paonan-o an asoy mahitungod kanda Debora ngan Barak nagbabaton hito nga mga pakiana.

6. Kay ano nga baga hin masayon la para ha kasundalohan ni Jabin nga pirdihon an mga Israelita?

⁶ An mga Israelita duro nga gintalumpigos han hadi han Canaan nga hi Jabin ha sulod hin 20 ka tuig. An mga Israelita nga naukoy ha baryo nahahadlok bisan ha paggawas ha ira balay. Kon huhunahunaon, waray gud mahihimo an mga Israelita; waray hira igo nga armas ha pakig-away ngan ha pagpanalipod ha ira kalugaringon, samtang an ira kaaway may-ada 900 nga karomata.—Huk. 4:1-3, 13; 5:6-8. *

7, 8. (a) Ano an siyahan nga iginsugo ni Jehova kan Barak? (b) Paonan-o napirde han Israel an kasundalohan ni Jabin? (Kitaa an retrato ha tinikangan hini nga artikulo.)

⁷ Bisan pa hito, hi Jehova naghatag hin matin-aw nga sugo pinaagi han propetisa nga hi Debora: “Lakat ngan kadto ha bukid ha Tabor, ngan kuhaa nga imo kaupud an napulo ka yukut ka tawo han mga  anak ni Neptali ngan han mga anak ni Sabulon? Ngan makada ako ha imo, dida ha salog ha Kison, Sisera, an kapitan han kasondalohan ni Jabin upud an iya mga karomata ha pakigaway ngan an iya kadam-an; ngan itutubyan ko hiya ngada ha imo kamot.”—Huk. 4:4-7.

⁸ Nagsarang an sumat. An mga boluntaryo nagkatirok ha Bukid Tabor. Ginsunod dayon ni Barak an instruksyon ni Jehova. (Basaha an Hukom 4:14-16.) Durante han girra ha Taanak, tigda nga binunok salit nagin malagay an palibot. Ginbukod ni Barak an kasundalohan ni Sisera tubtob ha Haroset, nga 24 ka kilometro an kahirayo. Samtang napalagiw hi Sisera, ginbayaan niya ha dalan an iya karomata nga ginkakahadlokan hadto pero yana waray na pulos, ngan nagdinalagan hiya pakadto ha Saanaim nga posible nga hirani ha Kedes. Kinadto hiya ha tolda ni Jael, an asawa ni Heber nga Kineohanon, ngan gin-abiabi hiya ni Jael. Tungod kay ginkapoy hi Sisera ha pakig-away, nahingaturog hiya. Mas masayon na yana buhaton han maisugon nga hi Jael an iya plano nga patayon hi Sisera. (Huk. 4:17-21) Napirde gud han mga Israelita an ira mga kaaway! *

9. Ano nga mga detalye an aton mababasa ha Hukom 5:20, 21 may kalabotan ha pakig-away han mga Israelita kan Sisera?

⁹ Importante nga pag-adman nga magkaupod an Hukom kapitulo 4 ngan 5, kay an tagsa hito may mga detalye nga diri mababasa ha usa. Pananglitan, an Hukom 5:20, 21 nasiring: “Tikang ha langit nakiaway an mga bitoon, tikang ha ira mga agianan nakigaway hira kan Sisera. Han salog ha Kison iginbanlas hira [kasundalohan ni Sisera].” Iginpapakita ba hini nga binulig an mga anghel ha pakig-away, o inuran hin mga bulalakaw? Waray magsiring an Biblia. Pero baga hin makatadunganon hunahunaon nga gintalwas ni Jehova an iya katawohan pinaagi ha pagpahinabo hin makusog nga uran ha eksakto nga lugar ngan panahon basi makurian pagdalagan an 900 nga karomata. Ha Hukom 4:14, 15, tulo ka beses nga gin-unabi nga hi Jehova an naghatag ha ira hin kadaogan. Waray gud bisan usa han 10,000 nga nagboluntaryo nga Israelita an makakaghambog nga hiya an hinungdan han kadaogan.

10, 11. Ano an “Meros,” ngan kay ano nga ginpanhimaraot ito?

¹⁰ Pero urusahon nga ha kabutngaan han kanta han kadaogan nira Debora ngan Barak basi dayawon hi Jehova hinin milagroso nga kadaogan, hira nagsiring: “Panhimarauta niyo an Meros, nagsiring an angel ni Jehova, panhimarauta ha mapait an mga umurukoy dida, tungud kay waray hira dumaup ha pagbulig kan Jehova, ha pagbulig kan Jehova patok ha mga makusganon.”—Huk. 5:23.

¹¹ Matin-aw nga natuman gud an panhimaraot ha Meros kay makuri na hibaroan an mahitungod hito nga lugar. Posible ba nga usa ito nga syudad diin an mga umurukoy hito waray sumuporta ha panawagan para hin mga boluntaryo? Kon usa ito han gin-agian ni Sisera ha iya pagpalagiw, posible ba nga waray salingabota han mga umurukoy hito an higayon nga dakpon hiya? Sigurado nga nakabati hira han panawagan ni Jehova para hin mga boluntaryo tungod kay 10,000 tikang hito nga rehiyon an nagkatirok para ha pakig-away. Handurawa la nga nakikita han mga umurukoy ha Meros inin peligroso nga girriro samtang nagdidinalagan ha ira mga kalsada nga nag-uusahan ngan nahahadlok! Daku gud unta adto nga higayon para ha ira nga bumulig ha pagtuman han katuyoan ni Jehova ngan makakarawat han iya bendisyon. Pero hiton importante nga takna nga puydi hira bumulig ha buruhaton ni Jehova, ginpili nira nga diri makigbahin. Kabaliktaran gud ito ha iginpakita nga kaisog ni Jael nga gin-unabi ha sumunod nga mga bersikulo!—Huk. 5:24-27.

12. Ano nga magkaiba nga disposisyon han mga tawo an makikita ha Hukom 5:9, 10, ngan paonan-o ini sadang makaapekto ha aton yana?

¹² Ha Hukom 5:9, 10, makikita liwat naton an magkaiba gud nga disposisyon han mga umupod kan Barak ha pakig-away ngan ha mga waray umupod.  Ginkumendasyonan nira Debora ngan Barak an “mga gobernador ha Israel nga ha kinasingkasing naghalad ha ira ngahaw [o, nagboluntaryo] sakot han katawohan.” Iba gud hira ha “nananakay han busag nga mga asno,” nga mapahitas-on ngan waray bumulig ha pakig-away pati na ha mga “nanlilingkod ha magtahum nga alpombra,” nga nalilipay ha mahimyang nga kinabuhi! Diri pariho ha mga “nagkakalakat ha dalan,” nga nagpili han mas masayon nga agian, an mga umupod kan Barak andam gud nga makig-away ha batoon nga mga bungtod han Tabor ngan ha malapok nga walog han Kison! An ngatanan nga mahilig ha kalipayan gin-aghat nga maghunahuna! Oo, kinahanglan nira pamalandungon nga may-ada unta hira higayon nga bumulig ha pagtuman han katuyoan ni Jehova, pero waray nira ito salingabota. Yana, sugad liwat hito an sadang buhaton han bisan hin-o nga nag-aalang ha pag-alagad hin bug-os kan Jehova.

13. May kalabotan ha pagboluntaryo, ano an magkaiba nga disposisyon han tribo ni Ruben, Dan, ngan Aser ha tribo ni Sabulon ngan Neptali?

¹³ Naobserbaran mismo han 10,000 nga nagboluntaryo kon paonan-o iginpakita ni Jehova an iya pagkasoberano. Salit may maisusumat hira ha iba kon nag-iistorya hira mahitungod ha “mga matadong nga buhat ni Jehova.” (Huk. 5:11) Ha luyo nga bahin, gin-unabi ha Hukom 5:15-17 nga mas ginpabilhan han tribo ni Ruben, Dan, ngan Aser an ira materyal nga karikohan—sugad han ginpapakita han pagkaada nira mga panon hin mga hayop, mga barko, ngan mga duruongan—kay han pagbulig ha buruhaton ni Jehova. Ha kabaliktaran, an tribo ni Sabulon ngan Neptali “nagbutang han ira mga kinabuhi ha kataragman ha kamatayon” basi suportaran hira Debora ngan Barak. (Huk. 5:18) Inin magkaiba nga disposisyon ha pagboluntaryo nagtututdo ha aton hin importante nga leksyon.

14. Paonan-o naton iginpapakita nga ginsusuportaran naton an pagkasoberano ni Jehova yana?

¹⁴ Yana, diri na kita gin-aaghat nga makigbahin ha literal nga pakig-away, pero may pribilehiyo kita nga ipakita an kaisog pinaagi han aton pagin madasigon ha pagsangyaw. Daku gud yana an panginahanglan hin mga boluntaryo ha organisasyon ni Jehova kay ha kakan-o pa man. Minilyon nga kabugtoan ngan mga batan-on an nagbuboluntaryo ha iba-iba nga klase hin bug-os-panahon  nga pag-alagad. Pananglitan, damu an nagpapayunir, nag-aalagad ha Bethel, nagbuboluntaryo ha pagpanukod hin mga Kingdom Hall, ngan nagbuboluntaryo ha mga asembleya ngan kombensyon. May mga tigurang liwat nga may-ada magbug-at nga responsabilidad ha Hospital Liaison Committee ngan ha pag-organisar hin mga kombensyon. Makakasiguro ka nga gin-aapresyar gud ni Jehova an imo pagin andam ha pagboluntaryo, ngan diri niya ito hingangalimtan.—Heb. 6:10.

15. Paonan-o naton mahibabaroan kon bug-os ba kita nga nakikigbahin ha buruhaton ni Jehova?

¹⁵ Maopay nga pakianhan naton an aton kalugaringon: ‘Ginpapabay-an ko ba nga an iba la an naghihimo han damu nga buruhaton? Gintutugotan ko ba an sobra nga pangalimbasog ha pagkaada materyal nga mga butang nga makaulang ha akon ha pagin andam ha pagboluntaryo? Pariho kanda Barak, Debora, Jael, ngan an 10,000 nga boluntaryo, may pagtoo ngan kaisog ba ako nga gamiton an anoman nga may-ada ako basi sundon an matin-aw nga sugo ni Jehova? Kon nagpaplano ako magtrabaho ha iba nga lugar o mag-abroad basi magkaada damu nga kwarta ngan maopay nga kinabuhi, ginhuhunahuna ngan igin-aampo ko ba an magigin epekto hito ha akon pamilya ngan ha kongregasyon?’ *

16. Bisan kon may-ada na hi Jehova han ngatanan, ano an aton maihahatag ha iya?

¹⁶ Ginpapasidunggan kita ni Jehova pinaagi ha paghatag ha aton hin higayon nga suportaran an iya pagkasoberano. Tikang pa han panahon nira Adan ngan Eva, nangangalimbasog hi Satanas nga aghaton an mga tawo nga sumuporta ha iya pagmando imbes nga kan Jehova. Salit an imo pagsuporta ha pagmando ni Jehova nagpapakita nga nadapig ka gud ha Iya. An imo pagboluntaryo tungod han imo pagtoo ngan pagkamaunungon kan Jehova nakakapalipay ha iya. (Prob. 23:15, 16) Ginagamit ni Jehova an imo pagsuporta ha iya ha pagbaton ha mga pagtamay ni Satanas. (Prob. 27:11) Salit pinaagi han imo pagin maunungon ngan masinugtanon, sugad hin gintatagan mo hi Jehova hin usa nga butang nga gintatagad niya nga presyoso, ngan nalilipay gud hiya hito.

17. Ano an igintututdo ha aton han Hukom 5:31 may kalabotan ha mahitatabo ha tidaraon?

¹⁷ Diri na mag-iiha, an ngatanan nga maukoy ha tuna amo adton mga nadapig ha pagkasoberano ni Jehova. Ginpapamulat gud naton ito! Pariho kanda Debora ngan Barak, kita nagkakanta: ‘Itugot nga an ngatanan mo nga kaaway, O Jehova, mahanaw: kondi tugoti adton nahigugma ha imo nga masugad han adlaw kon nagawas ha kakusog hito.’ (Huk. 5:31) Matutuman ini nga pangamuyo kon bungkagon na ni Jehova inin maraot nga kalibotan ni Satanas! Kon magtikang na an girra han Armagedon, diri na magkikinahanglan hin mga tawo nga magbuboluntaryo ha pagbungkag ha mga kaaway. Ito an panahon nga ‘matindog kita ha mahadong, ngan magkikita ha pagluwas ni Jehova.’ (2 Kron. 20:17) Pero samtang waray pa ito, damu an aton higayon nga suportaran an katuyoan ni Jehova, ngan buhaton ini nga may kaisog ngan kadasig.

18. Ano an mahimo magin epekto han imo pagin andam ha pagboluntaryo ha mga nagpapahimulos hito?

¹⁸ Gintikangan nira Debora ngan Barak an ira kanta han kadaogan pinaagi ha pagdayaw, diri ha mga linarang, kondi ha Gihitaasi nga Dios. Hira nagkanta: ‘Kay an katawohan naghalad hin kinasingkasing, pagbulahana hi Jehova.’ (Huk. 5:1, 2) Ha pariho nga paagi, an imo pagin andam ha pagboluntaryo magpagios unta ha ngatanan nga nagpapahimulos hito nga ‘bulahanon’ o dayawon hi Jehova!