1, 2. (a) Kay ano nga an pagkauripon ngan kagawasan importante nga mga topiko ha mga tawo ha panahon ni apostol Pablo? (b) Sumala han ginsiring ni Pablo, hin-o an Surok han tinuod nga kagawasan?

AN MGA tawo ha Imperyo han Roma, diin nag-ukoy an siyahan-siglo nga mga Kristiano, naghahambog nga nasuporta hira ha balaud, hustisya, ngan kagawasan. Kondi, kadak-an han gahum ngan himaya hito nga imperyo nagin posible tungod han mga uripon. May higayon nga an 30 porsyento han populasyon hito mga uripon. Waray ruhaduha, an pagkauripon ngan kagawasan nagin importante nga mga topiko para ha ordinaryo nga mga tawo, pati ha mga Kristiano.

² An mga surat ni apostol Pablo damu an igintututdo mahitungod ha kagawasan. Kondi an katuyoan han iya ministeryo diri para bag-uhon an kahimtang ha komunidad o politika, nga amo gud an karuyag han mga tawo hito nga panahon. Imbes nga sumarig ha bisan hin-o nga tawhanon nga magmarando o bisan ano nga organisasyon para ha pagkaada kagawasan, nangalimbasog hi Pablo ngan an iya mga igkasi-Kristiano ha pagbulig ha iba nga mahibaro han maopay nga sumat han Ginhadian han Dios ngan masabtan kon mationan-o kapresyoso an halad-lukat  ni Kristo Jesus. Gin-giyahan ni Pablo an iya mga igkasi-tumuroo ngadto ha Surok han tinuod nga kagawasan. Pananglitan, ha iya ikaduha nga surat para ha mga Kristiano ha Corinto, hiya klaro nga nagsiring: “Hi Jehova an Espiritu, ngan kon hain an espiritu ni Jehova, may-ada kagawasan.”​—2 Cor. 3:17.

3, 4. (a) Ano an ginhisgotan ni Pablo ha mga bersikulo antes an 2 Corinto 3:17? (b) Ano an sadang naton buhaton basi magkaada kagawasan nga tikang kan Jehova?

³ Ha nahiuna nga mga bersikulo hini nga surat ha mga taga-Corinto, hi Pablo naghisgot han himaya ni Moises han linusad hiya tikang ha Bukid Sinai katapos niya umatubang ha presensya han usa nga anghel ni Jehova. Han nakita han mga tawo hi Moises, nahadlok gud hira, salit gintabonan ni Moises an iya nawong. (Eks. 34:29, 30, 33; 2 Cor. 3:7, 13) Hi Pablo nagsaysay: “Pero kon nagbabag-o an usa nga tawo basi magsingba kan Jehova, nakukuha an tabon.” (2 Cor. 3:16) Ano an iginpapasabot ni Pablo?

⁴ Hinbaroan naton ha nahiuna nga artikulo nga hi Jehova, an Maglalarang han ngatanan nga butang, amo gud la an Persona nga may-ada bug-os ngan waray limitasyon nga kagawasan. Salit husto an pagsiring nga ha presensya ni Jehova ngan “kon hain an espiritu ni Jehova,” may-ada kagawasan. Kondi, basi magkaada ngan magpahimulos hito nga kagawasan, sadang kita “magsingba kan Jehova,” karuyag sidngon, kinahanglan kita magkaada duok nga relasyon ha iya. Ginhunahuna han mga Israelita ha kamingawan an mga ginbuhat ni Jehova uyon ha tawhanon la nga panhunahuna, diri uyon ha panhunahuna ni Jehova. Sugad hin may tabon ngan matig-a an ira kasingkasing ngan hunahuna. Karuyag la nira gamiton an ira kagawasan tikang ha pagin uripon ha Ehipto basi tagbawon an ira pisikal o unudnon nga mga hingyap.​—Heb. 3:8-10.

5. (a) Ano nga klase hin kagawasan an iginhahatag han espiritu ni Jehova? (b) Kay ano nga masisiring naton nga an literal nga pagkauripon diri nagwawara han kagawasan nga iginhahatag ni Jehova? (c) Ano nga mga pakiana an kinahanglan naton batunon?

⁵ Kondi an kagawasan nga iginhahatag han espiritu ni Jehova mas labaw kay ha kagawasan tikang ha literal nga pagkauripon. Ito nga espiritu naghahatag hin kagawasan nga diri gud maihahatag han tawo​—an kagawasan tikang ha pagkauripon ha sala ngan kamatayon, pati na ha buwa nga pagsingba ngan ha mga kustomre hito. (Roma 6:23; 8:2) Makalilipay gud ito nga kagawasan! Mahimo maeksperyensyahan han usa nga indibiduwal an mga kapulsanan han sugad nga kagawasan bisan kon priso o uripon hiya. (Gen. 39:20-23) Naeksperyensyahan ini han aton kabugtoan nga hira Nancy Yuen ngan Harold King, nga pariho napriso hin damu ka tuig tungod han ira pagtoo. Makikita ngan mababatian mo hira nga nagsasaysay han ira mga eksperyensya ha JW Broadcasting. (Kitaa ha MGA INTERBYU AT KARANASAN > PAGBABATA NG PAGSUBOK.) Kondi kinahanglan naton batunon ini nga mga pakiana: Paonan-o naton maipapakita nga ginpapabilhan naton an aton kagawasan? Ngan ano an mahimo naton buhaton basi magamit hin maaramon ini nga kagawasan?

6. Paonan-o iginpakita han mga Israelita an kawaray-apresasyon ha kagawasan nga iginhatag ha ira ni Jehova?

⁶ Kon nasasabtan naton an tinuod nga bili han usa nga marahalon nga regalo, napapagios kita nga ipakita an aton pagpasalamat ha naghatag. Waray apresyara han mga Israelita an kagawasan nga iginhatag ha ira ni Jehova han gintalwas hira tikang ha pagkauripon ha Ehipto. Paglabay hin pipira ka bulan katapos hira talwason, nagtikang hira paghingyap han mga pagkaon ngan irimnon nga ira napahimulosan hadto ha Ehipto ngan nagreklamo hira ha mga tagana ni Jehova. Karuyag pa ngani nira bumalik ha Ehipto! Hunahunaa la, mas importante ha ira an ‘isda, pipino, sandiya, puerro, sibuyas, ngan lasona’ kay ha kagawasan nga iginhatag ha ira ni Jehova basi makagsingba hira ha iya. Salit diri urusahon nga nasina hinduro hi Jehova ha iya katawohan! (Num. 11:5, 6, 10; 14:3, 4) Sadang gud ini magin leksyon ha aton!

7. Paonan-o gumios hi Pablo uyon ha iya sagdon nga mababasa ha 2 Corinto 6:1, ngan paonan-o liwat naton ito mahihimo?

 ⁷ Gin-aghat ni apostol Pablo an ngatanan nga Kristiano nga magin mapasalamaton ha kagawasan nga mahigugmaon nga iginhatag ni Jehova ha aton pinaagi han iya Anak, hi Jesu-Kristo. (Basaha an 2 Corinto 6:1.) Hinumdumi an kasakit ngan kakonsensya ni Pablo tungod kay inabat niya nga uripon hiya han sala ngan kamatayon. Bisan pa hito, hiya nagsiring: “Nagpapasalamat ako ha Dios pinaagi kan Jesu-Kristo nga aton Ginoo!” Kay ano? Hiya nagsaysay ha iya mga igkasi-Kristiano: “Kay an balaud hito nga espiritu nga naghahatag hin kinabuhi ha kahiusa ni Kristo Jesus nagtatalwas ha imo tikang ha balaud han sala ngan kamatayon.” (Roma 7:24, 25; 8:2) Pariho kan Pablo, sadang liwat kita magin mapasalamaton nga gintagan kita ni Jehova hin kagawasan tikang ha pagkauripon ha sala ngan ha kamatayon. Pinaagi han lukat, makakag-alagad kita ha Dios nga may limpyo nga konsensya ngan magkakaada kita tinuod nga kalipay ha pagbuhat hito.​—Sal. 40:8.

8, 9. (a) Ano an iginpahamangno ni apostol Pedro mahitungod ha paggamit han aton kagawasan? (b) Ano nga mga peligro an gin-aatubang naton yana?

⁸ Kondi labot la ha pagpahayag hin pagpasalamat, sadang liwat kita magin mabinantayon nga diri naton gamiton ha sayop nga paagi an aton presyoso nga kagawasan. Hi apostol Pedro nagpahamangno may kalabotan ha paggamit han aton kagawasan sugad nga pasangil ha pagtagbaw han aton unudnon nga mga hingyap. (Basaha an 1 Pedro 2:16.) Diri ba ito nga pahamangno nagpapahinumdom ha aton han nahitabo ha mga Israelita ha kamingawan? Yana, kinahanglan liwat naton an sugad nga pahamangno, bangin mas labi pa ngani nga ginkikinahanglan naton ito. Hi Satanas ngan an iya kalibotan nagtatanyag hin mas nakakadani nga mapipilian may kalabotan ha pamado ngan pag-ayos, pagkaon ngan irimnon, pagpahalibway ngan kaliawan, ngan ha damu pa nga butang. An tuso nga mga negosyante agsob nga nagamit ha ira mga adbertisment hin kilala nga mga tawo nga malimbungon nga nag-aaghat ha aton nga magkaada damu nga butang nga diri man naton kinahanglan. Masayon gud la mabiktima hini nga mga panlimbong ngan gamiton ha sayop nga paagi an aton kagawasan!

⁹ An sagdon ni Pedro aplikado liwat ha mas importante nga bahin han kinabuhi, sugad han edukasyon, trabaho, o karera nga ginpipili han usa. Pananglitan, an mga batan-on nga estudyante yana napipresyur nga maniguro basi makaeskwela ha pinakamag-opay nga unibersidad. Ginpapatoo hira nga kon may hitaas hira nga edukasyon, magkakaada hira maopay ngan daku an sweldo nga trabaho, ngan agsob nga may iginpapakita ha ira nga mga impormasyon nga nagsusumat nga mas daku an kità hadton naggradwar hito nga mga unibersidad kay hadton hayskul la an natapos. Tungod kay kinahanglan maghimo an mga batan-on hin mga desisyon nga mahimo makaapekto ha ira bug-os nga kinabuhi, bangin magin makaruruyag ha ira ini nga mga butang. Ano an sadang hinumdoman han mga batan-on ngan han ira mga kag-anak?

10. Ano an sadang naton hinumdoman kon ginagamit naton an aton kagawasan ha paghimo hin personal nga mga desisyon?

¹⁰ Bangin abaton han pipira nga indibiduwal nga tungod kay personal an pagdesisyon may kalabotan hini nga mga butang, sadang hira magkaada kagawasan ha pagpili kon ano an ira karuyag basta igintutugot ito han ira konsensya. Bangin nahuhunahuna nira an ginsiring ni Pablo ha mga Kristiano ha Corinto mahitungod ha pagkaon: “Kay ano nga an akon kagawasan huhukman han konsensya han iba nga tawo?” (1 Cor. 10:29) Bisan kon may kagawasan kita ha paghimo hin personal nga desisyon may kalabotan ha aton edukasyon ngan karera, kinahanglan naton hinumdoman nga relatibo la an aton kagawasan ngan may mga epekto an aton mga desisyon. Tungod hito, patiuna nga ginyakan ni Pablo ini nga mga pulong: “An ngatanan nga butang igintutugot han balaud, pero diri ngatanan nga butang mapulsanon. An ngatanan nga butang igintutugot han balaud, pero diri ngatanan nga butang makaparig-on.” (1 Cor. 10:23) Nabulig gud ini ha aton nga masabtan nga bisan kon may kagawasan kita ha  paghimo hin personal nga mga desisyon ha ngatanan nga bahin han aton kinabuhi, may mas importante nga mga butang nga sadang naton ikonsiderar kay han aton kalugaringon nga mga karuyag.

11. Ano an katuyoan nga gintagan kita ni Jehova hin kagawasan?

¹¹ Han nagpahamangno hi Pedro may kalabotan ha sayop nga paggamit han kagawasan, ginhisgotan liwat niya an katuyoan han kagawasan. Gin-aghat kita niya nga gamiton an aton kagawasan “sugad nga mga uripon han Dios.” Salit an tinuod nga katuyoan nga gintagan kita ni Jehova hin kagawasan tikang ha balaud han sala ngan kamatayon pinaagi kan Jesus amo nga basi makagkinabuhi kita “sugad nga mga uripon han Dios.”

12. Ano nga susbaranan an iginpakita ha aton ni Noe ngan han iya pamilya?

¹² An pinakamaopay nga paagi basi malikyan naton an sayop nga paggamit han aton kagawasan ngan diri kita magin uripon utro ha kalibotanon nga mga ambisyon ngan hingyap amo an pagpokus ha espirituwal nga mga buruhaton. (Gal. 5:16) Pananglitan, hunahunaa an patriarka nga hi Noe ngan an iya pamilya. Nagkinabuhi hira ha madarahog ngan imoral nga kalibotan. Kondi, waray hira magpaimpluwensya ha mga hingyap ngan mga buruhaton han mga tawo nga nakapalibot ha ira. Paonan-o nira ito nahimo? Ginpili nira nga magin sagipo ha ngatanan nga buruhaton nga igintoka ha ira ni Jehova​—pagtukod han arka, pagtirok hin pagkaon para ha ira kalugaringon ngan ha mga hayop, ngan pagpahamangno ha iba. “Ginbuhat ni Noe; sugad ha ngatanan nga kanan Dios ginsogo ha iya, iya ginbuhat.” (Gen. 6:22) Ano an resulta? Natalwas hi Noe ngan an iya pamilya han nabungkag ito nga kalibotan.​—Heb. 11:7.

13. Ano nga sugo an nakarawat ni Jesus nga iya liwat iginsugo ha iya mga sumurunod?

¹³ Ano an iginpapabuhat ha aton ni Jehova yana? Sugad nga mga disipulo ni Jesus, pamilyar kita han sugo nga iginhatag ha aton han Dios. (Basaha an Lucas 4:18, 19.) Yana, kadam-an han mga tawo an padayon nga ginbubuta han dios hini nga sistema ngan uripon hira han buwa nga relihiyon, materyal nga mga butang, ngan politikal nga sistema. (2 Cor. 4:4) Pribilehiyo naton nga subaron an ehemplo ni Jesus ha pagbulig ha mga tawo nga makilala ngan magsingba kan Jehova, an Dios nga naghahatag hin kagawasan. (Mat. 28:19, 20) Diri masayon an  pagbuhat hito, ngan damu an mga ayat. Ha pipira nga lugar, an mga tawo diri na interesado nga mahibaro mahitungod ha Dios, an iba nasisina pa ngani ha aton pagsangyaw. Sadang hunahunaon han kada tagsa ha aton ini nga pakiana, ‘Mahimo ko ba gamiton an akon kagawasan basi mas masuportaran an mga buruhaton han Ginhadian?’

14, 15. May kalabotan ha pagsangyaw nga buruhaton, ano an ginbubuhat han katawohan ni Jehova? (Kitaa an retrato ha tinikangan hini nga artikulo.)

¹⁴ Makapadasig hibaroan nga damu an natoo nga hirani na gud an kataposan hini nga sistema salit nagdesisyon hira nga pasimplihon an ira kinabuhi basi sumulod ha bug-os-panahon nga pag-alagad. (1 Cor. 9:19, 23) An pipira ha ira nag-aalagad ha ira lugar; an iba nabalhin ha mga lugar diin mas daku an panginahanglan. Iginpapakita han mga rekord nga han naglabay nga lima ka tuig, sobra 250,000 an nagregular payunir, ngan yana sobra 1,100,000 na an regular payunir ha bug-os nga kalibotan. Makalilipay gud ito nga resulta han maaramon nga paggamit han kagawasan basi mag-alagad kan Jehova!​—Sal. 110:3.

¹⁵ Ano an nakabulig hini nga kabugtoan nga gamiton hin maaramon an ira kagawasan? Hunahunaa hira John ngan Judith, nga nag-alagad ha damu nga nasud ha naglabay nga 30 ka tuig. Nahinunumdoman nira nga han nagtikang an Pioneer Service School han 1977, gindasig an mga estudyante nga bumalhin ngan mag-alagad ha lugar nga mas daku an panginahanglan. Basi magpabilin nga nakapokus hini nga tumong, hi John nagsiring nga damu ka beses nga nagbag-o hiya hin trabaho basi matipigan an simple nga pagkinabuhi. Ha urhi, han binalhin hira ha iba nga nasud, nakita nira nga an pag-ampo kan Jehova ngan an pagsarig ha iya nakabulig ha ira nga malamposan an mga ulang sugad han pag-aram hin bag-o nga linggwahe, pagpahiuyon ha bag-o nga kultura, ngan pag-ilob han magkuri nga klima. Ano an nagin epekto ha ira hiton damu ka tuig nga pag-alagad? Hi John nagsiring: “Inabat ko nga bug-os ako nga nakigbahin ha pinakamaopay nga buruhaton nga akon nahibaroan o naeksperyensyahan.” Inabat niya nga gin-ataman hiya ni Jehova pariho han ginbubuhat han usa nga mahigugmaon nga tatay, salit nagin mas totoo hi Jehova ha iya. Hiya dugang nga nagsiring: “Yana mas nasasabtan ko na an karuyag sidngon han Santiago 4:8: ‘Magin duok kamo ha Dios, ngan magigin duok hiya ha iyo.’ Kombinsido ako nga nakita ko na an akon ginbibiling, an makapatagbaw nga katuyoan han kinabuhi.”

16. Paonan-o ginagamit hin maaramon han yinukot nga kabugtoan an ira kagawasan bisan kon limitado la an ira nahihimo tungod han ira kahimtang?

¹⁶ An pipira, pariho kanda John ngan Judith, nakakagpayunir hin hilawig nga panahon. An iba, tungod han pipira nga kahimtang, nakakagpayunir hin halipot la nga panahon. Bisan pa hito, ginsasalingabot han damu an oportunidad nga magboluntaryo ha teokratiko nga mga proyekto han pagpanukod ha bug-os nga kalibotan. Pananglitan, han gintutukod an headquarters ha Warwick, New York, mga 27,000 nga kabugtoan an nagboluntaryo​—ha sulod hin duha ka semana, pipira ka bulan, usa ka tuig, o mas maiha pa. Damu ha ira an naghimo hin mga pagsakripisyo basi makag-alagad didto. Mag-opay gud hira nga susbaranan ha paggamit han ira kagawasan basi dayawon ngan pasidunggan hi Jehova, an Dios nga naghahatag hin kagawasan!

17. Ano nga makalilipay nga tidaraon an aton mapapahimulosan kon maaramon nga gagamiton naton yana an kagawasan nga iginhatag ha aton han Dios?

¹⁷ Mapasalamaton kita nga nakilala naton hi Jehova ngan nakakapahimulos han kagawasan nga resulta han tinuod nga pagsingba. Hinaot ipakita naton pinaagi ha aton mga desisyon nga ginpapabilhan naton ito nga kagawasan. Imbes nga karagan o gamiton ha sayop nga paagi ito nga kagawasan, gamiton naton ito ngan an mga oportunidad nga iginhahatag hito basi mag-alagad kan Jehova tubtob ha aton mahihimo. Kon bubuhaton naton ito, makakalaom kita nga mapapahimulosan naton an mga bendisyon nga iginsaad ni Jehova kon matuman na ini nga tagna: ‘An mga butang nga hinimo han Dios matatalwas ha pagin uripon han pagkadunot ngan magkakaada han mahimayaon nga kagawasan han iya mga anak.’​—Roma 8:21.