HAN naglabay nga tuig, yinukot nga kalalakin-an an ginpili sugad nga tigurang ngan ministeryal nga surugoon ha mga Saksi ni Jehova ha bug-os nga kalibotan. Kon usa ka hiton hinigugma nga kabugtoan, sigurado nga nalilipay ka han imo bag-o nga pribilehiyo.

Kondi, bangin may ginkakabarak-an ka liwat. Hi Jason, usa nga batan-on nga tigurang, nagsiring: “Han ginpili ako [nga magin tigurang], nabaraka gud ako ha akon bag-o nga mga responsabilidad.” Han nakakarawat hira Moises ngan Jeremias hin bag-o nga toka tikang kan Jehova, inabat nira nga diri hira kwalipikado. (Eks. 4:10; Jer. 1:6) Kon ito liwat an imo inaabat, paonan-o mo ito malalamposan ngan paonan-o ka padayon nga mag-uuswag? Hunahunaa an ehemplo han Kristiano nga disipulo nga hi Timoteo.—Buh. 16:1-3.

Hi Timoteo posible nga hirani na mag-20 anyos o sobra 20 anyos na han igin-upod hiya ni apostol Pablo ha pagmisyonero. Ha tinikangan, tungod kay batan-on pa, posible nga kulang pa hin kompyansa ha kalugaringon hi Timoteo ngan bangin nag-aalang ha pagbuhat han iya bag-o nga toka. (1 Tim. 4:11, 12; 2 Tim. 1:1, 2, 7) Kondi paglabay hin napulo ka tuig, nakasiring hi Pablo ha kongregasyon ha Filipos: “Naglalaom ako nga ha diri mag-iiha, pakakadaon ha iyo han Ginoo nga hi Jesus hi Timoteo, . . . kay waray ako iba nga masusugo ngada ha iyo nga pariho ha iya an disposisyon.”—Fil. 2:19, 20.

Kay ano nga nagin maopay gud nga tigurang hi Timoteo? Tigamni an unom nga leksyon nga imo mahibabaroan tikang ha iya ehemplo.

1. Hinigugma niya an mga tawo. Hi Pablo nagsiring ha kabugtoan ha Filipos: “[Hi Timoteo] sinsero nga magmamangno ha iyo.” (Fil. 2:20) Oo, hinigugma ni Timoteo an mga tawo. Interesado gud hiya ha ira espirituwal nga kaopayan, ngan andam hiya magsakripisyo para ha ira.

Likyi nga magin pariho ha usa nga drayber hin bus nga mas karuyag la makaabot ha terminal ha husto nga oras imbes nga magpasakay hin pasahero. Hi William, usa nga gintatahod nga tigurang ha sulod hin sobra 20 ka tuig na, may sagdon ha bag-o nga pinili nga kalalakin-an: “Higugmaa an kabugtoan. Tagi hin mas daku nga atensyon an ira panginahanglan imbes nga magpokus la ha pagdumara ha mga butang han kongregasyon.”

2. Gin-una niya an espirituwal nga mga butang. Ha pagkompara han ehemplo ni Timoteo ha iba, hi Pablo nagsiring: “An iba nagtitinguha han kalugaringon la nira nga mga kaopayan, diri han mga kaopayan ni Kristo Jesus.” (Fil. 2:21) Ginhimo ni Pablo an iya surat han nakadto hiya ha Roma. Naobserbaran niya nga an kabugtoan didto sagipo gud ha ira personal la nga mga buruhaton. Diri hira bug-os nga nakapokus ha espirituwal. Pero diri sugad hito hi Timoteo! Han nagkaada mga higayon ha pagpasamwak han maopay nga sumat, iginpakita niya an disposisyon nga pariho han kan Isaias, nga nagsiring: “Iini ako; pakadto-a ako.”—Isa. 6:8.

Ano an mahimo mo buhaton basi magin timbang ha imo espirituwal ngan personal nga mga obligasyon? Siyahan, paghimo hin mga prayoridad. Hi Pablo nag-aghat: ‘Siguroha an mas importante nga mga butang.’ (Fil. 1:10) Iprayoridad an mga butang nga importante ha Dios. Ikaduha, pasimpleha an imo pagkinabuhi. Likyi an diri importante nga mga buruhaton nga nakakaubos hin panahon ngan kusog. Gin-aghat ni Pablo hi Timoteo: “Paglikay ha mga hingyap han pagkabatan-on, lugod talinguhaa an pagkamatadong, pagtoo, gugma, kamurayawan.”—2 Tim. 2:22.

 3. Maduruto hiya ha sagrado nga pag-alagad. Hi Pablo nagpahinumdom ha mga taga-Filipos: “Maaram kamo han ebidensya nga iginpakita [ni Timoteo] mahitungod ha iya kalugaringon, nga pariho hin anak upod han iya amay, nagpauripon hiya kaupod ko ha pagpauswag han maopay nga sumat.” (Fil. 2:22) Diri hubya hi Timoteo. Maduruto nga nagbuhat hiya kaupod ni Pablo, ngan nagparig-on ini han ira gugma ha kada tagsa.

Damu an buruhaton ha organisasyon han Dios yana. Ito nga mga buruhaton makapatagbaw gud ngan makakabulig ito nga magin mas duok ka ha imo kabugtoan. Salit himoa nga tumong nga pirme “damu an ginbubuhat ha buruhaton han Ginoo.”—1 Cor. 15:58.

4. Igin-aplikar niya an iya mga hinbaroan. Hi Pablo nagsurat kan Timoteo: “Ginsunod mo hin maopay an akon igintutdo, an akon pagkinabuhi, an akon katuyoan, an akon pagtoo, an akon pagkapasensyoso, an akon gugma, an akon pagpailob.” (2 Tim. 3:10) Tungod kay igin-aplikar ni Timoteo an iya mga hinbaroan, nagin kwalipikado hiya para ha mas daku nga responsabilidad.—1 Cor. 4:17.

May-ada ba mas eksperyensyado nga bugto nga nagbabansay ha imo ha espirituwal? Kon waray, kay ano nga diri mamiling? Hi Tom, usa nga tigurang ha sulod hin damu ka tuig na, nagsiring: “Usa nga eksperyensyado nga tigurang an nagpakita ha akon hin personal nga interes ngan nagbansay ha akon hin maopay. Nangangaro ako pirme ha iya hin sagdon ngan igin-aaplikar ito. Tungod hini madagmit ako nga nagkaada kompyansa.”

5. Padayon niya nga ginbansay an iya kalugaringon. Gin-aghat ni Pablo hi Timoteo: “Bansaya an imo kalugaringon nga an imo tumong amo an pagpauswag han debosyon ha Dios.” (1 Tim. 4:7) An usa nga atleta bangin may-ada coach nga nagbabansay ha iya, pero kinahanglan liwat niya bansayon an iya kalugaringon. Ginsidngan ni Pablo hi Timoteo: “Padayon nga buhata an imo gimaopayi ha pagbasa ha publiko, ha pagsagdon, ngan ha pagtutdo. . . . Pamalandonga ini nga mga butang, ngan tagi ini hin bug-os nga atensyon, basi makita gud han mga tawo an imo pag-uswag.”—1 Tim. 4:13-15.

Kinahanglan mo liwat padayon nga pauswagon an imo mga abilidad. Ayaw kakontento ha kon ano la an imo hinbabaroan o ayaw tuguti nga an imo pagsabot ha mga kahikayan han kongregasyon diri na uyon ha pinakabag-o nga giya han organisasyon. Likyi liwat an pagkaada sobra nga kompyansa ha kalugaringon—bangin ha paghunahuna nga tungod kay eksperyensyado ka na kaya mo na sulbaron an anoman nga butang bisan kon diri na magsaliksik. Subara hi Timoteo, “pirme tagi hin atensyon an imo kalugaringon ngan an imo pagtutdo.”—1 Tim. 4:16.

6. Sinarig hiya ha espiritu ni Jehova. May kalabotan han ministeryo ni Timoteo, hi Pablo nagpahinumdom ha iya: “Bantayi an maopay nga igintapod ha imo pinaagi han baraan nga espiritu nga aadi ha aton.” (2 Tim. 1:14) Basi mapanalipdan ni Timoteo an iya ministeryo, kinahanglan niya sumarig ha espiritu han Dios.

Hi Donald, usa nga tigurang ha sulod hin damu ka dekada na, nagsiring: “Sadang pabilhan han pinili nga kalalakin-an an ira relasyon ha Dios. Adton mga nagbubuhat hito magigin mas marig-on. Kon mag-aampo hira para han espiritu han Dios ngan kukultibaron an bunga hito, magigin bendisyon gud hira ha ira mga kabugtoan.”—Sal. 84:7; 1 Ped. 4:11.

Makapadasig gud makita nga damu nga bag-o nga pinili nga kalalakin-an, pariho ha imo, an nag-uuswag ha espirituwal. Hi Jason nga gin-unabi kanina, nagsiring: “Durante han mga panahon nga nag-aalagad ako sugad nga tigurang, damu an akon hinbaroan ngan mas nagkaada ako kompyansa. Yana nalilipay gud ako ha akon toka ngan ginhuhunahuna ko ito sugad nga maopay gud nga pribilehiyo!”

Padayon ka ba nga mangangalimbasog nga mag-uswag ha espirituwal? Himoa nga tumong nga mahibaro tikang kan Timoteo. Kon bubuhaton mo ito, magigin bendisyon ka liwat ha katawohan han Dios.