1. Ano nga pagparig-on an iginhatag ni Jehova katapos gud la han pagrebelde ha Eden?

TIKANG pa han nakasala ngan nagin diri perpekto an mga tawo, iginpapakita na ni Jehova nga usa hiya nga Dios nga naghahatag hin pagparig-on. Katapos gud la han pagrebelde ha Eden, gintagan niya hin rason an magigin mga tulin ni Adan nga magin marig-on. May-ada pa paglaom an tawhanon nga pamilya. Hi Jehova naghatag hin tagna nga mababasa ha Genesis 3:15, nga kon masasabtan han mga tawo, maghahatag ito ha ira hin paglaom nga maabot an panahon nga bubungkagon “an orihinal nga halas,” hi Satanas nga Yawa, ngan an ngatanan niya nga magraot nga buhat.—Pah. 12:9; 1 Juan 3:8.

2. Paonan-o ginparig-on ni Jehova hi Noe?

² An surugoon ni Jehova nga hi Noe nagkinabuhi ha diri diosnon nga kalibotan diin an mga membro la han iya pamilya an nagsisingba  kan Jehova. Komon an kamadarahog ngan seksuwal nga imoralidad hito nga panahon, ngan mahimo unta ito makapaluya kan Noe. (Gen. 6:4, 5, 11; Jud. 6) Kondi may iginsumat ha iya hi Jehova nga naghatag ha iya hin kaisog nga iya ginkikinahanglan basi makapadayon ha ‘paglakat upod han Dios.’ (Gen. 6:9) Ginsidngan ni Jehova hi Noe nga Iya bubungkagon iton maraot nga kalibotan ngan iginsaysay ha iya kon ano an kinahanglan niya buhaton basi matalwas an iya pamilya. (Gen. 6:13-18) Iginpakita ni Jehova kan Noe nga usa hiya nga Dios nga naghahatag hin pagparig-on.

3. Ano nga pagparig-on an nakarawat ni Josue? (Kitaa an retrato ha tinikangan hini nga artikulo.)

³ Ha urhi, nagkaada hi Josue daku nga responsabilidad nga pangunahan an katawohan han Dios ngadto ha Tuna nga Iginsaad. Nag-uupod ini ha pagsakop ha mga nasud nga may-ada magkusog nga kasundalohan nga naukoy hito nga teritoryo. May-ada gud rason hi Josue nga mahadlok. Tungod kay maaram hito hi Jehova, ginsugo niya hi Moises nga parig-unon hi Josue. An Dios nagsiring: “Sogo-a hi Josue, ngan padasiga hiya, ngan parig-ona hiya; kay hiya matabok ha atubangan hini nga katawohan, ngan hiya magaaghat ha ira ha pagpanonod han tuna nga imo makikita.” (Deut. 3:28) Antes tikangan ni Josue an iya toka, ginparig-on hiya ni Jehova: “Waray ko ba ikaw sogoa? Magpakabaskog ka ngan magmadasigon: ayaw patarhug ngan ayaw man liwat kaholop: kay hi Jehova nga imo Dios maupud ha imo bisan ngain ka kadto.” (Jos. 1:1, 9) Makaparig-on gud ito nga mga pulong!

4, 5. (a) Ano nga pagparig-on an iginhatag ni Jehova ha iya katawohan ha kadaan nga panahon? (b) Paonan-o ginparig-on ni Jehova an iya Anak?

⁴ Hi Jehova naghahatag hin pagparig-on ha iya katawohan, diri la ha tagsa nga indibiduwal kondi sugad liwat nga grupo. Ha usa nga tagna nga sigurado nga maghahatag hin pagliaw ha mga Judio nga bihag ha Babilonya, hi Jehova nagsiring: “Diri ka mahadluk, kay ako upud ha imo; ayaw kaholop, kay ako an imo Dios; ako magpaparig-on ha imo; oo, ako mabulig ha imo; oo akon ka aagangagangon pinaagi han too nga kamot han akon pagkamatadong.” (Isa. 41:10) Ito liwat an pasarig ni Jehova ha siyahan-siglo nga mga Kristiano, pati na ha iya katawohan yana.—Basaha an 2 Corinto 1:3, 4.

⁵ Hi Jesus mismo nakakarawat hin pagparig-on tikang ha iya Amay. Han ginbawtismohan hi Jesus, nakabati hiya hin tingog tikang ha langit nga nasiring: “Ini an akon Anak nga hinigugma, nga akon nalilipayan.” (Mat. 3:17) Ito nga mga pulong sigurado nga nagparig-on kan Jesus durante han iya pagministeryo dinhi ha tuna!

6. Paonan-o an parabola mahitungod han mga talanton naghahatag ha aton hin pagparig-on?

⁶ Ginsubad ni Jesus an ehemplo han iya Amay. An parabola mahitungod han mga talanton, nga ginhisgotan ha tagna ni Jesus may kalabotan han ikatarapos hini nga sistema, nag-aaghat ha usa nga magin matinumanon. Ginpasidunggan han agaron an tagsa nga matinumanon nga uripon pinaagi ha pagsiring: “Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang. Malipay ka upod han imo agaron.” (Mat. 25:21, 23) Ini nga mga pulong nag-aaghat gud ha aton nga mag-alagad nga matinumanon kan Jehova!

7. Paonan-o ginparig-on ni Jesus an iya mga apostol, labi na hi Pedro?

⁷ An mga apostol ni Jesus agsob nga nagdidiskusyon kon hin-o an pinakalabaw ha ira, kondi nagin mapailubon hi Jesus ha ira ngan gin-aghat hira nga magin mapainubsanon ngan magserbi ha iba imbes nga magin mga agaron. (Luc. 22:24-26) Damu ka beses nga napasubo ni Pedro hi Jesus. (Mat. 16:21-23; 26:31-35, 75) Imbes nga  isalikway hi Pedro, ginparig-on hiya ni Jesus ngan ginsugo pa ngani nga parig-unon an iya kabugtoan.—Juan 21:16.

8. Paonan-o ginparig-on ni Hesekia an mga punoan han kasundalohan ngan an mga tawo ha Juda?

⁸ Antes pa man an Anak ni Jehova kumanhi ha tuna ngan nagin susbaranan ha pagparig-on ha iba, an matinumanon nga mga surugoon ni Jehova maaram nga kinahanglan nira parig-unon an iba. Han gintarhog han mga Asiryahanon an mga tawo ha Juda, gintirok ni Hesekia an mga punoan han kasundalohan ngan an mga tawo basi parig-unon hira. “Ngan an mga tawo sinmarig [o, naparig-on] dida han mga polong ni Hesekia.”—Basaha an 2 Kronikas 32:6-8.

9. Ano an igintututdo ha aton han libro han Job mahitungod ha paghatag hin pagparig-on?

⁹ Bisan kon nanginginahanglan mismo hi Job hin pagliaw, gintutdoan niya an iya tulo nga diri tinuod nga mga paraliaw hin leksyon kon paonan-o maghahatag hin pagparig-on. Ginsidngan niya hira nga kon hiya an aada ha ira kahimtang, hiya ‘magpaparig-on unta ha ira pinaagi han iya baba, ngan an paglipay han iya mga im-im makakaiban han ira kabidoan.’ (Job 16:1-5) Ha urhi, nakakarawat hi Job hin pagparig-on tikang kan Elihu ngan tikang kan Jehova mismo.—Job 33:24, 25; 36:1, 11; 42:7, 10.

10, 11. (a) Kay ano nga nagkikinahanglan hin pagparig-on an anak nga babaye ni Jepte? (b) Hin-o yana an takos liwat parig-unon?

¹⁰ An usa pa nga ehemplo ha kadaan nga panahon nga nanginginahanglan hin pagparig-on amo an anak nga babaye ni Jepte. Antes makig-away ha mga Amonitanhon, nagsaad an hukom nga hi Jepte nga kon bubuligan hiya ni Jehova nga magdaog, an siyahan nga tawo nga matapo ha iya katapos han iya pakig-away ihahalad niya basi mag-alagad kan Jehova didto ha santuaryo. Ngan nahitabo nga an iya anak nga babaye, an iya nag-uusahan la nga anak, an siyahan nga tumapo ha iya basi iselebrar an iya kadaogan. Nasubo hinduro hi Jepte. Kondi gintuman niya an iya saad ngan iginpadara an iya birhen nga anak ngadto ha Shilo basi mag-alagad ha tabernakulo ha bug-os niya nga kinabuhi.—Huk. 11:30-35.

¹¹ Mationan-o man ito kakuri kan Jepte, bangin mas makuri gud ito para ha iya anak, nga kinaburut-on nga sumunod ha desisyon han iya tatay. (Huk. 11:36, 37) Iya iginsakripisyo an higayon nga mag-asawa, magkaada mga anak, ngan matipigan an ngaran han iya pamilya ngan panurundon. Salit, kon may-ada man usa nga nagkikinahanglan hin pagliaw ngan pagparig-on, ito an anak ni Jepte. An rekord ha Biblia nasiring: “Ini amo an batasan ha Israel, nga an mga anak nga kababayin-an ha Israel nakadto ha kada tuig pagsaurug han anak nga babaye ni Jepte an Galaadnon ha upat ka adlaw ha usa ka tuig.” (Huk. 11:39, 40) Diri ba takos liwat kumendasyonan ngan parig-unon an solo nga mga Kristiano nga ginagamit an ira pagin solo basi magkaada mas daku nga panahon ha “mga butang han Ginoo”?—1 Cor. 7:32-35.

12, 13. Paonan-o ni Pedro ‘ginparig-on an iya kabugtoan’?

¹² Ha gab-i antes han kamatayon ni Jesus, ginsidngan niya hi apostol Pedro: “Simon, Simon, pamati! nagsiring hi Satanas nga karuyag niya ag-agon kamo sugad hin trigo. Pero nangamuyo ako para ha imo nga diri magluya an imo pagtoo, ngan katapos mo magbasol, parig-ona an imo kabugtoan.”—Luc. 22:31, 32.

¹³ Hi Pedro usa nga harigi han Kristiano nga kongregasyon han siyahan nga siglo. (Gal. 2:9) Gindasig niya an iya kabugtoan pinaagi han iya pagin maisugon han Pentekostes ngan ha sumunod pa nga mga panahon. Ha ikatarapos han iya damu ka tuig nga pagministeryo, nagsurat hiya  ha iya mga igkasi-Kristiano. Kay ano? Hiya nagsiring: “Nagsurat ako ha iyo hin halipot basi parig-unon kamo ngan tagan hin sinsero nga pamatuod nga amo ini an totoo nga diri-matupngan nga pagkabuotan han Dios. Magpabilin kamo nga marig-on dida hito.” (1 Ped. 5:12) An giniyahan nga mga surat ni Pedro nagin surok han pagparig-on ha mga Kristiano tikang pa hadto tubtob yana. Ginkikinahanglan gud naton ini nga pagparig-on samtang ginhuhulat naton an katumanan han mga saad ni Jehova!—2 Ped. 3:13.

14, 15. Paonan-o an giniyahan nga mga sinurat ni apostol Juan nagin surok han pagparig-on ha mga Kristiano tikang pa hadto tubtob yana?

¹⁴ Hi apostol Juan usa liwat nga harigi han Kristiano nga kongregasyon han siyahan nga siglo. An iya makapainteres gud nga Ebanghelyo mahitungod ha ministeryo ni Jesus nagin surok han pagparig-on ha mga Kristiano tikang pa han siyahan nga siglo tubtob ha aton panahon. Ha iya la Ebanghelyo mababasa an ginsiring ni Jesus nga an gugma amo an pangirilal-an han iya tinuod nga mga disipulo.—Basaha an Juan 13:34, 35.

¹⁵ An tulo nga surat ni Juan nagsusulod liwat hin presyoso nga mga kamatuoran. Kon nanluluya kita tungod han aton mga sala, diri ba kita naliliaw kon nababasa naton nga ‘an dugo ni Jesus naglilimpyo ha aton ha ngatanan nga sala’? (1 Juan 1:7) Kon padayon kita nga ginhuhukman han aton kasingkasing, diri ba kita nababantad ngan nakakatangis pa ngani tungod ha pagpasalamat kon nababasa naton nga “an Dios mas daku kay ha aton kasingkasing”? (1 Juan 3:20) Hi Juan la an nagsurat nga “an Dios gugma.” (1 Juan 4:8, 16) An iya ikaduha ngan ikatulo nga surat naghahatag hin kumendasyon ha mga Kristiano nga padayon nga “naglalakat uyon ha kamatuoran.”—2 Juan 4; 3 Juan 3, 4.

16, 17. Ano nga pagparig-on an iginhatag ni apostol Pablo ha mga Kristiano han siyahan nga siglo?

¹⁶ Han siyahan nga siglo, posible nga hi apostol Pablo an naghatag hin mas damu nga pagparig-on  ha iya kabugtoan. Waray pag-iha katapos han kamatayon ni Jesus, kadam-an han mga apostol nag-ukoy ha Jerusalem, diin nahimumutang an nagmamando nga lawas. (Buh. 8:14; 15:2) An mga Kristiano ha Judea nagsangyaw mahitungod han Kristo ha mga tawo nga natoo na ha usa la nga Dios tungod han impluwensya han Judaismo. Ha luyo nga bahin, hi apostol Pablo iginsugo pinaagi han baraan nga espiritu basi magsangyaw ha mga Griego, mga Romano, ngan ha iba pa nga nagsisingba ha damu nga mga dios.—Gal. 2:7-9; 1 Tim. 2:7.

¹⁷ Hi apostol Pablo nagbiyahe ha kadak-an nga bahin han gintatawag na yana nga Turkey, sugad man ha Gresya ngan Italya, ngan nagtukod hin Kristiano nga mga kongregasyon ha mga diri Judio. Inin bag-o la nga nakombirte nga mga Kristiano “nag-antos . . . ha kamot han [ira] mga kahimungto” ngan nagkikinahanglan hin pagparig-on. (1 Tes. 2:14) Han mga 50 C.E., hi Pablo nagsurat ha bag-o la nga kongregasyon ha Tesalonica: “Pirme kami nagpapasalamat ha Dios kon igin-uupod namon kamo ngatanan ha amon mga pag-ampo, kay diri gud namon nangangalimtan an iyo buhat tungod han pagtoo ngan an iyo pangalimbasog tungod han gugma ngan an iyo pagpailob.” (1 Tes. 1:2, 3) Gin-aghat liwat niya hira nga parig-unon an kada tagsa: “Padayon nga magdinasigay ngan magparig-onay kamo.”—1 Tes. 5:11.

18. Paonan-o ginparig-on hi Felipe han nagmamando nga lawas han siyahan nga siglo?

¹⁸ An nagmamando nga lawas han siyahan nga siglo nagin surok han pagparig-on ha mga nangunguna ha kongregasyon ngan ha ngatanan nga Kristiano. Han nagsangyaw an ebanghelisador nga hi Felipe mahitungod han Kristo ha mga Samaritano, nakarawat niya an bug-os nga suporta han nagmamando nga lawas. Iginpadara han nagmamando nga lawas an duha han ira membro, hira Pedro ngan Juan, basi mag-ampo para ha bag-o nga mga tumuroo nga makakarawat hin baraan nga espiritu. (Buh. 8:5, 14-17) Sigurado nga naparig-on gud hi Felipe sugad man an iya mga nakombirte tungod han suporta han nagmamando nga lawas!

19. Ano an nagin epekto ha Kristiano nga kongregasyon han siyahan nga siglo han surat nga iginpadara ha ira han nagmamando nga lawas?

¹⁹ Ha urhi, nagkatirok an nagmamando nga lawas basi pagdesisyonan kon kinahanglan ba magpaturi an diri Judio nga mga Kristiano, sugad han iginsusugo ha mga Judio han Balaud ni Moises. (Buh. 15:1, 2) Pinaagi han giya han baraan nga espiritu ngan katapos usisahon an Kasuratan, an nagmamando nga lawas nagdesisyon nga diri na ini kinahanglan, ngan naghimo hira hin surat para ha mga kongregasyon may kalabotan hito nga desisyon. Iginpadara nira an surat ha mga kongregasyon pinaagi hin mga representante. Ano an resulta? “Katapos ito basahon, nagkalipay hira tungod han pagparig-on.”—Buh. 15:27-32.

20. (a) Ano nga pagparig-on an iginhahatag han Nagmamando nga Lawas yana ha kabugtoan ha bug-os nga kalibotan? (b) Ano nga pakiana an babatunon ha sunod nga artikulo?

²⁰ Yana, an Nagmamando nga Lawas han mga Saksi ni Jehova naghahatag hin pagparig-on ha mga Bethelite, ha iba pa nga aada ha espesyal nga bug-os-panahon nga pag-alagad, ngan ha ngatanan nga tinuod nga Kristiano ha bug-os nga kalibotan. Ano an resulta hito? Pariho han siyahan nga siglo, nalilipay kita tungod hito nga pagparig-on! Dugang pa, han 2015, iginpublikar han Nagmamando nga Lawas an brosyur nga Balik kan Jehova, ngan nagin surok gud ito han pagparig-on ha damu nga kabugtoan ha bug-os nga kalibotan. Kondi adton may awtoridad la ba an sadang magsubad kan Jehova ha paghatag hin pagparig-on? Babatunon ito ha sunod nga artikulo.