Kay ano nga antes gud mamatay hi Jesus, ginkotar niya an mga pulong ni David ha Salmo 22:1?

Kaupod han ultimo nga mga ginsiring ni Jesus antes gud hiya mamatay an nakarekord ha Mateo 27:46: “Dios ko, Dios ko, kay ano nga ginpabay-an mo ako?” Han ginsiring ini ni Jesus, natuman niya an mga pulong han salmista nga hi David nga mababasa ha Salmo 22:1. (Mar. 15:34) Magigin sayop kon huhunahunaon naton nga ginkotar ini ni Jesus nga mga pulong tungod kay nasubo gud hiya kay waray hiya buligi han Dios o tungod kay temporaryo nga nawad-an hiya hin pagtoo. Maaram gud hi Jesus han rason kon kay ano nga kinahanglan niya mamatay ngan andam hiya nga buhaton ito. (Mat. 16:21; 20:28) Maaram liwat hiya nga ha panahon han iya kamatayon, kukuhaon ni Jehova an bisan ano nga “alad nga nagpapanalipod” ha palibot niya. (Job 1:10) Tungod hito, gintagan ni Jehova hi Jesus hin higayon nga pamatud-an nga magpapabilin hiya nga matinumanon anoman kakuri an iya kamatayon.​—Mar. 14:35, 36.

Kon sugad, kay ano nga ginsiring ni Jesus an mga pulong hini nga salmo? Bisan kon diri kita sigurado han rason, hisgotan naton an pipira nga posibilidad. *

Han ginsiring ni Jesus ini nga mga pulong, ginpapabug-atan ba niya nga diri pupugngan ni Jehova nga mamatay hiya? Kinahanglan ibayad ni Jesus an lukat nga waray han bulig ni Jehova. Usa hiya nga tawo ngan kinahanglan niya mamatay basi “maeksperyensyahan niya an kamatayon para ha ngatanan.”​—Heb. 2:9.

Han ginkotar ni Jesus an pipira nga pulong hito  nga salmo, karuyag ba niya hunahunaon han mga tawo an bug-os nga salmo? Hito nga panahon, komon ha mga Judio nga magmemorya hin damu nga salmo. Kon nakakabati hira hin usa nga bersikulo, awtomatiko nga nahuhunahuna nira an bug-os nga salmo. Kon ito an nakada ha hunahuna ni Jesus, kon sugad nabuligan niya an iya sumurunod nga mga Judio nga mahinumdoman an damu nga tagna hini nga salmo mahitungod han mga panhitabo durante han iya kamatayon. (Sal. 22:7, 8, 15, 16, 18, 24) Dugang pa, ha ultimo nga mga bersikulo hito nga salmo, gindadayaw hi Jehova ngan iginhuhulagway hiya sugad nga Hadi ha bug-os nga tuna.​—Sal. 22:27-31.

Han ginkotar ni Jesus ini nga mga pulong ni David, ginpapabug-atan ba niya nga waray hiya nabuhat nga sala? Antes patayon hi Jesus, ilegal nga ginbista hiya ngan ginhukman nga nakasala hin pagpasipara. (Mat. 26:65, 66) Dinalidali la ito nga pagbista ngan hilarom na han gab-i ito ginhimo ngan diri gud ito uyon ha legal nga proseso. (Mat. 26:59; Mar. 14:56-59) Han ginkotar ni Jesus ito nga mga pulong, posible nga iginpapakita niya nga waray hiya nahimo nga sala nga angay sirotan hin kamatayon.

Ginpapahinumdom ba liwat ni Jesus an mga tawo nga bisan kon gintugotan nga mag-antos hi David, nga nagsurat hini nga salmo, diri ini nagpapasabot nga hi David nawad-an han pag-uyon ni Jehova? An pagpakiana ni David diri nagpapakita hin kakulang hin pagtoo. Katapos niya ini igpakiana, nagsiring hiya nga nasarig hiya nga kaya talwason ni Jehova an iya katawohan, ngan padayon nga ginbendisyonan hiya ni Jehova. (Sal. 22:23, 24, 27) Sugad man, bisan kon hi Jesus, nga “Anak ni David,” nag-antos ha pasakitan nga kahoy, diri ini nagpapasabot nga nawad-an hiya han pag-uyon ni Jehova.​—Mat. 21:9.

Iginpapahayag ba ni Jesus an iya duro nga kasubo tungod kay maaram hiya nga diri hiya puproteksyonan ni Jehova basi bug-os nga mapamatud-an niya an iya pagkamatinumanon? Diri orihinal nga katuyoan ni Jehova nga an iya Anak mag-antos ngan mamatay. Ginkinahanglan la ito han nagrebelde hira Adan ngan Eva. Waray sayop nga nabuhat hi Jesus, pero kinahanglan niya mag-antos ngan mamatay basi mabaton an mga isyu nga iginbangon ni Satanas ngan maihatag an lukat nga kinahanglan basi maibalik an nawara ha mga tawo. (Mar. 8:31; 1 Ped. 2:21-24) Matutuman la ini kon temporaryo nga kukuhaon ni Jehova an iya proteksyon kan Jesus, ngan makausa gud la ini nga mahitatabo ha bug-os nga kinabuhi ni Jesus.

Karuyag ba ni Jesus buligan an iya mga sumurunod nga magpokus ha rason kon kay ano nga gintugotan hiya ni Jehova nga mamatay hini nga paagi? * Maaram hi Jesus nga ini nga klase hin kamatayon sugad nga usa nga kriminal dida ha pasakitan nga kahoy makakapakdol ha damu. (1 Cor. 1:23) Kon an iya mga sumurunod magpupokus ha tinuod nga rason han iya kamatayon, masasabtan nira an tinuod nga kahulogan hito. (Gal. 3:13, 14) Tungod hito, huhunahunaon nira hi Jesus sugad nga Paratalwas imbes nga usa nga kriminal.

Anoman an rason ni Jesus han pagkotar hini nga mga pulong, maaram hiya nga an iya naieksperyensyahan bahin han kaburut-on ni Jehova para ha iya. Waray pag-iha katapos kotaron ni Jesus ini nga salmo, hiya nagsiring: “Natuman na!” (Juan 19:30; Luc. 22:37) Oo, an temporaryo nga pagkuha ni Jehova han iya proteksyon naghatag kan Jesus hin oportunidad nga bug-os nga tumanon an ngatanan nga iginpapabuhat ha iya dinhi ha tuna. Naghatag liwat ito ha iya hin oportunidad nga tumanon an ngatanan nga butang nga nakasurat mahitungod ha iya “ha Balaud ni Moises ngan ha mga sinurat han mga Propeta ngan ha Mga Salmo.”​—Luc. 24:44.