1-2. Kay ano nga posible naton masunod an mga pitad ni Jesus? Iilustrar.

IMADYINA nga kaapi ka han usa nga grupo nga nagha-hiking ha delikado nga kamingawan nga napuputos hin snow. May naggigiya ha iyo nga eksperyensyado. Samtang naglalakat hiya, namarka an iya mga tiil ha iya gin-aagian nga snow. Katapos, waray mo na makita an iyo giya! Pero, diri ka nagpapanik. Lugod, ginsusundan mo ngan han imo mga kaupod an mga marka han tiil han iyo giya ha pinakamaopay nga iyo mahihimo!

² Sugad nga tinuod nga mga Kristiano, puropariho kita hin nagha-hiking ha delikado nga kamingawan​—inin maraot nga kalibotan. Pero maopay na la nga naghatag hi Jehova hin perpekto nga giya—​an iya Anak, hi Jesu-Kristo, nga mahimo naton sundon hin maopay an iya mga pitad. (1 Ped. 2:21) Sumala ha usa nga reperensya ha Biblia, iginpariho dinhi ni Pedro hi Jesus ha usa nga giya. Pariho hin giya, nga nagbibilin hin mga marka han iya mga tiil ha iya gin-aagian, hi Jesus nagbilin hin mga marka han iya mga tiil, o mga pitad, nga mahimo naton sundon. Hisgotan naton an tulo nga pakiana mahitungod ha pagsunod ha iya mga pitad. Ano an karuyag sidngon han pagsunod ha mga pitad ni Jesus? Kay ano nga kinahanglan naton ito sundon? Ngan paonan-o naton ito mahihimo?

3. Ano an karuyag sidngon han pagsunod ha mga pitad han usa nga tawo?

³ Ano an karuyag sidngon han pagsunod ha mga pitad han usa nga tawo? Ha Biblia, an mga pulong nga “paglakat” ngan “mga tiil” usahay nagtutudlok ha paagi han pagkinabuhi han usa nga tawo. (Gen. 6:9; Prob. 4:26) An ehemplo nga iginpapakita han  usa nga tawo mahimo ipariho ha mga marka han iya mga tiil, o mga pitad, samtang naglalakat hiya. Salit an pagsunod ha mga pitad han usa nagpapasabot hin pagsunod ha iya ehemplo, o pagsubad ha iya.

4. Ano an karuyag sidngon han pagsunod ha mga pitad ni Jesus?

⁴ Kon sugad, ano an karuyag sidngon han pagsunod ha mga pitad ni Jesus? Ha simple nga pagkayakan, nagpapasabot ito ha pagsubad han iya ehemplo. Ha aton tema nga teksto, espisipiko nga gin-uunabi ni apostol Pedro an maopay nga ehemplo ni Jesus kay gin-ilob niya an mga pag-antos; pero, damu pa an paagi nga masusubad naton hi Jesus. (1 Ped. 2:18-25) Oo, an bug-os nga pagkinabuhi ni Jesus​—an ngatanan nga iya ginsiring ngan ginbuhat—​usa nga ehemplo nga angay naton sundon.

5. Masusunod gud ba han diri perpekto nga mga tawo an perpekto nga ehemplo ni Jesus? Isaysay.

⁵ Sugad nga diri perpekto nga mga tawo, masusunod gud ba naton an ehemplo ni Jesus? Oo. Hinumdumi nga waray magsiring hi Pedro nga sundon hin perpekto an mga pitad ni Jesus, lugod gin-aghat kita niya nga ‘sundon [ito] hin maopay.’ Kon susundon naton hin maopay an iya mga pitad, karuyag sidngon kon ginbubuhat naton an aton gimaopayi sugad nga diri perpekto nga mga tawo, maiaaplikar naton an ginsiring ni apostol Juan: “Padayon nga maglakat sugad han paglakat” ni Jesus.​—1 Juan 2:6.

6-7. Kay ano nga makakasiring kita nga kon susundon naton an mga pitad ni Jesus magigin mas duok kita kan Jehova?

⁶ Kon susundon naton an mga pitad ni Jesus, magigin mas duok kita kan Jehova. Kay ano nga makakasiring kita hito? Siyahan, hi Jesus nagpakita hin maopay gud nga ehemplo kon paonan-o magkikinabuhi ha paagi nga nakakapalipay ha Dios. (Juan 8:29) Salit kon susundon naton an mga pitad ni Jesus, mapapalipay naton hi Jehova. Ngan makakasiguro kita nga magigin  duok an aton langitnon nga Amay ha mga nangangalimbasog nga magin iya sangkay.​—San. 4:8.

⁷ Ikaduha, perpekto nga ginsubad ni Jesus an iya Amay. Salit hi Jesus nakasiring: “An bisan hin-o nga nakakita ha akon nakakita liwat ha Amay.” (Juan 14:9) Kon ginsusubad naton an mga kalidad ni Jesus ngan an iya paagi ha pagtratar ha iba​—pananglitan, an iya kalooy ha usa nga may liprosi, an iya empatiya ha babaye nga may grabe nga sakit, ngan an iya pagpaid ha mga namatayan hin hinigugma​—ginsusubad liwat naton hi Jehova. (Mar. 1:40, 41; 5:25-34; Juan 11:33-35) Samtang mas ginsusubad naton hi Jehova, nagigin mas duok kita ha iya.

8. Isaysay kon kay ano nga an pagsunod ha mga pitad ni Jesus mabulig ha aton nga ‘madaog’ an kalibotan.

⁸ An pagsunod ha mga pitad ni Jesus nabulig nga diri mawara an aton pokus ha pag-alagad tungod hinin maraot nga kalibotan. Ha ultimo nga gab-i ni Jesus sugad nga tawo, nakasiring hiya: “Gindaog ko an kalibotan.” (Juan 16:33) Iginpapasabot niya nga waray hiya magpaimpluwensya ha panhunahuna, mga ambisyon, ngan mga buhat han mga tawo hini nga kalibotan. Waray tuguti ni Jesus nga mawara an iya pokus ha rason kon kay ano nga ginpakanhi hiya ha tuna​—an pagbindikar kan Jehova. Kumusta man kita? Hini nga kalibotan, damu an puydi makagwara han aton pokus ha pag-alagad. Pero kon magpupokus kita ha pagbuhat han kaburut-on ni Jehova pariho kan Jesus, ‘madadaog’ liwat naton an kalibotan.​—1 Juan 5:5.

9. Ano an kinahanglan naton buhaton basi magpabilin kita ha dalan ngadto ha kinabuhi nga waray kataposan?

⁹ An pagsunod ha mga pitad ni Jesus nagriresulta hin kinabuhi nga waray kataposan. Han nagpakiana an usa nga riko nga batan-on nga lalaki kon ano an kinahanglan niya buhaton basi mabuhi ha waray kataposan, hi Jesus binaton: “Kadi sunod ha akon.” (Mat. 19:16-21) Ha pipira nga Judio nga diri natoo nga hi Jesus an Kristo, hiya nagsiring: “An akon mga karnero . . . nasunod . . . ha akon. Gintatagan ko hira hin kinabuhi nga waray kataposan.” (Juan 10:24-29) Hi Jesus nagsiring kan Nicodemo, nga membro han Sanhedrin nga nainteres han iya mga katutdoan, nga adton ‘nagpapakita hin pagtoo ha iya magkakaada kinabuhi nga waray kataposan.’ (Juan 3:16) Nagpapakita kita hin pagtoo kan Jesus pinaagi ha pagbuhat han iya mga igintutdo pinaagi ha pulong ngan han iya ehemplo. Kon bubuhaton naton ito, magpapabilin kita ha dalan ngadto ha kinabuhi nga waray kataposan.​—Mat. 7:14.

10. Ano an kinahanglan naton buhaton basi ‘makilala’ hi Jesus hin mas maopay? (Juan 17:3)

¹⁰ Basi masunod naton hin maopay an mga pitad ni Jesus, kinahanglan anay naton hiya kilalahon. (Basaha an Juan 17:3.) An “pagkilala” kan Jesus usa nga butang nga kinahanglan padayon naton nga buhaton. Kinahanglan kilalahon naton hiya hin mas maopay pinaagi ha paghibaro han iya mga kalidad, han iya panhunahuna, ngan  han iya mga suruklan. Mationan-o man kita kaiha na ha kamatuoran, kinahanglan mangalimbasog kita nga padayon nga kilalahon hi Jehova ngan an iya Anak.

11. Ano an sulod han upat nga Ebanghelyo?

¹¹ Basi mabuligan kita nga makilala an iya Anak, mahigugmaon nga igin-upod ni Jehova ha iya Pulong an upat nga Ebanghelyo. An mga Ebanghelyo nagsusulod han istorya han kinabuhi ngan ministeryo ni Jesus. Ito nga rekord nagsusumat ha aton kon ano an iya mga ginsiring, ginbuhat, ngan gin-abat. Inin upat nga libro nabulig ha aton nga ‘tagdon hin maopay’ an ehemplo ni Jesus. (Heb. 12:3) Nagsusulod ito han mga pitad nga iya ginbilin. Salit pinaagi ha pag-usisa han mga Ebanghelyo, makikilala naton hin mas maopay hi Jesus. Sugad nga resulta, masusunod naton hin maopay an iya mga pitad.

12. Paonan-o kita bug-os nga magpapahimulos ha mga Ebanghelyo?

¹² Basi bug-os nga magpahimulos ha mga Ebanghelyo, kinahanglan diri la naton ito basta basahon. Kinahanglan maggahin kita hin panahon nga pag-adman ito hin maopay ngan pamalandungon gud. (Ikompara an Josue 1:8, footnote.) Hisgotan ta an duha nga suhestyon nga makakabulig ha aton nga mapamalandong an mga Ebanghelyo ngan maiaplikar an aton nababasa dida hito.

13. Ano an puydi mo himoon basi magin buhi ha imo an mga asoy han Ebanghelyo?

¹³ Siyahan, himoa nga buhi ha imo an mga asoy han Ebanghelyo. Gamita an imo imahinasyon basi makita, mabatian, ngan maabat an mga nahitatabo. Basi mabuligan ka nga mabuhat ito, pagsaliksik ha mga publikasyon nga igintatagana han organisasyon ni Jehova. Usisaha an konteksto​—an mga panhitabo antes o katapos han asoy nga imo gin-aadman. Pamiling hin mga impormasyon mahitungod ha mga tawo ngan mga lugar nga gin-uunabi dida hito. Ikompara an asoy nga imo gin-aadman ha kapariho nga asoy ha iba nga Ebanghelyo. Usahay, an usa nga parasurat han Ebanghelyo may igin-uupod nga makapainteres nga detalye nga waray unabiha ha iba nga Ebanghelyo.

14-15. Ano an kinahanglan naton buhaton basi maiaplikar an aton mga nahibaroan ha mga asoy han Ebanghelyo?

 ¹⁴ Ikaduha, iaplikar an mga asoy han Ebanghelyo. (Juan 13:17) Katapos mo pag-adman hin maopay an usa nga asoy han Ebanghelyo, pakianhi an imo kalugaringon: ‘Ano nga leksyon hini nga asoy an maiaaplikar ko ha akon kinabuhi? Paonan-o ko magagamit ini nga asoy basi mabuligan an iba?’ Paghunahuna hin usa nga indibiduwal, katapos, ha angayan nga panahon, mahigugmaon ngan mataktika nga isumat ha iya an leksyon nga imo nahibaroan.

¹⁵ Tagdon naton an usa nga ehemplo kon paonan-o naton maiaaplikar inin duha nga suhestyon. Hisgotan naton an asoy mahitungod han nagkukuri nga balo nga babaye nga gin-obserbaran ni Jesus ha templo.

16. Ihulagway an eksena nga nakarekord ha Marcos 12:41.

¹⁶ Himoa nga buhi ha imo an asoy. (Basaha an Marcos 12:41.) Imadyina an eksena. Nisan 11, 33 C.E. adto​—waray na mag-usa ka semana antes patayon hi Jesus. Haros bug-os-adlaw nga nagtinutdo hi Jesus ha templo. Ginkikinontra hiya han mga lider han relihiyon. Temprano hito nga adlaw, ginkwestyon han pipira ha ira an iya awtoridad. An iba nangalimbasog nga makorner hiya pinaagi hin magkuri nga pakiana. (Mar. 11:27-33; 12:13-34) Katapos, binalhin hi Jesus ha iba nga dapit han templo. Didto​—posible ha dapit nga gintatawag nga Bungsaran han mga Babaye—​nakikita niya an mga surudlan han kontribusyon hirani ha bungbong han bungsaran. Liningkod hiya ngan nag-obserbar ha mga tawo samtang ira iginhuhulog ha surudlan an ira kontribusyon. Nakikita niya an damu nga riko nga tawo nga naghuhulog hin damu nga sinselyo. Posible nga hirani gud hiya salit nababatian niya an tagingting han ira iginhuhulog nga mga sinselyo.

17. Ano an ginhimo han pobre nga balo nga babaye nga gin-uunabi ha Marcos 12:42?

¹⁷ Basaha an Marcos 12:42. Waray pag-iha, napansin ni Jesus an usa nga babaye. Usa hiya nga balo; pobre ngan “nagkukuri” hiya. (Luc. 21:2) Makuri gud an iya kinabuhi; posible nga diri hiya nakakapalit han iya mga panginahanglan. Pero kinadto hiya ha usa han mga surudlan ngan naghulog hin duha nga gudtiay nga sinselyo, nga bangin waray ngani magtunog han iya ito iginhulog. Maaram hi Jesus kon ano an iya iginhulog​—duha ka lepton, an pinakagutiay nga sinselyo nga ginagamit hito nga panahon. Diri ngani ito makakapalit hin usa nga maya, nga usa han pinakabarato nga tamsi nga iginbabaligya sugad nga pagkaon.

18. Sumala ha Marcos 12:43, 44, ano an ginsiring ni Jesus mahitungod ha kontribusyon han balo?

¹⁸ Basaha an Marcos 12:43, 44. Naimpres gud hi Jesus hini nga balo. Salit gintawag niya an iya mga disipulo, igintudlok ha ira an balo, ngan nagsiring: “Ini nga pobre nga balo naghulog hin mas damu kay ha ngatanan nga iba pa.” Katapos, nagsaysay hiya: “Hira [labi na an mga riko] ngatanan naghulog tikang ha ira sobra, kondi hiya, bisan kon nagkukuri, naghulog han ngatanan nga may-ada hiya, an ngatanan niya nga ginpakabuhian.” Han iginhatag hinin matinumanon nga balo an iya ultimo nga kwarta hito nga adlaw, iginpakita niya nga nasarig gud hiya nga aatamanon hiya ni Jehova.​—Sal. 26:3.

19. Ano nga importante nga leksyon an aton mahibabaroan ha ginsiring ni Jesus mahitungod ha pobre nga balo?

¹⁹ Iaplikar ha imo kinabuhi an asoy. Pakianhi an imo kalugaringon, ‘Ano nga leksyon an akon mahibabaroan ha ginsiring ni Jesus mahitungod ha pobre nga balo?’ Hunahunaa ito nga balo. Sigurado nga karuyag niya nga mas daku pa an iya maihatag kan Jehova. Pero ginbuhat niya an iya makakaya; iginhatag niya kan Jehova an iya pinakamaopay. Ngan maaram hi Jesus nga presyoso ha iya Amay an kontribusyon han balo. Salit  ini an importante nga leksyon para ha aton: Nalilipay hi Jehova kon iginhahatag naton ha iya an aton pinakamaopay​—an aton bug-os-kasingkasing ngan bug-os-kalag nga pag-alagad. (Mat. 22:37; Col. 3:23) Nalilipay hi Jehova kon nakikita niya nga ginbubuhat naton an tanan naton nga mahihimo! Ito nga prinsipyo aplikado ha kadaku han panahon ngan kusog nga aton iginhahatag ha pagsingba ha iya, upod na ha aton pagministeryo ngan pag-atender ha mga katirok.

20. Paonan-o mo maiaaplikar an leksyon ha asoy mahitungod ha balo nga babaye? Paghatag hin ehemplo.

²⁰ Paonan-o mo maiaaplikar an leksyon ha asoy mahitungod ha balo nga babaye? Paghunahuna hin mga indibiduwal nga bangin nagkikinahanglan hin pasarig nga an ira mga pangalimbasog nakakapalipay kan Jehova. Pananglitan, may kilala ka ba nga edaran nga sister nga bangin naabat hin kakonsensya o kawaray-pulos kay diri na damu an iya nahihimo ha ministeryo pariho hadto tungod kay diri na maopay an iya kahimsog o maluya na hiya? O may nahuhunahuna ka ba nga brother nga may maiha na ngan maul-ol nga sakit ngan nasusubo gud kay diri na hiya regular nga nakakaatender ha mga katirok ha Kingdom Hall? Buligi hira pinaagi ha pagyakan hin mga pulong nga “maopay . . . para ha pagparig-on.” (Efe. 4:29) Isumat ha ira an makaparig-on nga leksyon nga aton nahibaroan mahitungod ha pobre nga balo. An imo makapadasig nga mga pulong magpapasarig ha ira nga nalilipay hi Jehova kon iginhahatag naton ha iya an aton pinakamaopay. (Prob. 15:23; 1 Tes. 5:11) Kon ginkukumendasyonan mo an iba tungod kay iginhahatag nira kan Jehova an ira pinakamaopay​—bisan kon baga hin gutiay la ito—​ginsusunod mo hin maopay an mga pitad ni Jesus.

21. Ano an imo determinasyon?

²¹ Mapasalamaton gud kita nga an mga asoy han Ebanghelyo may-ada damu gud nga detalye mahitungod han kinabuhi ni Jesus, kay nabulig ito ha aton nga masubad hiya, o masunod hin maopay an iya mga pitad! Kay ano nga diri pag-adman ha iyo personal nga pag-aram o Pagsingba han Pamilya an mga Ebanghelyo? Hinumdoman naton nga basi bug-os nga magpahimulos kita ha aton pag-aram, kinahanglan himoon naton nga buhi an mga asoy ngan iaplikar ito ha aton kinabuhi. Labot pa han pagsubad han mga ginbuhat ni Jesus, kinahanglan liwat kita mamati ha iya mga ginsiring. Ha sunod nga artikulo, hihisgotan naton kon ano an aton mahibabaroan tikang ha ultimo nga mga ginsiring ni Jesus sugad nga tawo.