Makasurubo, han tin-edyer na ako, nagluya an akon relasyon kan Jehova. Nakita ko nga an akon mga kaeskwela baga hin waray limitasyon an ira kagawasan, ngan karuyag ko magkaada hin sugad nga kagawasan. Inabat ko nga sobra kaistrikto an mga patakaran han akon mga kag-anak ngan an mga suruklan para ha mga Kristiano, ngan nabubug-atan ako ha espirituwal nga mga buruhaton. Bisan kon natoo ako nga naeksister hi Jehova, inaabat ko nga diri na ako duok ha iya.

Pero diri ko karuyag magin diri aktibo, salit nagsasangyaw ako panalagsa. Ngan kon nagsasangyaw ako, diri gud ako nangangandam, salit nakukurian ako pagtikang pakiistorya o ha pagpadayon hito. Tungod hito, diri mabungahon an akon ministeryo ngan diri ako nalilipay, salit mas nawarayan ako gana ha ministeryo. Ginpapakianhan ko an akon kalugaringon, ‘Paonan-o nahihimo han usa nga magsinangyaw kada semana, kada bulan?’

Han nag-17 anyos ako, karuyag ko magin independente. Salit nag-impake ako, binaya ha balay, ngan binalhin ngadto ha Australia. Nasubo gud an akon mga kag-anak han binaya ako. Nabaraka hira  ha akon, pero naghunahuna hira nga diri ko papabay-an an akon espirituwalidad.

Ha Australia, mas nagluya pa an akon espirituwalidad. Danay diri na ako naatender ha mga katirok. Nakigsangkay ako ha mga batan-on nga, pariho ha akon, nalilipay pag-atender ha katirok pero pagkasunod nga gab-i nakadto ha mga nightclub basi mag-irignom ngan magsarayaw. Kon ginhihinumdom ko ito, nahuhunahuna ko nga hadto an akon usa nga tiil ada ha kamatuoran ngan an usa ada ha kalibotan, pero diri ako komportable bisan hain man hito.

Paglabay hin mga duha ka tuig, may nakilala ako nga sister nga nakabulig nga makapamurubuot ako mahitungod han akon pagkinabuhi, pero diri hiya maaram hito. Naukoy ako ha usa nga balay kaupod an lima nga solo nga sister, ngan gin-imbitar namon an paramangno han sirkito ngan an iya asawa nga hi Tamara nga mag-ukoy ha amon hin usa ka semana. Samtang gin-aasikaso han iya bana an mga buruhaton ha kongregasyon, hi Tamara nagpipinakiistorya ha amon, ngan nag-i-enjoy gud kami hito. Naopayan gud ako hito. Mapainubsanon gud hiya ngan diri ako nag-aalang pakiistorya ha iya. Diri ako makatoo nga an usa nga busy ha pag-alagad kan Jehova, makalilipay ngay-an liwat nga kaupod.

Madasigon gud hi Tamara. Nakakatapon an iya gugma ha kamatuoran ngan ha ministeryo. Nalilipay hiya nga ihatag kan Jehova an iya pinakamaopay, samtang ako diri malipayon tungod kay gutiay la an akon ginbubuhat ha pag-alagad. An iya pagin positibo ngan an pagin tinuod nga malipayon daku gud an epekto ha akon. Tungod han iya ehemplo, nakapanhunahuna ako mahitungod hinin importante nga kamatuoran: Karuyag ni Jehova nga an ngatanan mag-alagad ha iya nga “may pagrayhak” ngan “may malipayon nga pagsinggit.”​—Sal. 100:2.

Karuyag ko an klase han kalipay nga inaabat ni Tamara, pero basi magkaada ako hito, kinahanglan ko maghimo hin dagku nga mga pagbag-o. Nagkinahanglan ito hin panahon, pero hinay-hinay nga nagtikang ako paghimo hin gudtiay nga mga pagbag-o. Nagtikang ako mangandam para ha ministeryo, ngan ha panapanahon nag-o-auxiliary  payunir ako. Nakabulig ini ha akon nga maibanan an akon kulba ngan magkaada kompyansa. Samtang mas gin-gagamit ko an Biblia ha ministeryo, mas nag-i-enjoy ako. Waray pag-iha, nag-o-auxiliary payunir na ako kada bulan.

Nakigsangkay ako ha kabugtoan nga iba-iba an edad nga maopay an espirituwalidad ngan nalilipay ha ira pag-alagad kan Jehova. An ira maopay nga ehemplo nakabulig ha akon nga usisahon utro an akon mga prayoridad ngan magkaada maopay nga espirituwal nga rutina. Mas nag-enjoy na ako ha ministeryo, ngan ha urhi, nagregular payunir ako. Ha sulod hin pipira ka tuig, yana la utro ako nagin malipayon ngan nagin komportable ha kongregasyon.

Paglabay hin usa ka tuig, nakilala ko hi Alex. Buotan hiya ngan nahigugma gud kan Jehova ngan ha ministeryo. Nag-aalagad hiya sugad nga ministeryal nga surugoon ngan unom ka tuig na nga payunir. Nagboluntaryo liwat hiya hin pipira ka bulan ha Malawi diin daku an panginahanglan hin magwarali. Didto may nakaupod hiya nga mga misyonero nga nagin maopay gud nga susbaranan para ha iya ngan gindasig hiya nga padayon nga unahon an mga buruhaton han Ginhadian.

Han 2003, nagpakasal kami ni Alex, ngan nagpadayon kami ha bug-os-panahon nga pag-alagad. Damu nga mag-opay nga leksyon an amon nahibaroan, ngan ginbendisyonan kami ni Jehova ha damu gud nga paagi.

Han 2009, gin-imbitar kami nga mag-alagad sugad nga mga misyonero ha Timor-Leste, usa nga gutiay nga nasud ha arkipelago han Indonesia. Iba-iba an amon gin-abat​—nasurprisa kami, nagin eksayted, ngan ginkulba. Paglabay hin lima ka bulan, inabot kami ha kapital han nasud, an Dili.

An amon pagbalhin nagkinahanglan hin dagku nga pagbag-o ha amon pagkinabuhi. Kinahanglan namon mag-adjust ha bag-o nga kultura, linggwahe, pagkaon, ngan kahimtang ha kinabuhi. Ha ministeryo, agsob kami makakita hin mga tawo nga  pobre, waray makaeskwela, ngan mga ginraugdaog. Ngan damu an amon nakikita nga mga tawo nga nag-aantos pa gihapon han maraot nga epekto ha pisikal ngan ha emosyon tungod han girra ngan kamadarahog. *

Mabungahon gud an amon ministeryo! Pananglitan, may nakilala ako nga masurub-on nga 13 anyos nga daragita nga hi Maria. * Pipira pa la ka tuig nga namatay an iya nanay, ngan talagsa la niya igkita an iya tatay. Pariho ha damu nga kaedad ni Maria, waray direksyon an iya kinabuhi. Makausa, nahinunumdoman ko nga nagtinangis hiya samtang iginsusumat niya ha akon an iya mga inaabat. Pero diri ko nasasabtan an iya ginyiyinakan kay gutiay pa la an akon nahibabaroan ha iya linggwahe. Nag-ampo ako kan Jehova, nangaro hin bulig nga parig-unon hiya, ngan katapos nagbasa ako ha iya hin nakakaliaw nga mga teksto. Paglabay hin pipira ka tuig, nakita ko nga an kamatuoran nakagbag-o han disposisyon, pamostura, ngan kinabuhi ni Maria. Nagpabawtismo hiya, ngan yana may-ada na hiya mga gindudumarahan hin pag-aram ha Biblia. Yana, may-ada na hi Maria daku nga espirituwal nga pamilya, ngan inaabat niya nga hinigugma gud hiya.

Ginbibendisyonan ni Jehova an buruhaton ha Timor-Leste. Bisan kon an kadam-an nga magwarali mga napulo pa la ka tuig nga nabawtismohan, damu na ha ira an payunir, ministeryal nga surugoon, o tigurang. An iba naman nagbuboluntaryo ha Remote Translation Office ngan nabulig ha paghubad han espirituwal nga pagkaon ha lokal nga mga linggwahe. Nalilipay gud ako kon nababatian ko hira nga nagkakanta ha mga katirok, nakikita an ira mga hiyom, ngan naoobserbaran an ira espirituwal nga pag-uswag.

An amon kinabuhi ha Timor-Leste iba gud ha Australia, pero mas makalilipay gud ito nga kinabuhi. Usahay nasakay kami ha gutiay nga bus nga puno hin pasahero ngan may kargada nga mga bulad ngan damu nga utanon tikang ha merkado. May mga adlaw nga nagba-Bible study kami ha mapaso ngan gutiay nga balay nga diri sementado an salog ngan an mga manok ada la naglalakat-lakat. Pero bisan pa hiton makuri nga mga kahimtang, agsob ko nga nahuhunahuna, ‘Eksayting man ini!’

Kon ginhihinumdom ko an naglabay, mapasalamaton gud ako ha akon mga kag-anak nga ginhimo nira an pinakamaopay basi tutdoan ako han mga paagi ni Jehova ngan buligan ako, bisan ha mga panahon nga nanluya an akon espirituwalidad han tin-edyer ako. Napamatud-an ko nga tinuod gud an Proberbios 22:6. Proud gud hira Mama ngan Papa ha amon ni Alex. Nalilipay hira nga makita nga gin-gagamit kami ni Jehova. Tikang han 2016, nag-aalagad kami ha sirkito nga buruhaton ha teritoryo han sanga nga opisina han Australasia.

Haros diri ako makatoo nga may panahon hadto nga diri na ako nalilipay ha pagsangyaw. Yana, hinigugma ko na an ministeryo! Nasantop ko nga anoman an mahitabo ha aton kinabuhi, magigin tinuod gud la kita nga malipayon kon mag-aalagad kita ha Dios ha bug-os nga kasingkasing. Oo, an 18 ka tuig nga amon pag-alagad ni Alex kan Jehova amo an pinakamakalilipay nga mga tuig ha akon kinabuhi. Yana, nasasabtan ko nga tinuod gud an ginsiring kan Jehova han salmista nga hi David: “An ngatanan nga naayop ha imo magrarayhak; pirme hira masinggit hin malipayon. . . . Ngan an mga nahigugma ha imo ngaran magrarayhak tungod ha imo.”​—Sal. 5:11.