AN KABARAKA nakakapabug-at ha aton kasingkasing. (Prob. 12:25) Nag-antos ka na ba tungod han kabaraka? May mga panahon ba nga inaabat mo nga diri mo na ito makakaya? Kon oo, diri ka nag-uusahan. Bangin damu ha aton an nag-ataman hin may sakit, namatayan hin hinigugma, nakaeksperyensya hin kalamidad, o inatubang hin iba pa nga sitwasyon nga nakaubos han aton pisikal, mental, ngan emosyonal nga kusog. Pero ano an makakabulig ha aton nga makaya an kabaraka? *

Damu an aton mahibabaroan kon paonan-o makakaya an kabaraka kon aton uusisahon an ehemplo ni Hadi David. Nakaeksperyensya hiya hin damu nga kakurian, ngan may mga panahon pa ngani nga nanelikado an iya kinabuhi. (1 Sam. 17:34, 35; 18:10, 11) Ano an nakabulig kan David nga makaya an kabaraka? Paonan-o naton masusubad an iya ehemplo?

Inatubang hi David hin dudrungan nga problema. Hunahunaa an nahitabo ha iya han napalagiw hiya tikang kan Hadi Saul, nga nag-iikaparatay ha iya. Pagbalik ni David ngan han iya mga tawo tikang ha usa nga pakiggirra, nakalasan hira nga makita nga ginkawat han mga kaaway an ira mga panag-iya, ginsunog an ira mga balay, ngan ginbihag an ira mga pamilya. Ano an nagin reaksyon ni David? “Hi David ngan an kalalakin-an nga kaupod niya nagtikang pagtinangis hin makusog tubtob nga waray na hira kusog ha pagtangis.” Nadugangan an kasubo ni David kay an iya tinaporan nga mga tawo “nag-iiristorya nga batuhon hiya.” (1 Sam. 30:1-6) Yana tulo na nga dagku nga problema an gin-aatubang ni David: Naninelikado an iya pamilya, nahahadlok hiya nga patayon han iya mga tawo, ngan ginlilinanat la gihapon hiya ni Hadi Saul. Imadyina la an kabaraka nga sigurado nga gin-abat ni David!

Ano an sunod nga ginbuhat ni David? Iya dayon “ginparig-on . . . an iya kalugaringon pinaagi han bulig ni Jehova nga iya Dios.” Paonan-o daw la niya ini ginbuhat? Hiara hi David nga mag-ampo kan Jehova para hin bulig ngan mamalandong ha kon paonan-o Niya hiya ginbuligan han naglabay. (1 Sam. 17:37; Sal. 18:2, 6) Maaram hi David nga kinahanglan niya aroon an giya ni Jehova, salit nagpakiana hiya kan Jehova kon ano an angay niya buhaton. Katapos ni David makarawat an giya ni Jehova, ginios dayon hiya. Sugad nga resulta, hiya ngan an iya mga tawo ginbendisyonan ni Jehova ngan nabawi nira an ira mga pamilya ngan panag-iya. (1 Sam. 30:7-9, 18, 19) Napansin mo ba an tulo nga butang nga ginbuhat ni David? Nag-ampo hiya kan Jehova para hin bulig, namalandong ha mga ginbuhat ni Jehova para ha iya han naglabay, ngan ginios uyon ha giya ni Jehova. Paonan-o naton masusubad hi David? Aadi an tulo nga paagi.

1. Pag-ampo. Ha bisan ano nga panahon nga magtikang kita umabat hin kabaraka, makakag-ampo kita kan Jehova para hin bulig ngan kinaadman. Maiibanan an kabug-at nga aton inaabat kon mag-aampo kita hin maiha ngan isusumat ha iya an ngatanan nga aada ha aton kasingkasing. O makakag-ampo kita hin halipot ngan hilom kon iton la an aton mahihimo hito nga takna tungod han aton kahimtang. Ha kada panahon nga nangangaro kita kan Jehova hin bulig, iginpapakita naton nga nasarig gud kita ha iya pariho kan David, nga nagsiring: “Hi Jehova an akon daku nga bato ngan an akon balwarte, ngan Hiya an nagtatalwas  ha akon. An akon Dios amo an akon bato, nga akon gin-aayopan.” (Sal. 18:2) Epektibo gud ba an pag-ampo? Ini an siring han payunir nga sister nga hi Kahlia: “Katapos ko mag-ampo, murayaw an akon pag-abat. An pag-ampo nabulig ha akon nga mas masubad an panhunahuna ni Jehova ngan mas sumarig ha iya.” Oo, an pag-ampo maopay gud nga regalo tikang kan Jehova nga nabulig ha aton nga makaya an kabaraka.

2. Pamalandong. Kon imo ginhihinumdom an mga nahitabo ha imo kinabuhi, may mahuhunahuna ka ba nga mga problema nga nailob mo tungod la han bulig ni Jehova? Kon ginpapamalandong naton kon paonan-o kita ginbuligan ni Jehova sugad man an iya mga surugoon hadto, nagigin mas murayaw an aton pag-abat ngan mas nasarig kita ha iya. (Sal. 18:17-19) “May-ada ako lista han ginbaton nga mga pag-ampo,” siring han tigurang nga hi Joshua. “Nakabulig ini ha akon nga mahinumdoman an mga panahon nga may espisipiko ako nga gin-aro kan Jehova ngan iginhatag niya ha akon kon ano gud an akon kinahanglan.” Oo, kon ginpapamalandong ta an mga ginbuhat na ni Jehova para ha aton, nagkakaada kita kusog nga maatohan an kabaraka.

3. Gios. Antes kita magdesisyon kon ano an bubuhaton ha usa nga sitwasyon, makakakuha kita han pinakamasasarigan nga giya ha Pulong han Dios. (Sal. 19:7, 11) Napapansin han damu nga kon nagri-research hira mahitungod ha usa nga teksto, mas nasasabtan nira kon paonan-o ito nga teksto naaplikar ha ira kinabuhi. Ini an siring han tigurang nga hi Jarrod: “An pag-research nabulig ha akon nga makita an ngatanan nga anggulo han usa nga bersikulo ngan masabtan kon ano an ginsisiring ni Jehova ha akon. Naipapasilsil hini an teksto ha akon kasingkasing basi makagios ako uyon ha iya paggiya.” Kon ginbibiling naton ha Kasuratan an giya ni Jehova ngan ginsusunod ito nga giya, nagigin mas masayon para ha aton nga atubangon an kabaraka.

Maaram hi David nga basi makaya an kabaraka, kinahanglan niya an bulig ni Jehova. Gin-apresyar gud niya an bulig ni Jehova salit nakasiring hiya: “Pinaagi ha gahum han Dios makakasaka ako hin pader. An tinuod nga Dios amo an nagsusul-ot ha akon hin kusog.” (Sal. 18:29, 32) Bangin abaton naton nga an aton mga problema pariho hin mga pader nga diri masasaka. Pero ha bulig ni Jehova, makakaya naton an bisan ano nga sugad-pader nga problema! Oo, kon mag-aampo kita kan Jehova para hin bulig, mamamalandong ha ngatanan nga iya ginbuhat para ha aton, ngan magios uyon ha iya giya, makakasarig kita nga ihahatag niya ha aton an kusog ngan kinaadman nga aton kinahanglan basi makaya an aton mga kabaraka!