1. Ano an nakakapalipay gud ha aton?

 KARUYAG ni Jehova nga magin malipayon kita. Maaram kita hini kay an kalipay bahin han bunga han iya baraan nga espiritu. (Gal. 5:22) Tungod kay mas daku an kalipay ha paghatag kay ha pagkarawat, malipayon gud kita kon bug-os kita nga nakikigbahin ha ministeryo ngan nabulig ha aton kabugtoan ha iba-iba nga paagi.​—Buh 20:35.

2-3. (a) Sugad han iginpapakita ha Galacia 6:4, ano an duha nga butang nga mabulig ha aton nga magpabilin nga malipayon ha pag-alagad kan Jehova? (b) Ano an aton hihisgotan hini nga artikulo?

² Sugad han nakarekord ha Galacia 6:4, hi apostol Pablo nag-unabi hin duha nga butang nga mabulig ha aton nga magpabilin nga malipayon. (Basaha.) Siyahan, angay naton ihatag kan Jehova an aton pinakamaopay. Kon iginhahatag naton ha iya an aton pinakamaopay, angay kita malipay. (Mat. 22:36-38) Ikaduha, likyan naton nga ikompara an aton kalugaringon ha iba. Anoman an aton nahihimo tungod han aton kahimsog, training nga nakarawat, o abilidad, dapat kita magpasalamat kan Jehova. Kay kon huhunahunaon, tikang ha iya an tanan nga may-ada kita. Pero kon mas epektibo naman an iba kay ha aton ha usa nga bahin han ministeryo, angay kita malipay nga gin-gagamit nira an ira mga talento basi dayawon hi Jehova, diri basi magpabilib o para ha personal la nga kaopayan. Salit imbes nga makigkompetensya, angay kita mahibaro tikang ha ira.

³ Hini nga artikulo, kikitaon naton kon ano an makakabulig kon inaabat naton nga limitado na la an aton nahihimo ha pag-alagad. Hihisgotan liwat naton kon paonan-o naton magagamit ha pinakamaopay nga paagi an aton mga abilidad ngan kon ano an aton mahibabaroan tikang ha ehemplo han iba.

4. Ano nga sitwasyon an mahimo makapaluya? Paghatag hin ehemplo.

⁴ An pipira nga magsiringba ni Jehova naabat hin panluya tungod han mga limitasyon nga resulta han pagtikalagas o sakit. Ito an nahitabo kan Carol. Hadto nag-aalagad hiya ha lugar diin mas daku an panginahanglan. Hito nga panahon, 35 an iya Bible study ngan damu an iya nabuligan nga magdedikar ngan magpabawtismo. Mabungahon an ministeryo ni Carol! Katapos, nagkasakit hiya hin grabe, ngan kaurogan aada na la hiya ha balay. “Maaram ako nga diri ko nahihimo an nahihimo han iba tungod han akon sakit,” siring ni Carol, “pero inaabat ko nga diri ako sugad ha ira kamatinumanon. Nag-aaway an akon hingyap ngan an akon aktuwal nga kahimtang, ngan nakakapaluya gud ini ha akon.” Karuyag ni Carol buhaton an ngatanan nga iya mahihimo para kan Jehova. Angay gud hiya kumendasyonan! Makakasiguro kita nga gin-aapresyar han aton mapinairon nga Dios an iya maopay nga disposisyon.

5. (a) Ano an angay naton hinumdoman kon naabat kita hin panluya tungod han aton mga limitasyon? (b) Sugad han makikita ha mga piktyur, paonan-o padayon nga iginhahatag han brother an iya pinakamaopay ha pag-alagad kan Jehova?

⁵ Kon usahay nanluluya ka tungod han imo limitasyon, pakianhi an imo kalugaringon, ‘Ano an karuyag ni Jehova ipabuhat ha akon?’ An imo pinakamaopay—anoman an imo kahimtang yana. Pansina ini: Usa nga 80 anyos nga sister an naabat hin panluya kay an iya nahihimo ha ministeryo diri na pariho han iya nahihimo han 40 anyos hiya. Naghuhunahuna hiya nga bisan kon iginhahatag niya an iya pinakamaopay, diri ito nakakapalipay kan Jehova. Pero tinuod ba ito? Hunahunaa. Kon iginhatag hini nga sister an iya pinakamaopay han 40 anyos hiya ngan iginhahatag la gihapon an iya pinakamaopay yana nga 80 anyos na hiya, waray gud hiya umundang ha paghatag han iya pinakamaopay. Kon magtikang kita umabat nga an aton nahihimo ha pag-alagad diri na igo ha pagpalipay kan Jehova, kinahanglan ta pahinumdoman an aton kalugaringon nga hi Jehova an naghihimo han suruklan ha kon an makakapalipay ha iya. Kon bubuhaton naton an aton pinakamaopay, sugad hin masiring hi Jehova ha aton: “Maopay an imo ginbuhat!”​—Ikompara an Mateo 25:20-23.

6. Ano an aton mahibabaroan tikang ha ehemplo ni Maria?

⁶ Mas masayon para ha aton nga magin malipayon kon magpupokus kita ha aton mahihimo imbes nga ha diri naton mahihimo. Hunahunaa an sister nga hi Maria, nga limitado na an nahihimo ha ministeryo tungod han iya sakit. Ha siyahan, nadepres hiya ngan inabat nga waray hiya pulos. Katapos, nahunahuna niya an usa nga sister ha ira kongregasyon nga naghihinigda na la tungod han sakit, salit nagdesisyon hiya nga bumulig. “Nakigsabot ako ha iya nga magsasangyaw kami pinaagi han telepono ngan surat,” siring ni Maria. “Ha kada namon pagkakaupod ha ministeryo, nauli ako nga malipayon ngan kontento kay nabuligan ko an akon bugto.” Kita liwat mahimo magin mas malipayon kon magpupokus kita ha aton mahihimo imbes nga ha diri naton mahihimo. Pero ano man kon mas damu an aton mahihimo o maopay gud kita ha pipira nga bahin han pag-alagad kan Jehova?

7. Ano nga praktikal nga sagdon an iginhatag ni apostol Pedro ha mga Kristiano?

⁷ Ha siyahan nga giniyahan nga surat ni apostol Pedro, gin-aghat niya an iya kabugtoan nga gamiton ha pagparig-on han ira mga igkasi-tumuroo an anoman nga regalo ha ira nga abilidad ngan talento. Nagsurat hiya: “Sugad la nga an kada tagsa nakakarawat hin regalo, gamita ito ha pagserbi ha usa kag usa sugad nga  mag-opay nga mga tinaporan han diri matupngan nga pagkabuotan han Dios.” (1 Ped. 4:10) Diri kita dapat mag-alang nga bug-os nga gamiton an aton mga abilidad tungod han kabaraka nga bangin maawa o manluya an iba. Kay kon mag-aalang kita, diri naton maihahatag kan Jehova an aton pinakamaopay.

8. Sumala ha 1 Corinto 4:6, 7, kay ano nga dapat naton likyan nga ighambog an aton mga abilidad?

⁸ Kinahanglan naton gamiton hin bug-os an aton mga abilidad, pero kinahanglan maghirot kita nga diri ito ipanhambog. (Basaha an 1 Corinto 4:6, 7.) Pananglitan, bangin maopay ka gud magpatikang hin pag-aram ha Biblia. Ayaw pag-alang ha paggamit hito nga abilidad! Pero angay naton hinumdoman nga diri ito ipanhambog. Sidngon ta nga nagkaada ka makalilipay nga eksperyensya ha ministeryo ngan nakagpatikang ka hin pag-aram ha Biblia. Karuyag mo gud ito isumat ha iyo grupo han pagsangyaw. Pero han nagkirigta kamo, may sister nga nag-iistorya nga nakahatag hiya hin magasin. Hiya nakahatag hin magasin; ikaw naman nakagpatikang hin Bible study. Ano an imo bubuhaton? Maaram ka nga an grupo madadasig han imo eksperyensya, pero bangin magdesisyon ka nga ha iba na la nga higayon ito isumat basi diri maibanan an kalipay han sister nga nakahatag han magasin. Pagpakita ito hin pagkabuotan. Pero ayaw gud pag-undang ha pagtanyag hin Bible study. May-ada ka abilidad​—gamita ito!

9. Paonan-o naton dapat gamiton an aton mga abilidad?

⁹ Hinumdoman naton nga regalo tikang ha Dios an anoman nga abilidad nga may-ada kita. Dapat naton gamiton ito nga mga abilidad basi parig-unon an kongregasyon, diri basi magpabilib. (Fil. 2:3) Kon gin-gagamit naton an aton kusog ngan mga abilidad ha pagbuhat han kaburut-on han Dios, magkakaada kita hinungdan nga malipay​—diri tungod kay mas damu an aton nahihimo kay ha iba o mas labaw kita ha ira, kondi tungod kay gin-gagamit naton an aton mga abilidad basi dayawon hi Jehova.

10. Kay ano nga diri maopay nga ikompara an aton kalugaringon ha iba?

¹⁰ Kon an usa nga tawo diri maghihirot, bangin mahulog hiya ha bitik han pagkompara han iya mag-opay nga kalidad ha kaluyahan han iba. Pananglitan, an usa nga brother bangin maopay gud magpahayag. Ito an iya maopay nga kalidad. Pero ha iya kasingkasing bangin minuson niya an usa nga brother nga diri sugad kaopay magpahayag. Kondi ito nga brother bangin maabiabihon gud, maopay mag-train ha iya mga anak, o madasigon gud ha ministeryo. Mapasalamaton kita nga damu hinduro an maabilidad nga kabugtoan nga gin-gagamit an ira mga talento  ha pag-alagad kan Jehova ngan ha pagbulig ha iba!

11. Kay ano nga angay kita mangalimbasog nga sundon an ehemplo ni Jesus?

¹¹ Bisan kon diri naton angay ikompara an aton kalugaringon ha iba, makakapahimulos kita pinaagi ha paghibaro tikang ha ehemplo han mga matinumanon. An pinakamaopay nga ehemplo amo hi Jesus. Bisan kon perpekto hiya ngan kita diri, mahibabaro kita tikang ha iya mag-opay nga kalidad ngan mga buhat. (1 Ped. 2:21) Kon ginbubuhat naton an aton pinakamaopay nga sundon an iya ehemplo tubtob ha aton mahihimo, nagigin mas maopay kita nga magsiringba ni Jehova ngan mas epektibo ha aton ministeryo.

12-13. Ano an aton mahibabaroan tikang kan Hadi David?

¹² Ha Pulong han Dios, mababasa naton an damu nga ehemplo han matinumanon nga kalalakin-an ngan kababayin-an nga angay subaron bisan kon diri hira perpekto. (Heb. 6:12) Hunahunaa hi Hadi David, nga gintawag ni Jehova nga “usa nga tawo nga nakakapalipay ha akon kasingkasing.” (Buhat 13:22) Pero hi David diri perpekto. Ngani, nakabuhat hiya hin seryoso nga mga sayop. Bisan pa hito, maopay hiya nga susbaranan ha aton. Kay ano? Kay han gintadong hiya, waray hiya maghimo hin mga pasangil. Lugod, ginkarawat niya an marig-on nga sagdon ha iya ngan sinsero nga nagbasol ha iya nabuhat. Sugad nga resulta, ginpasaylo hiya ni Jehova.​—Sal. 51:3, 4, 10-12.

¹³ Mahibabaro kita tikang kan David pinaagi ha pagpakiana ha aton kalugaringon: ‘Ano an akon reaksyon ha sagdon? Gin-aamin ko ba dayon an akon mga sayop, o naghihimo ako hin mga pasangil? Ginbabasol ko ba an iba? Nangangalimbasog gud ba ako nga diri na utruhon an akon mga sayop?’ Mahimo mo igpakiana an puropariho hini samtang nagbabasa ka mahitungod ha iba pa nga matinumanon nga kalalakin-an ngan kababayin-an ha Biblia. An ira ba mga problema puropariho han imo naieksperyensyahan? Ano nga makaruruyag nga mga kalidad an ira iginpakita? Ha tagsa nga kahimtang, pakianhi an imo kalugaringon: ‘Paonan-o ko mas masusubad ini nga maunungon nga surugoon ni Jehova?’

14. Paonan-o kita makakapahimulos kon aton oobserbaran an aton mga igkasi-tumuroo?

¹⁴ Makakapahimulos liwat kita kon aton oobserbaran an aton mga igkasi-tumuroo, batan-on man o lagas. Pananglitan, may mahuhunahuna ka ba nga kakongregasyon nga matinumanon nga nag-iilob hin problema—bangin pagpresyur  han mga kaupod, pagkontra han pamilya, o sakit? May nakikita ka ba nga makaruruyag nga mga kalidad hini nga bugto nga karuyag mo subaron? Pinaagi ha paghunahuna ha iya maopay nga susbaranan, bangin may mahibaroan ka nga praktikal nga mga paagi basi mailob an imo mga problema. Mapasalamaton gud kita ha pagkaada sugad nga kabugtoan nga mga susbaranan han pagtoo—usa gud nga hinungdan para malipay!​—Heb. 13:7; San. 1:2, 3.

15. Ano an iginsagdon ni apostol Pablo nga makakabulig ha aton nga padayon nga malipay ha aton pag-alagad kan Jehova?

¹⁵ Basi matipigan an kamurayawan ngan pagkaurosa ha kongregasyon, an tagsa ha aton kinahanglan maghatag han aton pinakamaopay. Hunahunaa an mga Kristiano ha siyahan nga siglo. Iba-iba an ira mga abilidad ngan toka. (1 Cor. 12:4, 7-11) Pero waray ito magin hinungdan han pakigkompetensya ngan pagkabahin-bahin. Lugod, gin-aghat ni Pablo an tagsa ha ira nga buhaton an ginkikinahanglan “basi maparig-on an lawas han Kristo.” Nagsurat hi Pablo ha mga taga-Efeso: “Kon an tagsa nga parte nagios hin maopay, nakakabulig ini ha pagtubo han lawas samtang ginpaparig-on hito an kalugaringon pinaagi han gugma.” (Efe. 4:1-3, 11, 12, 16) An mga nagbuhat hito nakabulig ha pagtipig han kamurayawan ngan pagkaurosa​—mga kalidad nga nakikita naton ha aton mga kongregasyon yana.

16. Ano an angay naton magin determinasyon? (Hebreo 6:10)

¹⁶ Magin determinado nga likyan an pagkompara han imo kalugaringon ha iba. Lugod, mahibaro tikang kan Jesus, ngan pangalimbasog nga subaron an iya mga kalidad. Magpahimulos ha mga susbaranan han pagtoo ha panahon han Biblia ngan ha aton panahon. Samtang padayon nga ginbubuhat mo an imo pinakamaopay, sarig nga hi Jehova “diri kay diri matadong nga kalimtan niya an [imo] mga buhat.” (Basaha an Hebreo 6:10.) Padayon nga malipay ha pag-alagad kan Jehova, kay maaram ka nga gin-aapresyar niya an imo bug-os-kalag nga mga pangalimbasog basi lipayon hiya.