An panumpa “usa nga seryoso gud, pormal nga deklarasyon o saad nga buhaton an usa nga butang, ngan agsob nga gin-uunabi an Dios . . . sugad nga testigo.” Mahimo ito iyakan o isurat.

An iba bangin maghunahuna nga sayop an pagpanumpa kay hi Jesus nagsiring: “Ayaw gud panumpa . . . Basta an iyo ‘Oo’ sadang mangahulogan hin oo, ngan an iyo ‘Diri,’ diri, kay an sobra pa hini tikang ha usa nga maraot.” (Mat. 5:33-37) Syempre, maaram hi Jesus nga igin-obligar han Mosaiko nga Balaud an pipira nga panumpa ngan an matinumanon nga mga surugoon han Dios naghimo hin mga panumpa. (Gen. 14:22, 23; Ex. 22:10, 11) Maaram liwat hiya nga hi Jehova mismo naghimo hin mga panumpa. (Heb. 6:13-17) Salit diri karuyag sidngon ni Jesus nga diri na gud kita angay manumpa. Lugod, nagpahamangno hiya nga diri manumpa ha mga butang nga diri importante o waray angayan nga katuyoan. Angay naton hunahunaon nga sagrado nga obligasyon an pagtuman han aton saad. Kinahanglan naton buhaton an aton ginsisiring.

Kon sugad, ano an angay mo buhaton kon ginsusugo ka nga manumpa? Siyahan, siguroha nga matutuman mo an imo iginpanumpa. Kon diri ka sigurado, mas maopay nga diri ka na la manumpa. An Pulong han Dios nagpahamangno: “Mas maopay nga diri ka magsaad kay ha magsaad ka nga diri mo gintutuman.” (Ecles. 5:5) Sunod, hunahunaa an mga prinsipyo ha Biblia nga konektado ha panumpa, ngan katapos sunda an imo binansay nga konsensya. Ano an pipira hini nga mga prinsipyo ha Biblia?

May mga panumpa nga uyon ha kaburut-on han Dios. Pananglitan, an mga Saksi ni Jehova naghihimo hin mga saad kon nagpapakasal hira. Ini nga mga saad usa nga klase hin panumpa. Ha atubangan han Dios ngan han mga testigo, an babaye ngan lalaki nagsasaad nga ira hihigugmaon, papaurahon, ngan tatahuron an usa kag usa ngan bubuhaton nira ito ‘samtang buhi hira.’ (Bangin diri ini an eksakto nga mga pulong nga ginyayakan han iba nga ginkakasal, pero naghihimo la gihapon hira hin saad ha atubangan han Dios.) Katapos, iginpapahibaro nga hira mag-asawa na, ngan kinahanglan magpabilin hira nga mag-asawa ha bug-os nira nga kinabuhi. (Gen. 2:24; 1 Cor. 7:39) Ini nga kahikayan husto, angayan, ngan uyon ha kaburut-on han Dios.

May mga panumpa nga kontra ha kaburut-on han Dios. An tinuod nga Kristiano diri manunumpa, pananglitan, ha paggamit hin mga armas basi depensahan an usa nga nasud o ha pagsalikway han pagtoo ha Dios. An pagbuhat hito kontra ha mga sugo han Dios. An mga Kristiano kinahanglan ‘diri [magin] bahin han kalibotan,’ salit diri kita puydi umapi ha mga isyu ngan girra hito.​—Juan 15:19; Isa. 2:4; San. 1:27.

 May mga panumpa nga personal nga desisyon uyon ha konsensya. Usahay, bangin kinahanglan naton turotimbangon hin maopay an usa nga panumpa uyon ha sagdon ni Jesus nga “ihatag ha Cesar an mga butang han Cesar, pero ihatag ha Dios an mga butang han Dios.”​—Luc. 20:25.

Pananglitan, an usa nga Kristiano bangin mag-aplay basi magin tuminungnong ha usa nga nasud o para hin pasaporte ngan mahibaroan niya nga gin-oobligar hiya nga manumpa hin pagkamaunungon. Kon hito nga nasud mangangahulogan ito hin pagpanumpa nga buhaton an usa nga butang nga kontra ha balaud han Dios, an iya binansay ha Biblia nga konsensya diri magtutugot ha iya nga buhaton ito. Pero bangin tugotan hiya han gobyerno nga bag-uhon an mga pulong han panumpa basi itugot han iya konsensya nga manumpa hiya.

An pagpanumpa hin pagkamaunungon nga may ginbag-o nga mga pulong bangin uyon ha prinsipyo nga mababasa ha Roma 13:1, nga nasiring: “An ngatanan nga tawo magpasakop ha higtaas nga mga awtoridad.” Salit bangin magdesisyon an usa nga Kristiano nga waray maraot ha pagpanumpa nga buhaton an usa nga butang nga igin-oobligar na han Dios nga buhaton.

Importante liwat nga sundon mo an imo konsensya kon ginsusugo ka nga gumamit hin butang o magkompas samtang nanunumpa. An kadaan nga mga Romano ngan Escita nanunumpa gamit an ira mga espada, nga ginagamit an simbolo han usa nga dios han girra sugad nga garantiya han ira pagin matataporan. Gin-aalsa han mga Griego an ira kamot ngadto ha langit kon nanunumpa. Hito nga paagi, ginkikilala nira nga may dios nga nakakakita han ginsisiring ngan ginbubuhat ngan ha iya may baratunon an mga tawo.

Syempre, an usa nga surugoon ni Jehova diri manunumpa ha bisan ano nga simbolo han nasud nga konektado ha buwa nga pagsingba. Pero ano man kon hangyoon ka ha korte nga ibutang an imo kamot ha Biblia ngan manumpa nga maghatag hin tinuod nga testimonya? Hito nga kahimtang, bangin magdesisyon ka nga buhaton ito, kay an Kasuratan nagsusumat mahitungod han mga matinumanon nga nanumpa nga may pagkompas. (Gen. 24:2, 3, 9; 47:29-31) Importante nga hinumdoman nga kon naghihimo ka hin sugad nga panumpa, nanunumpa ka ha atubangan han Dios nga magsusumat ka han kamatuoran. Kinahanglan magin andam ka nga ihatag an tinuod nga baton ha bisan ano nga bangin igpakiana ha imo.

Tungod kay an aton relasyon kan Jehova importante ha aton, kinahanglan ta ig-ampo ngan hunahunaon hin maopay an bisan ano nga panumpa nga iginsusugo ha aton, ngan siguruhon nga diri ito kontra ha aton konsensya o ha mga prinsipyo ha Biblia. Kon magdesisyon ka nga manumpa, kinahanglan tumanon mo ito.​—1 Ped. 2:12.