1. Ihulagway an eksena han ginhimo ni Jesus an iya siyahan nga milagro.

 IMADYINA an eksena ha tinikangan han ministeryo ni Jesus ha ikatarapos han 29 C.E. Hi Jesus ngan an iya nanay, hi Maria, ngan an pipira han iya mga disipulo gin-imbitar ha usa nga panagtawo ha kasal ha Cana, usa nga baryo ha norte han Nazaret, an bungto nga gindak-an ni Jesus. Sangkay hi Maria han pamilya ngan posible nga nabulig hiya pag-asikaso han mga bisita. Pero ha panahon han panagtawo, nagkaada problema nga puydi magresulta hin daku nga kaarawdan ha pamilya ngan ha batan-on nga mag-asawa—naubosan hira hin bino. b Bangin mas damu an bisita kay ha ginlalaoman. Hi Maria nagdadagmit nga kinadto ha iya anak ngan nagsiring: “Waray na hira bino.” (Juan 2:1-3) Ano an ginbuhat ni Jesus? Usa nga butang nga urusahon gud—an tubig milagroso nga ginhimo niya nga “maopay nga bino.”—Juan 2:9, 10.

2-3. (a) Ano nga mga milagro an ginhimo ni Jesus? (b) Ano an aton mapapahimulosan ha paghisgot han mga milagro ni Jesus?

² Damu pa an ginhimo ni Jesus nga mga milagro ha panahon han iya ministeryo. c Gin-gamit niya an iya gahum ha pagbulig ha yinukot nga tawo. Pananglitan, ha duha la niya nga milagro—pagpakaon hin 5,000 nga kalalakin-an ngan ha urhi 4,000 nga kalalakin-an—an kadamu bangin inabot hin sobra 27,000 ka tawo kon iuupod naton an kababayin-an ngan kabataan nga nakadto liwat.  (Mat. 14:15-21; 15:32-38) Hiton duha nga panhitabo, gintambal liwat ni Jesus an damu nga may sakit. (Mat. 14:14; 15:30, 31) Imadyina la an kahipausa han mga tawo han milagroso nga gintambal ngan ginpakaon hira ni Jesus!

³ Damu an aton mahibabaroan yana ha mga milagro ni Jesus. Hini nga artikulo, hihisgotan ta an makaparig-on ha pagtoo nga mga leksyon nga maitututdo ha aton hito nga mga milagro. Katapos, hihisgotan ta kon paonan-o naton masusubad an pagpaubos ngan pagpaid nga iginpakita ni Jesus han naghihimo hiya hin mga milagro.

4. Parte kan kanay an mga milagro ni Jesus nagtututdo hin makaparig-on ha pagtoo nga mga leksyon?

⁴ An mga milagro ni Jesus nagtututdo ha aton hin makaparig-on ha pagtoo nga mga leksyon, diri la parte ha iya, kondi parte liwat ha iya Amay. Kay kon huhunahunaon, hi Jehova an tinuod nga gintitikangan hito nga mga milagro. An Buhat 10:38 nagsusumat ha aton: “Gindihogan han Dios [hi Jesus] pinaagi han baraan nga espiritu ngan han gahum, ngan ginlibot niya an tuna nga ginbubuhat an maopay ngan gintatambal an ngatanan nga ginpapasakitan han Yawa, kay an Dios kaupod niya.” Hinumdumi liwat nga ha ngatanan nga ginsiring ngan ginbuhat ni Jesus—upod na an mga milagro nga iya ginhimo—perpekto nga iya ginsubad an panhunahuna ngan inaabat han iya Amay. (Juan 14:9) Pansina an tulo nga leksyon nga aton mahibabaroan ha mga milagro ni Jesus.

5. Ano an nagpagios kan Jesus nga maghimo hin mga milagro? (Mateo 20:30-34)

⁵ Siyahan, hi Jesus ngan an iya Amay nahigugma gud ha aton. Han nakanhi hi Jesus ha tuna, iginpakita niya an iya hilarom nga gugma ha mga tawo pinaagi ha paggamit han iya gahum basi buligan an mga nag-aantos. Makausa, duha nga buta nga lalaki an nakimalooy ha iya nga buligan hira. (Basaha an Mateo 20:30-34.) Pansina nga gintambal hira ni Jesus “tungod ha kalooy.” Sugad han gin-gamit dinhi, an Griego nga berbo nga iginhubad nga “tungod ha kalooy” nagtutudlok ha duro nga pagpaid nga inaabat ha sulod han lawas. Iton hilarom nga pagpaid, nga ekspresyon han gugma, nagpagios liwat kan Jesus nga pakaunon an mga nagugutom ngan tambalon an usa nga may liprosi. (Mat. 15:32; Mar. 1:41) Makakasiguro kita nga hi Jehova, an Dios nga may “malumo nga pagpaid,” ngan an iya Anak nahigugma gud ha aton ngan nasasakit kon nag-aantos kita. (Luc. 1:78; 1 Ped. 5:7) Sigurado nga eksayted gud hira nga tanggalon an ngatanan nga kakurian nga nakakaapekto ha katawohan!

6. Ano nga gahum an iginhatag han Dios kan Jesus?

⁶ Ikaduha, gintagan han Dios hi Jesus hin gahum basi solusyonan an mga problema han ngatanan nga tawo. Pinaagi han mga milagro ni Jesus, iya iginpakita nga kaya niya solusyonan an ngatanan nga problema nga diri gud naton masusulbad kon ha aton la pangalimbasog. Pananglitan, may gahum hiya nga talwason kita tikang ha hinungdan han mga problema han tawo—an napanunod nga sala ngan an mga epekto hito, an sakit ngan kamatayon. (Mat. 9:1-6; Roma 5:12, 18, 19) An iya mga milagro nagpamatuod nga kaya niya tambalon an “tagsa nga klase” han sakit ngan banhawon pa ngani an mga patay. (Mat. 4:23; Juan 11:43, 44) May gahum liwat hiya nga pakalmahon an makusog nga mga bagyo ngan pirdihon an magraot nga espiritu. (Mar. 4:37-39; Luc. 8:2) Makapasarig gud hibaroan nga hi Jehova naghatag hin sugad nga gahum ha iya Anak!

7-8. (a) Ano an iginpapasarig ha aton han mga milagro ni Jesus? (b) Ano nga milagro an ginpapamulat mo gud ha tiarabot nga bag-o nga kalibotan?

⁷ Ikatulo, bug-os nga makakasarig kita nga matutuman an tiarabot nga mga bendisyon nga  hihimoon han Ginhadian han Dios. An mga milagro nga ginhimo ni Jesus han nakanhi hiya ha tuna sugad nga tawo nagtututdo ha aton kon ano an iya bubuhaton ha bug-os nga tuna sugad nga langitnon nga Hadi han Ginhadian han Dios. Pansina kon ano an hirani na naton maeksperyensyahan kon magmando na an Kristo. Magigin perpekto na an aton kahimsog, kay wawad-on niya an tanan nga sakit ngan depekto ha lawas nga nagpapaantos ha mga tawo. (Isa. 33:24; 35:5, 6; Pah. 21:3, 4) Diri na gud kita magugutom o mag-aantos han mga epekto han mga kalamidad. (Isa. 25:6; Mar. 4:41) Magkakaada kita daku nga kalipay ha pagtapo ha aton mga hinigugma tikang ha “handumanan nga mga lubnganan.” (Juan 5:28, 29) Ano nga milagro an ginpapamulat mo gud ha tiarabot nga bag-o nga kalibotan?

⁸ Han naghihimo hi Jesus hin mga milagro, nagpakita hiya hin daku nga pagpaubos ngan pagpaid—mga kalidad nga dapat naton subaron. Hisgotan ta an duha nga ehemplo, siyahan, an rekord han panagtawo ha kasal ha Cana.

9. Ano an ginbuhat ni Jesus ha panagtawo ha kasal? (Juan 2:6-10)

⁹ Basaha an Juan 2:6-10. Han naubos an bino ha panagtawo ha kasal, kinahanglan ba nga may himoon hi Jesus? Diri man. Waray tagna nga an Mesias milagroso nga maghihimo hin bino. Pero imadyina la kon ano an imo aabaton kon naubosan ka hin irimnon ha imo mismo kasal. Posible nga pinaid hi Jesus ha pamilya, labi na ha kinasal, ngan karuyag niya nga diri hira maalohan. Salit sugad han gin-unabi ha tinikangan,  naghimo hiya hin milagro. An tubig—nga mga 390 ka litro—ginhimo niya nga pinakamaopay nga bino. Bangin nagtagana hiya hin sugad kadamu basi may mahisalin nga magagamit ha tiarabot o maibabaligya pa ngani basi makabulig ha pinansyal hinin batan-on nga mag-asawa. Sigurado nga mapasalamaton gud hira!

10. Ano an pipira nga importante nga detalye nga nakarekord ha Juan kapitulo 2? (Kitaa liwat an piktyur.)

¹⁰ Hunahunaa an pipira nga importante nga detalye nga nakarekord ha Juan kapitulo 2. Napansin mo ba nga diri hi Jesus an nagbutang hin tubig ha mga tadyaw nga bato? Imbes nga kuhaon an atensyon basi mahingada ha iya, ginsidngan niya an mga surugoon nga pun-on an mga tadyaw. (Bersikulo 6, 7) Ngan katapos niya himoon nga bino an tubig, diri hiya mismo an nagdara hito ha direktor han panagtawo. Lugod, an mga surugoon an iya ginpadara hito. (Bersikulo 8) Hi Jesus waray kumuha hin kopa nga may bino, ipakita ito ha atubangan han mga bisita, ngan maghambog, ‘Tilawi niyo an bino nga akon pa la ginhimo!’

11. Ano an aton mahibabaroan ha milagro ni Jesus?

¹¹ Ano an aton mahibabaroan ha milagro ni Jesus nga paghimo hin bino tikang ha tubig? Mahibabaro kita hin leksyon ha pagpaubos. Waray ni Jesus ighambog ito nga milagro; ngani, waray gud hiya maghambog han iya mga nahimo. Lugod, mapainubsanon hiya ngan pauroutro nga iginhatag ha iya Amay an tanan nga himaya ngan kadayawan. (Juan 5:19, 30; 8:28) Kon susubaron ta hi Jesus pinaagi ha pagtipig hin mapainubsanon nga panhunahuna ha aton kalugaringon, diri ta ighahambog an aton mga nahimo. Anoman an aton ginbubuhat ha pag-alagad kan Jehova, ighambog ta, diri an aton kalugaringon, kondi an aton harangdon nga Dios nga pribilehiyo naton nga alagaran. (Jer. 9:23, 24) Ihatag naton ha iya an dungog nga angay ha iya. Kay kon huhunahunaon, may mahihimo ba kita nga maopay kon waray an bulig ni Jehova?—1 Cor. 1:26-31.

12. Ano an usa pa nga paagi nga masusubad ta an pagin mapainubsanon ni Jesus? Iilustrar.

¹² Pansina an usa pa nga paagi nga masusubad ta an pagin mapainubsanon ni Jesus. Imadyina ini nga senaryo: Usa nga tigurang an naggagahin hin daku nga panahon basi buligan an usa nga batan-on nga ministeryal nga surugoon ha pag-andam han iya siyahan nga pahayag. Sugad nga resulta, ini nga batan-on nga brother nakahatag hin makapadasig nga pahayag nga naruyagan han kongregasyon. Katapos han katirok, may dinaop ha tigurang ngan nagsiring: ‘Kaopay han pahayag han aton bugto, diri ba?’ Kinahanglan ba an tigurang magsiring: ‘Oo, pero daku nga panahon an akon gin-gahin ha pagbulig ha iya’? O dapat mapainubsanon nga magsiring hiya: ‘Oo balitaw. Proud gud ako ha iya’? Kon mapainubsanon kita, diri ta karuyag nga kita an dayawon tungod han mag-opay nga butang nga ginhihimo naton para ha iba. Kontento na kita nga mahibaroan nga nakikita ngan gin-aapresyar ni Jehova an aton ginbubuhat. (Ikompara an Mateo 6:2-4; Heb. 13:16) Sigurado nga napapalipay naton hi Jehova kon ginsusubad ta hi Jesus ha pagpakita hin pagpaubos.—1 Ped. 5:6.

13. Ano an nakita ni Jesus hirani ha syudad han Nain, ngan ano an iya ginbuhat? (Lucas 7:11-15)

¹³ Basaha an Lucas 7:11-15. Imadyina ini nga eksena nga nahitabo ha kabutngaan han ministeryo ni Jesus. Nagbiyahe hiya ngadto ha Nain, usa nga syudad han Galilea nga hirani ha Sunem, diin mga 900 ka tuig antes hito, ginbanhaw ni propeta Eliseo an anak nga lalaki han usa nga babaye. (2 Hadi 4:32-37) Samtang hi Jesus nagtitikahirani ha ganghaan, may nakita hiya nga prosesyon han lubong nga tipagawas ha syudad. Makasurubo gud an eksena—namatay an usa la  nga anak han usa nga balo. Pero an nabibido nga nanay diri nag-uusahan; gin-uupdan hiya hin damu nga tawo tikang ha syudad. Ginpaundang ni Jesus an prosesyon ngan may ginhimo hiya nga diri ordinaryo para hinin nabibido nga nanay—ginbanhaw ni Jesus an iya anak! Ini an siyahan han tulo nga pagbanhaw ni Jesus nga espisipiko nga iginrekord ha mga Ebanghelyo.

14. Ano an pipira nga importante nga detalye ha rekord ha Lucas kapitulo 7? (Kitaa liwat an piktyur.)

¹⁴ Hunahunaa an pipira nga importante nga detalye ha rekord ha Lucas kapitulo 7. Napansin mo ba nga “nakita” ni Jesus an nabibido nga nanay ngan katapos, “nalooy hiya ha iya”? (Bersikulo 13) Salit, tungod han iya naobserbaran—bangin an pagtinangis han babaye samtang naglalakat hiya ha unhan han lawas han iya anak—pinaid gud hiya ha babaye. Hi Jesus diri la kay inabat hin kalooy ha nanay; iginpakita niya an iya pagpaid. Ginsidngan niya an babaye: “Ayaw na pagtinangis.” Sigurado nga nakakaliaw an tono han iya tingog han ginsiring niya ito. Katapos, may ginhimo hiya basi buligan an babaye. Ginbanhaw ni Jesus an iya anak ngan ‘iginhatag hiya ha iya nanay.’—Bersikulo 14, 15.

15. Ano nga leksyon an aton mahibabaroan ha milagro ni Jesus?

¹⁵ Ano nga leksyon an aton mahibabaroan ha milagro ni Jesus nga pagbanhaw ha anak han balo? Mahibabaroan naton nga kinahanglan ta magpakita hin pagpaid ha mga namatayan. Syempre, diri naton mababanhaw an patay, sugad han ginbuhat ni Jesus. Pero pariho ha iya, puydi ta makultibar an pagpaid ha mga namatayan pinaagi ha pagin maobserbaron. Puydi kita magpakita hin pagpaid pinaagi ha pagyakan ngan pagbuhat han aton mahihimo basi buligan ngan liawon hira. d (Prob. 17:17; 2 Cor. 1:3, 4; 1 Ped. 3:8) Bisan an simple nga mga pulong ngan gudtiay nga buhat makakaliaw gud.

16. Sugad han makikita ha piktyur, ano an imo mahibabaroan ha eksperyensya han usa nga nanay nga bag-o la nga namatayan han iya anak?

¹⁶ Aadi an usa nga eksperyensya. Pipira ka tuig an naglabay samtang nagkakanta ha katirok han kongregasyon, napansin han usa nga sister nga may nanay hirani ha iya nga nagtatangis.  Gin-unabi ha kanta an paglaom nga pagkabanhaw, ngan ito nga nanay bag-o la nga namatayan han iya bata pa nga anak nga babaye. Maaram hito an sister, salit dinaop dayon hiya, gin-agbayan an nanay, ngan nagkanta upod niya tubtob nga natapos an kanta. Ha urhi nagsiring an nanay: “Inabat ko an daku gud nga gugma ha kabugtoan.” Mapasalamaton gud hiya nga inatender hiya ha katirok. “Didto kita nakakakarawat hin bulig,” siring niya, “didto ha Kingdom Hall.” Makakasiguro kita nga napapansin ngan gin-aapresyar ni Jehova bisan an simple naton nga mga buhat nga nagpapakita hin pagpaid ha mga namatayan, nga “rumok an espiritu.”—Sal. 34:18.

17. Ano an aton nahibaroan hini nga artikulo?

¹⁷ An rekord han mga Ebanghelyo parte ha mga milagro ni Jesus puydi magin makaparig-on nga proyekto han pag-aram. Nagtututdo ito ha aton nga hinigugma gud kita ni Jehova ngan ni Jesus, nga may gahum hi Jesus nga solusyonan an mga problema han ngatanan nga tawo, ngan bug-os kita nga makakasarig ha iginsaad nga mga bendisyon han Ginhadian nga hirani na gud mahitabo. Samtang gin-aanalisar naton ito nga mga rekord, puydi ta pamalandungon an mga paagi nga masusubad naton an mga kalidad ni Jesus. Bangin puydi ka mag-eskedyol hin proyekto han personal nga pag-aram o hin Pagsingba han Pamilya nga nakapokus ha iba nga mga milagro ni Jesus. Kitaa kon ano nga mga leksyon an imo makukuha, ngan katapos, ipakiistorya ha iba an imo nahibaroan. Hunahunaa la an makaparig-on nga pag-iristorya nga imo mai-enjoy!—Roma 1:11, 12.

18. Ano an aton hihisgotan ha sunod nga artikulo?

¹⁸ Ha ikatarapos han ministeryo ni Jesus, ginhimo niya an iya ikatulo ngan ultimo nga pagbanhaw nga nakarekord ha Biblia. Pero naiiba ini—nagbanhaw hiya hin hinigugma nga sangkay, ngan ginbuhat niya ito ha diri ordinaryo nga mga kahimtang. Ano nga mga leksyon an aton mahibabaroan ha rekord han Ebanghelyo mahitungod hito nga milagro? Ngan paonan-o ta mapaparig-on an aton pagtoo ha paglaom nga pagkabanhaw? Babatunon ha sunod nga artikulo ito nga mga pakiana.