1. Kay ano nga nakomento kita ha mga katirok?

 KAY ano nga naatender kita ha mga katirok? Siyahan, basi dayawon hi Jehova. (Sal. 26:12; 111:1) Naatender liwat kita ha mga katirok basi madasig naton an usa kag usa hinin makuri nga mga panahon. (1 Tes. 5:11) Kon naalsa kita han aton kamot ngan nakomento, nabulig kita nga matuman inin duha nga katuyoan.

2. Ano an aton mga oportunidad nga magkomento ha aton mga katirok?

² Kada semana, may mga oportunidad kita nga magkomento ha aton mga katirok. Pananglitan, ha mga weekend, puydi kita magkomento ha panahon han pag-aram ha Barantayan. Ha aton mga katirok ha midweek, puydi kita magkomento ha panahon han Espirituwal nga mga Hiyas, Pag-aram ha Biblia han Kongregasyon, ngan iba pa nga bahin nga may paghisgot.

3. Ano nga mga ulang an bangin atubangon naton, ngan paonan-o makakabulig an Hebreo 10:24, 25?

³ Karuyag naton ngatanan nga dayawon hi Jehova ngan dasigon an aton mga igkasi-magsiringba. Pero bangin may makaulang ha aton ha pagkomento. Bangin ginkukulba kita nga magkomento, o bangin karuyag naton nga mas agsob kita makakomento pero usahay diri kita natatawag. Paonan-o ta malalamposan ini nga mga ulang? Makakabulig ha aton an surat ni apostol Pablo ha mga Hebreo. Ha iya paghisgot ha pagkaimportante han pagkatirok, nagsiring hiya nga angay kita magpokus ha ‘pagdinasigay ha usa kag usa.’ (Basaha an Hebreo 10:24, 25.) Kon ginhuhunahuna naton nga bisan an simple nga komento nga nagpapahayag han aton pagtoo puydi na  makadasig ha iba, maiibanan an aton kakulba ha pag-alsa han aton kamot. Ngan kon diri kita agsob matawag, mahimo kita magin malipayon nga an iba ha kongregasyon magkakaada oportunidad nga magkomento.—1 Ped. 3:8.

4. Ano an tulo nga punto nga hihisgotan hini nga artikulo?

⁴ Hini nga artikulo, hihisgotan ta siyahan kon paonan-o naton madadasig an usa kag usa ha gutiay nga kongregasyon nga diri damu an nakomento. Sunod, hihisgotan ta kon paonan-o dadasigon an usa kag usa ha daku nga kongregasyon nga damu an naalsa han ira kamot basi magkomento. Katapos, hihisgotan ta kon paonan-o naton madadasig an iba pinaagi ha aton ginsisiring ha aton komento.

5. Paonan-o ta madadasig an usa kag usa kon gutiay la an naatender?

⁵ Ha gutiay nga kongregasyon o grupo, diri damu an matatawag han nagdudumara basi magkomento. May mga panahon nga bangin kinahanglan hiya maghulat nga may mag-alsa han kamot. Baga hin nagigin boring na an katirok, ngan diri ito makapadasig. Ano an puydi mo buhaton? Magin andam nga pirme mag-alsa han imo kamot. Kon bubuhaton mo ito, puydi mo maaghat an iba nga magkomento hin mas agsob.

6-7. Paonan-o ta maiibanan an aton kakulba ha pagkomento?

⁶ Ano man kon ginkukulba ka pagkomento? Damu an naabat hin sugad hito. Pero basi magin mas makapadasig ha kabugtoan, puydi ka mamiling hin mga paagi nga maibanan an imo kakulba ha pagkomento. Paonan-o mo ito mahihimo?

⁷ Makakabulig ha imo an pagrepaso han pipira nga suhestyon nga iginpublikar ha naglabay nga mga isyu han An Barantayan. b Pananglitan, pag-andam hin maopay. (Prob. 21:5) Kon mas pamilyar ka ha aradman, diri ka duro nga kukulbaon pag-alsa han imo kamot. Halipota liwat an imo mga komento. (Prob. 15:23; 17:27) Kon halipot an imo komento, diri ka duro nga kukulbaon. Bangin mas masayon pa ngani masabtan han kabugtoan an halipot nga komento, pananglitan an usa o duha la nga sentence, kay ha hilaba nga komento nga naghihisgot hin damu nga ideya. Pinaagi ha paghatag hin halipot nga komento ha imo kalugaringon nga mga pulong, maipapakita mo nga nag-andam ka hin maopay ngan nasasabtan mo gud an aradman.

8. Ano an panhunahuna ni Jehova ha aton pinakamaopay nga mga pangalimbasog?

⁸ Ano man kon gintestingan mo na an pipira hini nga mga suhestyon pero ginkukulba ka la gihapon ha pagkomento hin sobra usa o duha ka beses? Sarig nga aapresyaron ni Jehova an imo sinsero nga mga pangalimbasog nga buhaton an imo mahihimo. (Luc. 21:1-4) An paghatag han imo pinakamaopay diri nagpapasabot hin pagbuhat han diri mo kaya. (Fil. 4:5) Hibaroi kon ano an imo mahihimo, magkaada tumong ha pagbuhat hito, ngan pag-ampo nga magin kalmado ka. Ha siyahan, ito nga tumong bangin amo an pagkomento hin halipot bisan makausa la.

9. Ano nga ulang an bangin gin-aatubang han iba ha dagku nga kongregasyon?

⁹ Kon an iyo kongregasyon may damu nga magwarali, bangin iba nga ulang an imo  gin-aatubang. Bangin damu gud nga kabugtoan an naaalsa han ira kamot basi magkomento salit kasagaran na nga diri ka natatawag. Pananglitan, hi Danielle maiha na nga nalilipay pagkomento ha mga katirok. c Para ha iya, bahin ito han iya pagsingba, usa nga paagi ha pagdasig ha iba, ngan usa liwat nga paagi ha pagparig-on han iya pagtoo ha mga kamatuoran ha Biblia. Pero han binalhin hiya ha mas daku nga kongregasyon, diri na hiya agsob matawag—danay diri ngani hiya natatawag bisan makausa la ha bug-os nga katirok. “Nasubo gud ako,” siring niya. “Inabat ko nga baga hin may nawara ha akon nga pribilehiyo. Kon pauroutro ito nga nahitatabo, naghuhunahuna ka na kon gintutuyo ba ito.”

10. Paonan-o ta madudugangan an aton mga oportunidad nga makakomento?

¹⁰ Naabat mo na ba an gin-abat ni Danielle? Kon oo, bangin mahunahuna mo nga diri na mag-alsa han imo kamot ngan mamati na la ha katirok. Pero ayaw pag-undang ha pangalimbasog nga makakomento. Ano an puydi mo buhaton? Bangin makabulig an pag-andam hin pipira nga komento para ha tagsa nga katirok, basi kon diri ka matawag ha tinikangan han pag-aram, magkakaada ka la gihap mga oportunidad nga magkomento samtang nagpapadayon an katirok. Kon nag-aandam para ha pag-aram ha Barantayan, hunahunaa kon ano an koneksyon han tagsa nga parapo ha tema han artikulo. Kon bubuhaton mo ito, posible gud nga may maikukomento ka ha bug-os nga pag-aram. Puydi ka liwat mangandam pagkomento ha mga parapo nga naghihisgot hin mas higlarom nga kamatuoran nga mas makuri isaysay. (1 Cor. 2:10) Kay ano? Kay bangin pipira la an mag-alsa han ira kamot hito nga bahin han pag-aram. Pero ano man kon damu na nga katirok an linabay pero waray ka la gihapon makakomento bisan kon ginsunod mo na ini nga mga suhestyon? Antes han katirok, puydi mo daupon an magdudumara ngan sumatan hiya kon ano nga pakiana an karuyag mo batunon.

11. Ano an igin-aaghat ha aton han Filipos 2:4?

¹¹ Basaha an Filipos 2:4. Ha paggiya han Dios, gin-aghat ni apostol Pablo an mga Kristiano nga panginanoon an kaopayan han iba.  Paonan-o naton maiaaplikar ito nga sagdon ha panahon han mga katirok? Pinaagi ha paghinumdom nga pariho ha aton, karuyag liwat han iba nga magkomento.

12. Ano an usa nga maopay nga paagi nga madadasig ta an iba ha mga katirok? (Kitaa liwat an piktyur.)

¹² Hunahunaa ini. Kon nakikiistorya ka ha imo kasangkayan, ikaw la ba an magyiyinakan salit haros waray na hira higayon nga makayakan? Syempre diri! Karuyag mo nga mag-istorya liwat hira. Ha pariho nga paagi, ha mga katirok, karuyag naton nga damu gud an makakomento kon posible. Ngani, usa han pinakamaopay nga mga paagi ha pagdasig ha aton kabugtoan amo an paghatag ha ira hin higayon nga ipahayag an ira pagtoo. (1 Cor. 10:24) Aton hisgotan kon paonan-o ta ito mahihimo.

13. Paonan-o ta matatagan hin higayon an iba nga mamarati nga makakomento?

¹³ Pananglitan, puydi ta haliputon an aton komento basi mas damu an makapartisipar. Puydi magpakita hin susbaranan an mga tigurang ngan an iba pa nga eksperyensyado nga magwarali. Bisan kon halipot an imo komento, likayi an paghisgot hin sobra kadamu nga punto. Kon kukomentohan mo an tanan nga aada ha parapo, gutiay na la an maikukomento han iba. Pananglitan, hini nga parapo may duha nga suhestyon—halipota an imo komento ngan likayi an paghisgot hin sobra kadamu nga punto. Kon ikaw an siyahan nga tawagon basi magkomento hini nga parapo, pangalimbasugi nga komentohan an usa la hini nga mga punto.

14. Ano an makakabulig ha aton ha pagdesisyon kon ano kaagsob kita mag-aalsa han aton kamot? (Kitaa liwat an piktyur.)

¹⁴ Magin maaramon kon nagdidesisyon kon ano kaagsob ka mag-aalsa han imo kamot basi magkomento. Kon pirme na la kita naalsa han aton kamot, bangin mapresyur an nagdudumara nga tawagon kita hin pauroutro bisan kon waray pa matawag an iba. Tungod hito, bangin diri na ganahan an iba nga mag-alsa han ira kamot.—Ecles. 3:7.

15. (a) Ano an dapat naton magin reaksyon kon diri kita matawag basi magkomento? (b) Paonan-o maipapakita han mga nagdudumara an konsiderasyon ha ngatanan? (Kitaa an kahon nga “ Kon Nagdudumara Ka.”)

 ¹⁵ Kon damu nga magwarali an naalsa han ira kamot ha panahon han pag-aram, bangin diri kita agsob makakomento bisan kon karuyag naton. Usahay bangin diri gud kita matawag han nagdudumara. Makasurubo ito, pero dapat kita mangalimbasog nga diri maglain an aton buot kon diri kita matawag.—Ecles. 7:9.

16. Paonan-o naton madadasig an iba nga nakomento?

¹⁶ Kon diri ka agsob makakomento bisan kon karuyag mo, puydi ka mamati hin maopay samtang nakomento an iba, ngan katapos han katirok pasalamati hira han ira komento. Pariho han imo ikukomento unta, an imo kumendasyon makakadasig liwat ha kabugtoan. (Prob. 10:21) An paghatag hin kumendasyon usa pa nga paagi nga madadasig naton an usa kag usa.

17. (a) Paonan-o mabubuligan han mga kag-anak an ira mga anak nga mag-andam hin angayan nga mga komento? (b) Sumala ha video, ano an upat nga bubuhaton kon nag-aandam hin komento? (Kitaa liwat an footnote.)

¹⁷ Ano an iba pa nga paagi nga madadasig naton an usa kag usa ha aton mga katirok? Kon usa ka nga kag-anak, buligi an imo mga anak nga mag-andam hin mga komento nga angayan ha ira edad. (Mat. 21:16) May mga panahon nga an seryoso nga mga butang sugad  han mga problema ha pag-asawa o isyu ha moral an ginhihisgotan ha pag-aram, pero posible gud nga may usa o duha nga parapo nga puydi komentohan hin bata. Buligi liwat an imo mga anak nga masabtan kon kay ano nga bangin diri hira pirme tawagon kon naalsa hira han ira kamot. An pagsaysay hini makakabulig ha ira nga diri masubo kon iba an tawagon imbes nga hira.—1 Tim. 6:18. d

18. Paonan-o naton malilikyan nga magpokus ha aton kalugaringon kon nakomento? (Proberbios 27:2)

¹⁸ Kita ngatanan makakag-andam hin makaparig-on nga mga komento nga magdadayaw kan Jehova ngan magdadasig ha aton mga igkasi-Kristiano. (Prob. 25:11) Bisan kon ha pana-panahon puydi ta ig-istorya hin halipot an aton mismo eksperyensya, dapat naton likyan an pirme pag-istorya parte ha aton kalugaringon. (Basaha an Proberbios 27:2; 2 Cor. 10:18) Lugod, naniningkamot kita nga pirme magpokus kan Jehova, ha iya Pulong, ngan ha iya katawohan sugad nga grupo. (Pah. 4:11) Syempre, kon an pakiana ha parapo nag-aaghat ha aton nga isumat an aton mismo inaabat, angayan an pagbuhat hito. May ehemplo hini ha sunod nga parapo hini nga artikulo.

19. (a) Ano an magigin resulta kon magigin makonsiderasyon kita ha ngatanan nga naatender? (Roma 1:11, 12) (b) Ano an imo naaapresyar mahitungod ha pagkomento ha mga katirok?

¹⁹ Waray istrikto nga mga surundon kon paonan-o magkukomento, pero kita ngatanan mahimo maningkamot nga magin makapadasig an aton pagpartisipar. Bangin magpasabot ini nga magkukomento kita hin mas agsob. O bangin magpasabot ini nga magigin kontento kita ha aton mga oportunidad nga magkomento ngan malilipay kita nga gin-aapresyar liwat han iba ini nga pribilehiyo. Pinaagi ha pagpokus ha kaopayan han iba ha mga katirok han kongregasyon, kita ngatanan malilipay ha ‘pagdinasigay.’—Basaha an Roma 1:11, 12.