1. Ha ano kita kombinsido?

 SUGAD nga katawohan ni Jehova, maaram kita nga hinigugma niya kita ngan karuyag niya nga magkaada kita han pinakamaopay nga kinabuhi nga posible. (Roma 8:35-39) Kombinsido liwat kita nga an mga prinsipyo ha Biblia pirme mapulsanon ha aton kon gin-aaplikar ta ito. (Isa. 48:17, 18) Pero ano man kon umatubang kita hin mga problema nga diri naton ginlalaoman?

2. Ano nga mga problema an bangin atubangon naton, ngan ano an puydi ta mahunahuna tungod hito?

² An tanan nga surugoon ni Jehova may mga problema. Pananglitan, an usa naton nga kapamilya bangin may mahimo nga makapasubo ha aton. Bangin may-ada kita sakit salit limitado na la an aton nahihimo ha pag-alagad kan Jehova. Bangin maeksperyensyahan ta an nakakadaot nga epekto han usa nga kalamidad. O bangin pagtimarauton kita tungod han aton mga gintotoohan. Kon umatubang kita hin sugad nga mga problema, bangin mahunahuna ta: ‘Kay ano nga nahitatabo ini ha akon? May nabuhat ba ako nga sayop? Nagpapasabot ba ini nga diri ako ginbibendisyonan ni Jehova?’ Inabat ka na ba hin sugad hito? Kon oo, ayaw panluya. Damu han maunungon nga mga surugoon ni Jehova an inabat hin puropariho hito.—Sal. 22:1, 2; Hab. 1:2, 3.

3. Ano an aton mahibabaroan ha Salmo 34:19?

³ Basaha an Salmo 34:19. Pansina an duha nga importante nga punto hini nga salmo: (1) An magtadong nga tawo naatubang hin mga problema. (2) Gintatalwas kita ni Jehova tikang  ha aton mga problema. Paonan-o kita gintatalwas ni Jehova? Usa nga iya ginhihimo amo an pagbulig ha aton nga magkaada reyalistiko nga panhunahuna ha kinabuhi dinhi hini nga sistema. Bisan kon nagsasaad hi Jehova nga magigin malipayon kita ha pag-alagad ha iya, diri hiya naggagarantiya hin kinabuhi nga waray problema yana. (Isa. 66:14) Gin-aaghat ka niya nga magpokus ha aton kabubuwason—an panahon nga magkakaada na kita han kinabuhi nga karuyag niya nga ma-enjoy naton ha kadayonan. (2 Cor. 4:16-18) Ha pagkayana, nabulig hiya ha aton nga padayon nga makag-alagad ha iya kada adlaw.—Pag. 3:22-24.

4. Ano an aton hihisgotan hini nga artikulo?

⁴ Hisgotan ta kon ano an aton mahibabaroan ha ehemplo han matinumanon nga mga magsiringba ni Jehova, ha panahon han Biblia ngan yana. Sugad han aton mahibabaroan, posible kita umatubang hin mga problema nga diri naton ginlalaoman. Pero kon nasarig kita kan Jehova, pirme gud kita niya bubuligan. (Sal. 55:22) Samtang ginhihisgotan ta ito nga mga ehemplo, pakianhi an imo kalugaringon: ‘Ano daw la an akon reaksyon kon puropariho hito an akon sitwasyon? Paonan-o ito nga mga ehemplo nagpaparig-on han akon pagsarig kan Jehova? Ano nga mga leksyon an puydi ko iaplikar ha akon mismo kinabuhi?’

5. Ano nga mga problema an gin-atubang ni Jacob tungod kan Laban? (Kitaa an piktyur ha kobre.)

⁵ An mga surugoon ni Jehova ha panahon han Biblia inatubang hin diri ginlalaoman nga mga problema. Hisgotan ta hi Jacob. Ginsugo hiya han iya tatay nga kumuha hin asawa tikang ha mga anak nga babaye ni Laban, usa nga paryente nga nagsisingba ha Dios, ngan ginpasarig nga hura hiya nga bibendisyonan ni Jehova. (Gen. 28:1-4) Salit ginbuhat ni Jacob an tama. Binaya hiya ha tuna han Canaan ngan nagbiyahe ngadto ha balay ni Laban, nga may duha nga anak nga babaye—hira Leah ngan Raquel. Ginhigugma ni Jacob hi Raquel, an manghod nga anak ni Laban, ngan inuyon nga magtrabaho hin pito ka tuig para ha iya tatay antes hiya pangasaw-on. (Gen. 29:18) Pero waray mahitabo an ginlalaoman ni Jacob. Ginlimbongan hiya ni Laban salit hi Leah, an magurang nga anak ni Laban, an iya napangasawa. Gintugotan ni Laban hi Jacob nga pangasaw-on hi Raquel paglabay hin usa ka semana, pero ha kondisyon nga magtatrabaho hiya hin pito pa ka tuig. (Gen. 29:25-27) Diri liwat patas hi Laban ha iya mga transaksyon kan Jacob. Ha kabug-osan, 20 ka tuig an diri patas nga pagtratar ni Laban kan Jacob!—Gen. 31:41, 42.

6. Ano an iba pa nga mga problema ni Jacob?

⁶ May iba pa nga mga problema hi Jacob. Daku an iya pamilya, pero diri pirme murayaw an relasyon han iya mga anak. Ira pa ngani ginbaligya an ira mismo bugto nga hi Jose basi magin uripon. An duha han mga anak ni Jacob, hira Simeon ngan Levi, nagdara hin kaarawdan ha pamilya ngan ha ngaran ni Jehova. Dugang pa, an hinigugma nga asawa ni Jacob nga hi Raquel namatay samtang nanganganak ha ira ikaduha nga anak. Ngan tungod han grabe nga gutom, napiritan hi Jacob nga bumalhin ha tuna han Ehipto han lagas na hiya.—Gen. 34:30; 35:16-19; 37:28; 45:9-11, 28.

7. Paonan-o iginpakita ni Jehova kan Jacob nga Iya gin-uuyonan hiya?

⁷ Bisan pa hito ngatanan, waray gud hi Jacob mawad-i hin pagtoo kan Jehova ngan ha Iya mga saad. Ngan iginpakita naman ni Jehova kan Jacob nga Iya gin-uuyonan hiya. Pananglitan, bisan pa han malimbong nga pagtratar ni Laban, ginbendisyonan ni Jehova hi Jacob ha materyal nga paagi. Ngan sigurado nga mapasalamaton gud hi Jacob kan Jehova han nagkita hira utro ni Jose—an anak nga maiha na niya  nga ginhuhunahuna nga patay! An duok nga pakigsangkay ni Jacob kan Jehova nakabulig ha iya nga makaya an iya mga problema. (Gen. 30:43; 32:9, 10; 46:28-30) Kon magpapabilin kita nga duok nga sangkay ni Jehova, makakaya liwat naton an diri ginlalaoman nga mga problema.

8. Ano an karuyag buhaton ni Hadi David?

⁸ Hi Hadi David diri makakahimo han tanan nga karuyag niya buhaton ha pag-alagad kan Jehova. Pananglitan, hingyap gud ni David nga magtukod hin templo para ha iya Dios. Iya iginsumat kan propeta Nathan ito nga hingyap. Ini an iginbaton ni Nathan: “Buhata an anoman nga aada ha imo kasingkasing, kay kaupod mo an tinuod nga Dios.” (1 Cron. 17:1, 2) Sigurado nga nakadasig gud kan David ito nga mga pulong. Bangin nagplano dayon hiya para hinin daku nga proyekto.

9. Ano an reaksyon ni David ha makasurubo nga balita?

⁹ Pero waray pag-iha, binalik an propeta ni Jehova nga may dara nga makasurubo nga balita. “Hito mismo nga gab-i,” ginsumatan ni Jehova hi Nathan nga diri hi David an magtutukod han templo; lugod, usa han iya mga anak nga lalaki an magbubuhat hito. (1 Cron. 17:3, 4, 11, 12) Ano an reaksyon ni David han nakarawat niya ini nga mensahe? Ginbag-o niya an iya tumong. Nagpokus hiya ha pagtirok han mga pundo ngan mga materyales nga pagkikinahanglanon han iya anak nga hi Solomon para ha proyekto.—1 Cron. 29:1-5.

10. Paonan-o ginbendisyonan ni Jehova hi David?

¹⁰ Katapos gud sumatan hi David nga diri hiya an magtutukod han templo, naghimo hi Jehova hin kasabotan ha iya. Nagsaad hi Jehova kan David nga usa han iya mga tulin an magmamando ha kadayonan. (2 Sam. 7:16) Ha bag-o nga kalibotan, imadyina la an kalipay ni David kon mahibaroan na niya nga hi Jesus, nga tikang ha iya tulin, amo an Hadi ha Usa ka Yukot ka Tuig nga Pagmando! Ini nga rekord nabulig ha aton nga masabtan nga bisan kon diri ta mahihimo an ngatanan nga aton karuyag buhaton para kan Jehova, an aton Dios bangin may igin-aandam nga iba pa nga mga bendisyon para ha aton nga diri gud naton ginlalaoman.

11. Paonan-o ginbendisyonan an mga Kristiano ha siyahan nga siglo bisan kon waray umabot an Ginhadian ha panahon nga ira ginlalaoman? (Buhat 6:7)

¹¹ An mga Kristiano ha siyahan nga siglo nagkaada diri ginlalaoman nga mga kakurian. Pananglitan, karuyag gud nira nga umabot na an Ginhadian han Dios, pero diri hira maaram kon san-o ito mahitatabo. (Buh. 1:6, 7) Salit ano an ira ginhimo? Nagpabilin hira nga busy ha pagsangyaw nga buruhaton. Samtang nagtitikadamu an mga lugar nga nasasangyawan han maopay nga sumat, nakita nira an pamatuod nga ginbibendisyonan ni Jehova an ira mga pangalimbasog.—Basaha an Buhat 6:7.

12. Ano an ginhimo han mga Kristiano ha siyahan nga siglo han nagkaada gutom?

¹² Makausa, nagkaada duro nga gutom “ha bug-os nga inuukyan nga tuna.” (Buh. 11:28) Naapektohan liwat an mga Kristiano ha siyahan nga siglo. Naiimadyin mo ba an ira pag-antos tungod hinin grabe nga kakulang hin pagkaon? Sigurado nga nabaraka an mga ulo han pamilya kon paonan-o nira matataganahan an ira pamilya. Hunahunaa liwat an mga batan-on nga nagpaplano pagpahaluag han ira ministeryo. Naghunahuna daw la hira nga diri la anay nira idadayon ito nga mga plano? Anoman an kahimtang hito nga mga Kristiano, nagpahiuyon hira. Padayon hira nga nagsangyaw ha bisan ano nga paagi nga ira mahihimo, ngan malipayon nga gintagan nira an ira mga igkasi-tumuroo ha Judea han anoman nga may-ada hira.—Buh. 11:29, 30.

13. Ano nga mga bendisyon an nakarawat han mga Kristiano ha panahon han gutom?

¹³ Ano nga mga bendisyon an nakarawat han  mga Kristiano ha panahon han gutom? Nakita mismo han mga nakakarawat han iginpanhatag nga mga suplay nga hi Jehova nabulig ha ira. (Mat. 6:31-33) Sigurado nga nagin mas duok hira ha ira mga igkasi-tumuroo nga binulig ha ira. Ngan an mga nagdonar o inapi ha panaltag han mga suplay ha iba nga mga paagi nakaeksperyensya han kalipay nga resulta han paghatag. (Buh. 20:35) Hira ngatanan ginbendisyonan ni Jehova kay nagpahiuyon hira ha nagbabag-o nga mga kahimtang.

14. Ano an nahitabo kanda Bernabe ngan apostol Pablo, ngan ano an nagin resulta? (Buhat 14:21, 22)

¹⁴ An mga Kristiano ha siyahan nga siglo agsob pagtimarauton, usahay ha panahon nga diri gud nira ginlalaoman. Hunahunaa an nahitabo kanda Bernabe ngan apostol Pablo samtang nagsasangyaw hira ha Listra. Ha siyahan, malipayon nga gin-abiabi hira han mga namati ha ira. Pero ha urhi, “ginkombinse [han mga nakontra] an mga tawo,” ngan an iba ha ira nagbato kan Pablo ngan ginbayaan nira hiya kay kahuna nira nga patay na hiya. (Buh. 14:19) Pero hira Bernabe ngan Pablo padayon nga nagsangyaw ha iba nga lugar. Ano an nagin resulta? Nakahimo hira hin “damu nga disipulo,” ngan an ira mga pulong ngan ehemplo nagparig-on ha ira mga igkasi-tumuroo. (Basaha an Buhat 14:21, 22.) Damu an nakabenepisyo kay hira Bernabe ngan Pablo waray umundang bisan pa han tigda nga pagtimaraot. Kon diri kita maundang ha buruhaton nga iginsusugo ni Jehova ha aton, bibendisyonan kita.

15. Ano an imo mahibabaroan ha ehemplo ni Brother A. H. Macmillan?

¹⁵ Ha mga tuig antes han 1914, an katawohan ni Jehova may mga ginlalaoman nga mahitatabo. Usa ha ira hi Brother A. H. Macmillan. Pariho han damu hito nga panahon, kahuna ni Brother Macmillan nga hirani na gud niya makarawat an iya langitnon nga balos. Ha usa niya nga pahayag han Septyembre 1914, nagsiring hiya: “Posible nga ini na an akon ultimo nga pahayag publiko.” Syempre, diri ito an iya ultimo nga pahayag. Ha urhi, hi Brother Macmillan nagsurat: “Bangin an iba ha amon nagdali-dali la paghunahuna nga makadto dayon kami ha langit.” Nagsiring pa hiya: “An kinahanglan namon buhaton amo an pagpabilin nga sagipo ha pag-alagad ha Ginoo.” Nagpabilin gud nga busy hi Brother Macmillan. Madasigon hiya ha ministeryo. Nakapribilehiyo hiya nga parig-unon an damu nga kabugtoan nga napriso tungod han ira pagin neutral. Ngan regular hiya nga natambong ha mga katirok han kongregasyon bisan han lagas na hiya. Paonan-o nakabenepisyo hi Brother Macmillan ha paggamit hin maopay han iya panahon samtang iya ginhuhulat an balos ha iya? Han hirani na hiya mamatay han 1966, nagsurat hiya: “Waray gud magluya an akon pagtoo.” Maopay gud ito nga disposisyon nga dapat subaron naton ngatanan—labi na kon an aton pag-ilob ha mga kakurian mas maiha na kay han aton ginlalaoman!—Heb. 13:7.

16. Ano nga diri ginlalaoman nga problema an gin-agian ni Herbert Jennings ngan han iya asawa? (Santiago 4:14)

¹⁶ Damu han katawohan ni Jehova an nagkakaada diri ginlalaoman nga mga sakit. Pananglitan, iginsaysay ni Brother Herbert Jennings b ha iya istorya han kinabuhi an kalipay niya ngan han iya asawa ha ira toka sugad nga mga misyonero ha Ghana. Pero paglabay han panahon, nadayagnos hiya nga may grabe nga mood disorder. Ginkotar ni Brother Jennings an Santiago 4:14 ngan gintawag an iya bag-o nga sitwasyon nga “usa nga ‘buwas’ nga diri namon ginlalaoman.” (Basaha.) Nagsurat hiya: “Kinahanglan namon magin reyalistiko, salit nagplano kami nga bumaya ha Ghana ngan ha amon damu nga  duok nga kasangkayan ngan bumalik ha Canada [para magpatambal].” Ginbuligan ni Jehova hi Brother Jennings ngan an iya asawa nga makapadayon ha pag-alagad hin matinumanon bisan pa han problema nga ira gin-aagian.

17. Paonan-o an susbaranan ni Brother Jennings nakabulig ha iya mga igkasi-tumuroo?

¹⁷ An tangkod nga mga ginsiring ni Brother Jennings ha iya istorya han kinabuhi nagkaada daku nga epekto ha iba. Usa nga sister an nagsurat: “Ha ngatanan nga artikulo nga akon nabasa, yana la ako nabantad hin sugad hini. . . . An pakabasa nga kinahanglan bayaan ni Brother Jennings an iya toka basi asikasuhon an iya sakit nakabulig ha akon nga magkaada balanse nga panhunahuna ha akon sitwasyon.” May brother liwat nga nagsurat: “Tigurang ako ha kongregasyon ha sulod hin napulo ka tuig, pero kinahanglan ko bayaan an akon pribilehiyo tungod han sakit ha hunahuna. Inabat ko gud nga pakyas ako salit agsob ako madepres kon ginbabasa ko an mga artikulo nga istorya han kinabuhi. . . . Pero naparig-on ako han pagkamapailubon ni Brother Jennings.” Nagpapahinumdom ini ha aton nga kon gin-iilob ta an diri ginlalaoman nga mga problema, madadasig naton an iba. Bisan kon an nahitatabo ha aton kinabuhi iba kay han aton ginlalaoman, puydi la gihapon kita magin buhi nga susbaranan han pagtoo ngan pagpailob.—1 Ped. 5:9.

18. Ano an imo mahibabaroan ha susbaranan han usa nga balo ha Nigeria, sugad han makikita ha mga piktyur?

¹⁸ Damu han katawohan ni Jehova an naapektohan han mga trahedya sugad han COVID-19 nga pandemya. Pananglitan, an usa nga balo ha Nigeria may gutiay na gud la nga pagkaon ngan kwarta nga nabibilin. Usa ka aga, ginpakianhan hiya han iya anak nga babaye kon ano an ira kakaunon katapos nira maluto an ira ultimo nga takos han bugas. Ginsidngan han aton sister an iya anak nga waray na hira nabibilin nga kwarta o pagkaon pero dapat nira subaron an balo ha Zarepat—iandam an ira ultimo nga pagkaon ngan bug-os nga sumarig kan Jehova. (1 Hadi  17:8-16) Waray pa ngani hira magtikang paghunahuna kon ano an ira magigin paniudto hito nga adlaw, nakakarawat na hira hin surudlan nga may mga suplay nga relief tikang ha kabugtoan. An pagkaon ha sulod hito eksakto na para ha sobra duha ka semana. Siring han sister nga waray niya mahunahuna nga namamati ngay-an hin maopay hi Jehova ha iya iginsumat ha iya anak. Oo, kon nasarig kita kan Jehova, an aton diri ginlalaoman nga mga problema makakabulig pa ngani ha aton nga magin mas duok ha iya.—1 Ped. 5:6, 7.

19. Ano nga pagtimaraot an gin-ilob ni Aleksey Yershov?

¹⁹ Hinin bag-o la nga mga tuig, damu han aton kabugtoan an nag-ilob hin pagtimaraot nga posible nga diri nira ginlalaoman. Usa ha ira hi Brother Aleksey Yershov, nga naukoy ha Russia. An katawohan ni Jehova hito nga lugar may kagawasan pa han ginbawtismohan hi Brother Yershov han 1994. Pero paglabay han mga tuig, nagbag-o an sitwasyon ha Russia. Han 2020, gin-raid ngan ginhalughog an balay ni Brother Yershov, ngan damu han iya mga panag-iya an ginkompiskar. Paglabay hin pipira ka bulan, an gobyerno nagpasaka hin mga kaso kriminal kontra ha iya. An mas maraot pa gud, an mga akusasyon iginbasar ha mga video rekording tikang ha tawo nga sobra usa ka tuig nga nagpakunokuno nga interesado mag-aram han Biblia. Pagtraydor gud ito!

20. Paonan-o ginpaparig-on ni Brother Yershov an iya relasyon kan Jehova?

²⁰ May maopay ba nga resulta an pagtimaraot nga gin-antos ni Brother Yershov? Oo. Nagin mas marig-on an iya relasyon kan Jehova. “Mas agsob na kami nga mag-asawa mag-ampo nga magkaupod,” siring niya. “Maaram ako nga diri ko maiilob ini nga sitwasyon kon waray an bulig ni Jehova.” Nagsiring liwat hiya: “An personal nga pag-aram nabulig ha akon nga maatohan an panluya. Napapamalandong ko an mga ehemplo han matinumanon nga mga surugoon ha naglabay. Damu an mga rekord ha Biblia nga nagpapakita kon ano kaimportante an pagpabilin nga kalmado ngan pagsarig kan Jehova.”

21. Ano an aton nahibaroan hini nga artikulo?

²¹ Ano an aton nahibaroan hini nga artikulo? Usahay nakakaeksperyensya kita hin diri ginlalaoman nga mga problema hini nga sistema. Bisan pa hito, hi Jehova pirme nabulig ha iya mga surugoon kon nasarig hira ha iya. Sugad han ginsisiring ha aton tema nga teksto, “damu an kakurian han matadong, pero gintatalwas hiya ni Jehova tikang hito ngatanan.” (Sal. 34:19) Hinaot padayon kita nga magpokus, diri ha aton mga kakurian, kondi ha gahum ni Jehova ha pagparig-on. Ha pagbuhat hito, pariho kan apostol Pablo, makakasiring kita: “Ha ngatanan nga butang may kusog ako pinaagi ha iya nga naghahatag ha akon hin gahum.”—Fil. 4:13.