1. Paonan-o iginyakan han usa nga bata an iya paglaom ha pagkabanhaw?

 AN BATA nga hi Matthew may grabe nga sakit salit makadamu hiya gin-operahan. Han syete anyos hiya, hira han iya pamilya nagkita han binulan nga programa ha JW Broadcasting^®. Ha ikatarapos han programa, may nakita hira nga music video mahitungod ha pagtapo ha mga hinigugma ha panahon han pamanhaw. b Katapos han programa, dinaop hi Matthew ha iya mga kag-anak, ginkaptan an ira mga kamot, ngan nagsiring: “Mama, Papa, nakita niyo, diri ba? Bisan kon mamatay ako, magmamata ako ha panahon han pamanhaw. Hulata la ako; mahitatabo ito.” Naiimadyin mo ba kon ano an sigurado nga inabat hito nga mga kag-anak han nahibaroan nira nga tinuod gud ha ira anak an paglaom nga pagkabanhaw?

2-3. Kay ano nga maopay nga pamalandungon ta an saad nga pagkabanhaw?

² Maopay nga pamalandungon ta ha panapanahon an tiarabot nga pagkabanhaw nga iginsaad han Biblia. (Juan 5:28, 29) Kay ano? Kay diri gud kita maaram kon san-o kita bangin magkaada grabe nga sakit o tigda nga mamatayan hin hinigugma. (Ecles. 9:11; San. 4:13, 14) An aton paglaom ha pagkabanhaw makakabulig ha aton nga mailob an sugad nga mga problema. (1 Tes. 4:13) Ginpapasarig kita han Kasuratan nga kilala gud kita ngan hinigugma han aton langitnon nga Amay. (Luc. 12:7) Hunahunaa la kon ano kita kakilala ni Jehova nga Dios salit kaya kita niya larangon utro nga amo la gihapon an personalidad ngan mga hinumdoman. Ngan hinigugma gud kita ni Jehova salit tatagan kita niya han oportunidad nga mabuhi ha waray kataposan, pinaagi pa ngani ha pagbanhaw ha aton engkaso mamatay kita!

³ Hini nga artikulo, siyahan aton hihisgotan kon kay ano nga makakatoo kita ha saad nga pagkabanhaw. Sunod, aton uusisahon  an makaparig-on ha pagtoo nga rekord han Biblia diin mababasa an mga pulong han aton tema nga teksto: “Mabubuhi an imo bugto.” (Juan 11:23) Katapos, mahibabaroan ta kon ano an aton mahihimo basi magin mas tinuod ha aton an paglaom nga pagkabanhaw.

4. Basi tumoo ha usa nga saad, ha ano kita dapat magin kombinsido? Iilustrar.

⁴ Basi tumoo ha usa nga saad, kinahanglan kombinsido kita nga an nagsasaad may hingyap ngan gahum, o abilidad, ha pagtuman hito. Ha pag-ilustrar: Sidngon ta nga daku an naruba ha imo balay tungod han bagyo. May sangkay ka nga kinadto ha imo ngan nagsaad, ‘Bubuligan ko ikaw nga matukod utro an imo balay.’ Sinsero hiya, ngan kombinsido ka nga karuyag ka niya buligan. Kon may skill hiya ha pagtukod ngan han kinahanglanon nga mga garamiton, maaram ka nga mahihimo liwat niya ito. Salit natoo ka ha iya saad. Kon sugad, kumusta man an saad han Dios nga pagkabanhaw? May-ada gud ba hiya hingyap ngan gahum nga tumanon ito?

5-6. Kay ano nga makakasiguro kita nga may hingyap hi Jehova nga banhawon an mga patay?

⁵ May hingyap ba hi Jehova nga banhawon an mga patay? Oo. Damu nga nagsurat han Biblia an iya gin-giyahan nga irekord an iya saad nga magkakaada pagkabanhaw ha tiarabot. (Isa. 26:19; Hos. 13:14; Pah. 20:11-13) Ngan kon may iginsasaad hi Jehova, pirme niya ito gintutuman. (Jos. 23:14) Ngani, karuyag gud ni Jehova buhion an mga patay. Kay ano nga makakasiring kita hito?

⁶ Pansina an ginsiring han patriarka nga hi Job. Sigurado hiya nga bisan pa hiya mamatay, mahihidlaw ha iya hi Jehova ngan maruruyag nga makita hiya nga buhi utro. (Job 14:14, 15, ftn.) Hi Jehova may sugad liwat nga kahidlaw ha ngatanan nga magsiringba niya nga namatay. Karuyag gud niya hira buhion nga mahimsog ngan malipayon. Kumusta man an binilyon nga nagkamatay nga waray magkaada oportunidad nga mahibaro han kamatuoran mahitungod kan Jehova? Karuyag liwat hira banhawon han aton mahigugmaon nga Dios. (Buh. 24:15) Karuyag niya nga magkaada hira oportunidad nga magin iya mga sangkay ngan mabuhi ha waray kataposan dinhi ha tuna. (Juan 3:16) Klaro nga may hingyap hi Jehova nga banhawon an mga patay.

7-8. Kay ano nga makakasiguro kita nga may gahum hi Jehova nga banhawon an mga patay?

⁷ May gahum ba liwat hi Jehova nga banhawon an mga patay? Oo! Hiya “an Makagarahum-ha-ngatanan.” (Pah. 1:8) Salit may gahum hiya nga pirdihon an bisan ano nga kaaway, bisan an kamatayon. (1 Cor. 15:26) An paghibaro hito nagpaparig-on ngan nagliliaw ha aton. Pansina an eksperyensya ni Sister Emma Arnold. Hiya ngan an iya pamilya inatubang hin grabe nga mga pagsari ha ira pagtoo han Girra ha Kalibotan II. Basi liawon an iya anak nga babaye kay namatayan hira hin mga hinigugma ha mga concentration camp han mga Nazi, nagsiring hi Emma: “Kon permanente an kamatayon, karuyag sidngon mas gamhanan ito kay ha Dios, diri ba?” Sigurado nga waray bisan ano nga mas gamhanan kan Jehova! An makagarahum-ha-ngatanan nga Dios nga naglarang han kinabuhi may gahum nga ibalik an kinabuhi han mga namatay.

⁸ Usa pa nga rason kon kay ano nga maaram kita nga kaya han Dios banhawon an mga patay kay waray tubtoban an iya abilidad ha paghinumdom. An tagsa nga bitoon iya gintatawag ha ngaran. (Isa. 40:26) Nahinunumdoman liwat niya an mga namatay. (Job 14:13; Luc. 20:37, 38) Masayon la niya mahinumdoman an tagsa nga detalye parte hadton iya babanhawon, upod na an ira hitsura, personalidad, mga eksperyensya, ngan mga hinumdoman.

9. Kay ano nga natoo ka ha iginsaad ni Jehova nga pagkabanhaw ha tiarabot?

 ⁹ Klaro nga makakatoo kita ha saad ni Jehova nga magkakaada pagkabanhaw ha tiarabot kay maaram kita nga may hingyap hiya ngan gahum nga tumanon ito. Aadi an usa pa nga rason nga makakatoo kita ha saad han Dios nga pagkabanhaw: Nahimo na ito ni Jehova. Ha panahon han Biblia, gintagan niya hin gahum an pipira nga matinumanon nga kalalakin-an, upod na hi Jesus, nga banhawon an mga patay. Hisgotan ta an rekord mahitungod ha usa han mga pagbanhaw nga ginbuhat ni Jesus, nga nakarekord ha Juan kapitulo 11.

10. Ano an nahitabo ha Betania samtang hi Jesus nagsasangyaw ha tabok han Jordan, ngan ano an iya ginbuhat? (Juan 11:1-3)

¹⁰ Basaha an Juan 11:1-3. Imadyina an eksena ha Betania ha ikatarapos han 32 C.E. Hi Jesus may duok nga kasangkayan hini nga baryo—hi Lazaro ngan an iya duha nga bugto nga hira Maria ngan Marta. (Luc. 10:38-42) Pero hi Lazaro nagkasakit, ngan nababaraka an iya mga bugto. Nagpadara hira hin mensahe kan Jesus, nga nakadto ha tabok han Jordan, nga mga duha ka adlaw nga pagbaktas tikang ha Betania. (Juan 10:40) Makasurubo kay namatay hi Lazaro ha panahon nga inabot kan Jesus an mensahero. Bisan kon maaram hi Jesus nga namatay pa la an iya sangkay, nagpabilin hiya didto hin duha pa ka adlaw, katapos nagbiyahe hiya ngadto ha Betania. Salit pag-abot ni Jesus, upat na ka adlaw nga patay hi Lazaro. May bubuhaton hi Jesus nga mabulig ha iya kasangkayan ngan maghihimaya ha Dios.—Juan 11:4, 6, 11, 17.

11. Ano nga leksyon mahitungod ha pagin sangkay an aton mahibabaroan tikang hini nga rekord?

¹¹ Tikang hini nga rekord, may mahibabaroan kita nga leksyon mahitungod ha pagin sangkay. Hunahunaa ini: Han iginpadara nira Maria ngan Marta an mensahe ngadto kan Jesus, waray nira hiya hangyoa nga kumadto ha Betania. Nagsiring la hira nga may sakit an iya hinigugma nga sangkay. (Juan 11:3) Han namatay hi Lazaro, kaya unta hiya banhawon ni Jesus bisan hiya hirayo. Pero nagdesisyon hi Jesus nga kumadto ha Betania basi makaupod an iya kasangkayan nga hira Maria ngan Marta. May sangkay ka ba nga mabulig ha imo bisan diri mo hiya hangyoon? Kon sugad, maaram ka nga masasarigan mo nga mabulig hiya ha “mga panahon han kasakitan.” (Prob. 17:17) Pariho kan Jesus, hinaot magin sugad kita hito nga sangkay! Yana balikon ta an rekord ngan kitaon an sunod nga nahitabo.

12. Ano an iginsaad ni Jesus kan Marta, ngan kay ano nga makakatoo hiya hito nga saad? (Juan 11:23-26)

¹² Basaha an Juan 11:23-26. Nahibaroan ni Marta nga hi Jesus hirani na ha Betania. Nagdagmit hiya pagtapo kan Jesus ngan nagsiring: “Ginoo, kon nakanhi ka la, waray unta mamatay an akon bugto.” (Juan 11:21) Oo, puydi unta matambal ni Jesus hi Lazaro. Pero may nahunahuna hiya nga buhaton nga mas espesyal pa gud. Nagsaad hiya: “Mabubuhi an imo bugto.” Gintagan liwat niya hi Marta hin dugang nga rason nga tumoo ha iya saad pinaagi ha pagsiring: “Ako an pagkabanhaw ngan an kinabuhi.” Oo,  gintagan hiya han Dios hin gahum ha kinabuhi ngan kamatayon. Antes hito, may ginbanhaw hi Jesus nga bata nga babaye nga bag-o pa la nga namatay ngan may ginbanhaw liwat hiya nga batan-on nga lalaki, posible gud nga ha adlaw nga namatay ito nga lalaki. (Luc. 7:11-15; 8:49-55) Pero mababanhaw ba niya an upat ka adlaw na nga patay ngan an lawas nagtikang na madunot?

13. Sugad han nakarekord ha Juan 11:32-35, ano an reaksyon ni Jesus han nakita niya an pagtinangis ni Maria ngan han iba? (Kitaa liwat an piktyur.)

¹³ Basaha an Juan 11:32-35. Imadyina an sunod nga nahitabo. Hi Maria, an usa pa nga bugto ni Lazaro, ginawas basi tapoon hi Jesus. Ginyakan liwat niya an ginsiring han iya bugto: “Ginoo, kon nakanhi ka la, waray unta mamatay an akon bugto.” Masurub-on gud hiya ngan an iya mga kaupod. Han nakita ngan nabatian ni Jesus an ira pagtinangis, nasubo gud hiya. Pinaid gud hiya ha iya kasangkayan salit nanuro an iya mga luha. Maaram hiya kon ano kasakit an mamatayan hin hinigugma. Sigurado nga karuyag gud niya wad-on an hinungdan han ira pagtinangis!

14. Ano an aton mahibabaroan mahitungod kan Jehova ha reaksyon ni Jesus ha pagtinangis ni Maria?

¹⁴ An reaksyon ni Jesus ha pagtinangis ni Maria nagtututdo ha aton nga hi Jehova mapinairon gud nga Dios. Kay ano nga masisiring naton ito? Ha nauna nga artikulo, nahibaroan ta nga perpekto nga ginsusubad ni Jesus an panhunahuna ngan inaabat han iya Amay. (Juan 12:45) Salit kon nababasa naton nga pinaid gud hi Jesus ha iya nasusubo nga kasangkayan salit nagtangis hiya, masisiring naton nga hi Jehova liwat nalolooy gud ha aton kon nagtatangis kita tungod han kasubo. (Sal. 56:8) Diri ba nakakaaghat ito ha imo nga maruyag nga magin mas duok ha aton mapinairon nga Dios?

15. Sugad han nakasurat ha Juan 11:41-44, ano an nahitabo ha lubnganan ni Lazaro? (Kitaa liwat an piktyur.)

¹⁵ Basaha an Juan 11:41-44. Inabot hi Jesus ha lubnganan ni Lazaro ngan naghangyo nga kuhaon an bato nga takop hito. Binaribad hi Marta; siring niya nga sigurado nga mabaho na an lawas. Binaton hi Jesus: “Diri ba ginsidngan ko ikaw nga kon tumoo ka makikita mo an himaya han Dios?” (Juan 11:39, 40) Katapos, hinangad hi Jesus ngan nag-ampo ha publiko. Karuyag  niya ihatag kan Jehova an ngatanan nga kadayawan ha sunod nga mahitatabo. Katapos, ginuliat hi Jesus: “Lazaro, gawas!” Ngan ginawas hi Lazaro ha lubnganan! Ginbuhat pa la ni Jesus an ginhunahuna han iba nga imposible.—Kitaa an study note han Juan 11:17.

16. Paonan-o an rekord nga mababasa ha Juan kapitulo 11 nagpaparig-on han aton pagtoo ha paglaom nga pagkabanhaw?

¹⁶ An rekord nga mababasa ha Juan kapitulo 11 nagpaparig-on han aton pagtoo ha paglaom nga pagkabanhaw. Kay ano? Hinumdumi an saad ni Jesus kan Marta: “Mabubuhi an imo bugto.” (Juan 11:23) Pariho han iya Amay, hi Jesus may hingyap ngan gahum nga tumanon ito nga saad. Iginpakita han iya mga luha nga may-ada hiya kinasingkasing nga hingyap nga wad-on an kamatayon ngan an kasubo nga resulta hito. Ngan ha takna mismo nga ginawas hi Lazaro ha lubnganan, ginpamatud-an utro ni Jesus nga may gahum hiya nga banhawon an mga patay. Hunahunaa liwat an iginpahinumdom ni Jesus kan Marta: “Diri ba ginsidngan ko ikaw nga kon tumoo ka makikita mo an himaya han Dios?” (Juan 11:40) May mag-opay kita nga rason nga tumoo nga tutumanon han Dios an iya iginsaad nga pagkabanhaw. Pero ano an puydi ta himoon basi magin mas tinuod ha aton ini nga paglaom?

17. Ano an angay ta hinumdoman kon nagbabasa kita ha Biblia hin mga rekord parte ha pagkabanhaw?

¹⁷ Basaha ngan pamalandonga an mga pagkabanhaw nga nahitabo han naglabay. Mababasa ha Biblia an walo nga rekord han mga tawo nga ginbanhaw dinhi ha tuna. c Admi hin maopay an tagsa nga rekord. Samtang ginbubuhat mo ito, hinumdumi nga tinuod hira nga mga tawo—kalalakin-an, kababayin-an, ngan kabataan. Pamiling hin mga leksyon nga puydi mo mahibaroan. Hunahunaa kon paonan-o iginpapakita han tagsa nga ehemplo an hingyap ngan gahum han Dios nga buhion an mga patay. Labaw ha  ngatanan, pamalandonga an pinakaimportante nga pagkabanhaw—an kan Jesus. Hinumdumi nga an iya pagkabanhaw ginpamatud-an han ginatos nga nakakita ngan naghahatag ha aton hin marig-on nga basihan para ha aton pagtoo.—1 Cor. 15:3-6, 20-22.

18. Paonan-o mo magagamit hin maopay an aton mga kanta mahitungod ha paglaom nga pagkabanhaw? (Kitaa liwat an footnote.)

¹⁸ Gamita hin maopay an “espirituwal nga mga kanta” nga nag-uunabi han paglaom nga pagkabanhaw. d (Efe. 5:19) Ini nga mga kanta nabulig basi magin mas tinuod ha aton an pagkabanhaw ngan nagpaparig-on han aton pagtoo hinin presyoso nga paglaom. Pamatii ito, praktisa ito, ngan hisguti ha iyo pagsingba han pamilya an kahulogan han mga liriko. Tipigi ha imo hunahuna ngan kasingkasing an mga liriko, basi kon umatubang ka hin problema nga maninelikado an imo kinabuhi o mamatayan ka hin hinigugma, an espiritu ni Jehova mabulig ha imo nga mahinumdoman ini nga mga kanta ngan maliliaw ka ngan mapaparig-on hito.

19. Ano an puydi ta maimadyin parte ha pagkabanhaw? (Kitaa an kahon nga “ Ano an Imo Ipapakiana ha Ira?”)

¹⁹ Gamita an imo imahinasyon. Gintagan kita ni Jehova han abilidad ha pag-imadyin han aton kalugaringon ha bag-o nga kalibotan. Usa nga sister an nagsiring: “Daku na gud nga panahon an akon nagamit ha pag-imadyin han akon kalugaringon ha bag-o nga kalibotan, salit sugad hin nahahamot ko na an mga rosas nga namumukad ha Paraiso.” Imadyina an pakiistorya ha matinumanon nga kalalakin-an ngan kababayin-an nga nabuhi ha panahon han Biblia. Hin-o an karuyag mo gud makaistorya? Ano an imo ipapakiana ha iya? Imadyina liwat an pagkirigta niyo utro han imo mga hinigugma nga nagkamatay. Hunahunaa an mga detalye hito—an siyahan nga iyayakan, an mahigugmaon nga mga hangkop, an mga luha han kalipay.

20. Ano an angay ta magin determinasyon?

²⁰ Mapasalamaton gud kita ha saad ni Jehova nga pagkabanhaw! Makakasiguro kita nga matutuman ini nga saad, kay hi Jehova may hingyap ngan gahum nga tumanon ito. Magin determinado kita nga padayon nga parig-unon an aton pagtoo hinin presyoso nga paglaom. Ha pagbuhat hito, magigin mas duok gud kita ha Dios nga sugad hin nagsasaad ha tagsa ha aton, ‘Mabubuhi an imo mga hinigugma!’