ARADMAN NGA ARTIKULO 19
Paonan-o Naton Mapaparig-on an Aton Pagtoo ha Saad ni Jehova nga Bag-o nga Kalibotan?
“Kon may ginsisiring [hi Jehova], diri ba niya ito bubuhaton?”—NUM. 23:19.
KARANTAHON 142 Marig-on nga Tipigi an Aton Paglaom
MAHITUNGOD HAN ARTIKULO a
1-2. Ano an kinahanglan ta buhaton samtang ginhuhulat an bag-o nga kalibotan?
MAPASALAMATON gud kita ha saad ni Jehova nga ini nga sistema sasaliwnan niya hin matadong nga bag-o nga kalibotan. (2 Ped. 3:13) Bisan kon diri kita maaram kon san-o gud ito maabot, iginpapakita han ebidensya nga diri na maiha an aton paghulat.—Mat. 24:32-34, 36; Buh. 1:7.
2 Ha pagkayana, anoman kita kaiha ha kamatuoran, kinahanglan parig-unon ta ngatanan an aton pagtoo hito nga saad. Kay ano? Kay bisan an marig-on nga pagtoo mahimo magluya. Ngani, an kakulang hin pagtoo gintawag ni apostol Pablo nga “an sala nga masayon la makasangbod ha aton.” (Heb. 12:1) Basi malikyan an pagluya han aton pagtoo, kinahanglan regular nga repasuhon naton an ebidensya nga nagpapamatuod nga hirani na umabot an bag-o nga kalibotan.—Heb. 11:1.
3. Ano an hihisgotan ta hini nga artikulo?
3 Hini nga artikulo, hihisgotan naton an tulo nga paagi nga mapaparig-on ta an aton pagtoo ha saad ni Jehova nga bag-o nga kalibotan: (1) pinaagi ha pagpamalandong han lukat, (2) pinaagi ha paghunahuna han gahum ni Jehova, ngan (3) pinaagi ha paggahin hin panahon ha espirituwal nga mga buruhaton. Katapos, hihisgotan ta kon paonan-o an mensahe ni Jehova kan Habakuk nagpaparig-on han aton pagtoo yana. Pero siyahan, hisgotan ta an pipira nga sitwasyon nga bangin naieksperyensyahan naton yana nga nagkikinahanglan hin marig-on nga pagtoo ha saad nga bag-o nga kalibotan.
MGA SITWASYON NGA NAGKIKINAHANGLAN HIN MARIG-ON NGA PAGTOO
4. Ano nga mga desisyon an nagkikinahanglan hin marig-on nga pagtoo?
4 Kada adlaw, naghihimo kita hin mga desisyon nga nagkikinahanglan hin marig-on nga pagtoo. Pananglitan, naghihimo kita hin mga desisyon parte ha aton mga kaupod, kaliawan, edukasyon, pag-asawa, mga anak, ngan sekular nga trabaho. Maopay nga pakianhan ta an aton kalugaringon: ‘Nakikita ba ha akon mga desisyon nga sigurado ako nga temporaryo la ini nga sistema ngan hirani na ini saliwnan han bag-o nga kalibotan han Dios? O an akon ba mga desisyon impluwensyado han mga tawo nga nagkikinabuhi nga sugad hin an kamatayon an kataposan han ngatanan?’ (Mat. 6:19, 20; Luc. 12:16-21) Hihimoon naton an pinakamaopay nga mga desisyon kon paparig-unon ta an aton pagtoo nga hirani na an bag-o nga kalibotan.
5-6. Kay ano nga kinahanglan ta an marig-on nga pagtoo ha mga panahon han kasakitan? Iilustrar.
5 Naatubang liwat kita hin mga problema nga nagkikinahanglan hin marig-on nga pagtoo. Bangin pagtimarauton kita, magkaada grabe nga sakit, o umatubang hin iba nga sitwasyon nga puydi makapaluya ha aton. Ha siyahan, bangin abaton ta nga kaya naton mailob an aton problema. Pero kon mag-iiha ito—sugad han agsob mahitabo—magkikinahanglan kita hin marig-on nga pagtoo basi makailob ngan padayon nga makag-alagad kan Jehova hin malipayon.—Roma 12:12; 1 Ped. 1:6, 7.
6 Kon may problema kita, bangin abaton ta nga diri na gud maabot an bag-o nga kalibotan ni Jehova. Nagpapasabot ba ini nga maluya an aton pagtoo? Diri man. Pansina an usa nga ilustrasyon. Kon damu ka semana na nga nag-iinuran, bangin abaton ta nga diri na mapakita an adlaw. Pero naabot an panahon nga nagigin masirak gihap. Ha pariho nga paagi, kon nanluluya gud kita, bangin abaton ta nga diri na gud maabot an bag-o nga kalibotan. Pero kon marig-on an aton pagtoo, maaram kita nga matutuman an mga saad han Dios. (Sal. 94:3, 14, 15; Heb. 6:17-19) Tungod hito nga pagsarig, padayon ta nga uunahon ha aton kinabuhi an pagsingba kan Jehova.
7. Ano nga panhunahuna an kinahanglan ta likayan?
7 Hunahunaa an usa pa nga sitwasyon nga nagkikinahanglan hin marig-on nga pagtoo—an pagsangyaw nga buruhaton. Damu han aton ginsasangyawan an naghuhunahuna nga diri katoohan an “maopay nga sumat” parte ha tiarabot nga bag-o nga kalibotan han Dios. (Mat. 24:14; Ezek. 33:32) Diri ta gud karuyag nga matapnan kita han ira pagin maruhaduhaon. Basi diri ito mahitabo, kinahanglan padayon ta nga parig-unon an aton pagtoo. Hisgotan ta an tulo nga paagi nga mahihimo naton ito.
PAMALANDONGA AN LUKAT
8-9. Paonan-o an pagpamalandong ha lukat makakaparig-on han aton pagtoo?
8 Usa nga paagi nga mapaparig-on ta an aton pagtoo amo an pagpamalandong ha lukat. An lukat naggagarantiya nga matutuman an mga saad han Dios. Kon ginhuhunahuna ta hin maopay kon kay ano nga igintagana an lukat ngan kon ano an ginkinahanglan basi maihatag ito, nagririg-on an aton pagtoo nga matutuman an saad han Dios nga kinabuhi nga waray kataposan ha mas maopay nga kalibotan. Kay ano nga makakasiring kita hito?
9 Ano an ginkinahanglan basi maihatag an lukat? Ginsugo ni Jehova tikang ha langit an iya hinigugma nga suhag nga Anak, an iya pinakaduok nga kaupod, basi ig-anak sugad nga perpekto nga tawo. Han nakanhi hi Jesus ha tuna, gin-ilob niya an ngatanan nga klase hin kakurian. Katapos, nag-antos hiya ngan namatay ha masakit nga paagi. Daku hinduro nga kantidad an iginbayad ni Jehova! Diri gud tutugotan han aton mahigugmaon nga Dios nga mag-antos ngan mamatay an iya Anak basi la kita tagan hin mas maopay kondi halipot hinduro nga kinabuhi. (Juan 3:16; 1 Ped. 1:18, 19) Tungod kay daku hinduro nga kantidad an iginbayad ni Jehova, sisiguruhon niya nga magkakaada kita kinabuhi nga waray kataposan ha bag-o nga kalibotan.
HUNAHUNAA AN GAHUM NI JEHOVA
10. Sumala ha Efeso 3:20, ano an kaya himoon ni Jehova?
10 An ikaduha nga paagi nga mapaparig-on ta an aton pagtoo amo an paghunahuna han gahum ni Jehova. May gahum hiya nga tumanon an tanan nga iya iginsaad. Damu yana an naghuhunahuna nga imposible matuman an saad nga kinabuhi nga waray kataposan ha bag-o nga kalibotan. Pero hi Jehova agsob magsaad hin mga butang nga diri gud mahihimo han mga tawo. Kay kon huhunahunaon, hiya an Makagarahum-ha-ngatanan nga Dios. (Job 42:2; Mar. 10:27) Lalaoman ba naton nga ordinaryo la nga mga saad an iya hihimoon?—Basaha an Efeso 3:20.
11. Paghatag hin usa nga ehemplo han diri ordinaryo nga mga saad han Dios. (Kitaa an kahon nga “ Pipira nga Diri Ordinaryo nga mga Saad nga Natuman.”)
11 Pansina an pipira nga iginsaad ni Jehova ha iya katawohan ha naglabay nga baga hin imposible mahitabo. Ginpasarig niya hira Abraham ngan Sarah nga magkakaanak hira bisan kon lagas na hira. (Gen. 17:15-17) Ginsidngan liwat Niya hi Abraham nga ihahatag ha iya mga tulin an tuna han Canaan. Ha damu ka tuig nga uripon ha Ehipto an mga tulin ni Abraham, an mga Israelita, posible nga nahunahuna nira nga baga hin diri gud matutuman ito nga saad. Pero natuman ito. Ha urhi, iginsumat ni Jehova nga magkakaanak an edaran na nga hi Elizabeth. Ginsidngan liwat ni Jehova hi Maria, nga usa nga birhen, nga ig-aanak niya an Iya mismo Anak, nga magigin katumanan han iginsaad ni Jehova ha garden han Eden yinukot ka tuig na an naglabay!—Gen. 3:15.
12. Ano an iginpapasarig ha aton han Josue 23:14 ngan Isaias 55:10, 11 mahitungod han gahum ni Jehova?
12 Kon ginhuhunahuna naton an pagtuman ni Jehova han ngatanan niya nga saad, nagigin mas marig-on an aton pagtoo ha iya gahum nga tumanon an iya saad nga bag-o nga kalibotan. (Basaha an Josue 23:14; Isaias 55:10, 11.) Tungod hito nagigin mas andam kita nga buligan an iba nga masabtan nga an iginsaad nga bag-o nga kalibotan diri kay inop la, o susmatanon. Ini an ginsiring ni Jehova mismo mahitungod ha bag-o nga langit ngan bag-o nga tuna: “Ini nga mga pulong matinumanon ngan tinuod.”—Pah. 21:1, 5.
PAGGAHIN HIN PANAHON HA ESPIRITUWAL NGA MGA BURUHATON
MGA KATIROK
Paonan-o an tagsa hini nga espirituwal nga mga buruhaton makakaparig-on han imo pagtoo? (Kitaa an parapo 13)
13. Paonan-o mapaparig-on han mga katirok an aton pagtoo? Isaysay.
13 An ikatulo nga paagi nga mapaparig-on ta an aton pagtoo amo an paggahin hin panahon ha espirituwal nga mga buruhaton. Pananglitan, hunahunaa kon paonan-o kita nagpapahimulos ha aton mga katirok. Hi Anna, nga damu na ka dekada nga nakikigbahin ha iba-iba nga klase han bug-os-panahon nga pag-alagad, nagsiring: “An mga katirok nabulig basi magpabilin nga marig-on an akon pagtoo. Bisan kon an mamumulong diri sugad kaopay magtutdo o diri na bag-o an iya ginyayakan, agsob nga may nababatian ako nga nabulig ha akon nga mas masabtan an usa nga kamatuoran ha Biblia, ngan nagpaparig-on ito han akon pagtoo.” b Mapaparig-on liwat an aton pagtoo kon namamati kita ha mga komento han aton kabugtoan.—Roma 1:11, 12; 10:17.
MINISTERYO
Paonan-o an tagsa hini nga espirituwal nga mga buruhaton makakaparig-on han imo pagtoo? (Kitaa an parapo 14)
14. Paonan-o an ministeryo nagpaparig-on han aton pagtoo?
14 Napaparig-on ta liwat an aton pagtoo kon nakikigbahin kita ha ministeryo. (Heb. 10:23) Hi Barbara, nga sobra 70 ka tuig na nga nag-aalagad kan Jehova, nagsiring: “Maiha ko na nga naobserbaran nga nagpaparig-on han pagtoo an pagsangyaw. Kon mas nakikiistorya ako ha iba parte ha mag-opay gud nga saad ni Jehova, mas nagririg-on an akon pagtoo.”
PERSONAL NGA PAG-ARAM
Paonan-o an tagsa hini nga espirituwal nga mga buruhaton makakaparig-on han imo pagtoo? (Kitaa an parapo 15)
15. Paonan-o an personal nga pag-aram nagpaparig-on han aton pagtoo? (Kitaa liwat an mga piktyur.)
15 May usa pa nga espirituwal nga buruhaton nga nagpaparig-on han aton pagtoo: an personal nga pag-aram. Para kan Susan, nakakabulig ha iya an pag-eskedyol han iya pag-aram. Siring niya: “Kon Domingo, nag-aaram ako para ha pag-aram ha Barantayan ha sunod nga semana. Kon Lunes ngan Martes, nag-aandam ako para ha katirok ha midweek. An iba naman nga mga adlaw han semana para ha akon project ha personal nga pag-aram.” Tungod kay ginsusunod ni Susan an iya eskedyol ha pag-aram, padayon niya nga napaparig-on an iya pagtoo. Para naman kan Irene, nga damu na ka dekada nga nag-aalagad ha world headquarters, an pag-aram ha mga tagna ha Biblia nagpaparig-on han iya pagtoo. Siring niya: “Naiimpres gud ako nga natutuman bisan an pinakagutiay nga detalye han mga tagna ni Jehova.” c
“SIGURADO NGA MATUTUMAN ITO”
16. Kay ano nga mapulsanon ha aton yana an pasarig ni Jehova kan Habakuk? (Hebreo 10:36, 37)
16 An iba han mga surugoon ni Jehova maiha na nga naghihinulat ha kataposan hini nga sistema. Bangin hunahunaon han iba nga baga hin nalalangan an katumanan han saad han Dios. Nasasabtan ni Jehova ito nga kabaraka. Ngani, ginpasarig niya hi propeta Habakuk: “An bisyon mahitatabo ha itinanda nga panahon hito, ngan nagdadagmit ito ngadto ha kataposan hito, ngan diri ito magbubuwa. Bisan kon malangan ito, padayon ito nga pamulata! Kay sigurado nga matutuman ito. Diri ito maaatrasado!” (Hab. 2:3) Para la ba kan Habakuk ito nga pasarig han Dios? O may kapulsanan ha aton yana an Iya mga pulong? Ha paggiya han Dios, gin-aplikar ni apostol Pablo ito nga mga pulong ha mga Kristiano, nga naghihinulat han bag-o nga kalibotan. (Basaha an Hebreo 10:36, 37.) Oo, makakasiguro kita nga bisan kon baga hin nalalangan an iginsaad ha aton nga katalwasan, “sigurado nga matutuman ito. Diri ito maaatrasado!”
17. Paonan-o gin-aplikar han usa nga sister an sagdon ni Jehova kan Habakuk?
17 Damu nga surugoon ni Jehova an nag-aaplikar han sagdon ni Jehova nga ‘padayon nga pamulaton’ an kataposan—an iba ha sulod hin damu na ka tuig. Pananglitan, hi Louise nagtikang pag-alagad kan Jehova han 1939. Nagsiring hiya: “Hito nga panahon, kahuna ko maabot an Armagedon antes ako maggradwar ha hayskul. Waray ito mahitabo. Ha paglabay han mga tuig, nakabulig ha akon an pagbasa han gintatawag ko nga ‘mga rekord han paghulat’—an mga istorya ha Biblia parte kan Noe, kan Abraham, kan Jose, ngan ha iba pa nga kinahanglan maghulat hin maiha antes makarawat an iginsaad nga balos tikang kan Jehova. An padayon nga pagpamulat nakabulig ha akon ngan ha iba nga magin kombinsido nga hirani na gud an bag-o nga kalibotan.” Damu pa nga maiha na nga magsiringba ni Jehova an nauyon hito!
18. Paonan-o an pag-obserbar ha mga linarang nagpaparig-on han aton pagtoo ha tiarabot nga bag-o nga kalibotan?
18 Oo, waray pa an bag-o nga kalibotan. Pero hunahunaa an mga aanhi—pananglitan, an mga bitoon, an kakahoyan, an mga hayop, ngan an imo mga igkasi-tawo. Waray maghuhunahuna nga ini ngatanan diri tinuod, bisan kon may panahon hadto nga waray pa ini. Yana aanhi na ini tungod la kay ginlarang ini ni Jehova. (Gen. 1:1, 26, 27) Katuyoan liwat han Dios nga maghimo hin bag-o nga kalibotan. Tutumanon niya ito nga katuyoan. Ha bag-o nga kalibotan, mai-enjoy na han mga tawo an kinabuhi nga waray kataposan nga may perpekto nga kahimsog. Sugad la nga tinuod an uniberso, an bag-o nga kalibotan magigin tinuod liwat ha itinanda nga panahon han Dios.—Isa. 65:17; Pah. 21:3, 4.
19. Paonan-o mo mapaparig-on an imo pagtoo?
19 Ha pagkayana, buhata an ngatanan nga imo mahihimo basi maparig-on an imo pagtoo. Magin mapasalamaton pirme ha lukat. Hunahunaa an gahum ni Jehova. Paggahin hin panahon ha espirituwal nga mga buruhaton. Ha pagbuhat hito, magigin usa ka ha “mga nakakapanunod han mga saad pinaagi han pagtoo ngan pagpailob.”—Heb. 6:11, 12; Roma 5:5.
KARANTAHON 139 Handurawa an Bag-o nga Kalibotan
a Damu yana an diri natoo ha saad han Biblia nga bag-o nga kalibotan. Para ha ira inop la ito, susmatanon, imposible mahitabo. Pero sigurado kita nga matutuman an tanan nga saad ni Jehova. Bisan pa hito, kinahanglan maningkamot la gihap kita nga padayon nga parig-unon an aton pagtoo. Paonan-o? Isasaysay ito hini nga artikulo.
b Ginsaliwnan an iba nga ngaran.
c Damu nga artikulo mahitungod ha mga tagna ha Biblia an makikita ilarom han topiko nga “Prophecy” ha Watch Tower Publications Index. Pananglitan, kitaa an artikulo nga “Kon Ano an Igintatagna ni Jehova Natutuman” ha Enero-Marso 2008 nga isyu han An Barantayan.
