1. Ano an espirituwal nga paraiso, ngan ano an dapat naton magin determinasyon?

 MAY paraiso yana ha tuna nga puno hin kinabuhi ngan buruhaton. Minilyon nga tawo an aada hito ngan nag-i-enjoy han totoo nga kamurayawan. Adton aada na hini nga paraiso determinado nga diri gud bumaya. Karuyag liwat nira nga damu gud nga tawo an umapi ha ira tubtob nga posible hinin kakaiba nga kahimtang. Ano ito? An espirituwal nga paraiso! a

2. Ano an nakakaimpres mahitungod ha espirituwal nga paraiso?

² Nakakaimpres gud nga naghimo hi Jehova hin murayaw nga palibot ha butnga hinin kalibotan ni Satanas nga puno hin kangalas, karaotan, ngan peligro. (1 Juan 5:19; Pah. 12:12) Nakikita han aton mahigugmaon nga Dios an nakakadaot nga epekto hini nga sistema han mga butang ngan nagtatagana hiya hin seguridad nga aton kinahanglan basi padayon nga makag-alagad hin malipayon. Iginhulagway han Iya Pulong an espirituwal nga paraiso sugad nga talwas nga “arayopan” ngan “garden nga ginsaribohan hin maopay.” (Isa. 4:6; 58:11) Pinaagi han bendisyon ni Jehova, an mga naukoy hini nga paraiso naabat hin kalipay ngan seguridad hinin makuri nga kataposan nga mga adlaw.—Isa. 54:14; 2 Tim. 3:1.

3. Ano an katumanan han Isaias kapitulo 65 ha kadaan nga panahon?

³ Pinaagi kan propeta Isaias, iginhulagway ni Jehova an magigin kahimtang hadton maukoy ha espirituwal nga paraiso. Makikita mo ini nga paghulagway ha Isaias kapitulo 65, nga may una nga katumanan han 537 B.C.E. Hito nga panahon, ginpagawas an mabinasulon nga mga Judio tikang ha pagkabihag ha Babilonya  ngan binalik hira ha ira tuna nga natawhan. Ginbendisyonan ni Jehova an iya katawohan ngan ginbuligan hira nga himoon nga mahusay utro an ginbungkag nga syudad han Jerusalem ngan ipahiuli an templo hito sugad nga sentro han tinuod nga pagsingba ha Israel.—Isa. 51:11; Zac. 8:3.

4. Ano an katumanan han Isaias kapitulo 65 ha moderno nga panahon?

⁴ An ikaduha nga katumanan han tagna ni Isaias nagtikang han 1919 C.E. han an mga magsiringba ni Jehova ha moderno nga panahon nakagawas tikang ha pagkabihag ha Babilonya nga Gamhanan. Katapos, nagtikahaluag an espirituwal nga paraiso ha bug-os nga tuna. An madasigon nga mga parasamwak han Ginhadian nagporma hin damu nga kongregasyon ngan nagkaada espirituwal nga mga bunga. An kalalakin-an ngan kababayin-an nga bayolente ngan imoral hadto ‘nagsul-ot han bag-o nga personalidad nga ginlarang uyon ha kaburut-on han Dios.’ (Efe. 4:24) Syempre, an damu nga bendisyon nga iginhulagway ni Isaias literal nga matutuman ha tiarabot nga bag-o nga kalibotan. Pero bisan yana hura kita nga nagpapahimulos. Kitaon naton kon paonan-o ini nga espirituwal nga paraiso nakakaapekto ha aton ngan kon kay ano nga dapat diri gud kita bumaya.

KON ANO AN INAABAT HADTON AADA HA ESPIRITUWAL NGA PARAISO

5. Sugad han iginsaad han Isaias 65:​13, ano an aton napapahimulsan ha sulod han espirituwal nga paraiso?

⁵ Mahimsog ngan narepreskohan. Iginpapakita ha tagna ni Isaias an daku nga kaibahan han kinabuhi hadton aada ha sulod han espirituwal nga paraiso ngan hadton aada ha gawas. (Basaha an Isaias 65:13.) Hura nga igintatagana ni Jehova an espirituwal nga mga panginahanglan han iya mga magsiringba. May-ada kita han iya baraan nga espiritu, an iya sinurat nga Pulong, ngan an hura nga espirituwal nga pagkaon basi kita ‘makakaon, makainom, [ngan] magrayhak.’ (Ikompara an Pahayag 22:17.) Kabaliktaran gud ito han mga aadto ha gawas han espirituwal nga paraiso nga ‘nagugutom, nauuhaw, [ngan] nag-aantos hin kaarawdan.’ Diri gud naihahatag ha ira an ira espirituwal nga mga panginahanglan.—Amos 8:11.

6. Paonan-o iginhuhulagway han Joel 2:​21-24 an aton espirituwal nga mga tagana, ngan kon paonan-o kita nagpapahimulos hito?

⁶ Ha tagna ni Joel, gin-gamit niya an kinahanglanon nga mga butang sugad han lugas, bino, ngan lana nga olibo basi ipakita nga hi Jehova mahinatagon nga nagtatagana ha iya katawohan han ira kinahanglan, upod na an espirituwal nga pagkaon. (Joel 2:​21-24) Ginbubuhat niya ito pinaagi han Biblia, han aton mga publikasyon nga basado ha Biblia, han aton website, pati na han aton mga katirok, asembleya, ngan kombensyon. Mahimo kita makapahimulos han espirituwal nga mga tagana kada adlaw, ngan sugad nga resulta, magigin mas mahimsog kita ngan mas marirepreskohan.

7. Ano an naghahatag ha aton han “maopay nga kahimtang han kasingkasing”? (Isaias 65:14)

⁷ Malipayon ngan kontento. An katawohan han Dios ‘makakasinggit hin malipayon’ kay an ira kasingkasing puno gud hin apresasyon. (Basaha an Isaias 65:14.) An makaparig-on nga mga kamatuoran ngan nakakaliaw nga mga saad han Pulong han Dios ngan an aton marig-on nga paglaom nga basado ha halad lukat han Kristo naghahatag ha aton hin “maopay nga kahimtang han kasingkasing.” An pakiistorya ha aton kabugtoan mahitungod hini nga mga butang maghahatag ha aton hin tinuod nga kalipay!—Sal. 34:8; 133:​1-3.

8. Ano an duha nga nangunguna nga pangirilal-an han espirituwal nga paraiso?

⁸ An gugma ngan pagkaurosa han katawohan ni Jehova amo an duha nga nangunguna nga kalidad han espirituwal nga paraiso. Ini nga “bugkos han pagkaurosa” naghahatag ha aton hin ideya kon ano an magigin kinabuhi ha bag-o  nga kalibotan, diin an mga surugoon ni Jehova magigin mas mahigugmaon ngan nagkakaurosa kay han ira ginbubuhat yana. (Col. 3:14) Usa nga sister an nagsiring kon ano an iya napansin mahitungod ha katawohan ni Jehova han nakilala niya hira: “Diri ako maaram kon paonan-o magigin malipayon, bisan ha akon pamilya. Siyahan ko nga nakita nga an mga tawo naghihigugmaay, han nakilala ko an mga Saksi ni Jehova.” An bisan hin-o nga naruruyag magin malipayon gud ngan kontento kinahanglan makasulod ha aton espirituwal nga paraiso. Anoman an hunahunaon han kalibotan ha mga surugoon ni Jehova, may-ada hira dungganon nga ngaran, o reputasyon, kaupod han ngatanan nga nagsisingba ha iya.—Isa. 65:15.

9. Ano an iginsasaad han Isaias 65:​16, 17 mahitungod ha mga problema han kinabuhi?

⁹ Relaks ngan kalmado. An Isaias 65:14 nasiring nga adton nagpabilin ha gawas han espirituwal nga paraiso “mangangaraba tungod han kasakit han kasingkasing ngan magngunguyngoy . . . tungod han masurub-on nga espiritu.” Pero kumusta man an ngatanan nga butang nga hinungdan han kasakit ngan pag-antos han katawohan han Dios? Ha urhi, ito nga mga butang ‘mahingangalimtan [ngan] itatago ito tikang ha mga mata [han Dios].’ (Basaha an Isaias 65:​16, 17.) Wawad-on ni Jehova an aton mga problema, ngan ha urhi diri na gud naton mahinunumdoman an mga epekto hito ha aton.

10. Kay ano nga inaabat mo nga bendisyon nga makaupod an Kristiano nga kabugtoan? (Kitaa liwat an piktyur.)

¹⁰ Bisan yana, mahimo kita magin kalmado kon aadto kita ha aton Kristiano nga mga katirok, diin puydi kita marelaks ngan diri magpokus ha mga butang hinin maraot nga kalibotan nga nakakapaistres ha aton. Nabubuligan liwat naton an aton kabugtoan nga magin kalmado kon iginpapakita naton an gugma, kalipay, kamurayawan, pagkabuotan, ngan pagin malumo nga mga bahin han bunga han espiritu han Dios. (Gal. 5:​22, 23) Bendisyon gud para ha aton nga makaapi ha organisasyon han Dios! Adton magpapabilin ha espirituwal nga paraiso makakakita han bug-os nga katumanan han saad han Dios nga “bag-o nga mga langit ngan hin bag-o nga tuna.”

11. Sumala ha Isaias 65:​18, 19, paonan-o dapat makaapekto ha aton an espirituwal nga paraiso nga ginlarang ni Jehova?

¹¹ Mapasalamaton ngan eksayted. Sunod, iginsaysay ni Isaias kon kay ano nga dapat kita ‘magrayhak ngan maglipay’ ha espirituwal nga paraiso. Hi Jehova an naglarang hinin simboliko nga paraiso. (Basaha an Isaias 65:​18, 19.) Diri urusahon nga ginagamit kita ni Jehova nga giyahan an mga tawo nga bumaya ha mga organisasyon hini nga kalibotan, nga diri nagtututdo han kamatuoran  mahitungod ha Dios, ngan buligan hira nga magin bahin han aton mahusay nga simboliko nga paraiso! Eksayted kita ha mga bendisyon nga aton napapahimulsan kay aadi kita ha kamatuoran, ngan napapagios kita nga sumatan an iba mahitungod hito.—Jer. 31:12.

12. Ano an imo inaabat ha mga saad nga iginhulagway ha Isaias 65:​20-24, ngan kay ano?

¹² Malipayon liwat kita ngan eksayted mahitungod ha paglaom nga may-ada kita sugad nga mga residente ha espirituwal nga paraiso. Hunahunaa la an ngatanan naton nga makikita ngan bubuhaton ha bag-o nga kalibotan han Dios! An Biblia nagsasaad: “Diri na magkakaada hin minasus-an . . . nga mabubuhi hin pipira la ka adlaw, o hin lagas nga diri makakakompleto han iya mga adlaw. . . . Magtutukod [kita] hin mga balay ngan maukoy dida hito, ngan magtatanom . . . hin mga urubasan ngan makaon han mga bunga hito. . . . Diri [kita] maniniguro pagtrabaho hin waray la pulos” tungod kay “binendisyonan [kita] ni Jehova.” Nagsasaad hiya ha aton hin kinabuhi nga may seguridad, makalilipay, ngan may tinuod nga katuyoan. “Antes pa hira tumawag,” maaram na hiya han mga panginahanglan han kada tagsa ngan “gintatagbaw an hingyap han tagsa nga buhi nga linarang.”—Isa. 65:​20-24; Sal. 145:16.

13. Paonan-o iginhuhulagway han Isaias 65:25 an mga pagbag-o nga ginhimo han mga tawo ha ira kinabuhi han nag-alagad hira kan Jehova?

¹³ Naabat hin pagin murayaw ngan pagin talwas. Ha bulig han espiritu han Dios, damu nga bayolente, agresibo, o diri tangkod hadto an naghimo hin dagku nga pagbag-o ha ira kinabuhi. (Basaha an Isaias 65:25.) Naningkamot hira nga wad-on an ira diri mag-opay nga kalidad. (Roma 12:2; Efe. 4:​22-24) Syempre, an katawohan han Dios diri la gihapon perpekto, salit padayon kita nga makakasayop. Pero gin-urosa ni Jehova an “ngatanan nga klase hin tawo” ha diri nabubungkag nga bugkos han gugma ngan kamurayawan. (Tito 2:11) Milagro ini nga an makakahimo la an Dios nga makagarahum-ha-ngatanan!

14. Paonan-o an Isaias 65:25 nagin tinuod ha kinabuhi han usa nga brother?

¹⁴ Mababag-o gud ba han mga tawo an ira personalidad? Pansina ini nga eksperyensya. An usa nga batan-on nga lalaki nga sulod-gawas ha prisohan han mga 20 anyos hiya, nahidabi gud ha imoral ngan bayolente nga pagkinabuhi. Napriso hiya tungod han pag-carnap, pangawat ha balay, ngan iba pa nga seryoso nga krimen. Andam hiya pirme makig-away. Han siyahan nga nabatian niya an kamatuoran tikang ha Biblia ngan nagtikang pagtambong ha mga katirok han mga Saksi ni Jehova, nakombinse hiya nga may katuyoan an kinabuhi—an pagsingba kan Jehova ha espirituwal nga paraiso. Han nabawtismohan hiya, agsob hiya maghunahuna kon paonan-o an Isaias 65:25 naaplikar ha iya. Nagbag-o hiya tikang ha pagin sugad leon nga bayolente nga tawo ngadto ha sugad karnero nga mamurayawon nga tawo.

15. Kay ano nga karuyag naton nga imbitaron an iba nga magin kaapi naton ha espirituwal nga paraiso, ngan paonan-o naton ito mabubuhat?

¹⁵ An Isaias 65:13 gintitikangan hini nga deklarasyon: “Ini an siring ni Jehova nga Soberano nga Ginoo.” An bersikulo 25 gintatapos hini nga mga pulong “nasiring hi Jehova.” An iya mga pulong pirme natutuman. (Isa. 55:​10, 11) May-ada na yana espirituwal nga paraiso. Naglarang hi Jehova hin usa nga pamilya han mga magsiringba nga naiiba gud. Naieksperyensyahan naton an kamurayawan ngan an pag-abat han pagin talwas hinin bayolente nga kalibotan kay bahin kita hini nga pamilya. (Sal. 72:7) Tungod hini nga mga rason, karuyag naton buligan an damu nga tawo tubtob nga posible nga magin kaapi han aton Kristiano nga pagminagburugto. Mabubuhat naton ini pinaagi ha pagpokus ha panhimo hin mga disipulo.—Mat. 28:​19, 20.

 KON PAONAN-O NATON MAIENGGANYO AN IBA HA ESPIRITUWAL NGA PARAISO

16. Ano an nakakaengganyo ha mga tawo nga umapi ha espirituwal nga paraiso?

¹⁶ An kada usa ha aton may importante nga papel nga mahihimo basi magin nakakaengganyo ha iba an espirituwal nga paraiso. Matutuman naton ini nga papel kon susubaron naton hi Jehova. Diri niya ginpipirit an mga tawo nga sumulod ha iya organisasyon. Lugod, may pagkabuotan nga ‘iginpapahirani’ niya an mga tawo ha iya. (Juan 6:44; Jer. 31:3) An sinsero nga mga tawo nga nahibabaro mahitungod ha gugma ni Jehova ngan han iya maopay gud nga personalidad, natural la nga napahirani ha iya. Paonan-o naton maiengganyo an mga tawo ha espirituwal nga paraiso, pinaagi han aton mag-opay nga kalidad ngan panggawi?

17. Paonan-o naton maiengganyo an iba ha espirituwal nga paraiso?

¹⁷ An usa nga paagi nga maiengganyo naton an iba ha espirituwal nga paraiso amo an pagin mahigugmaon ngan pagin buotan ha aton mga igkasi-magsiringba. Kon natambong an mga bag-ohan ha aton mga katirok ha kongregasyon, karuyag naton nga abaton nira an pariho han gin-abat han mga diri tumuroo nga posible nga inatender ha mga katirok ha kadaan nga Corinto. Hira nagsiring: “An Dios aada gud ha iyo.” (1 Cor. 14:​24, 25; Zac. 8:23) Salit dapat naton padayon nga sundon an sagdon nga “makigmurayaw . . . ha usa kag usa.”—1 Tes. 5:13.

18. Ano an bangin makaengganyo ha mga tawo ha aton organisasyon?

¹⁸ Dapat pirme naton pangalimbasogan nga kitaon an aton kabugtoan sugad han pagkita ni Jehova ha ira. Ginhihimo naton ito pinaagi ha pagpokus han ira mag-opay nga kalidad ngan diri ha ira mga kaluyahan, nga ha urhi mawawara. Masusulbad naton an bisan ano nga mga diri pagsinabtanay ha mahigugmaon nga paagi kon pirme kita ‘buotan ha usa kag usa, malumo nga  napaid, hura nga nagpapasaylo ha usa kag usa.’ (Efe. 4:32) Katapos, an espirituwal nga paraiso makakaengganyo ha mga tawo nga naruruyag trataron ha pariho nga paagi. b

AYAW PAGBAYA HA ESPIRITUWAL NGA PARAISO

19. (a) Sugad han iginpapakita ha kahon nga “ Binaya Hira Ngan Binalik,” ano an ginsiring han iba katapos nira bumalik ha espirituwal nga paraiso? (b) Ano an dapat naton magin determinasyon? (Kitaa liwat an piktyur.)

¹⁹ Gin-aapresyar gud naton an aton espirituwal nga paraiso! Mas mahusay gud ito kay ha naglabay, ngan gin-uukyan ito hin mas damu nga magsiringba ni Jehova kay ha naglabay. Hinaot padayon kita nga magin mapasalamaton ha paraiso nga ginlarang ni Jehova para ha aton. An bisan hin-o nga naruruyag marepreskohan, magin kontento, magin kalmado, ngan umabat hin pagin talwas dapat sumulod ha espirituwal nga paraiso ngan diri gud bumaya! Pero paghirot, kay hi Satanas naniningkamot paglimbong ha aton basi bumaya kita. (1 Ped. 5:8; Pah. 12:9) Dapat diri naton hiya tugotan nga maglampos. Maniguro gud kita nga protektaran an kahusay, kaputli, ngan kamurayawan han espirituwal nga paraiso.