1. Ano an karuyag ni Jehova nga buhaton naton?

 AN USA han pinakamakalilipay nga panhitabo han mag-asawa amo an katawo han ira mahimsog nga anak. Pero bisan kon nalilipay an mga kag-anak ha ira katatawo pa la nga anak, diri nira karuyag nga magpabilin hiya nga minasus-an. Ngani, nababaraka gud hira kon diri hiya nadaku. Sugad man, nalilipay hi Jehova kon ginhihimo naton an siyahan nga mga pitad basi magin sumurunod ni Jesus, pero diri Niya karuyag nga magpabilin kita nga bata ha espirituwal. (1 Cor. 3:1) Lugod, karuyag niya nga “magin adulto” kita nga mga Kristiano.—1 Cor. 14:20.

2. Ano an hihisgotan naton hini nga artikulo?

² Ano an karuyag sidngon han pagin adulto nga Kristiano? Paonan-o kita mag-uuswag basi magin hamtong nga Kristiano? Ano an papel han matig-a nga pagkaon ha aton pag-uswag? Ngan kay ano nga dapat naton likyan an sobra nga pagkompyansa? Hini nga artikulo, hihisgotan ta an mga baton hini nga mga pakiana.

ANO AN KARUYAG SIDNGON HAN PAGIN HAMTONG NGA KRISTIANO?

3. Ano an karuyag sidngon han pagin adulto nga Kristiano?

³ Ha Biblia, an Griego nga pulong nga iginhubad nga “adulto” mahimo liwat mangahulogan hin “hamtong,” “perpekto,” ngan “kompleto.” a (1 Cor. 2:6) Nagigin adulto kita, o hamtong nga mga Kristiano kon nagtutubo kita tikang ha pagin minasus-an ha espirituwal ngan nagigin adulto ha espirituwal. Syempre, bisan kon nakab-ot na naton ito nga tumong, kinahanglan diri gud kita umundang ha pag-uswag ha espirituwal. (1 Tim. 4:15) Kita ngatanan, upod na adton mga batan-on, mahimo magin hamtong ha  espirituwal. Pero paonan-o naton mahibabaroan nga hamtong na an usa nga Kristiano?

4. Paonan-o mo maihuhulagway an usa nga hamtong nga Kristiano?

⁴ An hamtong nga Kristiano nagkikinabuhi uyon ha ngatanan nga iginsusugo han Dios, diri nga ginbubuhat la niya an iya karuyag sundon. Syempre tungod kay diri perpekto, makakahimo hiya hin mga sayop. Bisan pa hito, iginpapakita niya ha iya adlaw-adlaw nga pagkinabuhi nga an iya ginhuhunahuna ngan ginbubuhat uyon ha kaburut-on han Dios. Iginsul-ot niya an bag-o nga personalidad ngan padayon nga nangangalimbasog nga mas maipahiuyon an iya panhunahuna ha panhunahuna han Dios. (Efe. 4:​22-24) Gin-train niya an iya kalugaringon nga maghimo hin maaramon nga mga desisyon nga basado ha mga balaud ngan prinsipyo ni Jehova, salit diri na niya kinahanglan hin hilaba nga lista han mga surundon kon ano an iya bubuhaton. Kon naghihimo hiya hin desisyon, nangangalimbasog gud hiya nga sundon ito.—1 Cor. 9:​26, 27.

5. Ano an mahitatabo ha usa nga Kristiano nga diri hamtong? (Efeso 4:​14, 15)

⁵ Ha luyo nga bahin, an usa nga Kristiano nga nagpapabilin nga diri hamtong masayon la maisimang han “panlimbong” ngan ‘hinimo-himo nga kabuwaan’ ngan tumoo ha mga apostata ngan mga tawo nga nagpapasarang hin buwa nga mga impormasyon. b (Basaha an Efeso 4:14, 15.) Bangin masayon la hiya mangabugho, magpatikang hin araway, masina, o masulay.—1 Cor. 3:3.

6. Paonan-o naton maiilustrar an proseso han pag-uswag ha pagkahamtong? (Kitaa liwat an piktyur.)

⁶ Sugad han gin-unabi na, an proseso han pag-uswag ha pagin hamtong ha espirituwal iginpariho han Kasuratan ha proseso han pagtubo ha pagin adulto. Damu an butang nga diri nahibabaroan han usa nga bata, salit kinahanglan niya hin proteksyon ngan giya han usa nga adulto. Ha pag-ilustrar, bangin hangyoon han nanay an iya bata pa nga anak nga kumapot ha iya kamot kon natabok ha kalsada. Samtang nagtitikaadulto an bata, bangin tugotan hiya han iya nanay nga tumabok ha kalsada nga hiya la, pero papahinumdoman la gihap niya an iya anak nga magkita ha wala ngan too antes tumabok. Kon magin adulto na hiya, maaram na hiya maglikay ha mga peligro. Sugad la nga kinahanglan han  mga bata an bulig han mga adulto basi malikyan an peligro, agsob nga kinahanglan han diri hamtong nga mga Kristiano an bulig han hamtong nga mga Kristiano basi malikyan an mga peligro ha espirituwal ngan makahimo hin maaramon nga mga desisyon. Ha kabaliktaran, kon naghihimo hin desisyon an hamtong nga mga Kristiano, ginhuhunahuna nira hin maopay an mga prinsipyo ha Biblia basi masabtan an panhunahuna ni Jehova. Katapos, igin-aaplikar nira an ira nahibaroan.

7. Kinahanglan ba han hamtong nga mga Kristiano an bulig han iba?

⁷ Nagpapasabot ba ini nga an hamtong nga Kristiano diri na gud magkikinahanglan hin bulig tikang ha iba? Diri. May mga panahon nga kinahanglan liwat mangaro hin bulig an mga hamtong. Pero an usa nga diri hamtong bangin maglaom nga sidngan hiya han iba kon ano an iya bubuhaton o gusto niya nga an iba an magdesisyon para ha iya nga dapat hiya an naghihimo. An hamtong nga Kristiano naman, makonsulta ha kinaadman ngan eksperyensya han iba samtang ginhuhunahuna nga naglalaom hi Jehova nga hiya an “magdadara han iya kalugaringon nga pinas-an.”—Gal. 6:5.

8. Ha ano nga mga paagi nagkakaiba-iba an mga hamtong?

⁸ Sugad la nga an mga adulto iba-iba an pisikal nga hitsura, an hamtong nga mga Kristiano iba-iba liwat an espirituwal nga mga kalidad, sugad han kinaadman, kaisog, pagkamahinatagon, ngan empatiya. Dugang pa, kon an duha nga hamtong nga Kristiano naatubang hin pariho nga sitwasyon, bangin maghimo hira hin magkaiba nga mga konklusyon nga pariho uyon ha Kasuratan. Agsob ini nga nahitatabo kon nagdidesisyon hira basado ha ira konsensya. Salit diri nira ginhuhukman an kada tagsa kon magkaiba an ira mga desisyon. Lugod, nakapokus hira ha pagpabilin nga nagkakaurosa.—Roma 14:10; 1 Cor. 1:10.

PAONAN-O KITA NAG-UUSWAG HA PAGIN HAMTONG NGA KRISTIANO?

9. Awtomatiko ba an aton pag-uswag ha pagin hamtong ha espirituwal? Isaysay.

⁹ Natural la nga magtubo kita ha pagin adulto paglabay han panahon, pero waray nag-uuswag hin awtomatiko ha pagin hamtong ha espirituwal. Pananglitan, an kabugtoan ha Corinto kinarawat han maopay nga sumat, nagpabawtismo, kinarawat han baraan nga espiritu, ngan nagpahimulos tikang ha pagtutdo ni apostol Pablo ha ira. (Buh. 18:​8-11) Pero pipira ka tuig katapos han ira bawtismo, damu la gihapon an diri hamtong. (1 Cor. 3:2) Paonan-o naton malilikyan nga maghinay an aton pag-uswag ha espirituwal?

10. Ano an kinahanglan naton buhaton basi magin hamtong? (Judas 20)

¹⁰ Basi magin hamtong, kinahanglan anay naton kultibaron an hingyap nga magin hamtong. Adton ‘naruruyag ha pagin waray eksperyensya,’ ngan naruruyag magpabilin nga bata ha espirituwal, diri gud magigin hamtong. (Prob. 1:22) Diri naton karuyag nga magin pariho hadton mga adulto na ha pisikal pero nadepende la gihapon ha ira mga kag-anak ha paghimo hin mga desisyon. Lugod, karuyag naton magin responsable para ha aton pag-uswag ha espirituwal. (Basaha an Judas 20.) Kon nangangalimbasog ka la gihapon nga magin hamtong, pag-ampo kan Jehova nga tagan ka han “hingyap ngan han gahum ha pagbuhat.”—Fil. 2:13.

11. Ano an igintagana nga bulig ha aton basi mag-uswag ha pagkahamtong? (Efeso 4:​11-13)

¹¹ Diri naglalaom hi Jehova nga mag-uuswag kita ha pagkahamtong ha aton la kalugaringon nga pangalimbasog. Adton nag-aalagad sugad nga mga paraataman ngan magturutdo ha Kristiano nga kongregasyon andam bumulig ha aton ha pag-uswag ngadto ha pagin “adulto” ha espirituwal, “nga nakakaabot ha sukol han kahamtong han Kristo.” (Basaha an Efeso 4:11-13.) Igintatagana liwat ni Jehova an iya baraan nga espiritu basi buligan kita nga magkaada han  “panhunahuna han Kristo.” (1 Cor. 2:​14-16) Dugang pa, iginhatag han Dios an upat nga Ebanghelyo basi ipakita ha aton kon paonan-o hi Jesus naghunahuna, nagyakan, ngan ginios ha panahon han iya ministeryo dinhi ha tuna. Pinaagi ha pagsubad han paagi han paghunahuna ngan panggawi ni Jesus, makakab-ot mo an imo tumong nga magin hamtong nga Kristiano.

AN PAPEL HAN MATIG-A NGA ESPIRITUWAL NGA PAGKAON

12. Ano an “nangunguna nga doktrina mahitungod han Kristo”?

¹² Basi mag-uswag ha pagkahamtong, kinahanglan liwat naton hibaroan an “nangunguna nga doktrina mahitungod han Kristo,” nga amo an nangunguna nga mga katutdoan han Kristiano. An ehemplo hiton nangunguna nga mga katutdoan amo an pagbasol, pagtoo, bawtismo, ngan pagkabanhaw. (Heb. 6:​1, 2) Ini an pipira han nangunguna nga katutdoan nga gintotoohan han ngatanan nga Kristiano. Salit han nagsangyaw hi Pedro ha mga tawo han Pentekostes, gin-unabi niya ini nga mga butang. (Buh. 2:​32-35, 38) Kinahanglan naton karawaton ini nga nangunguna nga mga katutdoan basi magin disipulo han Kristo. Pananglitan, hi Pablo nagpahamangno nga an bisan hin-o nga diri natoo han katutdoan han pagkabanhaw diri makakasiring nga tinuod hiya nga Kristiano. (1 Cor. 15:​12-14) Pero diri la kita dapat makontento han nangunguna nga kahibaro han kamatuoran.

13. Ano an dapat naton buhaton basi makapahimulos tikang ha matig-a nga espirituwal nga pagkaon nga gin-unabi ha Hebreo 5:14? (Kitaa liwat an piktyur.)

¹³ Diri pariho ha nangunguna nga doktrina, an matig-a nga espirituwal nga pagkaon nag-uupod diri la han mga balaud ni Jehova kondi pati liwat han iya mga prinsipyo, nga nabulig ha aton nga masabtan an iya panhunahuna. Basi makapahimulos han sugad nga pagkaon, kinahanglan naton adman, pamalandungon, ngan iaplikar hin maopay an Pulong han Dios. Samtang ginbubuhat naton ito ginti-train naton an aton kalugaringon nga maghimo hin mga desisyon nga nakakapalipay kan Jehova. c—Basaha an Hebreo 5:14.

14. Paonan-o ginbuligan ni Pablo an mga taga-Corinto nga mag-uswag ha pagkahamtong?

¹⁴ An diri hamtong nga mga Kristiano agsob  nga nakukurian ha paghimo hin tama nga desisyon kon waray espisipiko nga balaud ha Biblia. Kon waray balaud nga mababasa ha Biblia, bangin abaton han iba nga puydi nira buhaton an bisan ano nga ira karuyag. An iba bangin magpakiana hin surundon bisan kon waray man surundon para hito. Pananglitan, baga hin an mga Kristiano ha Corinto nagpakiana kan Pablo hin surundon kon puydi ba kumaon hin pagkaon nga iginhalad na ha idolo. Iginpakita ni Pablo nga an kada tagsa ha ira may-ada “katungod ha pagpili” basado ha kon ano an igintutugot han ira konsensya nga buhaton. Gin-unabi niya an pipira nga mga prinsipyo ha Biblia nga makakabulig ha ira ha paghimo hin desisyon nga diri makakapakonsensya ha ira ngan diri man liwat makakapakdol ha iba. (1 Cor. 8:​4, 7-9) Hito nga paagi, ginbuligan ni Pablo an mga taga-Corinto nga mag-uswag ha espirituwal basi makahimo hira hin desisyon nga ginagamit an ira abilidad ha pagsabot imbes nga sumarig la ha iba o magsunod la hin mga surundon.

15. Paonan-o ginbuligan ni Pablo an Hebreo nga mga Kristiano nga mag-uswag ha espirituwal?

¹⁵ Nahibaro kita hin importante nga leksyon tikang ha surat ni Pablo ha Hebreo nga mga Kristiano. An iba waray magpadayon ha pag-uswag ha espirituwal; ngani “nagkikinahanglan na liwat [hira] han gatas, diri han matig-a nga [espirituwal nga] pagkaon.” (Heb. 5:12) Waray hira mahibaro ngan kumarawat ha bag-o nga mga butang nga hinay-hinay nga igintututdo ni Jehova pinaagi han kongregasyon. (Prob. 4:18) Pananglitan, damu nga Judio nga tumuroo an nag-aaghat la gihapon han Mosaiko nga Balaud bisan kon mga 30 ka tuig na tikang han gintapos ito pinaagi han halad han Kristo. (Roma 10:4; Tito 1:10) Sigurado nga diri sobra kabug-at an iginpapabuhat ha Judio nga mga Kristiano nga bag-uhon an ira panhunahuna ha sulod hin sobra 30 ka tuig! An bisan hin-o nga nakabasa han giniyahan nga surat ni Pablo para ha mga Hebreo makakasiring nga ini nga libro may-ada matig-a nga espirituwal nga pagkaon. An iya surat nakabulig ha ira nga makita nga mas maopay an bag-o nga paagi han pagsingba kan Jehova nga iginpapatuman pinaagi kan Jesus. Naghatag liwat ito ha ira hin kaisog nga makapadayon ha pagsangyaw bisan pa han pagkontra han mga Judio.—Heb. 10:​19-23.

LIKAYI AN SOBRA NGA PAGKOMPYANSA

16. Labot la ha pag-uswag ha pagkahamtong, ano an kinahanglan naton buhaton?

¹⁶ Dapat maniguro kita nga diri la makab-ot an  pagin hamtong kondi magpabilin liwat nga sugad hito. Nagkikinahanglan ito nga likyan naton an sobra nga pagkompyansa. (1 Cor. 10:12) Kinahanglan ‘padayon nga sarihan’ naton an aton kalugaringon basi masiguro nga padayon kita nga nag-uuswag.—2 Cor. 13:5.

17. Paonan-o an surat ni Pablo ha mga taga-Colosas nagpapakita nga kinahanglan magpabilin nga hamtong?

¹⁷ Ha surat ni Pablo ha mga taga-Colosas, ginpabug-atan niya utro nga kinahanglan magpabilin nga hamtong. Bisan kon nagin hamtong na hira nga mga Kristiano, ginpahamangnoan hira ni Pablo nga diri malimbongan han panhunahuna han kalibotan. (Col. 2:​6-10) Ngan hi Epafras, nga sigurado nga nakilala hin maopay ha kabugtoan hito nga kongregasyon, padayon nga nag-ampo nga ha “kataposan bug-os nga makatindog” unta hira, o magin hamtong. (Col. 4:12) Ano an punto? Nasabtan nira Pablo ngan Epafras nga nagkikinahanglan hin personal nga pangalimbasog ngan bulig han Dios basi makapabilin nga hamtong. Karuyag nira nga an mga taga-Colosas magpabilin nga hamtong, o adulto, nga mga Kristiano bisan pa han mga problema nga ira gin-aatubang.

18. Ano an mahimo mahitabo ha usa nga hamtong nga Kristiano? (Kitaa liwat an piktyur.)

¹⁸ Ginpahamangnoan ni Pablo an mga Hebreo nga puydi mawara hin permanente han hamtong nga Kristiano an pag-uyon han Dios. Mahimo magin matig-a an kasingkasing han usa nga Kristiano nga tungod hito diri na niya nahihimo an pagbasol ngan pagkarawat han pagpasaylo han Dios. Maopay na la, waray magin sugad hito an mga Hebreo. (Heb. 6:​4-9) Kumusta man adton nagin diri aktibo o na-disfellowship yana pero ha urhi nagbasol? An ira mapainubsanon nga pagbasol nagpapakita nga diri hira pariho hadton gin-unabi ni Pablo ha iya surat. Pero kon bumalik hira kan Jehova, kinahanglan nira an bulig nga iya igintatagana. (Ezek. 34:​15, 16) An mga tigurang mahimo maghangyo hin hamtong nga bugto basi buligan hira nga maparig-on utro an ira relasyon kan Jehova.

19. Ano an dapat naton magin tumong?

¹⁹ Kon padayon ka nga naniningkamot nga magin hamtong nga Kristiano, makakab-ot mo an imo tumong! Padayon nga kaon hin matig-a nga espirituwal nga pagkaon ngan mas ipahiuyon an imo panhunahuna ha panhunahuna ni Jehova. Ngan kon nagin hamtong ka na, buhata an ngatanan basi magpabilin nga hamtong nga Kristiano.