1. Paonan-o gin-organisar an katawohan ni Jehova ha siyahan nga siglo?

 ANOMAN nga toka an iginhahatag ni Jehova ha iya katawohan, naglalaom hiya nga bubuhaton nira ito ha organisado nga paagi. (1 Cor. 14:33) Pananglitan, kaburut-on han Dios nga an maopay nga sumat maisangyaw ha bug-os nga inuukyan nga tuna. (Mat. 24:14) Iginhatag ni Jehova an responsabilidad kan Jesus nga manguna hito nga buruhaton. Ginsisiguro ni Jesus nga ginbubuhat ito ha organisado nga paagi. Ha siyahan nga siglo, han an mga kongregasyon naestablisar ha iba-iba nga lugar, gintokahan an mga tigurang nga maghatag hin instruksyon ngan manguna. (Buh. 14:23) Ha Jerusalem may grupo han mga tigurang, nga ginkukompwesto han mga apostol ngan edaran nga kalalakin-an, nga naghihimo hin mga desisyon nga ginlalaoman nga susundon han ngatanan nga kongregasyon. (Buh. 15:2; 16:4) Sugad nga resulta han ira pagin masinugtanon ha mga instruksyon nga ira nakarawat, “an mga kongregasyon padayon nga nagigin marig-on ha pagtoo ngan nagtitikadamu.”—Buh. 16:5.

2. Tikang han 1919, paonan-o hi Jehova nagtatagana hin giya ngan espirituwal nga pagkaon?

² Bisan yana, padayon nga gin-oorganisar ni Jehova an iya katawohan. Tikang han 1919, ginagamit ni Jesus an gutiay nga grupo han dinihogan nga kalalakin-an basi ig-organisar an pagsangyaw nga buruhaton ngan itagana an espirituwal nga pagkaon ha iya mga sumurunod. a (Luc. 12:42) Klaro nga ginbibendisyonan ni Jehova an buruhaton hito nga grupo.—Isa. 60:22; 65:​13, 14.

3-4. (a) Iilustrar kon paonan-o kita nagpapahimulos ha pagin organisado. (b) Ano an aton hihisgotan hini nga artikulo?

 ³ Kon diri kita organisado, diri naton mabubuhat an buruhaton nga igintoka ha aton ni Jesus. (Mat. 28:​19, 20) Pananglitan, kon waray igintoka nga teritoryo; an ngatanan puydi magsangyaw bisan diin nira karuyag. An iba nga teritoryo bangin pauroutro nga makobrehan han iba-iba nga magwarali, samtang an iba naman nga teritoryo bangin mapabay-an. May nahuhunahuna ka pa ba nga iba nga paagi nga nagpapahimulos kita ha pagin organisado?

⁴ Sugad la nga gin-organisar ni Jesus an iya mga sumurunod han nakanhi hiya ha tuna, padayon niya nga gin-oorganisar an katawohan han Dios yana. Hini nga artikulo, aton hihisgotan an ehemplo nga iginpakita ni Jesus ngan kon paonan-o an aton organisasyon nagsusunod hito nga ehemplo. Hihisgotan ta liwat kon paonan-o naton maipapakita nga gin-aapresyar ta an organisasyon ni Jehova.

AN ATON ORGANISASYON NAGSUSUNOD HAN EHEMPLO NI JESUS

5. Ano an usa nga paagi nga ginsusunod naton an ehemplo ni Jesus? (Juan 8:28)

⁵ Hi Jesus nahibaro tikang ha iya langitnon nga Amay kon ano an bubuhaton ngan kon ano an isisiring. Sugad nga pagsunod han ehemplo ni Jesus, iginbabasar han organisasyon ni Jehova ha Pulong han Dios an mga instruksyon hito ngan mga katutdoan ha moral. (Basaha an Juan 8:28; 2 Tim. 3:​16, 17) Regular kita nga nakakakarawat hin mga pahinumdom nga basahon ngan iaplikar an Pulong han Dios. Paonan-o kita nagpapahimulos ha pagsunod hini nga sagdon?

6. Ano an usa nga importante nga paagi nga nagpapahimulos kita ha pag-aram ha Biblia?

⁶ Daku an aton napapahimulsan kon gin-aadman naton an Biblia gamit an aton mga publikasyon. Pananglitan, naikukompara naton an mga katutdoan ha Biblia ha mga instruksyon nga aton nakakarawat tikang ha organisasyon. Kon nakikita naton nga an giya nga aton nakakarawat basado ha Kasuratan, mas nadudugangan an aton pagsarig ha organisasyon ni Jehova.—Roma 12:2.

7. Ano nga mensahe an iginsangyaw ni Jesus, ngan paonan-o ginsusunod han organisasyon ni Jehova an iya ehemplo?

⁷ Iginsangyaw ni Jesus “an maopay nga sumat han Ginhadian han Dios.” (Luc. 4:​43, 44) Ginsugo liwat ni Jesus an iya mga disipulo nga magsangyaw mahitungod han Ginhadian. (Luc. 9:​1, 2; 10:​8, 9) Yana, an ngatanan nga kaapi han organisasyon ni Jehova nagsasangyaw han mensahe han Ginhadian diin man hira naukoy o anoman kadamu an ira responsabilidad ha organisasyon.

8. Ano nga pribilehiyo an iginhatag ha aton?

⁸ Pribilehiyo gud nga isangyaw ha iba an kamatuoran mahitungod ha Ginhadian han Dios! Diri ngatanan may-ada hito nga pribilehiyo. Pananglitan, han nakanhi hi Jesus ha tuna, waray niya tuguti an magraot nga espiritu nga magpamatuod parte ha iya. (Luc. 4:41) Yana, antes an usa makigbahin ha ministeryo kaupod an katawohan ni Jehova, kinahanglan niya magin kwalipikado hito nga pribilehiyo. Iginpapakita naton nga gin-aapresyar ta gud ini nga pribilehiyo nga pagsangyaw pinaagi ha pagsumat ha mga tawo mahitungod ha Ginhadian han Dios ha bisan diin ngan bisan san-o. Pariho kan Jesus, an aton tumong amo an maitanom ngan masaribohan an mga liso han kamatuoran han Ginhadian ha kasingkasing han mga tawo.—Mat. 13:​3, 23; 1 Cor. 3:6.

9. Ano an ginbubuhat han organisasyon basi maipakilala an ngaran han Dios?

⁹ Iginpakilala ni Jesus an ngaran han Dios. Ha pag-ampo ni Jesus ha iya langitnon nga Amay, hiya nagsiring: “Iginpakilala ko . . . an imo ngaran.” (Juan 17:26) Uyon ha ehemplo ni Jesus, ginbubuhat han organisasyon ni Jehova an  ngatanan nga posible basi buligan an iba nga mahibaroan an ngaran han Dios. An Bag-o nga Kalibotan nga Hubad han Baraan nga Kasuratan may importante nga papel hini pinaagi ha pagpahiuli han ngaran han Dios ha husto nga hinmumutangan hito. May-ada na yana hini nga hubad han Biblia ha bug-os o ha bahin man ha sobra 270 nga linggwahe. Ha Apendise A4 ngan A5 hini nga hubad, makikita mo an mga detalye mahitungod ha pagpahiuli han ngaran han Dios ha Biblia. An Apendise C, nga makikita ha Bibliya Para sa Pag-aaral, naghahatag hin damu nga ebidensya nga an ngaran han Dios dapat mabasa hin 237 ka beses ha Kristiano Griego nga Kasuratan.

10. Ano an imo nahibaroan ha ginsiring han babaye nga taga-Myanmar?

¹⁰ Pariho kan Jesus, karuyag naton buligan an mas damu nga tawo tubtob nga posible basi makilala an ngaran han Dios. Han nahibaroan han 67 anyos nga babaye ha Myanmar an ngaran han Dios, nagtangis hiya ngan nagsiring: “Siyahan ko pa gud la ini nga pakabati nga Jehova an ngaran han Dios. . . . Gintutdoan mo ako han pinakaimportante nga butang nga puydi ko mahibaroan.” Sugad han iginpapakita hini nga eksperyensya, an paghibaro han ngaran han Dios mahimo magkaada daku nga epekto ha mga tawo nga tangkod an kasingkasing.

PADAYON NGA MAGPAKITA HIN APRESASYON HA ATON ORGANISASYON

11. Paonan-o maipapakita han mga tigurang an ira apresasyon ha organisasyon ni Jehova? (Kitaa liwat an piktyur.)

¹¹ Ano an usa nga paagi nga maipapakita han mga tigurang nga gin-aapresyar nira an organisasyon han Dios? Kon nakakakarawat hin instruksyon, dapat basahon ito hin maopay han mga tigurang ngan buhaton an tanan nga ira mahihimo basi iaplikar ito. Pananglitan, nakakakarawat hira hin giya diri la ha kon paonan-o magdudumara hin mga bahin ngan kon paonan-o mag-aampo para ha kongregasyon, kondi pati liwat kon paonan-o aatamanon an mga karnero han Kristo. Kon ginsusunod han mga tigurang an giya han organisasyon, an kabugtoan naabat nga hinigugma hira ni Jehova ngan gin-aataman hira.

12. (a) Kay ano nga dapat kita makigkooperar ha mga nangunguna? (Hebreo 13:​7, 17) (b) Kay ano nga dapat kita magpokus ha positibo nga mga kalidad han mga nangunguna?

¹² Kon nakakakarawat kita hin instruksyon tikang ha mga tigurang, dapat kinaburut-on nga sundon naton ito. Ha pagbuhat hito, nabubuligan naton an mga nangunguna nga magin mas masayon an ira buruhaton. Gin-aaghat kita han Biblia nga magin masinugtanon ngan magin mapinasakupon hadton mga nangunguna. (Basaha an Hebreo 13:​7, 17.) Usahay makuri ito. Kay ano? Kay ini nga kalalakin-an diri perpekto. Pero kon magpupokus kita ha ira negatibo nga mga kinaiya imbes ha ira positibo nga mga kalidad, sugad hin ginbubuligan naton an aton mga kaaway. Ha ano nga paagi? Ginpapaluya naton an aton pagsarig ha organisasyon han Dios, nga amo an karuyag han aton mga parakontra. Ano an puydi naton himoon basi makilala ngan isalikway an mga buwa han aton mga kaaway?

AYAW TUGUTI AN IBA NGA PALUYAHON AN IMO APRESASYON

13. Paonan-o an mga kaaway han Dios nangangalimbasog nga pakarauton an iya organisasyon?

¹³ Nangangalimbasog an mga parakontra han Dios nga himoon an mag-opay nga butang han organisasyon ni Jehova nga baga hin maraot. Pananglitan, nahibaroan naton ha Kasuratan nga naglalaom hi Jehova nga magigin malimpyo ha pisikal, moral, ngan espirituwal an iya mga magsiringba. Hiya nagsiring nga dapat paiwason ha kongregasyon an bisan hin-o nga diri mabinasulon ngan padayon nga nagbubuhat hin maraot. (1 Cor. 5:​11-13; 6:​9, 10) Ginsusunod naton iton Kasuratanhon nga sugo. Pero nangangalimbasog an aton mga parakontra nga gamiton ito  kontra ha aton pinaagi ha pag-akusar nga mga panatiko kita, kritiko, ngan diri mahigugmaon.

14. Hin-o an gintitikangan han buwa nga mga istorya mahitungod ha organisasyon?

¹⁴ Kilalaha an gintitikangan han mga pag-atake. Hi Satanas nga Yawa an nagpapaluyo han buwa nga mga istorya. Hiya an “amay han kabuwaan.” (Juan 8:44; Gen. 3:​1-5) Salit dapat kita maglaom nga gagamiton ni Satanas an mga nasuporta ha iya basi magpasarang hin buwa nga mga istorya mahitungod ha organisasyon ni Jehova. Ini an nahitabo ha siyahan nga siglo.

15. Ano an ginbuhat han mga lider han relihiyon kan Jesus ngan ha iya mga sumurunod?

¹⁵ Ha siyahan nga siglo, gin-gamit ni Satanas an mga tawo basi magpasarang hin kabuwaan mahitungod ha Anak han Dios bisan kon perpekto hiya ngan naghimo hin mag-opay nga milagro. Pananglitan, ginsidngan han mga lider han relihiyon an mga tawo nga an gahum ni Jesus ha pagpagawas ha mga demonyo iginhatag ha iya pinaagi han “magmarando han mga demonyo.” (Mar. 3:22) Han ginbista hi Jesus, gin-akusaran hiya han mga lider han relihiyon hin pagpasipara ngan ginkombinse an mga tawo nga ipapatay hiya. (Mat. 27:20) Ha urhi, han an mga sumurunod han Kristo nagsangyaw han maopay nga sumat, adton mga nakontra ha ira “nag-aghat ngan nag-impluwensya ha mga tawo” nga timarauton an mga Kristiano. (Buh. 14:​2, 19) Mahitungod ha Buhat 14:​2, An Barantayan han Disyembre 1, 1998, nagsaysay: “Tungod kay diri kontento ha pagsalikway han mensahe mismo, an Judio nga mga parakontra nagtikang ha maraot nga kampanya, nangangalimbasog ha pag-aghat ha mga Hentil nga magkaada maraot nga pagtrato kontra ha mga Kristiano.”

16. Ano an dapat naton hinumdoman kon nakakabati kita hin buwa nga mga istorya?

¹⁶ Hi Satanas padayon nga nagbibinuwa yana. Iya la gihapon ‘ginlilimbongan an bug-os nga inuukyan nga tuna.’ (Pah. 12:9) Kon nakakabati  ka hin negatibo nga mga istorya mahitungod ha organisasyon o ha kabugtoan nga nangunguna, hinumdumi kon paonan-o gintratar han mga kaaway han Dios hi Jesus ngan an siyahan-siglo nga mga disipulo. Yana, gintitimaraot ngan ginpapakaraot an katawohan ni Jehova sugad la han igintagna han Biblia. (Mat. 5:​11, 12) Diri kita matoo ha buwa nga mga istorya kon nasasabtan naton kon hin-o an nagpapasarang hito ngan kon magios kita dayon basi protektaran an aton kalugaringon. Paonan-o naton mapuprotektaran an aton kalugaringon?

17. Paonan-o naton malilikyan nga maapektohan han buwa nga mga istorya? (2 Timoteo 1:13) (Kitaa liwat an kahon nga “ Kon Ano an Bubuhaton kon Nakabati hin Buwa nga mga Istorya.”)

¹⁷ Isalikway an buwa nga mga istorya. Hi apostol Pablo naghatag hin klaro nga mga instruksyon han bubuhaton kon nakabati kita hin buwa nga mga istorya. Ginsidngan niya hi Timoteo nga “sugoon . . . an pipira nga diri . . . maghatag hin atensyon ha buwa nga mga istorya” ngan “isalikway an buwa nga mga istorya nga diri nagpapasidungog ha Dios.” (1 Tim. 1:​3, 4; 4:7) Bisan kon bangin puruton han bata an usa nga butang tikang ha salóg ngan ibutang ito ha iya baba, diri gud ito bubuhaton han hamtong nga tawo kay maaram hiya nga mahugaw ito. Ginsasalikway naton an buwa nga mga istorya kay maaram kita han gintitikangan hito nga impormasyon. Lugod, an aton la ginpapamatian amo an “mag-opay nga mga pulong” han kamatuoran.—Basaha an 2 Timoteo 1:13.

18. Paonan-o naton maipapakita nga gin-aapresyar naton an organisasyon ni Jehova?

¹⁸ Ginhisgotan la naton an tulo han damu nga paagi nga ginsusubad han organisasyon han Dios hi Jesus. Samtang imo gin-aadman an Biblia, pamiling pa hin mga paagi nga ginsusunod han organisasyon an ehemplo ni Jesus. Buligi an iba ha iyo kongregasyon nga mas apresyaron an organisasyon. Ngan padayon nga ipakita an imo apresasyon pinaagi ha pag-alagad kan Jehova hin maunungon ngan pagpabilin nga duok ha organisasyon nga iya ginagamit basi matuman an iya kaburut-on. (Sal. 37:28) Hinaot padayon naton nga apresyaron an aton pribilehiyo ha pagin bahin han mahigugmaon ngan maunungon nga katawohan ni Jehova.