1, 2. Kay ano nga kinahanglan naton bansayon an iba nga magin kwalipikado ha teokratiko nga mga toka?

AN PAGPASAMWAK han maopay nga sumat han Ginhadian amo an nangunguna nga buruhaton ni Jesus. Pero naggahin hiya hin panahon basi bansayon an iba nga magin paraataman ngan magturutdo. (Mat. 10:5-7) Hi Felipe sagipo ha pag-ebanghelyo, pero sigurado nga ginbuligan niya an iya upat nga anak nga kababayin-an nga magin epektibo ha pagpasamwak han kamatuoran tikang ha Kasuratan. (Buh. 21:8, 9) Kay ano nga importante gud yana an sugad nga pagbansay?

² Ha bug-os nga kalibotan, nagtitikadamu an nakarawat han maopay nga sumat. Kinahanglan masabtan han mga estudyante ha Biblia an pagkaimportante han personal nga pag-aram ha Kasuratan. Ini nga mga bag-ohan kinahanglan liwat bansayon ha pagsangyaw han maopay nga sumat ngan ha pagtutdo han kamatuoran ha iba. Ha tagsa nga kongregasyon, an mga brother kinahanglan dasigon nga mangalimbasog nga magin kwalipikado sugad nga ministeryal nga surugoon o tigurang. Pinaagi han “maopay nga pagturon-an [o, pagtutdo],” mabubuligan han hamtong nga mga Kristiano ini nga mga bag-ohan nga mag-uswag ha espirituwal.​—Prob. 4:2.

3, 4. (a) Paonan-o iginpakita ni Pablo an koneksyon han pag-aram ha Kasuratan ha pagin mabungahon ha ministeryo? (b) Antes naton dasigon an aton mga estudyante nga magkaada personal nga pag-aram ha Biblia, ano anay an kinahanglan naton himoon?

³ Kay ano nga importante gud an personal nga pag-aram ha Kasuratan? Hibabaroan naton an baton hito ha ginsiring ni apostol Pablo ha mga igkasi-Kristiano ha Colosas. Hiya nagsurat: “Waray kami undang ha pag-ampo para ha iyo ngan paghangyo nga mapuno unta kamo han husto nga kahibaro mahitungod han [kanan Dios] kaburut-on nga may bug-os nga kinaadman ngan pagsabot ha espirituwal nga mga butang, basi magkinabuhi ha paagi nga inuuyonan ni Jehova basi mapalipay gud hiya samtang padayon nga namumunga kamo ha tagsa nga maopay nga buhat ngan nag-uuswag ha husto nga kahibaro mahitungod ha Dios.” (Col. 1:9, 10) Pinaagi hito nga husto nga kahibaro, an mga Kristiano ha Colosas ‘makakagkinabuhi ha paagi nga inuuyonan ni Jehova basi mapalipay gud hiya.’ Mabulig ini ha ira nga ‘padayon nga mamunga ha tagsa nga maopay nga buhat,’ labi na ha pagsangyaw han maopay nga sumat. Basi magin epektibo ha pag-alagad an usa nga surugoon ni Jehova, kinahanglan regular nga basahon ngan pag-adman niya an Biblia. Maopay gud nga buligan naton an mga estudyante ha Biblia nga masabtan an pagkaimportante hito.

⁴ Antes buligan an iba nga magpahimulos ha personal nga pag-aram ha Biblia, kinahanglan kita mismo kombinsido nga mapulsanon ito. Ngani, kinahanglan kita mismo may regular nga pag-aram ngan pagpamalandong ha Biblia. Salit mahimo mo pakianhan an imo kalugaringon: ‘Kon may opinyon an tagbalay nga diri uyon ha Kasuratan o may makuri hiya nga pakiana, nababaton ko ba ito gamit an Biblia? Kon nababasa ko an pagin mapailubon ni Jesus, ni Pablo, ngan han iba pa may kalabotan ha ira ministeryo, ginpapamalandong ko ba kon paonan-o an ira pagpailob sadang makaapekto ha akon pag-alagad kan Jehova?’ Kita ngatanan nagkikinahanglan han kahibaro ngan sagdon tikang ha Pulong han Dios. Ngan kon iginsusumat naton ha iba kon paonan-o kita nagpapahimulos ha aton personal nga pag-aram ha Biblia, mahimo naton hira madasig nga magin maduruto ha pag-aram ha Kasuratan basi magpahimulos liwat hito.

5. Paghatag hin suhestyon kon paonan-o mabubuligan an mga bag-ohan nga magkaada regular nga personal nga pag-aram ha Biblia.

⁵ Mahimo mo pakianhan an imo kalugaringon, ‘Paonan-o ko mababansay an akon estudyante nga regular nga pag-adman an Biblia?’ Puydi mo ipakita ha iya kon paonan-o mangangandam para ha iyo pag-aram. Mahimo mo hiya aghaton nga basahon an mga bahin han apendise han Ano Gud ba an Igintututdo han Biblia? nga libro ngan an gin-unabi nga mga teksto. Buligi hiya nga mag-andam para ha mga katirok basi makagkomento. Dasiga hiya nga basahon an tagsa nga gowa han An Barantayan ngan Pagpamata! Kon may-ada Watchtower Library o Watchtower ONLINE LIBRARY ha iya linggwahe, mahimo mo hiya tutdoan kon paonan-o bibilngon dida hito an baton ha iya mga pakiana mahitungod ha Biblia. Kon bubuhaton mo ini, posible gud nga malipay an  imo estudyante ha iya personal nga pag-aram ha Biblia.

6. (a) Paonan-o mo mabubuligan an imo estudyante nga magkaada gugma ha Biblia? (b) Ano an posible nga himoon han estudyante kon may-ada na hiya hilarom nga gugma ha Kasuratan?

⁶ Syempre diri naton sadang piriton an usa nga basahon ngan pag-adman an Biblia. Lugod, gamiton naton an mga garamiton nga igintatagana han organisasyon ni Jehova basi buligan an aton estudyante nga maghilarom an iya gugma ha Biblia. Ha urhi, bangin abaton han sinsero nga estudyante an inabat han salmista nga nagkanta: “Maopay ito ha akon nga pumahirani ako ngadto ha Dios: Hi Jehova nga Ginoo ginhimo nakon nga arayopan.” (Sal. 73:28) Pinaagi han baraan nga espiritu, bubuligan ni Jehova adton maduruto ngan makinarawaton nga estudyante ha Biblia.

7. Paonan-o ginbansay ni Jesus an mga parasamwak han maopay nga sumat? (Kitaa an retrato ha tinikangan hini nga artikulo.)

⁷ Ha Mateo kapitulo 10, mababasa naton an mga instruksyon ni Jesus ha iya 12 nga apostol. Imbes nga maghisgot hin pankabug-osan nga ideya, naghatag hiya hin espisipiko nga mga punto. ^[1] Namati an mga apostol samtang nagtututdo hi Jesus kon paonan-o hira epektibo nga magsasangyaw. Katapos hito, nagsangyaw an mga apostol. Tungod kay nakita nira an mga pamaagi ni Jesus, waray pag-iha nagin kwalipikado hira nga mga magturutdo han kamatuoran tikang ha Kasuratan. (Mat. 11:1) Mahimo liwat naton mabansay an aton mga estudyante ha Biblia nga magin epektibo nga magwarali han maopay nga sumat. Tagdon naton an duha nga paagi ha pagbuhat hito.

8, 9. (a) Paonan-o nakiistorya hi Jesus ha mga tawo ha ministeryo? (b) Paonan-o naton mabubuligan an mga bag-ohan ha pakiistorya ha mga tawo pariho han ginbuhat ni Jesus?

⁸ Pakiistorya ha mga tawo. Hi Jesus agsob makiistorya ha mga tawo mahitungod han Ginhadian. Pananglitan, nakiistorya hiya ha usa nga babaye ha atabay ni Jacob hirani ha syudad han Sicar, ngan nagin makalilipay ngan positibo an resulta hito. (Juan 4:5-30) Nakiistorya liwat hiya kan Mateo Lebi nga usa nga parasukot hin buhis. Gutiay la an mababasa ha Ebanghelyo mahitungod hito nga ira pag-istorya, pero ginkarawat ni Mateo an imbitasyon nga magin sumurunod ni Jesus. Nabatian ni Mateo ngan han iba pa an hurohilaba nga pakiistorya ni Jesus ha usa nga panagtawo ha balay ni Mateo.​—Mat. 9:9; Luc. 5:27-39.

⁹ Ha iba liwat nga kahimtang, makisangkayon nga nakiistorya hi Jesus kan Natanael, nga may negatibo nga panhunahuna ha mga taga-Nazaret. Pero napagios hi Natanael nga bag-uhon an iya panhunahuna. Nagdesisyon hiya nga mahibaro pa mahitungod han igintututdo ni Jesus nga taga-Nazaret. (Juan 1:46-51) Salit may maopay kita nga rason nga bansayon an bag-ohan nga mga magwarali nga magin makisangkayon, buotan, ngan magpakita hin personal nga interes ha aton mga nakakaistorya kay pinaagi hito posible gud nga karawaton han sinsero nga mga tawo an aton mensahe. ^[2] Kon babansayon naton an aton mga estudyante ha sugad nga paagi, posible nga magin mas malipayon hira ha ministeryo.

10-12. (a) Paonan-o ginkultibar ni Jesus an interes hadton namati han maopay nga sumat? (b) Paonan-o naton mabubuligan an bag-ohan nga mga magwarali basi mag-uswag an ira abilidad ha pagtutdo han kamatuoran ha Biblia?

¹⁰ Kultibara an interes. Limitado gud la an panahon ni Jesus ha pagbuhat han iya ministeryo. Bisan pa hito, naghatag hiya hin panahon ha pagkultibar han interes hadton namati han maopay nga sumat. Pananglitan, usa ka adlaw, damu nga tawo an nagkatirok ha may baybayon basi mamati kan Jesus. Salit nagtutdo hiya ha ira sakay hin baluto. Katapos hito, naghimo hi Jesus hin milagro pinaagi ha pagpahinabo nga makadakop hi Pedro hin damu hinduro nga isda, ngan nagsiring ha iya: “Tikang yana mangingisda ka hin buhi nga mga tawo.” Ano an nagin resulta han ginsiring ngan ginbuhat ni Jesus? “Iginbalik [nira Pedro ngan han iya mga kaupod] ha baybayon an mga baluto, ngan ginbayaan  an ngatanan ngan sinunod [kan Jesus].”​—Luc. 5:1-11.

¹¹ Hi Nicodemo nga membro han Sanhedrin, nagin interesado ha mga katutdoan ni Jesus. Karuyag pa niya mahibaro pero nahadlok hiya ha isisiring han iba kon makiistorya hiya kan Jesus ha publiko. Mapauyon-uyon hi Jesus ngan andam maghatag hin panahon; nakiistorya hiya kan Nicodemo ha gab-i diin waray na mga tawo. (Juan 3:1, 2) Ano an aton hibabaroan tikang hini nga asoy? An Anak han Dios naggahin hin panahon basi parig-unon an pagtoo han mga tawo. Diri ba ini sadang magpagios liwat ha aton nga magin maduruto ha pagbalik-bisita ngan pagdumara hin pag-aram ha Biblia ha mga interesado?

¹² Posible gud nga mapauswag han bag-ohan nga mga magwarali an ira abilidad ha pagtutdo han kamatuoran ha Biblia kon iuupod naton hira ha pagministeryo. Mahimo naton hira tutdoan nga balikon bisan adton nagpakita hin gutiay nga interes. Puydi naton hira iupod ha aton mga ginbabalik-bisita ngan gindudumarahan hin pag-aram ha Biblia. Pinaagi han sugad nga pagbansay, sigurado nga mapapagios hira ha pagkultibar han interes han mga tawo ngan pagkaada kalugaringon nga gindumarahan hin pag-aram ha Biblia. Mahibabaro hira nga diri dayon umundang kondi magin mapailubon ha pagministeryo.​—Gal. 5:22; kitaa an kahon nga “ Importante an Pagin Mapailubon.”

13, 14. (a) Ano an imo masisiring ha ehemplo han mga tawohan ha Biblia nga nagsakripisyo para ha kabugtoan? (b) Paonan-o mo mababansay ha praktikal nga paagi an bag-ohan nga mga magwarali ngan mga batan-on ha pagpakita hin gugma ha kabugtoan?

¹³ Ginpapabug-atan han mga asoy ha Biblia nga pribilehiyo naton nga ipakita an “minagburugto nga gugma” ngan serbihan an kabugtoan. (Basaha an 1 Pedro 1:22; Lucas 22:24-27.) Iginhatag han Anak han Dios an ngatanan, upod na an iya kinabuhi ha pagserbi ha mga tawo. (Mat. 20:28) Hi Dorcas ‘damu an mag-opay nga buhat ngan mga hatag tungod ha kalooy.’ (Buh. 9:36, 39) Hi Maria nga taga-Roma ‘nagbuhat hin damu nga buruhaton’ para ha kabugtoan ha kongregasyon. (Roma 16:6) Paonan-o naton mabubuligan an mga bag-ohan nga masabtan an pagkaimportante han pagbulig ha kabugtoan?

¹⁴ Mahimo iupod han hamtong nga mga Kristiano an mga bag-ohan kon nabisita ha mga lagas ngan may sakit. Kon angayan, puydi iupod han mga kag-anak an ira anak ha sugad nga pagbisita. Mahimo iupod han mga tigurang an mga batan-on o bag-ohan ha pagpanginano kon may pagkaon an aton hinigugma nga lagas nga kabugtoan ngan kon namimintinar an ira balay. Ha pagbuhat hini, hibabaroan han mga batan-on ngan mga bag-ohan an pagpakita hin pagkabuotan ha kabugtoan. Pananglitan, durante han pagsangyaw, ginbibisita hin madaliay han usa nga tigurang an mga Saksi nga naukoy ha baryo nga sakop han iya teritoryo basi kumustahon hira. Salit hinbaroan han batan-on nga brother nga agsob umupod ha iya nga importante nga ipaabat ha ngatanan nga membro han kongregasyon nga hinigugma hira.​—Roma 12:10.

15. Kay ano nga importante nga magin interesado an mga tigurang ha pag-uswag han kalalakin-an ha kongregasyon?

¹⁵ Tungod kay kalalakin-an an ginagamit ni Jehova sugad nga mga magturutdo ha kongregasyon, importante nga mapauswag nira an ira abilidad ha pagtutdo. Kon usa ka nga tigurang, mahimo mo ba pamatian an usa nga ministeryal samtang nagrirehers han iya bahin? Pinaagi hito, mahimo mo hiya mabuligan nga mapauswag an iya abilidad sugad nga magturutdo han Pulong han Dios.​—Neh. 8:8. ^[3]

16, 17. (a) Ano an ginbuhat ni Pablo nga nagpapakita nga interesado hiya ha pag-uswag ni Timoteo? (b) Paonan-o epektibo nga mababansay han mga tigurang an magigin mga paraataman han kongregasyon?

¹⁶ Daku gud an panginahanglan hin mga paraataman ha kongregasyon, ngan adton magigin kwalipikado para hito nga pribilehiyo nagkikinahanglan hin padayon nga pagbansay. Ha surat ni Pablo kan Timoteo, nagtagana hiya hin giya kon paonan-o magbabansay: “Anak ko, padayon nga magkaada ka hin kusog pinaagi han diri-matupngan nga pagkabuotan nga nagtitikang ha pagin kahiusa ni Kristo  Jesus. Ngan mahitungod han mga butang nga imo nabatian ha akon nga ginsuportahan hin damu nga saksi, itapod ito nga mga butang ha matinumanon nga kalalakin-an, basi hira liwat magin kwalipikado gud ha pagtutdo ha iba.” (2 Tim. 2:1, 2) Damu an hinbaroan ni Timoteo tungod han iya pag-upod kan Pablo, nga usa nga apostol ngan tigurang. Ngan ginsubad ni Timoteo an mga pamaagi ni Pablo ha iya ministeryo ngan ha iba pa nga aspekto han sagrado nga pag-alagad.​—2 Tim. 3:10-12.

¹⁷ Hi Pablo naggahin hin panahon basi bansayon hin maopay an batan-on nga hi Timoteo. Igin-upod niya hi Timoteo. (Buh. 16:1-5) Masusubad han mga tigurang an ehemplo ni Pablo pinaagi ha pag-upod hin kwalipikado nga mga ministeryal ha pag-shepherding, kon angayan. Hini nga paagi, maoobserbaran mismo han mga ministeryal an pagtutdo, pagtoo, pagpailob, ngan gugma nga ginkikinahanglan ha Kristiano nga mga tigurang. Nabulig ini nga mabansay an magigin mga paraataman han “panon han Dios.”​—1 Ped. 5:2.

18. Kay ano nga importante gud nga bansayon naton an iba ha pag-alagad kan Jehova?

¹⁸ Tungod han nagtitikadamu nga panginahanglan ngan mga higayon ha pag-alagad kan Jehova, importante gud an pagbansay ha iba. An ehemplo ni Jesus ngan ni Pablo ha pagbansay epektibo pa gihapon yana. Karuyag ni Jehova nga an iya mga surugoon ha moderno nga panahon mabansay hin maopay para ha ira teokratiko nga mga toka. Gintatagan kita han Dios hin pribilehiyo nga buligan an mga bag-ohan basi epektibo nga matuman an ira ministeryo ngan mga responsabilidad ha kongregasyon. Samtang nagtitikaraot an kahimtang hini nga kalibotan ngan nagtitikadamu an aton buruhaton ha pag-alagad, nagigin mas importante ngan apurado an sugad nga pagbansay.

19. Kay ano nga kombinsido ka nga maglalampos an imo pangalimbasog ha pagbansay ha iba ha pag-alagad kan Jehova?

¹⁹ Syempre, an pagbansay ha iba nagkikinahanglan hin panahon ngan pangalimbasog. Pero bubuligan kita ni Jehova ngan han iya hinigugma nga Anak, ngan tatagan kita nira hin kinaadman basi mabuhat ito. Malilipay kita nga makita nga an aton ginbubuligan ‘maduruto nga nagbubuhat ngan nangangalimbasog gud.’ (1 Tim. 4:10) Ngan hinaot padayon kita nga mag-uswag ha espirituwal samtang ginbubuhat naton an sagrado nga pag-alagad kan Jehova.