1, 2. (a) Paonan-o an Isaias 60:22 natutuman hinin panahon han kataposan? (b) Ano an panginahanglan yana han tunan-on nga bahin han organisasyon ni Jehova?

“AN USA nga gutiayay mahihimo nga usa ka yukot, ngan an usa nga gutiay usa nga nasud nga makusog.” (Isa. 60:22) Ito nga tagna natutuman hinin kataposan nga mga adlaw. Ngani, han 2015 nga tuig han pag-alagad, 8,220,105 an aktibo nga magwarali han Ginhadian ha bug-os nga kalibotan! An ultimo nga mga pulong hito nga tagna sadang makaapekto ha ngatanan nga Kristiano, kay an aton Amay ha langit nasiring: “Ako, hi Jehova, mag-iikag [o, magpapadagmit] hini ha iya panahon.” Pariho hin mga pasahero ha nagtitikalaksi nga sarakyan, inaabat naton an malaksi nga pag-uswag han pagsangyaw nga buruhaton. Ano an aton ginbubuhat may kalabotan hito nga pag-uswag? Ginhihimo ba naton an aton gimaopayi ha ministeryo? Damu nga kabugtoan an nagriregular o nag-o-auxiliary payunir. Ngan diri ba kita nalilipay nga damu an nabalhin ha mga lugar nga mas daku an panginahanglan hin magwarali o nakikigbahin ha iba-iba nga klase hin teokratiko nga buruhaton?

² Nakikita liwat naton an nagtitikadaku nga panginahanglan hin mga magburuhat. Kada tuig, mga 2,000 nga kongregasyon an napuporma. Kon an tagsa hito nga kongregasyon may 5 nga tigurang, 10,000 nga ministeryal nga surugoon an kinahanglan magin kwalipikado nga mga paramangno  kada tuig. Nagpapasabot ito nga kinahanglan maabot han yinukot nga brother an mga kwalipikasyon para magin ministeryal. Dugang pa, kita ngatanan, brother man o sister, ‘damu an mabubuhat ha buruhaton han Ginoo.’​—1 Cor. 15:58.

3, 4. Ano nga espirituwal nga tumong an karuyag mo kab-uton?

³ Basaha an 1 Timoteo 3:1. An Griego nga berbo nga iginhubad nga “nagtatalinguha pagkab-ot” nangangahulogan hin pag-unat han kamot basi abuton an usa nga butang nga bangin hirayo ha imo. Gin-gamit ni apostol Pablo ito nga pulong basi pabug-atan nga an pag-uswag ha espirituwal nagkikinahanglan hin pangalimbasog. Handurawa an usa nga brother nga naruruyag pagkab-ot hin pribilehiyo ha kongregasyon. Diri pa hiya ministeryal nga surugoon, pero nasabtan niya nga kinahanglan niya kultibaron an mag-opay nga kalidad. Siyahan, nangalimbasog hiya nga magin kwalipikado nga ministeryal. Han nakab-ot na niya ito, nangalimbasog liwat hiya nga magin kwalipikado nga tigurang. Ha tagsa hito nga kahimtang, nangalimbasog gud hiya nga maabot an mga kwalipikasyon para magkaada dugang nga responsabilidad ha kongregasyon.

⁴ An kabugtoan nga naghihingyap nga magin payunir, Bethelite, o magboluntaryo ha pagpanukod hin Kingdom Hall, nangangalimbasog liwat ha pagkab-ot han ira mga tumong. Hisgotan naton kon kay ano nga kita ngatanan gin-aaghat han Pulong han Dios nga mag-uswag ha espirituwal.

5. Paonan-o magagamit han mga batan-on an ira kusog para ha mga buruhaton han Ginhadian?

⁵ An mga batan-on damu pa an mahihimo ha pag-alagad kan Jehova tungod kay makusog pa hira. (Basaha an Proberbios 20:29.) An pipira nga batan-on nga Bethelite nabulig ha pag-imprinta ngan pag-bind hin mga Biblia ngan mga literatura nga basado ha Biblia. Damu nga batan-on an nabulig ha pagtukod ngan pagmintinar hin mga Kingdom Hall. Kon may mga kalamidad, an pipira ha ira nagbuboluntaryo kaupod han eksperyensyado nga mga Saksi basi buligan an mga naapektohan hito. Damu liwat nga batan-on nga payunir an nag-aaram hin iba nga linggwahe basi maisangyaw an maopay nga sumat ha mga nitibo ngan mga langyawanon.

6-8. (a) Paonan-o nabag-o han usa brother an iya panhunahuna ha pag-alagad ha Dios, ngan ano an resulta hito? (b) Paonan-o naton ‘matitilawan ngan makikita nga hi Jehova maopay’?

⁶ Posible gud nga nasasabtan mo an pagkaimportante han bug-os-kasingkasing nga pag-alagad ha Dios. Pero ano man kon inaabat mo an inabat han bugto nga hi Aaron? Bisan kon nagdaku hiya ha Saksi nga pamilya, hiya nagsiring: “Waray ako gana ha mga katirok ngan pagsangyaw.” Karuyag niya magin malipayon ha pag-alagad ha Dios pero diri niya nasasabtan kon kay ano nga diri hiya malipayon. Ano an iya ginbuhat?

⁷ Nangalimbasog hi Aaron nga magkaada rutina ha espirituwal sugad han pagbasa ha Biblia ngan pagpangandam ngan pagkomento ha mga katirok. Nagtikang liwat hiya pag-ampo hin regular. Samtang naghihilarom an iya gugma kan Jehova, nagtikang pag-uswag an iya espirituwalidad. Tikang hadto, inabat niya an kalipay ha pagpayunir, pagboluntaryo kaupod han iba kon may mga kalamidad, ngan pagsangyaw ha iba nga nasud. Yana, Bethelite na hiya ngan tigurang. Ano an iya inaabat ha iya ginpili nga pagkinabuhi? “Akon ‘natilawan ngan nakita nga hi Jehova maopay.’ Tungod han iya mga bendisyon, inaabat ko nga may utang ako ha iya ngan nagpapagios ito ha akon nga magin mas madasigon pa ha pag-alagad ha iya, ngan nagriresulta ini hin mas damu nga bendisyon.”

⁸ An salmista nagkanta: “Hira nga nagbibiling kan Jehova diri magkukulang hin bisan ano nga maopay nga butang.” (Basaha an Salmo 34:8-10.) Oo, bubuligan gud ni Jehova adton madasigon nga nag-aalagad ha iya. Samtang ginbubuhat  naton an aton bug-os nga mahihimo ha pag-alagad ha iya, aton mismo ‘natitilawan ngan nakikita nga hi Jehova maopay.’ Ngan kon ginhihimo naton an aton gimaopayi ha pag-alagad ha Dios, magigin malipayon gud kita.

9, 10. Kay ano nga importante nga magin mapailubon ka ha ‘paghulat’?

⁹ Samtang nangangalimbasog ka pagkab-ot hin mga tumong, magin mapailubon ha ‘paghulat.’ (Mika 7:7) Bisan kon bangin tugotan ni Jehova nga lumabay anay an pipira ka panahon antes makakarawat hin pribilehiyo an iya mga surugoon o maghulat anay hira hin angayan nga mga kahimtang, makakasarig hira nga bubuligan hira ni Jehova. Tagda an eksperyensya ni Abraham. Nagsaad ha iya hi Jehova nga magkakaada hiya anak, pero kinahanglan niya tumoo ngan magin mapailubon. (Heb. 6:12-15) Bisan kon naghulat hiya hin maiha antes matawo hi Isaac, waray gud hiya mawad-i hin paglaom, ngan gintuman gud ni Jehova an iya saad kan Abraham.​—Gen. 15:3, 4; 21:5.

¹⁰ Diri masayon an paghulat. (Prob. 13:12) Kon paghihinunahunaon naton an aton mga kapakyasan, makakapaluya gud ito ha aton. Salit mas maopay nga gamiton naton an aton panahon basi mapauswag an mga kalidad nga ginkikinahanglan ha pagkaada mga pribilehiyo. Hisgotan naton an tulo hito.

11. Ano nga mag-opay nga kalidad an mahimo naton kultibaron, ngan kay ano nga importante ito?

¹¹ Kultibara an mag-opay nga kalidad. Pinaagi ha pagbasa ngan pagpamalandong ha Pulong han Dios, magkakaada kita kinaadman, hilarom nga pagsabot, maopay nga pagturotimbang, kahibaro, abilidad ha paghunahuna, ngan maopay nga panhunahuna. Importante ito nga mga kalidad ha mga nangunguna ha kongregasyon. (Prob. 1:1-4; Tito 1: 7-9) Ngan kon babasahon naton an aton mga publikasyon nga basado ha Biblia, mahibabaroan naton an panhunahuna han Dios ha damu nga butang. Kada adlaw, naatubang kita hin mga pagsari may kalabotan ha kaliawan, pamado ngan pag-ayos, paggamit han kwarta, ngan pakig-upod ha iba. Pinaagi ha pag-aplikar han aton hinbabaroan ha Biblia, makakahimo kita hin mga desisyon nga makakapalipay kan Jehova.

12. Paonan-o maipapakita han mga membro han kongregasyon nga matataporan hira?

¹² Ipakita nga matataporan ka. Kinahanglan buhaton han tagsa nga membro han kongregasyon an ira gimaopayi ha pagtuman han ira teokratiko nga mga toka. Sugad nga gobernador, kinahanglan ni Nehemia magpili tikang ha katawohan han Dios hin tutokahan para ha iba-iba nga responsabilidad. Hin-o an iya mga ginpili? Adton may kahadlok ha dios, matinumanon, ngan matataporan. (Neh. 7:2; 13:12, 13) Yana, “an mga tinaporan ginlalaoman nga magigin matinumanon” liwat. (1 Cor. 4:2) Ngan an mag-opay nga buhat nakikita gud.​—Basaha an 1 Timoteo 5:25.

13. Paonan-o mo masusubad an ehemplo ni Jose kon maraot an pagtratar ha imo han iba?

¹³ Tuguti hi Jehova nga magputli ha imo. Ano an imo mahimo buhaton kon diri maopay an pagtratar ha imo han iba? Bangin makiistorya ka dayon ha iya may kalabotan hito. Kondi usahay tungod han imo paniguro nga depensahan an imo kalugaringon, nagdadaku lugod an problema. May mahibabaroan kita ha ehemplo ni Jose. Gintratar hiya hin maraot han iya kabugtoan, pero waray hiya magdumot. Ha urhi, gin-akusaran hiya ngan ginpriso bisan kon waray sala. Pero nagpagiya hiya kan Jehova durante hiton magkuri nga panahon. Ano an nagin resulta? “An pulong ni Jehova nagsuray [o, nagputli] ha iya.” (Sal. 105:19) Han natapos ito nga mga pagsari, nagin kwalipikado hi Jose para ha espesyal nga pribilehiyo. (Gen. 41:37-44; 45:4-8) Kon maraot an pagtratar ha imo han iba, pag-ampo para han kinaadman, magin kalmado ngan buotan ha pagyakan, ngan sarig ha Dios. Sigurado nga bubuligan ka ni Jehova.​—Basaha an 1 Pedro 5:10.

14, 15. (a) Kay ano nga kinahanglan naton ‘pirme tagan hin atensyon’ an paagi han aton pagsangyaw? (b) Paonan-o ka mahimo magpahiuyon ha nagbabag-o nga mga kahimtang? (Kitaa an retrato ha tinikangan hini nga artikulo ngan an kahon nga “ Karuyag Mo ba Sarihan an Iba nga Pamaagi?”)

¹⁴ Gin-aghat ni Pablo hi Timoteo: “Padayon nga buhata an imo gimaopayi ha pagbasa ha publiko, ha pagsagdon, ngan ha pagtutdo. Pirme tagi hin atensyon an imo kalugaringon ngan an imo pagtutdo.” (1 Tim. 4:13, 16) Eksperyensyado na hi Timoteo ha pagsangyaw han Ginhadian. Pero magigin epektibo la hiya ha iya ministeryo kon iya ‘pirme tatagan hin atensyon’ an iya pagtutdo. Maaram gud hiya nga nagbabag-o an panginahanglan ngan kahimtang han mga tawo salit importante nga bag-uhon niya an iya nahiaraan nga pamaagi han pagtutdo ngan ipahiuyon ito ha ira panginahanglan basi maabot an ira kasingkasing. Ito liwat an angay naton buhaton sugad nga mga parasamwak han Ginhadian.

¹⁵ Ha aton pagsangyaw, kasagaran nga damu nga balay an waray tawo. Ha pipira nga lugar, diri nasasangyawan an mga naukoy ha mga apartment ngan subdibisyon. Kon sugad hito an iyo teritoryo, kay ano nga diri sarihan an iba nga pamaagi han pagsangyaw?

16. Kay ano nga masisiring nga epektibo gud an pagsangyaw ha publiko?

¹⁶ An pagsangyaw ha publiko maopay gud nga paagi han pagpasamwak han maopay nga sumat. Damu nga Saksi an epektibo gud hini nga buruhaton. Nagsasangyaw hira ha mga estasyon han tren ngan bus, ha merkado ngan parke, ngan ha iba pa nga panpubliko nga lugar. Mahimo tikangan han usa nga Saksi an iya pakiistorya pinaagi ha pag-unabi hin balita, paghatag hin kumendasyon mahitungod ha anak han iya kaistorya, o pagpakiana mahitungod ha iya trabaho. Samtang nagpapadayon an pag-istorya, mahimo magbangon an  magwarali hin usa nga punto tikang ha Kasuratan ngan aroon an opinyon han iya kaistorya. An baton hito nga indibiduwal kasagaran na nga nagriresulta hin dugang nga paghisgot ha Biblia.

17, 18. (a) Paonan-o ka mahimo magkaada dugang nga kompyansa ha pagsangyaw ha publiko? (b) Kay ano nga importante an pagkaada han disposisyon ni David ha pagdayaw kan Jehova kon nakikigbahin ka ha ministeryo?

¹⁷ Kon nakukurian ka pagsangyaw ha publiko, ayaw pag-undang. Hi Eddie nga payunir ha New York City nag-aalang hadto ha pakiistorya ha mga tawo ha publiko. Pero ha urhi, nagkaada hiya kompyansa ha kalugaringon. Ano an nakabulig ha iya? Hiya nagsiring: “Ha amon pagsingba han pamilya, nagsasaliksik kami nga mag-asawa han baton han mga pagriwa ngan opinyon han mga tawo. Nangangaro liwat kami hin mga suhestyon ha iba nga Saksi.” Yana, nalilipay na gud hi Eddie ha pagsangyaw ha publiko.

¹⁸ Samtang nagkakaada ka abilidad ngan kompyansa ha pagsangyaw han maopay nga sumat, makikita an imo espirituwal nga pag-uswag. (Basaha an 1 Timoteo 4:15.) Dugang pa, sigurado nga dadayawon mo an aton langitnon nga Amay pariho han ginbuhat ni David nga nagkanta: “Pagbibendisyonan [o, pagdadayawon] ko hi Jehova ha ngatanan nga takna: An iya pagdayaw mamaada ha akon baba ha dayoday. An akon kalag magmamalipay gud kan Jehova: An mga maaghop makakabati dida hiton, ngan magkakalilipay hira.” (Sal. 34:1, 2) Ngan posible nga tungod han imo ministeryo, an mga maaghop malipayon nga maupod ha imo ha tinuod nga pagsingba.

19. Kay ano nga sadang magin malipayon an maunungon nga surugoon ni Jehova bisan kon aada hiya ha makuri nga kahimtang?

¹⁹ Hi David nagkanta liwat: “An ngatanan mo nga mga buhat mapasalamat ngadto ha imo, O Jehova; ngan an imo mga baraan magbubulahan ha imo. Magyayakan hira han himaya han imo ginhadian, ngan maghihimangraw mahitungod han imo kagamhanan. Ha pagpasabot ngadto ha mga anak han mga tawo han iya magpakagarahum nga mga buhat, ngan an kahimayaan han kaharangdon han iya ginhadian.” (Sal. 145:10-12) Iginpapahayag gud hito nga mga pulong an inaabat han ngatanan nga maunungon nga Saksi ni Jehova. Pero ano man kon baga hin limitado na an imo nahihimo ha ministeryo tungod han sakit o kalagas? Hinumdumi pirme nga kon nagsasangyaw ka ha imo mga nakakaupod sugad han nars o doktor, an imo sagrado nga pag-alagad nagdadayaw ha aton mahimayaon nga Dios. Kon napriso ka tungod han imo pagtoo, posible nga ginsasalingabot mo nga maisangyaw an kamatuoran, ngan an pagbuhat hito nakakapalipay kan Jehova. (Prob. 27:11) Nalilipay liwat hiya kon padayon mo nga ginbubuhat an imo rutina ha espirituwal bisan kon diri mga Saksi an imo mga kapamilya. (1 Ped. 3:1-4) Bisan ha magkuri nga kahimtang, mahimo mo madayaw hi Jehova ngan mapauswag an imo espirituwalidad.

20, 21. Kon gintaporan ka hin damu nga pribilehiyo ha organisasyon ni Jehova, paonan-o ka magigin bendisyon ha iba?

²⁰ Sigurado nga bibendisyonan ka ni Jehova kon padayon mo nga papauswagon an imo espirituwalidad. Kon hihimoon mo an ginkikinahanglan nga pagbag-o ha imo eskedyol o pagkinabuhi, magkakaada ka mas daku nga pribilehiyo nga buligan an mga tawo nga hibaroan an presyoso nga mga kamatuoran tikang ha Dios. Dugang pa, an imo espirituwal nga pag-uswag ngan pagsakripisyo ha kalugaringon magigin daku nga bendisyon ha imo mga igkasi-tumuroo. Ngan tungod han imo mga pangalimbasog para ha kongregasyon, hihigugmaon ka, papasalamatan, ngan susuportaran han mga nahigugma kan Jehova.

²¹ Nag-aalagad man kita kan Jehova hin damu na ka tuig o pipira pa la ka bulan, kita ngatanan mahimo mag-uswag ha espirituwal. Pero paonan-o mabubuligan han hamtong nga mga Kristiano an mga bag-ohan nga mag-uswag ha espirituwal? Hihisgotan naton ito ha sunod nga pag-aram.