AN SINSERO nga mga estudyante ha Biblia puropariho ha mga minero hin bulawan. Kinahanglan nira mangalimbasog ngan padayon nga mamiling hin presyoso nga kinaadman ha Kasuratan. Sugad nga mga estudyante ha Biblia, ano an aton mahibabaroan ha tulo nga paagi kon paonan-o nabibilngan an bulawan?

Handurawa nga naglalakat ka ha ligid han salog ngan katapos may nakit-an ka nga baga hin gutiay nga bato nga nag-iinggat. Dinuko ka basi kitaon ito ngan nalipay ka kay bulawan ngay-an ito. Guroguti ito kay han ulo-ulo hin palito ngan talagsahon kay han marahalon nga diamante. Syempre, namiling ka pa ha palibot kay bangin may iba pa nga bulawan.

Ha pariho nga paagi, bangin diri mo gud nahingangalimtan an panahon nga may Saksi ni Jehova nga bumisita ha iyo balay basi isumat an paglaom nga makikita ha Biblia. Posible nga nahinunumdoman mo pa gud an siyahan nga higayon nga nakabiling ka hin espirituwal nga bulawan, siring pa. Bangin han nabasa mo ha Biblia nga Jehova an ngaran han Dios. (Sal. 83:18) O bangin han hinbaroan mo nga puydi ka magin sangkay ni Jehova. (San. 2:23) Nasantop mo dayon nga may nabilngan ka nga mas maopay kay han bulawan! Ngan bangin nagin determinado ka nga mamiling pa hin espirituwal nga bulawan.

An gudtiay nga tipak hin bulawan usahay natitirok ha mga sapa ngan salog. Gintatawag ini nga alluvial nga bulawan. May panahon nga an maduruto nga minero nakakabiling dida hito hin kinilo-kilo nga bulawan nga nagkakantidad hin yinukot ka dolyar.

Han nagtikang ka pag-aram han Biblia kaupod han mga Saksi ni Jehova, bangin inabat mo nga pariho ka hin minero nga nagsasarà hin bulawan. An pagpamalandong hin mga teksto ha Biblia posible nga nakadugang han imo mga hinbaroan na, ngan nabulig ito nga maparig-on an imo espirituwalidad. Samtang naniningkamot ka nga maagian an presyoso nga mga kamatuoran ha Biblia, nahibabaro ka kon paonan-o magigin duok kan Jehova ngan magpapabilin ha iya gugma nga nagriresulta hin kinabuhi nga waray kataposan.​—San. 4:8; Jud. 20, 21.

Pariho ha minero nga namimiling hin presyoso nga bulawan, bangin maduruto ka liwat pamiling hin  birilhon nga espirituwal nga bahandi. Katapos mo hibaroan an basihan nga mga kamatuoran ha Biblia, posible nga napagios ka nga magdedikar kan Jehova ngan magpabawtismo.​—Mat. 28:19, 20.

An usa nga minero bangin makabiling hin gudtiay nga bulawan ha nagtig-a nga mga bato tikang ha bulkan. An pipira hito nga bato may damu nga gudti-gudti nga bulawan. Ha siyahan, bangin diri mo dayon makita ito nga mga bulawan. Kay ano? Kay ha kada usa ka tonilada hito nga bato may-ada la mga 10 ka gramo nga bulawan! Pero para ha minero, takos gud pangalimbasogan nga makuha ito nga mga bulawan.

Ginkikinahanglan liwat an pangalimbasog katapos hibaroan han indibiduwal “an nangunguna nga doktrina mahitungod han Kristo.” (Heb. 6:1, 2) Ha imo pag-aram ha Biblia, kinahanglan mangalimbasog ka nga makakuha hin bag-o nga mga ideya ngan praktikal nga mga leksyon. Salit, ano an puydi mo buhaton basi padayon nga magin mapulsanon an imo personal nga pag-aram ha Biblia, bisan kon maiha mo na ito nga ginbubuhat?

Padayon nga magin disidido nga mahibaro. Usisaha an mga detalye. Kon padayon ka nga mangangalimbasog, mabibilngan mo an birilhon nga mga bulawan ha Kasuratan nga amo an kinaadman ngan giya tikang ha Dios. (Roma 11:33) Basi mag-uswag an imo kahibaro ha Kasuratan, pahimulusi an mga garamiton ha pagsaliksik nga may-ada ha iyo linggwahe. Pamilnga an giya nga imo ginkikinahanglan ngan an mga baton han imo mga pakiana may kalabotan ha Biblia. Pakianhi an iba kon ano nga mga teksto ngan artikulo an nakabulig ngan nakadasig ha ira. Isumat ha iba an makapainteres nga mga punto nga imo hinbaroan ha imo pag-aram ha Pulong han Dios.

Syempre, diri la pagkaada damu nga kahibaro an sadang mo magin tumong. Hi apostol Pablo nagpahamangno nga “an kahibaro nag-aaghat hin paghambog.” (1 Cor. 8:1) Salit pangalimbasog nga matipigan an pagkamapainubsanon ngan marig-on nga pagtoo. An regular nga pagsingba han pamilya ngan personal nga pag-aram ha Biblia mabulig ha imo nga magkinabuhi uyon ha mga suruklan ni Jehova ngan magpapagios ha imo nga buligan an iba. Labaw ha ngatanan, malilipay ka kay nakabiling ka hin mas maopay gud kay han bulawan.​—Prob. 3:13, 14.