1. Bisan kon kasagaran na nga malipayon an pagtikang han pag-asawa, ano an maieksperyensyahan han mga mag-aasawa? (Kitaa an retrato hini nga pahina.)

KON magkita na an karaslon nga lalaki ngan an iya mahusay nga maarasawa ha adlaw han ira kasal, diri gud maisasaysay an ira duro nga kalipay. Han mag-uyab hira, nagtubo gud an ira gugma ha kada tagsa, salit nagin andam hira nga magsaad nga magmamaunungon hira ha usa kag usa sugad nga mag-asawa. Syempre, ginkikinahanglan an mga pagbag-o kon nagtatampo an duha nga indibiduwal ngan nagigin usa nga bag-o nga pamilya. An Pulong han Dios naghahatag hin maaramon nga sagdon para hadton karuyag mag-asawa, kay karuyag han mahigugmaon nga Dios nga nagpatikang han pag-asawa nga magin malampuson ngan malipayon an ira pag-asawa. (Prob. 18:22) Pero an Kasuratan matin-aw nga nagsusumat ha aton nga tungod kay diri kita hingpit, an mga mag-aasawa “magkakaada kasakitan ha ira kinabuhi.” (1 Cor. 7:28) Paonan-o malilimitahan ito nga kasakitan? Ngan paonan-o magigin malampuson an Kristiano nga pag-asawa?

2. Ano an iba-iba nga klase han gugma nga sadang ipakita han mag-asawa?

 ² Ginpapabug-atan han Biblia an pagkaimportante han gugma. An pagpalangga (Griego, phi·liʹa) kinahanglanon ha pag-asawa. An romantiko nga gugma (eʹros) naghahatag hin kalipay, ngan an gugma ha pamilya (stor·geʹ) importante labi na kon nagkakaada na mga anak. Kondi an gugma nga iginbasar ha prinsipyo (a·gaʹpe) an nagpapalampos han pag-asawa. May kalabotan ha gugma, hi apostol Pablo nagsurat: “Sadang higugmaon han tagsa ha iyo an iya asawa sugad han iya paghigugma ha iya kalugaringon. Sugad man, an asawa sadang magkaada daku nga respeto ha iya bana.”​—Efe. 5:33.

3. Mationan-o kadaku nga gugma an sadang ipakita han mag-asawa?

³ Hi Pablo nagsurat: “Mga bana, padayon nga higugmaa an iyo asawa, sugad la nga hinigugma han Kristo an kongregasyon ngan iginhatag an iya kalugaringon para hito.” (Efe. 5:25) Basi masubad han mga Kristiano an ehemplo ni Jesus, kinahanglan nira higugmaon an kada tagsa pariho ha paghigugma niya ha ira. (Basaha an Juan 13:34, 35; 15:12, 13.) Kinahanglan ipakita han bana o asawa an daku gud nga gugma ha iya padis nga tungod hito andam niya ihatag an iya kinabuhi para ha iya padis kon ginkikinahanglan. Ito gud unta an sadang ipakita han mag-asawa kon may nabangon nga diri pagsinabtanay. Ngani, an a·gaʹpe nga gugma “nag-aantos . . . han ngatanan nga butang, natuod han ngatanan nga butang, naglalaom han ngatanan nga butang, ngan nagpapailob han ngatanan nga butang.” Oo, “an gugma diri gud napapakyas.” (1 Cor. 13:7, 8) An paghinumdom han ira saad nga maghihigugmaay ngan magmamaunungon ha kada tagsa mabulig ha Kristiano nga mag-asawa nga mangalimbasog nga sundon an hitaas nga suruklan ni Jehova basi masulbad an anoman nga problema.

4, 5. (a) Ano an responsabilidad han bana sugad nga ulo han pamilya? (b) Ano an sadang magin pagtagad han asawa ha kahikayan han pagkaulo? (c) Ano nga mga pagbag-o an ginhimo han usa nga mag-asawa?

⁴ Ha paghisgot han obligasyon han tagsa nga padis, hi Pablo nagsurat: “An mga asawa magpasakop ha ira bana sugad han ira pagpasakop ha Ginoo, kay an bana amo an ulo han iya asawa sugad la nga an Kristo amo an ulo han kongregasyon.” (Efe. 5:22, 23) Ini nga kahikayan diri nagpapasabot nga an asawa uroubos ha iya bana. Lugod, nabulig ito basi matuman han asawa an papel nga iginhatag ha iya han Dios han Hiya nagsiring: “Diri maopay nga an lalaki [hi Adan] mag-uusahan la; ako maghihimo hin iya kabulig.” (Gen. 2:18) Sugad la nga an Kristo, an “ulo han kongregasyon,” nagpapakita hin gugma, sadang liwat ipakita han bana an mahigugmaon nga pagkaulo. Kon bubuhaton niya ito, an iya asawa maabat hin kasigurohan ngan magigin masayon para ha asawa nga respetuhon ngan suportaran an iya bana ngan magpasakop ha iya.

⁵ May kalabotan ha mga pagbag-o nga kinahanglan himoon ha pag-asawa, hi Cathy ^[1] nagsiring: “Han solo pa ako, ako an nagbubuot ngan nag-aataman han akon kalugaringon. Pero nabag-o ito han nag-asawa na ako kay kinahanglan ko mahibaro pagsarig ha akon bana. Diri ito pirme masayon, pero nagin mas duok gud kami nga mag-asawa tungod han amon pagsunod ha giya ni Jehova.” An iya bana nga hi Fred nagsiring: “Nakukurian ako paghimo hin mga desisyon. Ha pag-asawa, nagigin mas makuri ito kay duha na nga indibiduwal an kinahanglan tagdon. Pero pinaagi ha pangaro hin giya kan Jehova ngan pagpamati ha suhestyon han akon asawa, nagigin mas masayon ito. Nagbibinuligay gud kami ha ngatanan nga buruhaton!”

6. Paonan-o an gugma nagigin “hingpit nga bugkos han pagkaurosa” kon nagkakaproblema an mag-asawa?

⁶ Marig-on an pag-asawa kon an bana ngan asawa masinabuton ha kaluyahan han usa kag usa. ‘Padayon hira nga nag-iinantosay ngan kinasingkasing  nga nagpipinasayloay.’ Oo, an kada usa makakabuhat hin sayop. Kon mahitabo ito, magkakaada hira higayon nga mahibaro tikang ha ira mga sayop, magin mapinasayloon, ngan mas maipakita an gugma nga amo an “hingpit nga bugkos han pagkaurosa.” (Col. 3:13, 14) Dugang pa, “an gugma nagpapasensya ngan buotan. . . . Diri ito nag-iihap han karat-an.” (1 Cor. 13:4, 5) Salit kon nabangon an diri pagsinabtanay, kinahanglan sulbaron dayon ito han mag-asawa tubtob nga posible, antes matunod an adlaw. (Efe. 4:26, 27) An sinsero nga pagsiring nga “pasayloa ako nga napasubo ko ikaw” nagkikinahanglan hin pagpaubos ngan kaisog, pero nakakabulig ito nga masulbad an mga problema ngan magin mas duok an mag-asawa.

7, 8. (a) Ano an sagdon han Biblia may kalabotan ha seksuwal nga relasyon han mag-asawa? (b) Kay ano nga kinahanglan ipakita han mag-asawa an mahigugmaon nga konsiderasyon ha kada tagsa?

⁷ An Biblia naghahatag hin maaramon nga sagdon nga makakabulig ha mag-asawa nga magkaada timbang nga panhunahuna ha ira seksuwal nga panginahanglan. (Basaha an 1 Corinto 7:3-5.) Importante an pagpakita hin mahigugmaon nga konsiderasyon ha pagbati ngan panginahanglan han padis. Kon diri magigin makonsiderasyon an bana ha iya asawa, bangin diri malipay an asawa ha ira seksuwal nga relasyon. An mga bana ginsusugo nga ‘trataron hin maaramon’ an ira asawa. (1 Ped. 3:7) An pakighilawas diri sadang igpirit o ig-obligar kondi sadang mahitabo na la hin natural. Agsob nga mas madagmit maruyag hini an lalaki kay han babaye, pero kinahanglan mahitabo ini ha panahon nga karuyag nira nga duha.

⁸ Bisan kon an Biblia waray maghatag hin espisipiko nga mga surundon kon ano an angay o diri angay buhaton han mag-asawa may kalabotan ha ira seksuwal nga relasyon, nag-uunabi ito hin mga pagpahayag hin gugma. (Kanta ni Salo. 1:2; 2:6) Kinahanglan ipakita han Kristiano nga mag-asawa an mahigugmaon nga konsiderasyon ha usa kag usa.

9. Kay ano nga sayop an pagkaada seksuwal nga hingyap ha diri naton padis?

⁹ An daku nga gugma ha Dios ngan ha igkasi-tawo mabulig ha mag-asawa nga likyan an bisan hin-o o bisan ano nga makakadaot han ira pag-asawa. May mga pag-asawa nga nagkakaproblema o nadadaot pa ngani tungod kay an padis nagin adik ha pornograpiya. Kinahanglan atohan naton an bisan ano nga mag-aaghat ha aton nga magkita hin pornograpiya o magkaada sayop nga seksuwal nga hingyap. Bisan an baga hin pagpikat ha diri naton padis diri gud mahigugmaon ngan sadang likyan. An paghinumdom nga maaram an Dios han ngatanan nga aton ginhuhunahuna ngan ginbubuhat magpaparig-on han aton hingyap nga lipayon hiya ngan magpabilin nga putli.​—Basaha an Mateo 5:27, 28; Hebreo 4:13.

10, 11. (a) Mationan-o kakalyap an diborsyo? (b) Ano an ginsisiring han Biblia mahitungod ha pagbulag? (c) Ano an mabulig ha mag-asawa nga diri dayon magdesisyon pagbulag?

¹⁰ Kon nagpapadayon an seryoso nga mga problema han mag-asawa, bangin hunahunaon han usa o nira nga duha nga magbulag o magdiborsyo. Ha pipira nga nasud, sobra katunga han mga mag-asawa an nagdidiborsyo. Talagsa la ini mahitabo ha sulod han kongregasyon, pero an pagtikadamu han mga Kristiano nga nagkakaproblema ha ira pag-asawa kinahanglan tagan hin atensyon.

¹¹ An Biblia naghahatag hini nga instruksyon: “Diri bulagan han asawa an iya bana. Pero kon bumulag hiya, magpabilin hiya nga waray asawa, o kon diri man, makighiuli hiya ha iya bana. Ngan diri bayaan han bana an iya asawa.” (1 Cor. 7:10, 11) An pagbulag sadang tagdon hin seryoso. Bisan kon an pagbulag bangin amo an solusyon ha dagku nga problema, kasagaran na nga nakakadugang la lugod ito. Katapos unabihon utro an  ginsiring han Dios mahitungod ha pagbaya han lalaki ha iya kag-anak ngan pagtampo ha iya asawa, hi Jesus nagsiring: “An gintampo han Dios diri pagbulagon han tawo.” (Mat. 19:3-6; Gen. 2:24) Iginpapasabot liwat hini nga bisan an bana o asawa waray katungod nga pagbulagon “an gintampo han Dios.” Gintatagad ni Jehova an pag-asawa sugad nga bug-os-kinabuhi nga pagkaupod. (1 Cor. 7:39) An paghunahuna nga kita ngatanan may baratunon ha Dios magpapagios ha mag-asawa nga mangalimbasog nga sulbaron dayon an mga problema basi diri ito dumaku.

12. Ano an posible nga hinungdan han pagbulag han mag-asawa?

¹² An diri reyalistiko nga mga ginlalaoman posible nga amo an hinungdan han problema ha pag-asawa. Kon diri natutuman an ginlalaoman nga malipayon nga pag-asawa, bangin magin diskontento an usa, umabat nga nalimbongan, o maaringit pa ngani. An pagkaiba han emosyon ngan han mga nahiaraan han bana o asawa bangin magin hinungdan han problema, o bangin bumangon an diri pagsinabtanay tungod han kwarta, pakig-upod ha ugangan, ngan pagpadaku ha anak. Kondi makalilipay nga nasusolusyonan han kadam-an nga inasaw-an nga Kristiano ito nga mga problema kay nagpapagiya hira ha Dios.

13. Ano an makatadunganon nga mga rason ha pagbulag?

¹³ Usahay bangin may makatadunganon nga rason ha pagbulag. An pipira naghuhunahuna nga an tinuyo nga diri pagsuporta ha materyal, sobra nga pag-abuso ha pisikal, ngan duro nga pameligro han espirituwalidad mga rason ha pagbulag. An Kristiano nga mag-asawa nga may seryoso nga mga problema sadang mangaro hin bulig ha mga tigurang. Inin eksperyensyado nga kabugtoan makakabulig ha mga mag-asawa nga iaplikar an sagdon han Pulong han Dios. Ha pagsulbad ha mga problema ha pag-asawa, kinahanglan kita mag-ampo kan Jehova para han iya espiritu ngan han iya bulig basi maiaplikar an mga prinsipyo ha Biblia ngan maipakita an bunga han iya espiritu.​—Gal. 5:22, 23. ^[2]

14. Ano an ginsisiring han Biblia ha inasaw-an nga mga Kristiano nga an bana o asawa diri nag-aalagad kan Jehova?

¹⁴ May mga Kristiano nga an bana o asawa diri nag-aalagad kan Jehova. Ha sugad nga sitwasyon, an Biblia naghahatag hin maopay nga rason kon kay ano nga diri hira angay magbulag. (Basaha an 1 Corinto 7:12-14.) An diri-tumuroo nga padis ‘nababaraan’ tungod han iya Kristiano nga bana o asawa, nasasantop man niya ito o diri. An ira mga anak gintatagad nga “baraan” salit nagpapahimulos han panalipod han Dios. Hi Pablo nagsiring ha tumuroo nga padis: “Sugad nga asawa, bangin man la matalwas mo an imo bana. O sugad nga bana, bangin man la matalwas mo an imo asawa.” (1 Cor. 7:16) Haros ngatanan nga kongregasyon may mga mag-asawa diin an tumuroo nga padis an nagin instrumento nga “matalwas” an iya bana o asawa.

15, 16. (a) Ano an sagdon han Biblia ha Kristiano nga mga asawa nga diri-tumuroo an bana? (b) Ano an sadang himoon han usa nga Kristiano “kon magdesisyon pagbulag an diri-tumuroo” nga padis?

¹⁵ Ginsasagdonan ni apostol Pedro an Kristiano nga mga asawa nga magpasakop ha ira bana, “basi kon may bisan hin-o nga diri masinugtanon ha pulong, makabig hira bisan waray pulong pinaagi han iyo panggawi, tungod kay mga testigo hira nga nakakita han iyo putli nga panggawi nga may daku nga respeto.” Imbes nga pagsinangyawan pirme han asawa an iya bana, bangin mas mabuligan niya hiya nga karawaton an kamatuoran kon ipapakita niya “an kalmado ngan malumo nga disposisyon, nga presyoso gud ha pagkita han Dios.”​—1 Ped. 3:1-4.

¹⁶ Ano man kon an diri-tumuroo nga padis magdesisyon nga makigbulag? An Biblia nasiring: “Kon magdesisyon pagbulag an diri-tumuroo, pabay-i hiya nga bumulag. Ha sugad nga mga kahimtang diri obligado an tumuroo nga bana o asawa nga makig-upod ha iya. Pero gintagan  kamo han Dios hin kamurayawan.” (1 Cor. 7:15) Diri ini nagpapasabot nga an Kasuratan naghahatag ha ginbulagan nga padis hin kagawasan nga mag-asawa utro, pero diri sadang pugngan an diri-tumuroo nga padis nga makigbulag. An pagbulag bangin maghatag hin kamurayawan. Pero mahimo hunahunaon han ginbulagan nga Kristiano nga bangin makigbalik an iya diri-tumuroo nga padis basi matipigan an ira pag-asawa, ngan ha urhi magin alagad ni Jehova.

17. Ano an sadang magin prayoridad han Kristiano nga mag-asawa?

¹⁷ Tungod kay nagkikinabuhi na gud kita ha “kataposan nga mga adlaw,” naieksperyensyahan naton an “peligroso gud nga mga panahon nga makuri pakiangayan.” (2 Tim. 3:1-5) Pero an pagpabilin nga marig-on ha espirituwal makakabulig gud nga maatohan an magraot nga impluwensya han kalibotan. Hi Pablo nagsurat: “Halipot na an nabibilin nga panahon. Tikang yana, an mga may asawa magin pariho han mga waray asawa, . . . ngan an mga nagamit han kalibotan magin pariho han mga diri nagamit hito hin bug-os.” (1 Cor. 7:29-31) Waray magsiring hi Pablo nga ibalewaray han mga inasaw-an an ira obligasyon ha ira bana o asawa. Pero tungod kay halipot na gud an panahon, kinahanglan nira tagan hin prayoridad an espirituwal nga mga buruhaton.​—Mat. 6:33.

18. Kay ano nga an mga Kristiano mahimo magkaada malipayon ngan malampuson nga pag-asawa?

¹⁸ Bisan kon nagkikinabuhi kita hinin makuri gud nga panahon diin kadam-an han pag-asawa an napapakyas, mahimo magin malipayon ngan malampuson an aton pag-asawa. Oo, matitipigan han Kristiano nga mga mag-asawa “an gintampo han Dios” kon padayon nga makikig-upod hira ha katawohan ni Jehova, iaaplikar an sagdon han Kasuratan, ngan magpapagiya ha baraan nga espiritu.​—Mar. 10:9.