Usa la ini han damu nga isyu nga ginhimo han mga kaaway ni Jesus basi pakarauton hiya ngan an iya mga disipulo. An Mosaiko nga Balaud nag-uunabi hin mga seremonya han pagputli may kalabotan ha mga butang sugad han mga agas han lawas, sanla o liprosi, ngan patay nga lawas hin tawo o hayop. May mga instruksyon liwat ito kon paonan-o magigin limpyo. Mahihimo ini pinaagi ha paghalad, paghugas, o pagwisik.​—Leb., kap. 11-15; Num., kap. 19.

Ginhimo nga komplikado han Judio nga mga rabi an tagsa nga detalye hini nga mga balaud. Usa nga reperensya an nagsiring nga kon may nakakahugaw, “uusisahon kon diin ito nakuha, kon paonan-o ngan mationan-o ito mahimo makatapon, kon ano nga mga gamit an magigin mahugaw o diri, ngan kon ano an paagi ngan an rituwal nga ginkikinahanglan para ha pagputli.”

An mga kaaway ni Jesus nagpakiana ha iya: “Kay ano nga diri ginsusunod han imo mga disipulo an tradisyon han mga tawo ha kadaan nga panahon, ngan nangangaon hira nga maghugaw an kamot?” (Mar. 7:5) Ito nga mga kaaway ni Jesus diri naghihisgot han pisikal nga kalimpyo. Sugad nga rituwal, gin-oobligar han mga rabi nga buboan hin tubig an ira mga kamot antes kumaon. An reperensya dugang nga nagsiring: “Gindidebatihan liwat kon ano an gagamiton nga surudlan han tubig, ano nga klase hin tubig an angayan, hin-o an magbububo, ngan tubtob diin nga parti han kamot an huhunawan.”

Ano an baton ni Jesus may kalabotan hini ngatanan nga balaud nga hinimo han tawo? Ginsidngan niya an mga lider han relihiyon han siyahan nga siglo: “Husto gud an igintagna ni Isaias mahitungod ha iyo nga mga hipokrito, sugad han nahisurat: ‘Ini nga mga tawo nagpapasidungog ha akon pinaagi han ira mga im-im, pero an ira kasingkasing hirayo gud ha akon [Jehova]. Waray pulos an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’ Diri niyo ginsusunod an sugo han Dios, lugod gintutuman niyo an tradisyon han mga tawo.”​—Mar. 7:6-8.