IKATARAPOS adto han Nobyembre 1932 ha Mexico City. Usa ka semana antes hito, igin-instalar ha siyahan nga higayon an mga traffic light hini nga syudad nga may sobra usa ka milyon nga umurukoy. Pero hini nga higayon, daan na nga balita an mahitungod han mga traffic light. An mga reporter hito nga syudad nakapokus na ha mahitatabo hini nga semana. Andam na an ira mga kamera, ngan nakadto na hira ha estasyon han tren, naghuhulat ha pag-abot han espesyal nga bisita—hi Joseph F. Rutherford, nga presidente hadto han Watch Tower Society. Naghuhulat liwat an mga Saksi hito nga nasud basi malipayon nga abiabihon hi Bugto Rutherford, nga binisita ha ira basi tumambong ha tulo ka adlaw nga nasyonal nga kombensyon.

An The Golden Age nagsiring: “Sigurado nga ini nga kombensyon magigin bahin han kasaysayan sugad nga importante gud nga hitabo ha pangalimbasog nga maipasamwak an kamatuoran ha republika han Mexico.” Pero kay ano nga makatirigamnan ini nga kombensyon bisan kon mga 150 la an tinambong?

Antes hito nga kombensyon, mahinay an pag-uswag han Ginhadian ha Mexico. Tikang han 1919, may gudtiay nga asembleya nga gindudumara, pero nagtikaguti an mga kongregasyon han sumunod nga mga tuig. Han nagkaada sanga nga opisina ha Mexico City han 1929, ginhunahuna han kabugtoan nga magtitikaopay an kahimtang. Pero damu pa gihapon an ulang. Han ginsidngan an mga colporteur nga diri salaktan hin negosyo an pagsangyaw nga buruhaton, usa ha ira an nasina ngan binaya ha kamatuoran ngan nag-organisar hin iya kalugaringon nga grupo ha pag-aram ha Biblia. Durante hito nga panahon, an paramangno han sanga nga opisina nakabuhat hin diri uyon ha Kasuratan salit kinahanglan saliwnan. An maunungon nga mga Saksi ha Mexico nagkinahanglan hin pagparig-on ha espirituwal.

Durante han pagbisita ni Bugto Rutherford, ginparig-on gud niya ini nga mga maunungon pinaagi hin duha nga makapabantad nga pahayag ha kombensyon ngan lima nga mapwersa nga sermon ha radyo. Ha siyahan nga higayon, naipasamwak an maopay nga sumat ha bug-os nga Mexico pinaagi han mga estasyon han radyo. Katapos han kombensyon, gin-organisar han bag-o nga pinili nga paramangno han sanga nga opisina an buruhaton, ngan an mga Saksi padayon nga nagsangyaw nga may dugang nga kadasig ngan pag-uyon ni Jehova.

Han sumunod nga tuig, nagkaada na duha nga kombensyon hito nga nasud, an usa ha syudad han Veracruz ngan an usa ha Mexico City. An daku nga pangalimbasog ha pagsangyaw nagtikang pagkaada mag-opay nga resulta. Han 1931, may 82 nga magwarali hito nga nasud. Paglabay hin napulo ka tuig, nagdamu ito hin napulo ka pilo! Mga 1,000 an binisita ha Mexico City para han 1941 nga Theocratic Assembly.

Han 1943, an mga Saksi nagsul-ot hin mga karatola basi ipasamwak an “Free Nation’s” Theocratic Assembly nga dudumarahon ha 12 nga syudad han Mexico. *  Duha nga karatola an ginbibitay ha sugbong, usa ha atubangan ngan usa ha likod. Usa ini nga pamaagi han pagpasamwak nga ginagamit han mga Saksi tikang han 1936.

May kalabotan ha malampuson nga paggamit han kabugtoan han mga karatola nga iginsusul-ot, an magasin nga La Nación nagsiring: “Han siyahan nga adlaw [han asembleya], ginsidngan [an mga Saksi] nga mag-imbitar hin damu nga tawo. Han sumunod nga adlaw, napuno na nira an pasilidad.” An epekto hini nga mga parada waray makapalipay ha Katoliko nga Singbahan, salit ira ginkontra an mga Saksi. Bisan pa han pagkontra, an maisugon nga kabugtoan nagpadayon ha pagpasamwak ha kakalsadahan. An La Nación nagsiring liwat: “Nakita hira ha bug-os nga syudad.” Nagdugang liwat ito nga an kabugtoan may sul-ot nga mga karatola—ha ira atubangan ngan ha ira luyo. Iginpakita hito nga artikulo an retrato han kabugtoan nga nagpapasamwak ha kakalsadahan han Mexico City. Makikita ha ubos han retrato an kapsyon: “Pag-okupar ha kakalsadahan.”

Hito nga mga panahon, kadam-an han mga Saksi an kinahanglan magsakripisyo basi makatambong ha pipira nga kombensyon ha Mexico. Damu nga delegado an tikang ha higrayo nga baryo diin waray tren o bisan kalsada. Salit kinahanglan hira sumakay hin kabayo o magbaktas hin pipira ka adlaw pakadto ha lugar nga may tren nga nabiyahe pakadto ha syudad diin dudumarahon an kombensyon.

Kadam-an han mga Saksi mga pobre, ngan haros igo la an ira pamasahe tipakadto ha kombensyon. Pag-abot nira didto, damu ha ira an nakikiukoy ha balay han mga Saksi hito nga lugar, nga mahigugmaon nga nag-aabiabi ha ira. An iba nahuron ha mga Kingdom Hall. Makausa, mga 90 nga delegado an hinuron ha sanga nga opisina, diin an kada tagsa gintagan hin 20 nga karton hin libro basi ira magin higdaan. Mababasa an asoy ha Yearbook nga an mapasalamaton nga mga bisita nagsiring nga ini nga ira ‘higdaan mas mahumok ngan mas mapaso kay han semento nga salog.’

Para hinin mapasalamaton nga mga Saksi, an pagtambong ha makalilipay nga mga asembleya takos gud han ngatanan nga pagsakripisyo. Yana, samtang nagtitikadamu an mga magwarali ha Mexico nga maabot na hin usa ka milyon, nagpapabilin pa gihapon an mapasalamaton nga disposisyon han kabugtoan. * An report han sanga nga opisina han Mexico han 1949 nagsiring mahitungod han kabugtoan: “An makuri nga mga kahimtang nga ira naeksperyensyahan waray magpaluya han ira kadasig ha kamatuoran kay an tagsa namon nga asembleya amo an usa han nangunguna nga topiko nga ira gin-iinistorya ha sulod hin maiha nga panahon katapos han asembleya ngan an kabugtoan padayon nga nagpapakiana, San-o kita magkakaada utro asembleya?” Ito pa gihapon an ginbubuhat han kabugtoan ha Mexico yana.​—Tikang ha aton daan nga mga koleksyon ha Sentral Amerika.