1. Ano nga pribilehiyo an aton napapahimulosan?

DAKU gud nga pribilehiyo para ha aton nga magin bahin han kongregasyon ni Jehova! Aada kita ha usa nga espirituwal nga paraiso nga puno hin mamurayawon ngan malipayon nga mga tawo. Ano an imo papel ha kongregasyon?

2. Ano nga ilustrasyon an gin-gamit ni apostol Pablo ha pipira han iya mga surat nga aada ha Biblia?

² Damu an aton mahibabaroan mahitungod hini nga topiko ha usa nga ilustrasyon nga gin-gamit ni apostol Pablo ha pipira han iya mga surat nga aada ha Biblia. Ha tagsa hito nga mga surat, iginpariho ni Pablo an kongregasyon ha lawas han tawo. Iya liwat iginpariho an mga indibiduwal ha kongregasyon ha mga parte han lawas.​—Roma 12:4-8; 1 Cor. 12:12-27; Efe. 4:16.

3. Ano an tulo nga leksyon nga aton hihisgotan hini nga artikulo?

³ Hini nga artikulo, hihisgotan naton an tulo nga importante nga leksyon nga mahibabaroan naton ha ilustrasyon ni Pablo. Una, mahibabaroan naton nga an tagsa ha aton may papel * ha kongregasyon ni Jehova. Ikaduha, hihisgotan naton an mahimo naton buhaton kon nakukurian kita nga makita kon ano an aton papel ha kongregasyon. Ngan ikatulo, hihisgotan naton kon kay ano nga kinahanglan naton magpabilin nga sagipo ha pagtuman han aton papel ha kongregasyon han Dios.

4. Ano an igintututdo ha aton han Roma 12:4, 5?

⁴ Ini an una nga leksyon nga aton mahibabaroan ha ilustrasyon ni Pablo: An tagsa ha aton may importante nga papel ha pamilya ni Jehova. Gintikangan ni Pablo an iya ilustrasyon pinaagi ha pagsiring: “Sugad la nga may-ada kita ha usa nga lawas damu nga parte, pero diri parapriho an buruhaton han mga parte, sugad man kita, bisan kon damu, uusa la nga lawas nga kahiusa han Kristo, pero sugad nga indibiduwal mga parte kita nga nakadepende ha usa kag usa.” (Roma 12:4, 5) Ano an iginpapasabot ni Pablo? An tagsa ha aton may iba-iba nga papel ha kongregasyon, pero importante an tagsa ha aton.

5. Ano nga “mga regalo” an iginhatag ni Jehova ha kongregasyon?

⁵ Kon ginhuhunahuna mo adton mga may papel ha kongregasyon, bangin mahunahuna mo dayon adton mga nangunguna. (1 Tes. 5:12; Heb. 13:17) Oo pinaagi han Kristo, naghahatag hi Jehova hin “mga regalo nga mga lalaki” ha Iya kongregasyon. (Efe. 4:8) Kaapi hini nga “mga regalo nga mga lalaki” an mga membro han Nagmamando nga Lawas, mga pinili nga kabulig han Nagmamando nga Lawas, mga membro han Komite han Sanga, mga paramangno han sirkito, mga instruktor ha teokratiko nga mga eskwelahan, mga tigurang han kongregasyon, ngan mga ministeryal nga surugoon. Ini nga kabugtoan ginpili pinaagi han baraan nga espiritu basi atamanon an presyoso nga mga karnero ni Jehova ngan parig-unon an kongregasyon.​—1 Ped. 5:2, 3.

6. Sumala ha 1 Tesalonica 2:6-8, ano an ginpapangalimbasogan nga buhaton han mga kabugtoan nga ginpili pinaagi han baraan nga espiritu?

⁶ Pinaagi han baraan nga espiritu may ginpipili nga mga kabugtoan basi magbuhat hin iba-iba nga responsabilidad. Sugad la nga an iba-iba nga parte han lawas, pariho han mga kamot ngan mga tiil, nagbubuhat para ha kaopayan han bug-os nga lawas, an kabugtoan nga ginpili pinaagi han baraan nga espiritu maduruto nga nagbubuhat para ha kaopayan han bug-os nga kongregasyon. Diri hira naghihingyap nga dayawon han iba. Lugod, nangangalimbasog hira nga parig-unon an ira kabugtoan. (Basaha an 1 Tesalonica 2:6-8.) Mapasalamaton gud kita kan Jehova tungod hinin diri makikalugaringon ngan kwalipikado nga kalalakin-an!

7. Ano nga mga bendisyon an nakakarawat han damu nga aada ha bug-os-panahon nga pag-alagad?

⁷ An pipira ha kongregasyon bangin pilion basi magin misyonero, espesyal payunir, o regular payunir. Ngani, may mga kabugtoan ha bug-os nga kalibotan nga nagdesisyon nga bug-os-panahon nga makigbahin ha pagsangyaw ngan panhimo hin disipulo nga buruhaton. Tungod hito, damu an ira nabuligan nga magin disipulo ni Jesu-Kristo. Bisan kon gutiay la an materyal nga mga butang han kadam-an hinin bug-os-panahon nga mga ebanghelisador, gintagan hira ni Jehova hin damu nga bendisyon. (Mar. 10:29, 30) Hinigugma gud naton ini nga kabugtoan, ngan mapasalamaton kita nga bahin hira han kongregasyon!

8. Kay ano nga an tagsa nga magwarali han maopay nga sumat presyoso kan Jehova?

⁸ An pinili nga kabugtoan la ba ngan adton aada ha bug-os-panahon nga pag-alagad an may papel ha kongregasyon? Diri gud! An tagsa nga magwarali han maopay nga sumat importante ha Dios ngan ha kongregasyon. (Roma 10:15; 1 Cor. 3:6-9) Ngani, usa han pinakaimportante nga mga tumong han kongregasyon amo an panhimo hin mga disipulo han aton Ginoo nga hi Jesu-Kristo. (Mat. 28:19, 20; 1 Tim. 2:4) An ngatanan ha kongregasyon, bawtismado ngan diri-bawtismado nga mga magwarali, nangangalimbasog nga iprayoridad ini nga buruhaton.​—Mat. 24:14.

9. Kay ano nga gintatagan naton hin importansya an Kristiano nga kababayin-an?

 ⁹ Ginpapakitaan ni Jehova hin dungog an Kristiano nga kababayin-an pinaagi ha paghatag ha ira hin importante nga buruhaton ha kongregasyon. Importante ha iya ini nga mga asawa, nanay, balo, ngan solo nga mga sister nga maunungon nga nag-aalagad ha iya. An Biblia naghihisgot hin damu nga mag-opay nga kababayin-an nga nakapalipay ha Dios. Ginkukumendasyonan hira tungod han ira maopay nga ehemplo ha pagkaada kinaadman, pagtoo, kadasig, kaisog, mag-opay nga buhat, ngan han ira pagin mahinatagon. (Luc. 8:2, 3; Buh. 16:14, 15; Roma 16:3, 6; Fil. 4:3; Heb. 11:11, 31, 35) Mapasalamaton gud kita kan Jehova nga ha aton kongregasyon may Kristiano nga kababayin-an nga may sugad hito nga mag-opay nga kalidad!

10. Kay ano nga gintatagan naton hin importansya an mga edaran?

¹⁰ Nalilipay liwat kita nga may-ada damu nga edaran ha kongregasyon. An iba nga mga kongregasyon may-ada edaran na nga kabugtoan nga maunungon nga nag-alagad kan Jehova ha ira bug-os nga kinabuhi. An iba nga mga edaran bangin bag-o pa la nga nahibaro han kamatuoran. Bag-ohan man hira o maiha na ha pag-alagad, damu hini nga mga edaran an may mga problema ha kahimsog tungod han pagtikalagas. Tungod hito, bangin gutiay na la an ira nahihimo ha kongregasyon ngan ha pagsangyaw. Pero, ginbubuhat nira an ira makakaya ha ministeryo, ngan gin-gagamit nira an kusog nga may-ada hira basi dasigon ngan bansayon an iba! Ngan nagpapahimulos kita tikang ha ira eksperyensya. Makaruruyag gud hira pagkit-on para kan Jehova ngan para ha aton.​—Prob. 16:31.

11-12. Paonan-o ka nadasig han mga batan-on ha iyo kongregasyon?

¹¹ Hunahunaa liwat an mga batan-on. Naatubang hira hin damu nga problema samtang nagtutubo hira hini nga kalibotan nga kontrolado ni Satanas nga Yawa ngan impluwensyado han iya maraot nga mga pilosopiya. (1 Juan 5:19) Pero, nadadasig kita kon nakikita naton an mga batan-on nga nagkukomento ha mga katirok, nakikigbahin ha ministeryo, ngan maisugon nga nagdidepensa han ira mga gintotoohan. Oo, kamo nga mga batan-on may importante  nga papel ha kongregasyon ni Jehova!​—Sal. 8:2.

¹² Pero, an iba han aton mga kabugtoan, nakukurian nga tumoo nga importante hira ha kongregasyon. Ano an makakabulig basi abaton naton sugad nga indibiduwal nga may papel kita ha kongregasyon? Aton kitaon.

13-14. Kay ano nga bangin inaabat han iba nga diri hira importante ha kongregasyon?

¹³ Tagda an ikaduha nga leksyon nga aton mahibabaroan ha ilustrasyon ni Pablo. Ginhihisgotan niya an usa nga problema nga gin-aatubang han damu yana; nakukurian hira nga tumoo nga importante hira ha kongregasyon. Hi Pablo nagsurat: “Kon an tiil magsiring, ‘Tungod kay diri ako kamot, diri ako parte han lawas,’ diri ini hinungdan nga diri ito magin parte han lawas. Ngan kon an talinga magsiring, ‘Tungod kay diri ako mata, diri ako parte han lawas,’ diri ini hinungdan nga diri ito magin parte han lawas.” (1 Cor. 12:15, 16) Ano an igintututdo ha aton ni Pablo?

¹⁴ Kon ikukompara mo an imo kalugaringon ha iba, bangin maghunahuna ka nga diri ka importante ha kongregasyon. An iba ha kongregasyon bangin maopay magtutdo, maopay ha pag-organisar, o maopay ha pagliaw ngan pagdasig ha iba. Bangin inaabat mo nga diri ka sugad kaopay ha ira hito nga mga aspekto. Iginpapakita hito nga mapainubsanon ka ngan maaram ka han imo mga limitasyon. (Fil. 2:3) Pero paghirot. Kon pirme mo ikukompara an imo kalugaringon ha iba nga may mag-opay nga abilidad, masusubo ka la. Bangin abaton mo pa ngani, sugad han gin-unabi ni Pablo, nga diri ka parte han kongregasyon. Ano an makakabulig ha imo nga malamposan ito nga pag-abat?

15. Sumala ha 1 Corinto 12:4-11, ano an kinahanglan naton hinumdoman mahitungod ha bisan ano nga regalo nga bangin may-ada kita?

¹⁵ Tagda ini: Gintagan ni Jehova an pipira han siyahan-siglo nga mga Kristiano hin milagroso nga mga regalo han baraan nga espiritu, pero diri parapriho an mga regalo nga nakarawat han ngatanan nga Kristiano. (Basaha an 1 Corinto 12:4-11.) Gintagan hira ni Jehova hin iba-iba nga regalo ngan abilidad, pero importante an  tagsa ha ira. Yana, waray kita han milagroso nga mga regalo han baraan nga espiritu. Pero aplikado la gihapon ini nga prinsipyo. Bangin iba-iba an aton mga abilidad, pero kita ngatanan importante kan Jehova.

16. Ano nga sagdon ni apostol Pablo an kinahanglan naton iaplikar?

¹⁶ Imbes nga ikompara an aton kalugaringon ha iba nga Kristiano, kinahanglan iaplikar naton an sagdon ni apostol Pablo: “Usisahon han kada tagsa an iya mga buhat, ngan magkakaada hiya hinungdan nga malipay gud ha iya la kalugaringon, ngan diri igintatanding an iya kalugaringon ha iba nga tawo.”​—Gal. 6:4.

17. Paonan-o kita magpapahimulos kon susundon naton an sagdon ni Pablo?

¹⁷ Kon susundon naton an sagdon ni Pablo ngan uusisahon an aton mga buhat, bangin makita naton nga may-ada kita mga regalo ngan abilidad nga waray an iba. Pananglitan, an usa nga tigurang bangin diri maopay magtutdo ha entablado, pero bangin epektibo gud hiya ha panhimo hin disipulo nga buruhaton. O bangin diri hiya sugad kaorganisado pariho ha iba nga mga tigurang ha iya kongregasyon, pero bangin kilala hiya sugad nga mahigugmaon nga paramangno ngan an mga kabugtoan diri nag-aalang pag-aro ha iya hin Kasuratanhon nga sagdon. O bangin kilala hiya nga maabiabihon. (Heb. 13:2, 16) Kon klaro nga nakikita naton an aton mga regalo ngan abilidad, magkakaada kita rason nga malipay ha aton mga nahihimo para ha kongregasyon. Ngan mas posible nga diri kita maawa ha kabugtoan nga iba ha aton an abilidad.

18. Paonan-o naton mapapauswag an aton mga abilidad?

¹⁸ Anoman an aton papel ha kongregasyon, kinahanglan hingyapon naton ngatanan nga mapauswag an aton pag-alagad ngan an aton mga abilidad. Basi mabuligan kita nga mag-uswag, naghahatag hi Jehova hin maopay gud nga pagbansay pinaagi han iya organisasyon. Pananglitan, ha aton katirok ha midweek, gintatagan kita hin mga instruksyon kon paonan-o magigin mas epektibo ha aton ministeryo. Nangangalimbasog ka ba nga gamiton an pagbansay nga imo nakakarawat hito nga katirok?

19. Paonan-o mo makakab-ot an tumong nga makaeskwela ha School for Kingdom Evangelizers?

¹⁹ An usa pa nga maopay gud nga programa ha pagbansay amo an School for Kingdom Evangelizers. An puydi makaeskwela hini amo an kabugtoan nga aada ha bug-os-panahon nga pagministeryo nga an pangidaron 23 tubtob 65. Bangin hunahunaon mo nga diri mo makakab-ot ini nga tumong. Pero imbes nga maghinunahuna hin mga rason kon kay ano nga diri ka hito makakaeskwela, paghunahuna hin mga rason kon kay ano nga karuyag mo umiskwela hito. Katapos, paghimo hin plano nga mabulig ha imo nga maabot an mga kwalipikasyon. Pinaagi ha bulig ni Jehova ngan han imo mga pangalimbasog, mahihimo mo an baga hin imposible para ha imo.

20. Ano an aton mahibabaroan ha Roma 12:6-8?

²⁰ An ikatulo nga leksyon nga aton mahibabaroan ha ilustrasyon ni Pablo mababasa ha Roma 12:6-8. (Basaha.) Dinhi iginpakita utro ni Pablo nga adton bahin han kongregasyon may iba-iba nga regalo o abilidad. Pero yana ginpapabug-atan niya nga kinahanglan naton gamiton an anoman nga regalo o abilidad nga may-ada kita basi parig-unon an kongregasyon.

21-22. Ano nga leksyon an aton mahibabaroan kanda Robert ngan Felice?

²¹ Hunahunaa an nahitabo ha bugto nga tatawagon naton nga Robert. Katapos niya mag-alagad ha iba nga nasud, igintoka hiya ha Bethel ha iya kalugaringon nga nasud. Bisan kon ginpasarig hiya nga an pagbag-o han iya toka diri  tungod kay may nahimo hiya nga sayop, hiya nagsiring: “Ha sulod hin damu ka bulan, nagkaada ako negatibo nga panhunahuna ha akon kalugaringon. Inabat ko nga pakyas ako. May mga panahon nga inabat ko nga diri ko na karuyag magpadayon ha pag-alagad ha Bethel.” Paonan-o hiya nagin malipayon utro? Ginpahinumdoman ako han usa nga igkasi-tigurang nga ginbabansay kita ni Jehova ha aton mga toka ha naglabay basi magin mas epektibo kita ha aton presente nga toka. Nasabtan ni Robert nga kinahanglan diri na niya paghinunahunaon an naglabay, lugod magpokus ha kon ano iya mahihimo yana.

²² Sugad liwat hito an naeksperyensyahan ni Brother Felice Episcopo. Hiya ngan an iya asawa naggradwar ha Gilead han 1956 ngan nag-alagad ha buruhaton ha sirkito ha Bolivia. Han 1964 nagkaanak hira. Hi Felice nagsiring: “Nakurian gud kami nga bayaan an toka nga amon hinigugma. Gin-aamin ko nga ginkaragan ko an haros usa ka tuig tungod han pag-abat hin kasubo ha akon kalugaringon. Pero ha bulig ni Jehova, nabag-o ko an akon panhunahuna ngan nagpokus ako ha akon bag-o nga responsabilidad sugad nga kag-anak.” Pariho ba kan Robert o kan Felice an imo inaabat? Nasusubo ka ba tungod kay an imo mga pribilehiyo yana diri na pariho hadto? Kon oo, magigin mas malipayon ka kon magpupokus ka ha imo mahihimo yana ha pag-alagad kan Jehova ngan ha pagserbi ha imo kabugtoan. Magpabilin nga okupado, nga ginagamit an imo mga regalo ngan abilidad ha pagbulig ha iba, ngan maabat ka hin kalipay samtang ginpaparig-on mo an kongregasyon.

23. Ano an kinahanglan naton tagan hin panahon, ngan ano an aton hihisgotan ha sunod nga artikulo?

²³ Importante kan Jehova an kada tagsa ha aton. Karuyag niya nga magin bahin kita han iya pamilya. Kon maggagahin kita hin panahon ha pagpamalandong kon ano an aton mahihimo ha pagparig-on han aton kabugtoan ngan mangangalimbasog kita nga buhaton ito, posible nga diri naton abaton nga diri kita parte han kongregasyon! Pero kumusta man an aton panhunahuna ha iba ha kongregasyon? Paonan-o naton maipapakita nga gin-aapresyar naton hira? Ha sunod nga artikulo, hihisgotan naton iton importante nga topiko.