1. Ano an ginhatag ni Jehova ha tagsa han iya matinumanon nga surugoon?

MAHIGUGMAON nga gintagan ni Jehova an tagsa han iya matinumanon nga surugoon hin papel ha iya kongregasyon. Bisan kon iba-iba an aton papel, importante kita ngatanan ngan kinahanglan naton an kada tagsa. Ginbubuligan kita ni apostol Pablo nga masabtan inin importante nga leksyon. Paonan-o?

2. Sumala ha Efeso 4:16, kay ano nga kinahanglan naton tagan hin importansya an kada tagsa ngan magbinuligay kita?

² Sugad han nakarekord ha tema nga teksto hini nga artikulo, ginpabug-atan ni Pablo nga waray bisan usa ha aton an makakasiring ha iba nga surugoon ni Jehova, “Diri ko ikaw kinahanglan.” (1 Cor. 12:21) Kon karuyag naton nga magin mamurayawon an kongregasyon, kinahanglan naton tagan hin importansya an kada tagsa ngan magbinuligay kita. (Basaha an Efeso 4:16.) Kon urosa kita nga nagbubuhat, nag-uuswag an kongregasyon ngan inaabat han ngatanan nga hinigugma hira.

3. Ano an aton hihisgotan hini nga artikulo?

³ Ano an pipira nga paagi nga maipapakita naton nga ginrirespeto naton aton kabugtoan ha kongregasyon? Hini nga artikulo, hihisgotan naton kon paonan-o maipapakita han mga tigurang nga ginrirespeto nira an ira mga igkasi-tigurang. Sunod, hihisgotan naton kon paonan-o naton maipapakita nga gintatagan naton hin importansya an aton kabugtoan nga waray asawa. Ngan katapos, mahibabaroan naton kon paonan-o naton maipapakita nga gin-aapresyar naton adton diri gud maopay magyakan han aton linggwahe.

4. Ano nga sagdon ni Pablo nga nakarekord ha Roma 12:10 an kinahanglan sundon han mga tigurang?

⁴ An ngatanan nga tigurang ha kongregasyon ginpipili pinaagi han baraan nga espiritu ni Jehova. Pero an kada tagsa may iba-iba  nga regalo ngan abilidad. (1 Cor. 12:17, 18) An iba bangin bag-o pa la nga tigurang ngan gutiay pa la an eksperyensya. An iba naman bangin limitado na la an nahihimo tungod han kalagas o problema ha kahimsog. Pero, waray bisan usa nga tigurang an angay maghunahuna nga waray pulos an iya igkasi-tigurang, ngan sugad hin magsiring, “Diri ko ikaw kinahanglan.” Lugod, kinahanglan sundon han tagsa nga tigurang an sagdon ni Pablo nga nakarekord ha Roma 12:10.​—Basaha.

5. Paonan-o iginpapakita han mga tigurang nga ginrirespeto nira an ira mga igkasi-tigurang, ngan kay ano nga importante nga buhaton nira ito?

⁵ Iginpapakita han mga tigurang nga ginrirespeto nira an ira mga igkasi-tigurang pinaagi ha pagpamati hin maopay ha ira. Labi nga importante ini kon nagmimiting an mga tigurang basi maghisgot hin seryoso nga mga butang. Kay ano? Tagda an ginsiring han Oktubre 1, 1988 nga The Watchtower: “Kikilalahon han mga tigurang nga mahimo gamiton han Kristo an baraan nga espiritu basi buligan an bisan hin-o nga tigurang ha kongregasyon nga mahunahuna an prinsipyo ha Biblia nga makakabulig ha ira nga mahibaroan kon ano an angay buhaton ha usa nga sitwasyon o makahimo hin importante nga desisyon. (Buh. 15:6-15) An baraan nga espiritu nabulig ha ngatanan nga tigurang ha kongregasyon, diri la ha usa ha ira.”

6. Ano an makakabulig ha mga tigurang nga urosa nga magbuhat, ngan paonan-o nagpapahimulos an kongregasyon kon ginbubuhat nira ito?

⁶ An usa nga tigurang nga narespeto ha iya mga igkasi-tigurang diri pirme nag-uuna ha pagyakan ha ira mga miting. Diri nga hiya na la pirme an nagyiyinakan, ngan diri niya ginhuhunahuna nga pirme tama an iya opinyon. Lugod, iginyayakan niya an iya mga ginhuhunahuna ha mapainubsanon nga paagi. Namamati hiya hin maopay ha mga komento han iba. Ngan mas importante, karuyag gud niya nga maghisgot hin Kasuratanhon nga mga prinsipyo ngan sundon an giya tikang ha “matinumanon ngan maaramon nga uripon.” (Mat. 24:45-47) Kon iginpapakita han mga tigurang an gugma ngan respeto ha kada tagsa samtang naghihisgot hin mga butang, magkakaada hira han baraan nga espiritu  han Dios, ngan maggigiya ito ha ira nga makahimo hin mga desisyon nga magpaparig-on ha kongregasyon.​—San. 3:17, 18.

7. Ano an panhunahuna ni Jesus ha pagin solo?

⁷ An mga kongregasyon yana ginkukompwesto hin mga mag-asawa ngan mga pamilya. Pero, ginkukompwesto liwat ito hin damu nga kabugtoan nga waray asawa. Ano an angay naton magin panhunahuna ha mga solo? Tagda an panhunahuna ni Jesus ha pagin solo. Ha pagministeryo ni Jesus dinhi ha tuna, waray hiya mag-asawa. Nagpabilin hiya nga solo ngan ginpokus an iya panahon ngan atensyon ha iya toka. Waray gud itutdo ni Jesus nga an usa kinahanglan mag-asawa o magin solo. Pero, nagsiring hiya nga pipilion han pipira nga Kristiano nga diri mag-asawa. (Mat. 19:11, 12; kitaa an study note han Mateo 19:12.) Ginrespeto ni Jesus adton mga waray asawa. Waray niya hunahunaa nga minos an mga solo o nga may kulang ha ira.

8. Sumala ha 1 Corinto 7:7-9, ano an igin-aghat ni Pablo ha mga Kristiano nga hunahunaon?

⁸ Pariho kan Jesus, nagpabilin nga solo hi apostol Pablo ha panahon han iya pagministeryo. Waray gud itutdo ni Pablo nga sayop nga mag-asawa an usa nga Kristiano. Maaram hiya nga personal ito nga desisyon. Bisan pa hito, gin-aghat ni Pablo an mga Kristiano nga hunahunaon kon mahimo ba hira mag-alagad kan Jehova sugad nga solo. (Basaha an 1 Corinto 7:7-9.) Waray gud minosa ni Pablo an solo nga mga Kristiano. Ngani, ginpili niya an batan-on nga hi Timoteo, usa nga solo nga bugto, ha pagtuman hin magbug-at nga toka. * (Fil. 2:19-22) Salit klaro nga sayop an paghunahuna nga an usa nga bugto mas kwalipikado o diri sugad kakwalipikado tungod la kay inasaw-an hiya o solo.​—1 Cor. 7:32-35, 38.

9. Ano an aton masisiring mahitungod ha pag-asawa ngan pagin solo?

⁹ Waray itutdo ni Jesus o ni Pablo nga kinahanglan mag-asawa an mga Kristiano o nga magpabilin hira nga solo. Kon sugad, ano an aton masisiring mahitungod ha pag-asawa ngan pagin solo? An Oktubre 1, 2012 nga An Barantayan naghatag hin maopay nga baton hini nga pakiana. Ito nagsaysay: “Ha pagkatinuod, an pagin inasaw-an o pagin solo regalo han Dios. . . . Waray . . . tagda ni Jehova [an pagin solo] sugad nga hinungdan hin kaarawdan o kasub-anan.” Salit, kinahanglan naton respetuhon an papel han solo nga kabugtoan ha kongregasyon.

10. Paonan-o naton maipapakita nga ginrirespeto naton an aton solo nga kabugtoan?

 ¹⁰ Paonan-o naton maipapakita nga ginrirespeto naton an inaabat ngan kahimtang han aton solo nga kabugtoan? Kinahanglan naton hinumdoman nga an pipira nga mga Kristiano nagdesisyon nga magpabilin nga waray asawa. An iba nga solo nga mga Kristiano naruruyag mag-asawa, pero waray hira nakikita nga angayan nga maarasawa. An iba naman bangin namatayan hin asawa. Anoman an rason, angayan ba nga pakianhan han kabugtoan an solo nga mga Kristiano kon kay ano nga waray hira asawa o magpresenta nga buligan hira ha pagbiling hin maarasawa? Syempre, an pipira nga solo nga mga Kristiano bangin mangaro hin sugad nga bulig. Pero kon waray man hira mangaro hin bulig, ano daw la an ira aabaton kon may magpresenta nga bubuligan hira ha pagbiling hin maarasawa? (1 Tes. 4:11; 1 Tim. 5:13) Aton hisgotan an komento han pipira nga matinumanon nga solo nga kabugtoan.

11-12. Paonan-o kita mahimo magin hinungdan nga mawara an kalipay han mga solo?

¹¹ Inaabat han usa nga solo nga paramangno han sirkito, nga epektibo gud ha iya toka, nga damu an benepisyo han pagin solo. Pero, nagsiring hiya nga nakakapanluya kon an kabugtoan nga maopay an intensyon nagpapakiana ha iya: “Kay ano nga waray ka asawa?” Usa nga solo nga brother nga nag-aalagad ha sanga nga opisina an nagsiring: “Usahay, ginpapaabat ha akon han kabugtoan nga angay kalooyan an mga solo. Baga hin iginpapakita hito nga an pagin solo usa nga pabug-at imbes nga regalo.”

¹² Usa nga solo nga sister nga nag-aalagad ha Bethel an nagsiring: “Ginhuhunahuna han pipira nga kabugtoan nga an ngatanan nga solo namimiling hin maarasawa o nga an ngatanan nga solo naghuhunahuna nga an kada higayon nga kaupod nira an damu nga tawo, oportunidad ito basi makabiling hira hin maarasawa. Makausa, han nagkadto ako ha iba nga lugar han nasud para ha usa nga toka, inabot ako han gab-i antes han katirok. Ginsidngan ako han sister nga nagpaukoy ha akon nga may duha nga brother ha kongregasyon nga akon kaedad. Ginpasarig niya ako nga diri niya ako gintutugpo ha ira. Pero pagsulod gud namon ha Kingdom Hall, gindara dayon niya ako ha dapit diin aadto an duha nga brother. Naawod gud ako hito nga sitwasyon pati an duha nga brother.”

13. Ano an nakadasig ha usa nga solo nga sister?

¹³ Usa pa nga solo nga sister nga nag-aalagad ha Bethel an nagsiring: “May kilala ako nga medyo may edad na nga solo nga mga payunir nga makinaadmananon, andam magsakripisyo, nakapokus, ngan kontento ha ira pag-alagad ngan daku gud hira nga bulig ha kongregasyon. May balanse hira nga panhunahuna ha ira pagin solo. Diri nira inaabat nga labaw hira ha iba kay nagpabilin hira nga solo, o diri hira magigin malipayon kay waray nira asawa ngan mga anak.” Salit, makalilipay gud magin bahin ha usa nga kongregasyon diin ginrirespeto ngan gintatagan hin importansya an kada tagsa. Diri mo inaabat nga ginkakaloy-an ka o ginkakaawaan, diri ka nira ginbabalewaray o ginhuhunahuna nga mas maopay kay ha ira. Maaram ka nga hinigugma ka nira.

14. Paonan-o naton maipapakita nga ginrirespeto naton an mga solo?

¹⁴ Magigin mapasalamaton an aton solo nga kabugtoan kon tatagan naton hira hin importansya tungod han ira mag-opay nga kalidad ngan diri tungod han ira pagin solo. Imbes nga malooy ha ira, mas maopay nga apresyaron naton an ira pagin matinumanon. Sugad nga resulta, diri aabaton han aton solo nga kabugtoan nga baga hin nasiring kita: ‘Diri namon kamo kinahanglan.’ (1 Cor. 12:21) Lugod, mahibabaroan nira nga ginrirespeto naton hira ngan nalilipay kita nga bahin hira han kongregasyon.

15. Ano nga mga pagbag-o an ginhimo han pipira basi mapahaluag an ira ministeryo?

¹⁵ Hinin bag-o la nga mga tuig, damu nga magwarali an nagkaada tumong nga mag-aram hin iba nga linggwahe basi mapahaluag an ira ministeryo. Basi mabuhat ito, kinahanglan nira maghimo hin mga pagbag-o. Ini nga kabugtoan binaya ha ira kongregasyon basi mag-alagad ha kongregasyon nga iba an linggwahe ngan mas nanginginahanglan hin magwarali. (Buh. 16:9) Personal ini nga desisyon hini nga mga Kristiano basi mas makag-alagad hira kan Jehova. Bangin lumabay anay an pipira ka tuig antes hira magin maopay ha bag-o nga linggwahe, pero damu gud an ira nahihimo para ha kongregasyon. An ira mag-opay nga kalidad ngan eksperyensya nagpaparig-on ha kongregasyon. Gintatagan gud naton hin importansya inin andam magsakripisyo nga kabugtoan!

16. Ano an pagbabasihan han mga tigurang ha pagrekomendar ha mga brother basi mag-alagad sugad nga tigurang ngan ministeryal nga surugoon?

¹⁶ An mga tigurang diri angay magdesisyon nga an usa nga brother diri pa kwalipikado nga mag-alagad sugad nga tigurang o ministeryal nga surugoon tungod la kay diri pa hiya maopay magyakan han linggwahe han kongregasyon. An pagbabasihan han mga tigurang ha pagrekomendar amo an Kasuratanhon nga mga kwalipikasyon para ha mga tigurang ngan ministeryal nga surugoon ngan diri an pagin maopay ha pagyakan han brother han linggwahe han kongregasyon.​—1 Tim. 3:1-10, 12, 13; Tito 1:5-9.

17. Ano nga mga pakiana an angay igkonsiderar han pipira nga pamilya kon nabalhin ha iba nga nasud?

¹⁷ An iba nga Kristiano nga mga pamilya binalhin ha iba nga nasud basi makalikay ha kasamok ha ira nasud o basi mamiling hin trabaho. Ha sugad nga mga kahimtang, bangin naedukar na an ira mga anak han linggwahe han ira bag-o nga nasud. An mga kag-anak bangin kinahanglan liwat mag-aram han bag-o nga linggwahe basi makabiling hin trabaho. Pero kumusta man kon hito nga nasud may kongregasyon o grupo ha ira kalugaringon nga linggwahe? Ano nga kongregasyon an angay tambongan han pamilya? An kongregasyon ba nga nagamit han linggwahe han nasud o an kongregasyon nga nagamit han linggwahe han pamilya?

18. Uyon ha Galacia 6:5, paonan-o naton maipapakita nga ginrirespeto naton an desisyon han ulo han pamilya?

¹⁸ An ulo han pamilya an kinahanglan magdesisyon kon diin nga kongregasyon maatender an iya pamilya. Tungod kay personal ini nga desisyon, kinahanglan igkonsiderar niya kon ano an makakaopay gud ha iya pamilya. (Basaha an Galacia 6:5.) Kinahanglan naton irespeto an desisyon han ulo han pamilya. Anoman an iya desisyon, akseptaron naton ito ngan karawaton an pamilya sugad nga importante nga bahin han aton kongregasyon.​—Roma 15:7.

19. Ano an kinahanglan hunahunaon hin maopay ngan ig-ampo han mga ulo han pamilya?

¹⁹ Ha iba nga kahimtang, an pipira nga pamilya bangin nag-aalagad ha kongregasyon nga nagamit han linggwahe han mga kag-anak, pero an  mga anak bangin diri masyado maaram hito nga linggwahe. Kon ito nga kongregasyon aada ha lugar diin gin-gagamit an linggwahe han nasud, bangin makurian an mga anak nga masabtan an mga katirok ngan diri mag-uswag ha espirituwal. Kay ano? Kay bangin nangingeskwela an mga anak ha usa nga eskwelahan nga nagamit han linggwahe han nasud ngan diri an linggwahe han ira mga kag-anak. Ha sugad nga kahimtang, kinahanglan hunahunaon hin maopay ngan ig-ampo han mga ulo han pamilya kon ano an kinahanglan nira buhaton basi mabuligan an ira mga anak nga magin mas duok kan Jehova ngan ha iya katawohan. Puydi nira buligan an ira mga anak nga magin pamilyar gud ha ira linggwahe o puydi nira igkonsiderar nga bumalhin ha kongregasyon nga nagamit hin linggwahe nga nasasabtan gud han ira mga anak. Anoman an desisyon han ulo han pamilya, kinahanglan ipaabat han kongregasyon nga iya ginpili nga ginrirespeto nira hiya ngan an iya pamilya ngan gintatagan hin importansya.

20. Paonan-o naton maipapakita nga ginrirespeto naton an aton kabugtoan nga nag-aaram hin iba nga linggwahe?

²⁰ Basado ha mga rason nga aton nahisgotan, ha damu nga mga kongregasyon, may mga kabugtoan nga nangangalimbasog gud nga mahibaro hin iba nga linggwahe. Bangin nakukurian hira ha pagpahayag han ira mga ginhuhunahuna. Pero, kon diri kita magpupokus ha paagi han ira pagyakan han bag-o nga linggwahe, makikita naton an ira gugma kan Jehova ngan han ira hingyap nga mag-alagad ha iya. Kon makikita naton inin mag-opay nga kalidad, rirespetuhon ngan tatagan gud naton hin importansya ini nga kabugtoan. Diri kita masiring ha ira nga ‘diri namon kamo kinahanglan’ tungod la kay diri hira maopay gud magyakan han aton linggwahe.

21-22. Ano nga maopay gud nga pribilehiyo an may-ada kita?

²¹ Gintagan kita ni Jehova hin maopay gud nga pribilehiyo nga magkaada hin importante nga papel ha iya kongregasyon. Lalaki man kita o babaye, solo o inasaw-an, batan-on o lagas o maopay magyakan hin usa nga linggwahe o diri masyado, kita ngatanan presyoso kan Jehova ngan ha kada tagsa.​—Roma 12:4, 5; Col. 3:10, 11.

²² Hinaot padayon naton nga iaplikar an damu nga mag-opay nga leksyon nga aton nahibaroan ha ilustrasyon ni Pablo mahitungod han lawas han tawo. Makakabulig ito ha aton nga mamiling hin mas damu pa nga paagi basi tagan hin importansya an aton papel ngan an papel han iba ha kongregasyon ni Jehova.