1. Ano an igintutdo ha imo mahitungod ha aton Maglalarang?

KON nagdaku ka ha pamilya nga Saksi ni Jehova, posible nga bata ka pa nga nahibaro mahitungod kan Jehova. Gintutdoan ka nga hiya an Maglalarang, nga may-ada hiya makaruruyag nga mga kalidad, ngan may maopay hiya nga katuyoan para ha mga tawo.​—Gen. 1:1; Buh. 17:24-27.

2. Ano an pagkita han pipira nga tawo hadton mga natoo nga may-ada Maglalarang?

² Pero damu nga tawo an diri natoo nga may-ada Dios, o nga hiya an Maglalarang. Lugod, natoo hira nga basta na la inulpot an kinabuhi ngan katapos, hinay-hinay ito nga nagbag-o tikang ha simple hinduro nga buhi nga mga butang ngadto ha mas komplikado nga klase hin buhi nga mga butang. An iba hito nga mga indibiduwal mga edukado gud. Nasiring hira nga ginpamatud-an han syensya nga sayop an Biblia ngan an natoo la nga may Maglalarang amo an mga tawo nga ignorante, bulok, o madali mauwat.

3. Kay ano nga importante nga parig-unon naton an aton pagtoo?

³ An mga ginsisiring ba han pipira nga edukado nga tawo makakapaluya han aton pagtoo nga hi Jehova an aton mahigugmaon nga Maglalarang? Nadepende gud ito ha rason kon kay ano nga natoo kita nga hi Jehova an Maglalarang. Tungod ba ito kay ginsidngan kita nga tumoo hito o tungod kay naggahin kita mismo hin panahon basi pag-adman an mga ebidensya nga may Maglalarang? (1 Cor. 3:12-15) Anoman kita kaiha na nga Saksi ni Jehova, kinahanglan padayon nga parig-unon naton ngatanan an aton pagtoo. Kon bubuhaton naton ito, diri kita malilimbongan “han pilosopiya ngan waray pulos nga panlimbong” nga igintututdo han mga tawo nga nakontra ha Pulong han Dios. (Col. 2:8; Heb. 11:6) Basi mabuligan kita, hihisgotan hini nga artikulo (1) kon kay ano nga damu an diri natoo nga may Maglalarang, (2) kon paonan-o mo mapaparig-on an imo pagtoo kan Jehova, an imo Maglalarang, ngan  (3) kon paonan-o mo matitipigan nga marig-on ito nga pagtoo.

4. Sumala ha Hebreo 11:1 ngan footnote, ha ano iginbase an tinuod nga pagtoo?

⁴ May mga naghuhunahuna nga an pagkaada pagtoo nagpapasabot hin pagtuod ha usa nga butang bisan kon waray ebidensya. Pero sumala ha Biblia, diri ito tinuod nga pagtoo. (Basaha an Hebreo 11:1 ngan footnote.) Tigamni nga an pagtoo ha mga reyalidad nga diri nakikita, sugad kan Jehova, kan Jesus, ngan ha langitnon nga Ginhadian, iginbasar ha makakombinse nga ebidensya. (Heb. 11:3) Usa nga Saksi nga syentista an nagsiring: “An gintotoohan han mga Saksi ni Jehova may basihan. Diri nira ginbabalewaray an mga kamatuoran ha syensya.”

5. Kay ano nga damu an natoo nga waray naglarang han ngatanan nga buhi nga butang?

⁵ Bangin magpakiana kita, ‘Kon may-ada man ngay-an makakombinse nga ebidensya nga may Maglalarang, kay ano nga damu an natoo nga diri an Dios an naghimo han ngatanan nga buhi nga mga butang?’ An iba diri natoo tungod la kay waray nira usisaha an mga ebidensya. Hi Robert nga usa na yana nga Saksi ni Jehova, nagsiring: “Tungod kay an paglarang waray gud igtutdo ha eskwelahan, naghunahuna ako nga diri ito totoo. Pero han mga 20 anyos na ako, may nakaistorya ako nga mga Saksi ni Jehova ngan dida ko la nahibaroan nga an Biblia naghahatag ha aton hin lohikal ngan makakombinse nga mga rason nga an Dios an naglarang han ngatanan nga butang.” *​—Kitaa an kahon nga “ Importante nga Mensahe ha mga Kag-anak.”

6. Kay ano nga an iba diri natoo nga may Maglalarang?

⁶ An iba diri natoo nga may Maglalarang tungod  kay nasiring hira nga natoo la hira ha kon ano an ira nakikita. Pero ha pagkatinuod, natoo hira ha mga butang nga diri nira nakikita, pananglitan ha grabidad, tungod kay may ebidensya hira nga totoo ito. An klase han pagtoo nga ginsisiring ha Biblia iginbase liwat ha ebidensya han “mga reyalidad nga diri nakikita.” (Heb. 11:1) Nagkikinahanglan hin panahon ngan pangalimbasog an pag-aram han mga ebidensya, ngan damu nga tawo an diri naruruyag ha pagbuhat hito. An usa nga tawo nga diri nag-aaram han mga ebidensya bangin maghunahuna nga waray Dios.

7. An ngatanan ba nga edukado nga tawo diri natoo nga ginlarang han Dios an uniberso? Isaysay.

⁷ Katapos pag-adman an mga ebidensya, nakombinse an pipira nga mga syentista nga ginlarang han Dios an uniberso. * Pariho kan Robert,  nga gin-unabi kanina, an iba bangin naghuhunahuna nga waray Maglalarang tungod kay waray itutdo ha unibersidad an mahitungod ha paglarang. Pero damu nga syentista an nahibaro mahitungod kan Jehova ngan ginhigugma nira hiya. Sugad han ginbuhat hito nga mga syentista, kinahanglan parig-unon naton ngatanan an aton pagtoo ha Dios, anoman an aton nakuha nga edukasyon. Waray bisan hin-o nga makakahimo hito para ha aton.

8-9. (a) Ano nga pakiana an aton yana paghihisgotan? (b) Paonan-o ka magpapahimulos han pag-aram mahitungod ha mga linarang?

⁸ Paonan-o mo mapaparig-on an imo pagtoo ha Maglalarang? Hisgotan naton an upat nga paagi.

⁹ Pag-admi an mahitungod ha mga linarang. Mapaparig-on mo an imo pagtoo ha Maglalarang pinaagi ha pag-obserbar ha mga hayop, mga tanom, ngan mga bitoon. (Sal. 19:1; Isa. 40:26) Samtang mas gin-aadman mo ito nga mga butang, mas nagigin kombinsido ka nga hi Jehova an Maglalarang. An aton mga publikasyon agsob nga may mga artikulo nga nagsasaysay mahitungod ha mga linarang. Basaha ini nga mga artikulo bisan kon nakukurian ka pag-intindi hito. Pag-admi ito tubtob ha imo makakaya. Ngan ayaw kalimot nga kitaon utro ha aton website nga jw.org an mag-opay nga video parte ha mga linarang nga iginpresenta ha aton regional nga mga kombensyon ha naglabay pa la nga mga tuig.

10. Paghatag hin ehemplo nga nagpapamatuod nga may-ada Maglalarang. (Roma 1:20)

¹⁰ Kon nag-aaram ka mahitungod han mga linarang, obserbari hin maopay an mga detalye nga igintututdo hito mahitungod ha aton Maglalarang. (Basaha an Roma 1:20.) Pananglitan, bangin maaram ka nga an aton adlaw, labot la nga naghahatag ito hin kapaso ngan lamrag nga ginkikinahanglan para ha kinabuhi ha tuna, nagpapagawas liwat ito hin nakakadaot nga enerhiya nga ultraviolet radiation. Kita nga mga tawo kinahanglan maproteksyonan tikang hito. Ngan protektado gud kita! Paonan-o? An aton tuna nga urukyan may-ada kalugaringon nga proteksyon​—usa nga layer han ozone gas nga nagsasagang han nakakadaot nga radiation. Samtang nagtitikakusog an ultraviolet radiation nga tikang ha adlaw, nadudugangan liwat an ozone gas. Salit diri ka ba mauyon nga may nagdisenyo gud hini nga proseso ngan sigurado nga mahigugmaon ngan baltok gud hiya nga Maglalarang?

11. Diin ka makakabiling hin nagpaparig-on ha pagtoo nga mga impormasyon mahitungod ha mga linarang? (Kitaa an kahon nga “ Mga Impormasyon nga Magpaparig-on han Imo Pagtoo ha Maglalarang.”)

¹¹ Makakabiling ka hin damu nga nagpaparig-on ha pagtoo nga mga impormasyon mahitungod ha mga linarang ha Watch Tower Publications Index ngan pinaagi ha pag-research ha jw.org. Puydi ka magtikang ha mga artikulo ngan mga video ha serye nga “May-ada ba Nagdisenyo Hito?” Haglipot la ini ngan nagpipresenta hin nakakaimpres nga mga impormasyon mahitungod ha mga hayop ngan mga tanom. May mga ehemplo liwat ini kon paonan-o nangangalimbasog an mga syentista nga makopya an ira nakikita ha mga linarang.

12. Kon gin-aadman naton an Biblia, ano an pipira nga butang nga angay naton tagdon?

¹² Pag-admi an Biblia. An syentista nga gin-unabi kanina, ha siyahan waray anay tumoo nga may-ada Maglalarang. Pero inabot an panahon, tinoo hiya. Hiya nagsiring: “Nagkaada ako pagtoo diri la tungod ha akon mga nahibaroan ha pag-aram han syensya. Tungod liwat ito han akon mga nahibaroan ha akon pag-aram han Biblia.” Bangin may-ada ka na husto nga kahibaro mahitungod ha mga katutdoan han Biblia. Pero basi maparig-on an imo pagtoo ha imo Maglalarang, kinahanglan padayon nga pag-adman mo an Pulong han Dios. (Jos. 1:8; Sal. 119:97) Pananglitan, tagda an detalyado nga mga pagsaysay han Biblia mahitungod han mga panhitabo ha kadaan nga panahon. Hunahunaa an mga tagna hito nga  natuman na ngan an pagkauruyon han mga sulod hito. Kon bubuhaton mo ito, mapaparig-on an imo pagtoo nga ginhimo kita han usa nga mahigugmaon ngan makinaadmananon nga Maglalarang ngan an Biblia mensahe niya para ha aton. *​—2 Tim. 3:14; 2 Ped. 1:21.

13. Ano an usa nga ehemplo han kinaadman nga aada ha Pulong han Dios?

¹³ Kon gin-aadman mo an Pulong han Dios, tagda kon paonan-o makakabulig ha imo an sagdon hito. Pananglitan, an Biblia maiha na nga nagpapahamangno nga an gugma ha kwarta nakakadaot ngan naghahatag hin “damu nga kasakit.” (1 Tim. 6:9, 10; Prob. 28:20; Mat. 6:24) Aplikado pa ba yana ito nga pahamangno? An libro nga The Narcissism Epidemic nasiring: “Ha aberids, an materyalistiko nga mga tawo mas diri malipayon ngan mas depres. Bisan adton nag-aambisyon la pagkaada dugang nga kwarta nag-aantos hin maluya nga kahimsog ha mental; nagkakaada liwat hira mas damu nga problema ha pisikal.” Salit mapulsanon gud an pahamangno han Biblia mahitungod ha pagkaada gugma ha kwarta! May nahuhunahuna ka ba nga iba pa nga mga prinsipyo ha Biblia nga nakabulig ha imo? Samtang mas naghihilarom an aton apresasyon ha sagdon han Biblia, mas naaaghat kita nga sumarig ha diri nadadaan nga kinaadman nga iginhahatag han aton mahigugmaon nga Maglalarang. (San. 1:5) Tungod hito, magigin mas makalilipay an aton kinabuhi.​—Isa. 48:17, 18.

14. Ha imo pag-aram ha Biblia, ano an mahibabaroan mo mahitungod kan Jehova?

¹⁴ Pag-admi an Biblia nga may husto nga katuyoan—makilala hi Jehova. (Juan 17:3) Samtang gin-aadman mo an Kasuratan, mahibabaroan mo an personalidad ngan mga kalidad ni Jehova. Ini gihapon nga mga kalidad an imo nahibaroan han gin-adman mo an mahitungod ha mga linarang. An paghibaro han mga kalidad ni Jehova nakakakombinse ha aton nga naeksister gud hiya. (Ex. 34:6, 7; Sal. 145:8, 9) Samtang mas nakikilala mo hin maopay hi Jehova, an imo pagtoo ha iya nagigin mas marig-on, an imo gugma ha iya naghihilarom, ngan an imo pakigsangkay ha iya nagigin mas marig-on.

15. Paonan-o ka magpapahimulos ha pagsumat ha iba han imo pagtoo mahitungod ha Dios?

¹⁵ Isumat ha iba an imo pagtoo mahitungod ha Dios. Kon bubuhaton mo ito, magririg-on an imo pagtoo. Pero ano man kon an imo ginsasangyawan nagbangon hin pakiana mahitungod ha pag-eksister han Dios ngan diri ka sigurado han imo ibabaton? Pamiling hin Kasuratanhon nga baton ha usa han aton mga publikasyon, ngan katapos, isumat ito ha iya. (1 Ped. 3:15) Mahimo ka liwat magpabulig ha usa nga eksperyensyado nga Saksi. Karawaton man han imo ginsasangyawan an ginsisiring han Biblia o diri, magpapahimulos ka han imo pag-research. An imo pagtoo magigin mas marig-on. Sugad nga resulta, diri ka matoo ha mga tawo nga baga hin makinaadmananon o mga edukado nga nasiring nga waray Maglalarang.

16. Ano an mahimo mahitabo kon diri naton titipigan nga marig-on an aton pagtoo?

¹⁶ Anoman kita kaiha na ha pag-alagad kan Jehova, kinahanglan tipigan naton nga marig-on an aton pagtoo ha iya. Kay ano? Kay kon diri kita maghihirot, mahimo magluya an aton pagtoo. Hinumdumi nga an pagtoo iginbasar ha ebidensya han mga reyalidad nga diri nakikita. Bangin masayon la naton mahingalimtan an mga butang nga diri naton nakikita. Salit, gintawag ni Pablo an kakulang hin pagtoo nga “sala nga masayon la makasangbod ha aton.” (Heb. 12:1) Kon sugad, paonan-o naton malilikyan ito nga lit-ag?​—2 Tes. 1:3.

17. Ano nga bulig an aton kinahanglan basi matipigan nga marig-on an aton pagtoo?

¹⁷ Siyahan, pangaro kan Jehova han iya baraan nga espiritu, ngan pirme ito buhata. Kay ano? Kay  an pagtoo usa nga aspekto han bunga han espiritu. (Gal. 5:22, 23) Diri naton mapaparig-on an aton pagtoo ha aton Maglalarang ngan matitipigan ito kon waray an bulig han iya baraan nga espiritu. Kon padayon kita nga mangangaro kan Jehova han iya espiritu, ihahatag niya ito ha aton. (Luc. 11:13) Mahimo pa ngani kita mag-ampo: “Tagi kami hin dugang nga pagtoo.”​—Luc. 17:5.

18. Sumala ha Salmo 1:2, 3, ano nga pribilehiyo an aton yana napapahimulsan?

¹⁸ Dugang pa, magin regular ha imo personal nga pag-aram ha Pulong han Dios. (Basaha an Salmo 1:2, 3.) Han ginkomposo ito nga Salmo, pipira la nga Israelita an may kompleto nga sinurat nga kopya han Balaud han Dios. Pero an hadi ngan an mga saserdote puydi makakuha han mga kopya, ngan kada pito ka tuig, ginhikay nga magtirirok “an mga lalaki, an mga babaye, an kabataan,” ngan an dayo nga mga residente ha Israel para mamati ha pagbasa han Balaud han Dios. (Deut. 31:10-12) Ha panahon ni Jesus, pipira la an may kopya han mga linukot nga basahon han Kasuratan, ngan an kadam-an hito gintitipigan ha mga sinagoga. Pero yana, nababasa na han kadam-an nga tawo an pipira o an ngatanan nga bahin han Pulong han Dios. Presyoso gud ito nga pribilehiyo. Paonan-o naton maipapakita nga gin-aapresyar naton ito nga pribilehiyo?

19. Ano an kinahanglan naton buhaton basi matipigan nga marig-on an aton pagtoo?

¹⁹ Maipapakita naton nga gin-aapresyar naton an pribilehiyo ha pagkaada han Pulong han Dios pinaagi ha pagbasa hito hin regular. Kinahanglan may eskedyol kita para ha aton personal nga pag-aram han Biblia; diri la naton ito dapat buhaton kon may bakante kita nga panahon. Kon ginsisiguro naton nga regular an aton pag-aram, matitipigan naton nga marig-on an aton pagtoo.

20. Ano an kinahanglan naton magin determinasyon?

²⁰ Diri pariho ha “mga maaramon ngan mga baltok” hini nga kalibotan, may-ada kita marig-on nga pagtoo nga iginbasar ha Pulong han Dios. (Mat. 11:25, 26) Tungod han aton pag-aram hito nga sagrado nga libro, nahibaroan naton kon kay ano nga nagtitikaraot an mga kahimtang ha tuna ngan kon ano an bubuhaton hito ni Jehova. Salit magin determinado kita nga parig-unon an aton pagtoo ngan buligan an damu nga tawo tubtob nga posible nga magkaada pagtoo ha aton Maglalarang. (1 Tim. 2:3, 4) Ngan padayon nga pamulaton naton an panahon nga an ngatanan nga nabubuhi ha tuna magdadayaw kan Jehova ngan magyayakan han mga pulong ha Pahayag 4:11: “Takos ka, Jehova nga amon Dios, ha pagkarawat han himaya . . . kay ikaw an naglarang han ngatanan nga butang.”