1-2. Sumala ha Salmo 34:8, paonan-o kita mahibabaro mahitungod ha pagkamaopay ni Jehova?

IMADYINA nga gintatagan ka hin pagkaon nga waray ka pa gud makakaon hito. Mahimo ka magkaada ideya mahitungod hito pinaagi ha pagkita hito, paghamot hito, paghibaro han mga panakot, o pagpakiana ha iba kon marasa ba ito. Pero mahibabaroan mo la kon marasa gud ba ito kon titilawan mo ito.

² Mahibabaro kita mahitungod ha pagkamaopay ni Jehova pinaagi ha pagbasa han Biblia ngan ha aton mga publikasyon ngan ha pagpamati han mga istorya han iba mahitungod han mga bendisyon nga ira nakakarawat tikang kan Jehova. Pero bug-os nga masasabtan naton kon ano gud kamaopay hi Jehova kon ‘titilawan’ naton mismo an iya pagkamaopay. (Basaha an Salmo 34:8.) Ini an usa nga ehemplo kon paonan-o naton ito mabubuhat. Pananglitan, karuyag naton mag-alagad kan Jehova hin bug-os-panahon, pero basi mabuhat ito, kinahanglan pasimplihon naton an aton kinabuhi. Bangin agsob naton mabasa an saad ni Jesus nga kon uunahon naton an Ginhadian, ihahatag ni Jehova an mga butang nga kinahanglan gud naton, pero waray pa gud naton maeksperyensyahi an katumanan hito nga saad. (Mat. 6:33) Kondi tungod kay natoo kita ha saad ni Jesus, naniningkamot kita nga ibanan an aton mga kagarastohan, ibanan an oras ha aton sekular nga trabaho, ngan magpokus ha aton ministeryo. Samtang ginbubuhat naton ito, nakikita naton mismo nga igintatagana gud ni Jehova an aton mga panginahanglan. ‘Natitilawan’ naton mismo an pagkamaopay ni Jehova.

3. Uyon ha Salmo 16:1, 2, hin-o an nakakakarawat han pagkamaopay ni Jehova?

³ Hi Jehova “maopay ha ngatanan,” bisan ha mga diri nakilala ha iya. (Sal. 145:9; Mat. 5:45) Pero labi nga gintatagan ni Jehova hin damu nga bendisyon adton nahigugma ha iya ngan nag-aalagad ha iya hin bug-os-kalag. (Basaha an Salmo 16:1, 2.) Tagda an pipira  nga paagi nga nagpapahimulos kita ha pagkamaopay ni Jehova.

4. Paonan-o iginpapakita ni Jehova an iya pagkamaopay hadton nagpapahirani ha iya?

⁴ Ha kada panahon nga igin-aaplikar naton an aton nahibabaroan tikang kan Jehova, nakikita naton an maopay nga epekto hito ha aton kinabuhi. Han nahibaro kita mahitungod ha iya ngan ginhigugma naton hiya, ginbuligan kita niya nga maatohan an mga panhunahuna ngan mabag-o an mga buhat nga diri niya gin-uuyonan. (Col. 1:21) Ngan han igindedikar naton an aton kinabuhi ha iya ngan nagpabawtismo, mas naeksperyensyahan pa naton an pagkamaopay ni Jehova kay gintagan kita niya hin maopay nga konsensya ngan ginbuligan kita nga magin duok ha iya.​—1 Ped. 3:21.

5. Paonan-o naton naieksperyensyahan an pagkamaopay ni Jehova ha aton ministeryo?

⁵ Padayon naton nga naieksperyensyahan an pagkamaopay ni Jehova samtang nakikigbahin kita ha ministeryo. Awdanon ka ba? Damu nga katawohan ni Jehova an awdanon. Bangin antes ka magin surugoon ni Jehova, diri mo gud naiimadyin nga makadto ka ha balay han usa nga tawo nga diri mo kilala ngan magsusumat ha iya hin mensahe nga posible nga diri niya maruyagan. Pero yana, regular mo na ito nga ginbubuhat. Dugang pa, tungod han bulig ni Jehova, nag-i-enjoy ka na pagsangyaw! Inaabat mo an bulig ni Jehova ha damu nga paagi. Ginbubuligan ka niya nga magpabilin nga kalmado kon may nakakaistorya ka nga nakontra ha aton mensahe. Ginbubuligan ka liwat niya nga mahinumdoman an angayan nga teksto nga imo gagamiton ha usa nga interesado. Ngan gintatagan ka niya hin kusog nga makapadayon ha imo ministeryo bisan kon diri damu an naruruyag mamati ha imo.​—Jer. 20:7-9.

6. Kay ano nga an mga pagbansay ha aton ni Jehova nagpapakita han iya pagkamaopay?

⁶ Iginpapakita liwat ha aton ni Jehova an iya pagkamaopay pinaagi ha pagbansay ha aton para ha ministeryo. (Juan 6:45) Ha aton katirok ha midweek, nakakapamati kita hin mag-opay nga sampol nga mga pakiistorya, ngan gindadasig kita nga gamiton ito ha ministeryo. Ha siyahan, bangin mag-alang kita ha pagtesting hin bag-o nga pamaagi. Pero kon bubuhaton naton ito, bangin makita naton nga epektibo ito ha aton teritoryo. Gindadasig liwat kita ha mga katirok ngan mga kombensyon nga makigbahin ha iba-iba nga paagi ha pagsangyaw nga bangin waray pa naton matestingi. Mahimo liwat ini makapakulba ha aton. Pero kon bubuhaton naton ito, gintatagan naton hi Jehova hin rason nga bendisyon kita. Hisgotan ta an pipira nga bendisyon nga makakarawat naton kon titestingan naton an bag-o nga mga pamaagi basi maihatag ta kan Jehova an aton pinakamaopay, anoman an aton kahimtang. Katapos, uusisahon naton an mga paagi nga mapapauswag naton an aton ministeryo.

7. Ano nga bendisyon an aton makakarawat kon mangangalimbasog kita nga mapauswag an aton ministeryo?

⁷ Nagigin mas duok kita kan Jehova. Tagda an ehemplo han tigurang nga hi Samuel, * nga nag-aalagad ha Colombia upod an iya asawa. Ini nga mag-asawa nag-i-enjoy pagpayunir ha ira kongregasyon, pero karuyag nira pauswagon pa an ira ministeryo pinaagi ha pagbulig ha usa nga kongregasyon nga mas nanginginahanglan hin mga magwarali. Basi makab-ot ito, kinahanglan nira maghimo hin mga sakripisyo. “Gin-aplikar namon an Mateo 6:33 ngan waray na kami magpinamalit han mga diri namon kinahanglan,” siring ni Samuel. “Pero an pinakamakuri nga amon ginbuhat amo an pagbaya ha amon apartment. Han ginhimo ito, kami an nagbuot han disenyo hito, ngan waray na kami ginbabayaran hito.” Ha ira bag-o nga toka, nakita nira nga eksakto na ha ira panginahanglan bisan an ikaunom la ka bahin han ira kità hadto. Hi Samuel nagsiring: “Nakita namon kon paonan-o gin-gigiyahan ni  Jehova an amon mga desisyon ngan ginbabaton an amon mga pag-ampo. Inaabat namon nga nalilipay hiya ha amon ngan hinigugma niya kami; inabat namon ito ha paagi nga waray pa namon maeksperyensyahi hadto.” Puydi mo ba mapauswag an imo ministeryo? Kon bubuhaton mo ito, makakasiguro ka nga magigin mas duok ka kan Jehova ngan ihahatag niya an imo mga panginahanglan.​—Sal. 18:25.

8. Ano an imo nahibaroan ha ginsiring nira Ivan ngan Viktoria?

⁸ Nagigin malipayon kita ha aton pag-alagad. Tagda an ginsiring nira Ivan ngan Viktoria, usa nga mag-asawa nga payunir ha Kyrgyzstan. Gintipigan nira nga simple an ira kinabuhi basi makaboluntaryo ha anoman nga toka, upod na an konstruksyon. Hi Ivan nagsiring: “Ginhihimo namon an bug-os namon nga makakaya ha tagsa namon nga toka. Bisan kon kapoy kami katatapos han bug-os nga adlaw, inaabat namon an kamurayawan ngan kakontento tungod kay maaram kami nga gin-gamit namon an amon kusog para ha mga buruhaton han Ginhadian. Malipayon gud liwat kami kay nagkaada kami bag-o nga kasangkayan ngan mag-opay nga mga eksperyensya.”​—Mar. 10:29, 30.

9. Ano an ginbubuhat han usa nga sister nga may makuri nga sitwasyon basi mapauswag an iya ministeryo, ngan ano an resulta?

⁹ Mahimo kita magin malipayon ha pag-alagad kan Jehova bisan kon makuri an aton sitwasyon. Pananglitan, hi Mirreh, nga usa nga lagas na nga balo ha West Africa, nagretiro ha pagin doktor ngan nagpayunir. Hi Mirreh may grabe nga arthritis ngan usa la ka oras an iya nakakaya ha pagsangyaw ha balay-balay. Pero kaya niya makigbahin ha pagsangyaw ha publiko hin mas damu ka oras. Damu an iya ginbabalik-bisita ngan ginba-Bible study, ngan an pipira hito ginbubuhat niya pinaagi ha telepono. Ano an nagpagios kan Mirreh nga dugangan pa an iya nahihimo para kan Jehova? “An akon kasingkasing nagsasap-ay han akon gugma kan Jehova ngan kan Kristo Jesus. Ngan agsob ako mag-ampo kan Jehova nga buligan ako nga mas damu pa an akon mahimo para ha pag-alagad ha iya.”​—Mat. 22:36, 37.

10. Sumala ha 1 Pedro 5:10, ano an nakakarawat tikang kan Jehova hadton nagpapauswag han ira pag-alagad?

¹⁰ Nakakakarawat kita hin dugang nga pagbansay tikang kan Jehova. Naeksperyensyahan ito ni Kenny, nga payunir ha Mauritius. Han nahibaroan niya an kamatuoran, inundang hiya pag-eskwela ha unibersidad, nagpabawtismo, ngan nag-alagad hin bug-os-panahon. Hiya nagsiring, “Nangangalimbasog ako nga iaplikar ini nga ginsiring ni propeta Isaias: ‘Aadi ako! Sugoa ako!’” (Isa. 6:8) Nagboluntaryo hi Kenny ha konstruksyon, ngan binulig liwat hiya ha paghubad han aton mga publikasyon nga basado ha Biblia ha iya kalugaringon nga linggwahe. “Nakakarawat ako hin training nga nagtutdo ha akon han mga skill nga akon kinahanglan basi matuman ko an akon mga toka,” siring ni Kenny. Pero an iya nahibaroan diri la kon paonan-o bubuhaton an iya toka. Hiya nagsiring, “Nahibaro ako mahitungod han akon mga limitasyon ngan han mga kalidad nga kinahanglan ko kultibaron basi magin mas maopay ako nga surugoon ni Jehova.” (Basaha an 1 Pedro 5:10.) Kay ano nga diri usisahon an imo sitwasyon basi mahibaroan mo kon puydi ka ba kumarawat hin dugang nga pagbansay tikang kan Jehova?

11. Ano an ginbuhat han pipira nga sister ha South Korea basi makapartisipar hira ha ministeryo, ngan ano an resulta? (Kitaa an retrato ha kobre.)

¹¹ Bisan an maiha na nga mga Saksi nagpapahimulos tikang ha pagbansay kon gintitestingan nira an usa nga bag-o nga pamaagi ha pagministeryo. Durante han COVID-19 nga pandemya, an mga tigurang ha usa nga kongregasyon ha South Korea nagsurat: “An pipira hadto nga naghuhunahuna nga diri nira kaya makigbahin ha ministeryo tungod han ira problema ha kahimsog nakikigbahin na yana pinaagi ha videoconference. Tulo nga sister nga sobra 80 anyos na an nag-aram ha paggamit hin kompyuter ngan yana haros kada adlaw  na hira nga nakikigbahin ha ministeryo.” (Sal. 92:14, 15) Karuyag mo ba pauswagon pa an imo ministeryo ngan mas matilawan pa an pagkamaopay ni Jehova? Tagda an pipira nga mahimo mo buhaton basi makab-ot mo ito nga tumong.

12. Ano an iginsasaad ni Jehova ha mga nasarig ha iya?

¹² Sarig kan Jehova. Nagsasaad hiya nga hura nga bibendisyonan kita niya kon masarig kita ha iya ngan ihahatag naton ha iya an aton pinakamaopay. (Mal. 3:10) Nakita han sister nga taga-Colombia nga hi Fabiola nga gintuman ha iya ni Jehova ito nga saad. Karuyag niya magregular payunir katapos han iya bawtismo. Pero kinahanglan padayon hiya nga magtrabaho basi masuportaran an iya asawa ngan an iya tulo nga anak. Salit han puydi na hiya magretiro, nag-inampo gud hiya kan Jehova nga buligan hiya. Hiya nagsiring: “Kasagaran na nga nag-iiha an pagproseso ha usa nga pensyon, pero usa la ka bulan, naaprobaran na an akon aplikasyon para hito. Para ha akon, usa gud ito nga milagro!” Paglabay hin duha ka bulan, nagpayunir hiya. Yana sobra 70 anyos na hiya ngan sobra 20 ka tuig na hiya nga payunir. Ha iya pagpayunir, walo ka tawo na an iya nabuligan nga magpabawtismo. Hiya nagsiring: “Bisan kon usahay maluya an akon lawas, ginbubuligan ako ni Jehova kada adlaw nga padayon ko nga masunod an akon eskedyol.”

13-14. Ano nga mga ehemplo an makakabulig ha aton nga sumarig kan Jehova ngan magpauswag han aton pag-alagad?

¹³ Magpahimulos ha mga ehemplo hadton mga sinarig kan Jehova. Ha Biblia, damu an ehemplo han mga indibiduwal nga naniguro para ha pag-alagad kan Jehova. Ha damu nga kahimtang, ito  nga mga surugoon ni Jehova kinahanglan may buhaton anay antes nira makarawat an espesyal nga mga bendisyon ni Jehova. Pananglitan, ginbendisyonan la ni Jehova hi Abraham han binaya na hiya ha iya balay​—“bisan kon diri hiya maaram kon diin hiya makadto.” (Heb. 11:8) Nakarawat la ni Jacob an usa nga espesyal nga bendisyon han nakigdulong na hiya ha anghel. (Gen. 32:24-30) Han an nasud han Israel hirani na sumulod ha Tuna nga Iginsaad, nakatabok la an katawohan ha Salog Jordan han an mga saserdote tinamak na hiton masulog nga salog.​—Jos. 3:14-16.

¹⁴ Mahimo ka liwat magpahimulos ha mga ehemplo han mga Saksi ha aton panahon nga nasarig kan Jehova ngan nagpapauswag han ira pag-alagad. Pananglitan, an mag-asawa nga hira Payton ngan Diana nag-i-enjoy pagbasa mahitungod ha kabugtoan nga nagpauswag han ira pag-alagad kan Jehova, sugad han mababasa ha serye nga “Malipayon nga Nagsakripisyo Hira ha Pag-alagad.” * Hi Payton nagsiring: “Kon ginbabasa namon an ira mga eksperyensya, sugad hin nagkikita kami ha usa nga tawo nga nag-i-enjoy ha marasa nga pagkaon. Samtang mas maiha kami nga nagkikinita, mas naghihingyap kami nga ‘tilawan ngan kitaon nga hi Jehova maopay.’” Ha urhi, hira Payton ngan Diana binalhin ha lugar nga mas nanginginahanglan hin magwarali. Nabasa mo na ba ini nga serye? Ngan nakita mo na ba an mga video nga Pangangaral sa Malalayong Teritoryo​—Australia ngan Pangangaral sa Malalayong Teritoryo​—Ireland nga makikita ha jw.org? Makakabulig ini ha imo nga mahibaroan kon paonan-o mo pa mapapauswag an imo pag-alagad.

15. Paonan-o makakabulig ha aton an maopay nga mga kaupod?

¹⁵ Pilia an maopay nga mga kaupod. Mas maruruyag kita pagtilaw ha usa nga bag-o nga putahe kon an aton mga kaupod nag-i-enjoy ha pagkaon hito. Sugad man, kon makikig-upod kita hadton gin-uuna hi Jehova ha ira kinabuhi, mas maaaghat kita nga mamiling hin mga paagi nga pauswagon an aton pag-alagad ha Dios. Ito an naeksperyensyahan han mag-asawa nga hira Kent ngan Veronica. “Gindasig kami han amon kasangkayan ngan pamilya nga testingan an iba-iba nga paagi han pag-alagad,” siring ni Kent. “Nakita namon nga han nakig-upod kami hadton gin-uuna an pagpamiling han Ginhadian, nagkaada kami kompyansa nga testingan an usa nga bag-o nga paagi ha pag-alagad.” Hira Kent ngan Veronica mga espesyal payunir na yana ha Serbia.

16. Uyon ha ilustrasyon ni Jesus ha Lucas 12:16-21, kay ano nga kinahanglan magin andam kita nga maghimo hin mga sakripisyo?

¹⁶ Paghimo hin mga sakripisyo para kan Jehova. Basi mapalipay hi Jehova, diri man kinahanglan nga bayaan naton an ngatanan nga naghahatag ha aton hin kalipay. (Ecles. 5:19, 20) Pero kon diri kita magbubuhat hin dugang pa ha pag-alagad ha Dios tungod la kay nadiri kita paghimo hin mga sakripisyo, mahimo naton mabuhat an sayop nga nahimo han tawo ha ilustrasyon ni Jesus nga naniguro nga magkaada komportable nga kinabuhi pero iginbalewaray an Dios. (Basaha an Lucas 12:16-21.) An brother nga hi Christian, nga taga-France, nagsiring, “Diri ko naihahatag hadto an akon daku nga panahon ngan kusog para kan Jehova ngan ha akon pamilya.” Hiya ngan an iya asawa nagdesisyon nga magpayunir. Pero basi mabuhat nira ito, kinahanglan nira bayaan an ira trabaho. Basi masuportaran an ira kalugaringon, nagtindog hira hin gutiay nga cleaning business, ngan nahibaro hira nga makontento bisan kon gutiay la an ira materyal nga mga butang. Bawi ba an ira sakripisyo? Hi Christian nagsiring, “Mas nag-i-enjoy kami yana ha amon pagministeryo ngan nalilipay kami nga makita an amon mga Bible study ngan an amon mga ginbabalik-bisita samtang nahibabaro hira mahitungod kan Jehova.”

17. Kay ano nga bangin mag-alang kita ha pagtesting hin bag-o nga pamaagi han pagministeryo?

 ¹⁷ Magin andam ha pagtesting hin bag-o nga mga pamaagi ha pagministeryo. (Buh. 17:16, 17; 20:20, 21) Hi Shirley, nga payunir nga taga-United States, kinahanglan maghimo hin pagbag-o ha iya ministeryo durante han COVID-19 nga pandemya. Ha siyahan, nag-alang hiya pagtesting ha pagsangyaw pinaagi ha telepono. Pero han nakakarawat hiya hin pagbansay ha bisita han ira paramangno han sirkito, regular nga nakigbahin na hiya hini nga paagi han pagsangyaw. Hiya nagsiring: “Ha tinikangan, nahadlok ako, pero yana nag-i-enjoy na ako. Mas damu an amon nakakaistorya kay ha amon pagsangyaw ha balay-balay!”

18. Ano an makakabulig ha aton ha pag-atubang han mga problema samtang nangangalimbasog kita nga pauswagon an aton ministeryo?

¹⁸ Paghimo hin tumong ngan kab-ota ito. Kon naatubang kita hin mga problema, nag-aampo kita para han bulig ngan naghuhunahuna hin maopay kon ano an aton bubuhaton mahitungod hito. (Prob. 3:21) Hi Sonia, nga regular payunir ha usa nga grupo ha Europa nga Romany an linggwahe nagsiring: “Iginsusurat ko an akon mga plano ha papel ngan iginbubutang ko ito nga papel ha dapit nga masayon ko makita. Ha akon lamesa, nagbutang ako hin drowing hin duha nga dalan nga magkaiba an direksyon. Kon naghihimo ako hin desisyon, ginkikita ko ito nga mga dalan ngan naghuhunahuna kon hain nga direksyon ako dadad-on han akon desisyon.” Nangangalimbasog hi Sonia nga magkaada positibo pirme nga panhunahuna ha iya mga problema. “An tagsa nga sitwasyon,” siring niya, “mahimo magin pariho hin pader nga makakaulang ha akon o tulay nga makakabulig ha akon​—depende ha akon disposisyon.”

19. Ano an angay naton magin determinasyon?

¹⁹ Ginbibendisyonan kita ni Jehova ha damu nga paagi. Maipapakita naton nga gin-aapresyar gud naton ito nga mga bendisyon pinaagi ha pagbuhat han ngatanan naton nga makakaya basi dayawon hiya. (Heb. 13:15) Mahimo ito mag-upod ha pagtesting hin bag-o nga mga pamaagi basi mapauswag an aton ministeryo, nga tungod hito dugang nga bibendisyonan kita ni Jehova. Kada adlaw, mamiling kita hin mga paagi nga ‘matilawan ngan makita nga hi Jehova maopay.’ Kon bubuhaton naton ito, magigin pariho kita kan Jesus nga nagsiring: “An akon pagkaon amo an pagbuhat han kaburut-on niya nga nagsugo ha akon ngan an paghuman han iya buruhaton.”​—Juan 4:34.