1. Kay ano nga naghangyo hi Jesus kan Jehova nga bantayan an iya mga sumurunod?

 HA GAB-I antes mamatay hi Jesus, may espesyal hiya nga iginhangyo ha iya langitnon nga Amay. Naghangyo hiya kan Jehova nga bantayan an iya mga sumurunod. (Juan 17:15, 20) Syempre, tikang pa hadto, ginbabantayan ni Jehova—gin-aataman ngan ginpuproteksyonan—an iya katawohan. Pero maaram hi Jesus nga kukontrahon gud ni Satanas an iya mga sumurunod. Maaram liwat hiya nga pagkikinahanglanon nira an bulig ni Jehova basi maatohan an magraot nga pag-atake han Yawa.

2. Sumala ha Salmo 33:18-20, kay ano nga diri kita dapat mahadlok ha mga kakurian?

² An sistema ni Satanas nagpapahinabo hin damu nga problema ha tinuod nga mga Kristiano yana. Naatubang kita hin mga kakurian nga mahimo magpaluya ha aton ngan magsari pa ngani han aton pagkamaunungon kan Jehova. Pero makikita naton hini nga artikulo nga waray kita angay kahadlokan. Hi Jehova nagbabantay ha aton—nakikita niya an aton mga problema ngan andam hiya pirme nga buligan kita nga malamposan ito. Usisahon naton an duha nga ehemplo ha Biblia nga nagpapakita kon paonan-o hi Jehova nagbabantay, o “nagkikita ha mga may kahadlok ha iya.”—Basaha an Salmo 33:18-20.

3. San-o kita bangin umabat nga nag-uusahan kita?

³ Bisan kon bahin kita han daku nga espirituwal nga pamilya, usahay bangin umabat kita nga nag-uusahan. Pananglitan, bangin umabat an mga batan-on nga nag-uusahan hira kon nagsasaysay han ira mga gintotoohan ha ira mga kaklase ha eskwelahan o kon nabalhin ha iba nga kongregasyon. An pipira ha aton bangin nasusubo o nadidepres kay naghuhunahuna kita nga kinahanglan naton ito atubangon hin kita la. Bangin nag-aalang kita nga ipakiistorya ha iba an  aton inaabat kay nababaraka kita nga bangin diri kita nira maintindihan. Ngan usahay, bangin naghuhunahuna pa ngani kita kon may nahigugma gud ba ha aton. An pag-abat nga nag-uusahan—anoman an rason—mahimo makapabaraka ha aton ngan makapaabat nga waray kita mahihimo. Diri gud karuyag ni Jehova nga umabat kita hin sugad. Kay ano nga makakasiring kita hito?

4. Kay ano nga nagsiring hi propeta Elias: “Ako na la an nahibilin”?

⁴ Hunahunaa an ehemplo han matinumanon nga hi Elias. Nanumpa hi Jezebel nga patayon hiya, salit sobra 40 ka adlaw na hiya nga napalagiw. (1 Hadi 19:1-9) Ha urhi, han nag-uusahan hiya ha lungib, nangaraba hiya kan Jehova: “Ako na la an [propeta nga] nahibilin.” (1 Hadi 19:10) May iba pa nga propeta hito nga tuna; natalwas ni Obadias an 100 nga propeta tikang ha paningkamot ni Jezebel nga pamatayon hira. (1 Hadi 18:7, 13) Salit kay ano nga inabat ni Elias nga nag-uusahan gud hiya? Naghunahuna ba hiya nga patay na an tanan nga propeta nga gintalwas ni Obadias? Posible ba nga inabat niya nga nag-uusahan hiya han waray inupod ha iya ha pag-alagad kan Jehova katapos pamatud-an ni Jehova nga hiya an tinuod nga Dios ha Bukid Carmel? Posible ba nga inabat niya nga waray maaram nga peligroso gud an iya sitwasyon, o bangin naghunahuna hiya kon may nahigugma ba ha iya? Waray bug-os nga isaysay han rekord an inaabat ni Elias. Pero sigurado nga nasabtan ni Jehova kon kay ano nga inabat ni Elias nga nag-uusahan hiya ngan maaram Hiya kon paonan-o hiya bubuligan.

5. Paonan-o ginpasarig ni Jehova hi Elias nga diri hiya nag-uusahan?

⁵ Ginbuligan ni Jehova hi Elias ha pipira nga paagi. Gin-aghat Niya hiya nga magyakan. Makaduha niya pakianhi hi Elias: “Ano an imo ginbubuhat dinhi?” (1 Hadi 19:9, 13) Ha kada pagsusumat ni Elias han iya inaabat, namamati hi Jehova. Ginbaton hiya ni Jehova pinaagi ha pagpakita han Iya presensya ngan daku nga gahum. Ginpasarig liwat Niya hi Elias nga damu pa an iya mga igkasi-magsiringba. (1 Hadi 19:11, 12, 18) Sigurado nga nakaginhawa hi Elias katapos niya isumat kan Jehova an iya inaabat ngan mabatian an Iya baton. Gintagan hiya ni Jehova hin pipira nga importante nga toka. Ginsugo Niya hiya nga dihogan hi Hazael sugad nga hadi han Syria, hi Jehu sugad nga hadi han Israel, ngan hi Eliseo sugad nga propeta.  (1 Hadi 19:15, 16) Pinaagi ha paghatag kan Elias hini nga mga toka, ginbuligan hiya ni Jehova nga magpokus ha positibo nga mga butang. Gintagan liwat hiya han Dios hin duok nga kaupod, hi Eliseo. Paonan-o mo makakarawat an bulig ni Jehova kon naabat ka nga nag-uusahan?

6. Ano an puydi mo ig-ampo kon naabat ka nga nag-uusahan? (Salmo 62:8)

⁶ Gin-aaghat ka ni Jehova nga mag-ampo ha iya. Nakikita niya an imo mga problema, ngan ginpapasarig ka niya nga mamamati hiya ha imo mga pag-ampo ha bisan san-o. (1 Tes. 5:17) Nalilipay hiya pagpamati ha iya mga magsiringba. (Prob. 15:8) Ano an puydi mo ig-ampo kon naabat ka nga nag-uusahan? Isumat kan Jehova an imo inaabat, sugad han ginbuhat ni Elias. (Basaha an Salmo 62:8.) Isumat ha iya an imo mga kabaraka ngan an imo inaabat parte hito. Hangyoa hi Jehova nga buligan ka nga malamposan ito. Pananglitan, kon naabat ka nga nag-uusahan ngan nahahadlok kon nagsasangyaw ha eskwelahan, hangyoa hi Jehova nga tagan ka hin kaisog basi mahimo ito. Puydi ka pa ngani mangaro ha iya hin kinaadman basi maisaysay hin mataktika an imo mga gintotoohan. (Luc. 21:14, 15) Kon nadidepres ka o nanluluya, hangyoa hi Jehova nga buligan ka nga ipakiistorya ito ha hamtong nga Kristiano. Puydi mo hiya hangyoon nga buligan an imo kakaistoryahon nga maintindihan ka. Isumat kan Jehova an imo inaabat, kitaa kon paonan-o hiya nabaton ha imo mga pag-ampo, ngan karawata an bulig han iba; maiibanan an imo pag-abat nga nag-uusahan ka.

7. Ano an imo mahibabaroan ha ehemplo ni Mauricio?

⁷ Kita tanan gintagan ni Jehova hin importante nga buruhaton. Makakasarig ka nga napapansin ngan gin-aapresyar niya an ngatanan mo nga ginbubuhat basi matuman an imo mga asaynment ha kongregasyon ngan ha ministeryo. (Sal. 110:3) Paonan-o an pagin busy hini nga buruhaton makakabulig ha imo kon naabat ka nga nag-uusahan? Pansina an ehemplo han batan-on nga brother nga hi Mauricio. * Waray pag-iha katapos ni Mauricio mabawtismohan, usa han iya pinakaduok nga sangkay an hinay-hinay nga binaya ha kamatuoran. Siring ni Mauricio: “Han nakita ko nga ginbayaan niya hi Jehova, naapektohan an akon kompyansa ha kalugaringon. Naghunahuna ako kon matutuman ko ba an akon dedikasyon ngan magpabilin nga bahin han pamilya ni Jehova. Inabat ko nga nag-uusahan ako ngan naghunahuna nga waray makakasabot han akon inaabat.” Ano an nakabulig kan Mauricio? Siring niya: “Ginpahaluag ko an akon ministeryo. Nakabulig ito ha akon nga diri na magpokus ha akon kalugaringon ngan ha akon inaabat. Nalipay ako ngan naibanan an akon pag-abat nga nag-uusahan samtang nakikig-upod ha iba ha ministeryo.” Oo, bisan kon diri naton personal nga nakakaupod ha pagsangyaw an aton kabugtoan, napaparig-on la gihapon kita han pagsangyaw kaupod nira pinaagi han surat ngan telepono. Ano pa an nakabulig kan Mauricio? Siring niya: “Pirme liwat ako busy ha kongregasyon. Ginhimo ko an  akon pinakamaopay ha pag-andam ngan pagpresenta han akon mga asaynment sugad nga estudyante ha mga katirok. Ini nga mga asaynment nakabulig ha akon nga umabat nga gin-aapresyar ako ni Jehova ngan han iba.”

8. Paonan-o makakaapekto ha aton an dagku nga problema?

⁸ Naglalaom kita nga umatubang hin mga problema hinin kataposan nga mga adlaw. (2 Tim. 3:1) Bisan pa hito, mahimo kita matigdaan han tayming ngan han klase han aton mga problema. Bangin tigda kita nga magkaada problema ha pinansyal, madayagnos nga may grabe nga sakit, o mamatyan hin hinigugma. Ha sugad nga mga panahon, bangin sobra kita nga maistres ngan mabug-atan, labi na kon baga hin sunod-sunod an mga problema o dudrungan pa ngani. Pero hinumdumi nga hi Jehova nagbabantay ha aton, ngan ha iya bulig magkakaada kita kusog nga maatubang an bisan ano nga problema.

9. Ano an pipira nga problema nga naeksperyensyahan ni Job?

⁹ Hunahunaa kon paonan-o ginbuligan ni Jehova an matinumanon nga hi Job. Nagkaada hiya pipira nga magbug-at nga problema ha sulod la hin halipot nga panahon. Ha usa la ka adlaw, nahibaroan niya an bayolente ngan nakakapakalas nga mga panhitabo nga nagresulta han kawara han iya mga hayop, kamatay han iya mga surugoon, ngan mas maraot pa gud, kamatay han iya hinigugma nga mga anak. (Job 1:13-19) Waray pag-iha katapos hito, samtang nagtataguminatay pa hiya, nagkaada hiya maul-ol nga sakit nga nakadaot han iya hitsura. (Job 2:7) Maraot gud an sitwasyon ni Job salit nakayakan hiya: “Ginsusumhan na ako ha akon kinabuhi; diri ko na karuyag nga mabuhi pa.”—Job 7:16.

10. Paonan-o iginhatag ni Jehova an kinahanglan ni Job basi mailob an iya mga problema? (Kitaa an piktyur ha kobre.)

¹⁰ Ginbabantayan ni Jehova hi Job. Tungod kay hinigugma ni Jehova hi Job, iginhatag Niya an iya kinahanglan basi mailob an iya mga problema. Ginkaistorya ni Jehova hi Job ngan ginpahinumdom hiya han Iya waray tubtoban nga kinaadman ngan mahigugmaon nga pag-ataman ha Iya mga linarang. Nag-unabi Hiya hin damu nga urusahon nga hayop. (Job 38:1, 2; 39:9, 13, 19, 27; 40:15; 41:1, 2) Gin-gamit liwat ni Jehova an matinumanon nga batan-on nga hi Elihu basi parig-unon ngan liawon hi Job. Ginpasarig hiya ni Elihu nga hi Jehova pirme nagbabalos ha Iya mga magsiringba tungod han ira pagpailob. Pero ginpagios liwat ni Jehova hi Elihu nga mahigugmaon nga sagdonan hi Job. Ginbuligan ni Elihu hi Job nga magpokus ha kon ano an pinakaimportante pinaagi ha pagpahinumdom ha iya nga gutiay gud la hiya kon ikompara kan Jehova, an Maglalarang han uniberso. (Job 37:14) Gintagan liwat ni Jehova hi Job hin toka—ig-ampo an iya tulo nga kaupod nga nakasala. (Job 42:8-10) Paonan-o kita ginbubuligan ni Jehova yana kon may magkuri kita nga problema?

11. Ano nga pagliaw an iginhahatag han Biblia ha panahon nga may mga problema kita?

¹¹ Diri direkta nga nakikiistorya ha aton hi Jehova, sugad han iya ginbuhat kan Job, pero nakikiistorya Hiya ha aton pinaagi han Iya Pulong, an Biblia. (Roma 15:4) Ginliliaw kita Niya pinaagi ha paghatag ha aton hin paglaom para ha tiarabot. Hunahunaa an pipira la nga punto tikang ha Biblia nga makakaliaw ha aton kon may mga problema kita. Ha Kasuratan, ginpapasarig kita ni Jehova nga waray bisan ano—ngan upod hito an dagku nga problema—nga “makakagbulag ha aton ha [iya] gugma.” (Roma 8:38, 39) Ginpapasarig liwat kita niya nga “hirani [hiya] ha ngatanan nga natawag ha iya” ha pag-ampo. (Sal. 145:18) Ginsusumatan kita ni Jehova nga kon masarig kita ha iya, maiilob naton an bisan ano nga problema ngan malilipay pa ngani bisan kon nag-aantos kita. (1 Cor. 10:13; San. 1:2, 12) Ginpapahinumdoman liwat kita han Pulong han Dios nga an aton mga problema temporaryo ngan halipot la  kon ikompara ha waray kataposan nga bendisyon nga iya ihahatag ha aton. (2 Cor. 4:16-18) Hi Jehova naghahatag ha aton han sigurado nga paglaom nga wawad-on niya an hinungdan han tanan naton nga problema—hi Satanas nga Yawa ngan adton nasubad han iya magraot nga paagi. (Sal. 37:10) May ginmemorya ka na ba nga nakakaliaw nga mga teksto ha Biblia nga mabulig ha imo nga mailob an tiarabot nga mga problema?

12. Ano an ginlalaoman ni Jehova nga buhaton naton basi mapahimulosan hin bug-os an iya Pulong?

¹² Hi Jehova naglalaom nga maggagahin kita hin panahon basi regular nga pag-adman an Biblia ngan pamalandungon an aton ginbabasa. Kon ginbubuhat naton an aton nahibabaroan, nagririg-on an aton pagtoo ngan nagigin mas duok kita ha aton langitnon nga Amay. Sugad nga resulta, nagkakaada kita kusog nga mailob an mga problema. Iginhahatag liwat ni Jehova an iya baraan nga espiritu hadton nasarig ha iya Pulong. Ngan ito nga espiritu makakahatag ha aton hin “diri ordinaryo nga gahum” basi mailob an bisan ano nga problema.—2 Cor. 4:7-10.

13. Paonan-o an espirituwal nga pagkaon nga igintatagana han “matinumanon ngan maaramon nga uripon” nabulig ha aton nga mailob an mga problema?

¹³ Ha bulig ni Jehova, “an matinumanon ngan maaramon nga uripon” nagpupublikar hin damu nga artikulo, video, ngan musika nga makakabulig ha aton nga magrig-on an pagtoo ngan magpabilin nga alerto ha espirituwal. (Mat. 24:45) Kinahanglan naton bug-os nga salingabuton an sugad nga napapanahon nga mga tagana. Usa nga sister ha United States an bag-o la nga nagpahayag han iya apresasyon hini ngatanan nga espirituwal nga pagkaon. Siring niya: “Ha akon 40 ka tuig nga pag-alagad kan Jehova, pauroutro nga nasarihan an akon integridad.” Inatubang hiya hin dagku nga problema—an iya lolo namatay tungod han hubog nga drayber, an iya mga kag-anak namatay tungod hin grabe nga sakit, ngan hiya naman duha ka beses nga nagkaada kanser. Ano an nakabulig ha iya nga makailob? Hiya nagsiring: “Tikang pa hadto, gin-aataman ako ni Jehova. An espirituwal nga pagkaon nga iya igintatagana pinaagi han matinumanon ngan maaramon nga uripon nakabulig ha akon nga makailob. Tungod hito, masisiring ko an ginsiring ni Job: ‘Tubtob nga mamatay ako, diri ko isasalikway an akon integridad!’”—Job 27:5.

14. Paonan-o ginagamit ni Jehova an kabugtoan ha pagbulig ha aton kon may mga problema kita? (1 Tesalonica 4:9)

¹⁴ Ginti-train ni Jehova an iya katawohan nga higugmaon ngan liawon an usa kag usa ha magkuri nga panahon. (2 Cor. 1:3, 4; basaha an 1 Tesalonica 4:9.) Ha pagsubad kan Elihu, an aton kabugtoan andam gud bumulig ha aton nga makapabilin nga matinumanon kon naatubang kita hin  mga kakurian. (Buh. 14:22) Pananglitan, hunahunaa kon paonan-o hi Diane gindasig han iya mga kakongregasyon ngan ginbuligan nga makapabilin nga marig-on ha espirituwal katapos mamatay an iya bana tungod hin grabe nga sakit. Siring niya: “Makuri adto. Pero inabat namon an makusog ngan mahigugmaon nga mga butkon ni Jehova hiton makuri nga mga bulan. Damu an ginbuhat han amon mga kakongregasyon basi buligan kami. An mga pagbisita, tawag, ngan hangkop han kabugtoan nakabulig ha amon nga makailob. Tungod kay diri ako maaram magdrayb, ginsiguro han kabugtoan nga makaatender ako ha mga katirok ngan makasangyaw kon kaya ko.” Bendisyon gud nga magin bahin hinin mahigugmaon nga espirituwal nga pamilya!

15. Kay ano nga kombinsido kita nga makakaya naton an kakurian?

¹⁵ Kita tanan maatubang hin problema. Pero sugad han aton nahibaroan, diri gud kita mag-uusahan ha pag-atubang hito. Pariho hin mahigugmaon nga amay, hi Jehova pirme nagbabantay ha aton. Hirani hiya ha aton, andam mamati ha aton mga pangaraba ngan karuyag gud nga buligan kita. (Isa. 43:2) Kombinsido kita nga makakaya naton an kakurian kay hura hiya nga naghahatag han tanan naton nga kinahanglan basi makailob. Iginhahatag niya ha aton an regalo nga pag-ampo, an Biblia, an damu nga espirituwal nga pagkaon, ngan an mahigugmaon nga kabugtoan basi buligan kita ha magkuri nga panahon.

16. Paonan-o kita makakapabilin ha mahigugmaon nga pag-ataman ni Jehova?

¹⁶ Mapasalamaton gud kita nga may Amay kita ha langit nga nagbabantay ha aton! “An aton kasingkasing nagrarayhak tungod ha iya.” (Sal. 33:21) Maipapakita naton kan Jehova nga gin-aapresyar ta an iya mahigugmaon nga pag-ataman pinaagi ha pagpahimulos han tanan niya nga igintatagana basi buligan kita. Kinahanglan ta liwat buhaton an aton bahin basi magpabilin ha pag-ataman han Dios. Ha iba nga pagkayakan, kon padayon ta nga bubuhaton an aton pinakamaopay nga sugton hi Jehova ngan buhaton an tama ha iya pagkita, babantayan kita niya ha kadayonan!—1 Ped. 3:12.