1. Ano nga mag-opay nga butang an nahimo na han damu nga batan-on?

 KADA tuig, yinukot nga batan-on nga mga Kristiano an nagpapabawtismo. Ginbuhat mo na ba ini? Kon oo, an imo espirituwal nga kabugtoan nalilipay para ha imo, ngan hi Jehova nalilipay liwat! (Prob. 27:11) Hunahunaa hin madaliay kon ano na kadamu an imo nahimo. Maduruto nga gin-adman mo an Biblia, bangin ha sulod hin pipira ka tuig. An imo pag-aram nakakombinse ha imo nga an Biblia amo an Pulong han Dios. Pero labaw pa hito, nakilala mo ngan ginhigugma an Awtor hiton sagrado nga libro. An imo gugma kan Jehova nagin marig-on gud salit yana usa ka na han iya dedikado ngan bawtismado nga mga surugoon. Maopay gud ito!

2. Ano an aton hihisgotan hini nga artikulo?

 ² Sigurado nga nasarihan an imo pagtoo ha iba-iba nga paagi samtang nag-uuswag ka ngadto ha pagpabawtismo. Pero samtang nagtitikaadulto ka, maatubang ka hin bag-o nga mga pagsari. Mangangalimbasog hi Satanas nga paluyahon an imo gugma kan Jehova ngan paundangon ka ha pag-alagad ha iya. (Efe. 4:14) Ayaw tuguti nga mahitabo ito. Ano an makakabulig ha imo nga makapabilin nga maunungon kan Jehova ngan matuman an imo saad han nagdedikar ka? Kinahanglan ‘padayon ka nga mag-uswag’ ha pagin hamtong nga Kristiano. (Heb. 6:1) Pero paonan-o mo ito mahihimo?

3. Ano an angay buhaton han ngatanan nga Kristiano katapos han bawtismo?

³ Katapos han bawtismo, kinahanglan sundon naton ngatanan  an sagdon ni apostol Pablo ha iya mga igkasi-tumuroo ha Efeso. Gin-aghat niya hira nga magin “adulto” nga mga Kristiano. (Efe. 4:13) Sugad hin nasiring hiya ha ira, ‘Padayon nga mag-uswag.’ Iginkompara ni Pablo an aton pag-uswag sugad nga Kristiano ha pagtubo han usa nga bata. An mga kag-anak nalilipay ngan proud ha ira natawo pa la nga anak. Pero diri hiya puydi magpabilin na la nga minasus-an. Maabot an panahon nga kinahanglan niya wad-on “an mga kinaiya han usa nga bata.” (1 Cor. 13:11) Puropariho hito an pagin Kristiano. Katapos han bawtismo, kinahanglan padayon kita nga mag-uswag. Hisgotan naton an pipira nga suhestyon nga mabulig ha aton nga mahimo ito.

4. Ano nga kalidad an makakabulig ha imo nga mag-uswag ha espirituwal? Isaysay. (Filipos 1:9)

⁴ Patuboa an imo gugma kan Jehova. Hinigugma mo na gud hi Jehova. Pero puydi pa maghilarom an imo gugma ha iya. Paonan-o? Gin-unabi ni apostol Pablo an usa nga paagi, sugad han nakarekord ha Filipos 1:9. (Basaha.) Nag-ampo hi Pablo nga “madugangan pa gud” an gugma han mga taga-Filipos. Salit puydi naton mapatubo an aton gugma. Mahihimo naton ito pinaagi ha pagkaada “husto nga kahibaro ngan bug-os nga pagsabot.” Samtang mas nakikilala naton hi Jehova, mas ginhihigugma naton hiya ngan gin-aapresyar an iya personalidad ngan paagi ha pagbuhat han mga butang. Mas karuyag gud naton nga mapalipay hiya ngan diri naton karuyag magbuhat hin bisan ano nga makakapasubo ha iya. Nangangalimbasog gud kita nga masabtan kon ano an iya kaburut-on ngan kon paonan-o naton ito mabubuhat.

5-6. Paonan-o magtutubo an aton gugma kan Jehova? Isaysay.

⁵ Puydi magtubo an aton gugma kan Jehova pinaagi ha pagkilala hin mas maopay ha iya Anak, nga perpekto nga nagsubad han personalidad han iya Amay. (Heb. 1:3) An pinakamaopay nga paagi nga makilala hi Jesus amo an pag-aram han upat nga Ebanghelyo. Kon waray mo pa mabatasan an pagbasa ha Biblia kada adlaw, kay ano nga diri ito tikangan yana? Samtang ginbabasa mo an mga rekord mahitungod kan Jesus, pagpokus ha iya mga kalidad. Masayon hiya madaop; mahigugmaon nga ginkugos niya an gudti nga kabataan. (Mar. 10:13-16) Buotan hiya ngan makisangkayon; an iya mga disipulo waray mahadlok pagsumat ha iya han ira inaabat. (Mat. 16:22) May kalabotan hini, ginsubad ni Jesus an iya Amay ha langit. Hi Jehova masayon gud liwat madaop. Makakag-ampo kita ha iya. Kon nag-aampo kita, maisusumat naton ha iya an aton inaabat. Nasarig kita nga diri niya kita huhukman. Hinigugma niya kita; may pagtagad hiya ha aton.—1 Ped. 5:7.

⁶ Pinaid hi Jesus ha mga tawo. Hi apostol Mateo nagsiring: “Pakakita niya ha damu nga tawo, nalooy hiya ha ira, kay ginpanitan hira ngan ginpabay-an sugad hin mga karnero nga waray paraataman.” (Mat. 9:36) Ano naman an inaabat ni Jehova? Hi Jesus nagsiring: “Diri karuyag han akon Amay nga aadto ha langit nga mawara an bisan usa hini nga mga ubos.” (Mat. 18:14) Makalilipay gud ito! Samtang mas nakikilala naton hi Jesus, nagtutubo an aton gugma kan Jehova.

7. Paonan-o makakabulig ha imo an pakig-upod ha hamtong nga mga Kristiano?

⁷ Mahibabaro ka liwat ha pagin mas mahigugmaon ngan mag-uswag sugad nga Kristiano pinaagi ha pakig-upod ha hamtong nga kabugtoan ha iyo kongregasyon. Pansina kon ano hira kamalipayon. Waray hira ginbabasolan ha ira desisyon nga mag-alagad kan Jehova. Hangyoa hira nga sumatan ka han pipira nira nga eksperyensya ha pag-alagad kan Jehova. Kon may importante ka nga desisyon nga hihimoon, pangaro hin sagdon ha ira. Hinumdumi,  “may kalamposan ha damu nga magsaragdon.”—Prob. 11:14.

8. Ano an puydi mo buhaton kon nagruruhaduha ka ha ginsisiring han Biblia?

⁸ Wad-a an imo mga pagruhaduha. Sugad han gin-unabi ha  parapo 2, mangangalimbasog hi Satanas nga pugngan ka ha padayon nga pag-uswag ha espirituwal. Usa nga paagi nga bangin himoon niya ito amo an pag-aghat ha imo nga magruhaduha ha pipira nga katutdoan han Biblia. Pananglitan, bangin may pipira nga mangangalimbasog pagkombinse ha imo nga tumoo ha teoriya han ebolusyon, nga nagpapasipara ha Dios. Han bata ka pa, posible nga waray mo ito mahunahuna, pero yana bangin igintututdo na ito ha iyo ha eskwelahan. Bangin mahunahuna mo nga lohikal ngan makakombinse an ginsisiring han imo mga titser nga nasuporta ha ebolusyon. Pero bangin waray nira admi hin maopay an ebidensya nga may-ada Maglalarang. Hinumdumi an prinsipyo ha Proberbios 18:17: “An tawo nga siyahan nga mag-istorya han iya kaso baga hin amo an husto, tubtob nga umabot an iya kakontra ngan imbistigaron hiya.” Imbes nga basta tumoo na la ha mga ideya nga imo nababatian ha eskwelahan, admi hin maopay an mga kamatuoran nga mababasa ha Pulong han Dios, an Biblia. Pag-research ha aton mga publikasyon. Pakiistorya ha kabugtoan nga natoo hadto ha ebolusyon. Pakianhi hira kon ano an nakakombinse ha ira nga may-ada Maglalarang nga nahigugma ha aton. An sugad nga makaparig-on nga mga iristorya makakabulig ha imo nga magpokus ha mga ebidensya.

9. Ano an imo mahibabaroan ha eksperyensya ni Melissa?

⁹ An sister nga hi Melissa nakabenepisyo gud ha iya pag-research ha topiko han paglarang. * Siring niya: “Ha eskwelahan, iginpipresenta an ebolusyon ha paagi nga baga hin makakombinse gud. Ha siyahan, nahahadlok ako nga atubangon an akon mga pagruhaduha. Nahadlok ako nga madiskobrehan nga tinuod an ebolusyon. Pero nahunahuna ko nga karuyag ni Jehova nga may basihan an aton gintotoohan. Salit gin-atubang ko an akon mga pagruhaduha. Ginbasa ko an libro nga Is There a Creator Who Cares About You? ngan an mga brosyur nga Ginlarang ba an Kinabuhi? ngan The Origin of Life—Five Questions Worth Asking. Ini gud an akon ginkikinahanglan. Unta maiha ko na ito ginbuhat.”

10-11. Ano an makakabulig ha imo nga makapabilin nga limpyo ha moral? (1 Tesalonica 4:3, 4)

 ¹⁰ Likayi an sayop nga panggawi. Kon usa ka nga tin-edyer, an hingyap nga makig-sex mahimo magin makusog gud, ngan bangin presyuron ka han iba nga magbuhat hin seksuwal nga imoralidad. Karuyag ni Satanas nga sundon mo an imo mga hingyap. Ano an makakabulig ha imo nga makapabilin nga limpyo ha moral? (Basaha an 1 Tesalonica 4:3, 4.) Ha imo mga pag-ampo, isumat kan Jehova kon ano gud an imo inaabat, ngan hangyoa hiya nga parig-unon ka. (Mat. 6:13) Hinumdumi nga karuyag ka buligan ni Jehova, diri hukman. (Sal. 103:13, 14) Mabubuligan ka liwat han Pulong han Dios. Hi Melissa, nga gin-unabi na, nakurian pag-ato ha imoral nga panhunahuna. Siring niya: “An pagbasa ha Biblia kada adlaw nakabulig ha akon nga diri umundang. Nagpahinumdom ito ha akon nga panag-iya ako ni Jehova ngan karuyag ko nga mag-alagad ha iya.”—Sal. 119:9.

¹¹ Ayaw pangalimbasog nga sulbaron an imo mga problema nga ikaw la. Ipakiistorya ito ha imo mga kag-anak. Syempre, diri masayon ipakiistorya an sugad kapersonal nga mga butang, pero importante nga buhaton ito. Hi Melissa nagsiring: “Nag-ampo ako para hin kaisog, katapos iginpakiistorya ko kan Papa an akon problema. Kahuman hito, nag-opay gud an akon pag-abat. Maaram ako nga proud ha akon ni Jehova.”

12. Paonan-o ka makakahimo hin maopay nga mga desisyon?

¹² Pagpagiya ha mga prinsipyo ha Biblia. Hinay-hinay nga magkakaada ka dugang nga kagawasan ha paghimo han imo kalugaringon nga mga desisyon. Pero kulang ka pa hin eksperyensya ha kinabuhi. Paonan-o mo malilikyan an pakahimo hin sayop nga makakaapekto han imo pakigsangkay kan Jehova? (Prob. 22:3) Iginsumat han sister nga hi Kari kon ano an nakabulig ha iya nga makahimo hin mas maopay nga mga desisyon. Nasabtan niya nga an hamtong nga mga Kristiano diri nagkikinahanglan hin surundon para ha tagsa nga sitwasyon. Siring niya: “Kinahanglan ko masabtan an mga prinsipyo ha Biblia imbes nga an mga surundon la.” Kon nagbabasa han Biblia, pakianhi an imo kalugaringon: ‘Ano an igintututdo ha akon hini nga teksto mahitungod ha panhunahuna ni Jehova? May mga prinsipyo ba ito nga makakabulig ha akon nga buhaton an tama? Kon oo, paonan-o ako makakabenepisyo kon susundon ko ito?’ (Sal. 19:7; Isa. 48:17, 18) Pinaagi ha pagbasa ha Biblia ngan pagpamalandong han mga prinsipyo hito, magigin mas masayon para ha imo an paghimo hin mga desisyon nga makakapalipay kan Jehova. Samtang padayon ka nga nag-uuswag, mapapansin mo nga diri mo kinahanglan hin surundon ha tagsa nga sitwasyon kay masasabtan mo an panhunahuna ni Jehova ha mga butang.

13. Ano an mahimo magin epekto ha imo han mag-opay nga kasangkayan? (Proberbios 13:20)

¹³ Pagpili hin kasangkayan nga nahigugma kan Jehova. Sugad han gin-unabi na, an imo ginpipili nga kasangkayan may daku gud nga epekto ha imo pag-uswag sugad nga Kristiano. (Basaha an Proberbios 13:20.) An sister nga hi Sara nawawad-an na hin kalipay. Katapos, may nahitabo nga nakabulig ha iya nga magin malipayon utro. Hi Sara nagsiring: “Tayming gud la nga nagkaada ako mag-opay nga kasangkayan. May nakaupod ako nga batan-on nga sister ha pag-aram han An Barantayan kada semana. May usa pa nga sangkay nga binulig ha akon nga magkomento ha mga katirok. Tungod han bulig han akon kasangkayan, mas ginseryoso ko an personal nga pag-aram ngan pag-ampo. Nagtikang ako magkaada mas marig-on nga relasyon kan Jehova, ngan nagin malipayon ako utro.”

14. Paonan-o hi Julien nagkaada mag-opay nga kasangkayan?

 ¹⁴ Ano an imo mahihimo para magkaada kasangkayan nga magigin maopay nga impluwensya ha imo? Hi Julien, nga usa na nga tigurang yana, nagsiring: “Han batan-on pa ako, nagkaada ako mag-opay nga kasangkayan samtang nagsasangyaw. Madasigon hira, ngan ginbuligan nira ako nga makita nga makalilipay gud an ministeryo. Nagin tumong ko an bug-os-panahon nga pag-alagad. Na-realize ko liwat nga amo nga diri damu an akon mag-opay nga kasangkayan kay nakikigsangkay la ako ha akon mga kaedad. Ha urhi, nagkaada liwat ako mag-opay nga kasangkayan ha Bethel. An ira ehemplo nakabulig ha akon nga pumili hin mas maopay nga kaliawan, ngan tungod hini nagin mas duok ako kan Jehova.”

15. Ano an iginpahamangno ni Pablo kan Timoteo mahitungod ha pakig-upod? (2 Timoteo 2:20-22)

¹⁵ Ano man kon mapansin mo nga an pakig-upod ha usa mo nga kakongregasyon makakadaot han imo relasyon kan Jehova? Maaram hi Pablo nga an pipira ha siyahan-siglo nga kongregasyon diri naghuhunahuna o nagios sugad nga mga Kristiano, salit ginpahamangnoan niya hi Timoteo nga magpahirayo ha ira. (Basaha an 2 Timoteo 2:20-22.) Presyoso an aton pakigsangkay kan Jehova. Nangalimbasog gud kita nga magin duok ha aton langitnon nga Amay, salit diri naton angay tugotan an bisan hin-o nga makadaot hito nga pakigsangkay.—Sal. 26:4.

16. Ano nga klase hin mga tumong an angay mo pilion?

¹⁶ Magkaada mag-opay nga tumong. Pagpili hin mga tumong nga magpaparig-on ha imo ngan mabulig ha imo nga magin hamtong. (Efe. 3:16) Pananglitan, bangin karuyag mo pauswagon an imo rutina han personal nga pag-aram ngan pagbasa ha Biblia. (Sal. 1:2, 3) O bangin mapansin mo nga kinahanglan mo mangalimbasog nga mag-ampo hin mas agsob ngan hin kinasingkasing. Bangin kinahanglan mo magpakita hin dugang nga pagpugong ha kalugaringon ha pagpili hin kaliawan ngan paggamit han imo panahon. (Efe. 5:15, 16) Kon nakikita ni Jehova nga nangangalimbasog ka gud nga padayon nga mag-uswag, malilipay hiya.

17. Paonan-o ka makakabenepisyo ha pagbulig ha iba?

¹⁷ Magigin mas hamtong ka nga Kristiano kon  ginbubuligan mo an iba nga tawo. Hi Jesus nagsiring: “Mas daku an kalipay ha paghatag kay ha pagkarawat.” (Buh. 20:35) Makakabenepisyo ka gud kon gagamiton mo an pipira han imo panahon ngan an kusog sugad nga batan-on ha pagbulig ha iba. Pananglitan, puydi mo himoon nga tumong an pagbulig ha mga lagas ngan may sakit ha iyo kongregasyon. Bangin puydi mo hira buligan ha pamalit o ha paggamit han ira gadyet. Kon usa ka nga brother, himoa nga tumong nga magin ministeryal nga surugoon basi mas makabulig ha kabugtoan. (Fil. 2:4) Maipapakita mo liwat an gugma ha mga diri igkasi-tumuroo pinaagi ha pagsangyaw ha ira han maopay nga sumat han Ginhadian. (Mat. 9:36, 37) Kon posible, himoa nga tumong an bug-os-panahon nga pag-alagad kan Jehova.

18. Paonan-o an bug-os-panahon nga pag-alagad makakabulig ha imo nga mag-uswag?

¹⁸ An bug-os-panahon nga pag-alagad makakahatag ha imo hin damu nga oportunidad nga mag-uswag ha espirituwal. Kon payunir ka, posible ka makaeskwela ha School for Kingdom Evangelizers. Posible ka makag-alagad ha Bethel o makabulig ha teokratiko nga mga proyekto ha konstruksyon. An batan-on nga payunir nga sister nga hi Kaitlyn nagsiring: “An pagministeryo kaupod han eksperyensyado nga kabugtoan nakabulig gud ha akon nga mag-uswag ha espirituwal katapos han akon bawtismo. An ira ehemplo nakaaghat ha akon nga pahilarumon an akon kahibaro ha Biblia ngan pauswagon an akon abilidad ha pagtutdo.”

19. Ano nga mga bendisyon an imo makakarawat samtang padayon ka nga nag-uuswag ha espirituwal?

¹⁹ Samtang padayon ka nga nag-uuswag ha espirituwal, damu nga bendisyon an imo makakarawat. Diri makakarag an imo pagkabatan-on ha pagkab-ot hin mga butang nga waray pulos. (1 Juan 2:17) Diri mo maieksperyensyahan an kasakit nga resulta han sayop nga mga desisyon. Lugod, magkakaada ka tinuod nga kalamposan ngan kalipay. (Prob. 16:3) An imo maopay nga ehemplo makakadasig ha kabugtoan, batan-on man o lagas. (1 Tim. 4:12) Ngan labaw ha ngatanan, magigin murayaw ka ngan kontento kay napapalipay mo hi Jehova ngan duok mo hiya nga sangkay.—Prob. 23:15, 16.