1. Sumala ha Hebreo 12:1, ano an kinahanglan naton himoon para makaabot ha finish line ha rumba han kinabuhi?

 HA Biblia, iginpapariho an aton kinabuhi sugad nga mga Kristiano ha usa nga rumba. An mga paradalagan nga malampuson nga nakaabot ha finish line may premyo nga kinabuhi nga waray kataposan. (2 Tim. 4:7, 8) Kinahanglan naton mangalimbasog nga padayon nga makadalagan labi na kay hirani na gud kita ha finish line. Hi apostol Pablo, nga malampuson nga nakatapos ha rumba han kinabuhi, nag-unabi han makakabulig ha aton nga magdaog ha rumba. Ginsugo kita niya nga ‘kuhaon an ngatanan nga nakakabug-at ngan mapailubon nga dalaganon an rumba nga iginbutang ha aton atubangan.’—Basaha an Hebreo 12:1.

2. Ano an karuyag sidngon han ‘kuhaon an ngatanan nga nakakabug-at’?

² Han hi apostol Pablo nagsurat nga kinahanglan naton ‘kuhaon an ngatanan nga nakakabug-at,’ karuyag ba niya sidngon nga waray dapat dad-on an usa nga Kristiano? Diri ito an iya punto. Lugod, karuyag niya ipasabot nga dapat naton kuhaon an bisan ano nga diri ginkikinahanglan. Ini nga klase hin dara mahimo makaulang ngan makapakapoy ha aton. Para makapailob, kinahanglan mahibaroan dayon naton an bisan ano nga diri ginkikinahanglan nga dara nga mahimo makapahinay ha aton ngan tanggalon ito. Pero diri naton karuyag tanggalon an mga butang nga dapat naton dad-on. Kay kon buhaton naton ito, diri kita makakapabilin ha rumba. (2 Tim. 2:5) Ano an kinahanglan naton dad-on?

3. (a) Sumala ha Galacia 6:5, ano an dapat naton dad-on? (b) Ano an aton hihisgotan hini nga artikulo, ngan kay ano?

³ Basaha an Galacia 6:5. Gin-unabi ni Pablo kon ano an dapat  naton dad-on. Hiya nagsurat nga “an kada tagsa magdadara han iya kalugaringon nga pinas-an.” Gintutudlok dinhi ni Pablo an aton tagsa nga responsabilidad ha Dios, nga waray iba nga puydi magbuhat para ha aton. Hini nga artikulo, aton hihisgotan kon ano an nahiuupod han aton “kalugaringon nga pinas-an” ngan kon paonan-o naton ito dadad-on. Aton liwat hibabaroan an diri kinahanglan nga mga butang nga bangin gindidinara naton ngan kon paonan-o ta ito kukuhaon. An pagdara han aton kalugaringon nga pinas-an ngan an pagkuha han diri ginkikinahanglan nga butang mabulig ha aton nga matapos an rumba han kinabuhi.

4. Kay ano nga diri mabug-at tumanon an aton saad han nagdedikar kita? (Kitaa liwat an piktyur.)

⁴ An aton saad han nagdedikar kita. Han nagdedikar kita kan Jehova, nagsaad kita nga sisingbahon hiya ngan bubuhaton an iya kaburut-on. Kinahanglan ta tumanon ito nga saad. An pagkinabuhi uyon ha aton dedikasyon usa nga seryoso nga responsabilidad, pero diri ito mabug-at. Tungod ini kay ginlarang kita ni Jehova para buhaton an iya kaburut-on. (Pah. 4:11) Ginhimo kita niya nga may espirituwal nga panginahanglan ngan ginlarang kita uyon  ha iya dagway. Sugad nga resulta, puydi kita magin duok ha iya ngan malipay ha pagbuhat han iya kaburut-on. (Sal. 40:8) Dugang pa, kon ginbubuhat naton an kaburut-on han Dios ngan ginsusunod an iya Anak, “marirepreskohan” kita.—Mat. 11:28-30.

5. Ano an makakabulig ha imo nga matuman an imo dedikasyon? (1 Juan 5:3)

⁵ Paonan-o mo dadad-on an imo pinas-an? May duha nga butang nga makakabulig. Siyahan, padayon nga parig-ona an imo gugma kan Jehova. Mahihimo mo ito kon papamalandungon mo an ngatanan nga mag-opay nga iya ginbuhat para ha imo ngan an mga bendisyon nga iya igin-andam para ha imo. Samtang mas nagtutubo an imo gugma ha Dios, nagigin mas masayon ha imo nga sugton hiya. (Basaha an 1 Juan 5:3.) Ikaduha, subara hi Jesus. Nagin malampuson hiya ha pagbuhat han kaburut-on han Dios kay nag-ampo hiya kan Jehova para hin bulig ngan nagpokus ha iya premyo. (Heb. 5:7; 12:2) Pariho kan Jesus, pag-ampo kan Jehova para hin kusog ngan tipigi nga matin-aw ha imo hunahunaa an paglaom nga kinabuhi nga waray kataposan. Kon nagtutubo an imo gugma ha Dios ngan ginsusubad an iya Anak, matutuman mo an imo dedikasyon.

6. Kay ano nga dapat naton tumanon an aton mga obligasyon ha pamilya? (Kitaa liwat an piktyur.)

⁶ An aton mga obligasyon ha pamilya. Ha aton rumba han kinabuhi, kinahanglan naton mas higugmaon hi Jehova ngan hi Jesus kay ha aton mga kapamilya. (Mat. 10:37) Pero diri ini nagpapasabot nga puydi na naton igbalewaray an aton mga obligasyon ha pamilya, nga baga hin nakakaulang ini ha aton pagpalipay ha Dios ngan ha Kristo. Ha kabaliktaran, para karawaton han Dios ngan han Kristo, kinahanglan naton tumanon an aton papel ha pamilya. (1 Tim. 5:4, 8) Kon bubuhaton ta ito, magigin mas malipayon kita. Ha pagkatinuod, maaram hi Jehova nga magigin malipayon an pamilya kon an bana ngan asawa may gugma ngan respeto ha usa kag usa, kon hinigugma ngan gintututdoan han mga kag-anak an ira mga anak, ngan kon ginsusugot han mga anak an ira mga kag-anak.—Efe. 5:33; 6:1, 4.

7. Paonan-o mo matutuman an imo papel ha pamilya?

⁷ Paonan-o mo dadad-on an imo pinas-an? Anoman an imo papel ha pamilya, sarig ha kinaadman nga makikita ha Biblia imbes nga basta la sumarig ha emosyon, kultura, o ha ginsisiring han mga eksperto kunohay. (Prob. 24:3, 4) Gamita hin maopay an aton basado ha Biblia nga mga publikasyon. May praktikal ini nga mga suhestyon kon paonan-o iaaplikar an mga prinsipyo ha Biblia. Pananglitan, an serye han mga artikulo nga “Bulig Para ha Pamilya” may mga impormasyon nga gindisenyo para ha espisipiko nga mga problema nga gin-aatubang yana han mga mag-asawa, mga kag-anak, ngan mga tin-edyer. b Magin determinado nga iaplikar an ginsisiring han Biblia, bisan kon an imo iba nga kapamilya diri nag-aaplikar. Kon bubuhaton mo ito, makakabenepisyo an imo pamilya ngan makakarawat mo an bendisyon ni Jehova.—1 Ped. 3:1, 2.

8. Paonan-o an aton mga desisyon makakaapekto ha aton?

⁸ An pagkaada baratunon ha aton mga desisyon. Gintagan kita ni Jehova hin regalo nga kagawasan ha pagbuot, ngan karuyag niya nga malipay kita ha mga resulta han aton mag-opay nga desisyon. Pero diri liwat kita niya papanalipdan tikang ha mga resulta han aton magraot nga desisyon. (Gal. 6:7, 8) Tungod hito, ginkakarawat  naton an mga resulta han aton sayop nga mga desisyon ngan han waray anay naton hunahunaa nga mga pulong ngan buhat. Bangin makonsensya kita tungod han aton mga ginbuhat. Pero an paghibaro nga may baratunon kita ha aton mga desisyon makakapagios ha aton nga isumat an aton mga sala, tadungon an aton mga sayop, ngan diri na ito utruhon. An pagbuhat hito nga mga butang mabulig ha aton nga makapabilin ha rumba han kinabuhi.

9. Ano an imo puydi buhaton kon nakahimo ka hin sayop nga desisyon? (Kitaa liwat an piktyur.)

⁹ Paonan-o mo dadad-on an imo pinas-an? Kon nakahimo ka hin sayop nga desisyon, ano an imo puydi buhaton? Akseptara nga diri mo na mababag-o an naglabay. Ayaw pagkaragi an imo panahon ngan kusog basi pamatud-an nga tama ka o basulon an imo kalugaringon o an iba tungod han imo sayop nga mga desisyon. Lugod, karawata an imo mga sayop ngan pangalimbasog nga himoon an imo pinakamaopay yana. Kon nakukonsensya ka tungod han imo sayop nga nabuhat, mapainubsanon nga dumaop kan Jehova ha pag-ampo, isumat an imo sayop, ngan pangaro hin pasaylo ha iya. (Sal. 25:11; 51:3, 4) Pangaro hin pasaylo ha mga tawo nga bangin nasakitan mo, ngan kon kinahanglan, pagpabulig ha mga tigurang. (San. 5:14, 15) Mahibaro hin leksyon tikang ha imo mga sayop, ngan pangalimbasugi nga diri na ito mautro. Kon hihimoon mo ito, makakasiguro ka nga hi Jehova magpapakita hin kalooy ha imo ngan maghahatag hin bulig nga imo kinahanglan.—Sal. 103:8-13.

10. Kay ano nga mabug-at gud an diri reyalistiko nga mga ginlalaoman? (Galacia 6:4)

¹⁰ Diri reyalistiko nga mga ginlalaoman. Mahimo kita mapabug-atan han diri reyalistiko nga mga ginlalaoman kon iginkukompara naton an aton kalugaringon ha iba. (Basaha an Galacia 6:4.) Kon pirme naton iginkukompara an aton kalugaringon ha iba, mahimo kita maawa ngan makigkompetensya ha ira. (Gal. 5:26) Kon ginpipirit naton nga buhaton an mga ginbubuhat han iba bisan kon diri naton ito kaya, bangin maghikaraot la kita. Ngan kon “an ginpapamulat nga nalalangan nakakapasubo han kasingkasing,” labi na gud nga makasurubo kon maglaom kita ha mga butang nga diri gud mahitatabo! (Prob. 13:12) An pagbuhat hito makakaubos han aton kusog ngan makakapahinay ha aton pagdalagan ha rumba han kinabuhi.—Prob. 24:10.

11. Ano an makakabulig ha imo nga malikayan an diri reyalistiko nga mga ginlalaoman?

¹¹ Paonan-o mo makukuha ito nga dara? Ayaw paghunahuna ha imo kalugaringon hin mas labaw pa kay han iginpapabuhat ni Jehova. Diri gud hiya naglalaom nga ihahatag mo kon ano an waray ka. (2 Cor. 8:12) Sarig nga diri ginkukompara ni Jehova an imo ginbubuhat ha ginbubuhat han iba. (Mat. 25:20-23) Ginpapabilhan niya an imo bug-os-kalag nga pag-alagad, an imo pagkamatinumanon, ngan an imo pagpailob. Mapainubsanon nga akseptara nga tungod han imo edad, kahimsog, ngan kahimtang bangin limitado na an puydi mo mahimo yana. Pariho kan Barzilai, magin andam nga diri karawaton an mga pribilehiyo kon diri mo na ito kaya matuman tungod han pisikal nga mga limitasyon. (2 Sam. 19:35, 36) Pariho kan Moises, karawat hin bulig ngan ihatag an iba nga mga responsabilidad kon ginkikinahanglan. (Ex. 18:21, 22) An sugad nga pagkamapainubsanon mabulig ha imo nga diri maghimo hin diri reyalistiko nga mga ginlalaoman nga mahimo makapaluya ha imo ha rumba han kinabuhi.

12. Kita ba an may baratunon ha sayop nga mga desisyon han iba? Isaysay.

¹² An pag-abat nga ikaw an may baratunon ha  sayop nga mga desisyon han iba. Diri kita an magdidesisyon para ha iba; ngan diri ta hira pirme mapapanalipdan tikang ha mga resulta han ira sayop nga mga desisyon. Pananglitan, an usa nga anak bangin ha urhi magdesisyon nga diri na hiya mag-aalagad kan Jehova. Ito nga desisyon mahimo gud makapasubo ha mga kag-anak. Pero an mga kag-anak nga ginbabasol an ira kalugaringon tungod han sayop nga desisyon han ira anak nabubug-atan gud. Diri ito an pinas-an nga karuyag ni Jehova nga dad-on nira.—Roma 14:12.

13. Ano an puydi buhaton han mga kag-anak kon an ira anak nakahimo hin sayop nga desisyon?

¹³ Paonan-o mo makukuha ito nga dara? Karawata nga kita ngatanan gintagan ni Jehova hin kagawasan ha pagbuot. Gintugotan niya an kada tagsa nga maghimo hin kalugaringon nga desisyon, upod na hito an pag-alagad ha iya. Maaram hi Jehova nga diri ka perpekto nga kag-anak; karuyag la niya nga himoon mo an imo pinakamaopay. An mga desisyon nga ginhihimo han imo anak iya baratunon, diri imo. (Prob. 20:11) Pero bangin mabaraka ka la gihapon tungod ha mga sayop nga imo nahimo sugad nga kag-anak. Kon ito an imo inaabat, isumat ito kan Jehova ngan pangaro hin pasaylo ha iya. Maaram hiya nga diri mo na maibabalik an naglabay ngan mababag-o an nahitabo. Ngan diri niya karuyag nga panalipdan mo an imo anak ha pag-ani han iya igintanom. Hinumdumi nga kon an imo anak mangalimbasog nga bumalik kan Jehova, andam Hiya ha pagkarawat ha iya.—Luc. 15:18-20.

14. Kay ano nga an sobra nga kakonsensya usa nga dara nga kinahanglan kuhaon?

¹⁴ Sobra nga kakonsensya. Kon nakasala kita, natural la nga makonsensya kita. Pero diri karuyag ni Jehova nga umabat kita hin sobra nga kakonsensya. Usa ito nga dara nga kinahanglan naton kuhaon. Paonan-o naton mahibabaroan kon sobra kita nga nakukonsensya? Kon iginsumat na naton an aton sala, nagbasol, ngan naghimo hin mga paagi nga diri na ito mautro, makakasarig kita nga ginpasaylo na kita ni Jehova. (Buh. 3:19) Katapos himoon ito nga mga pitad, diri karuyag ni Jehova nga padayon kita nga makonsensya. Maaram hiya  nga diri gud makakaopay ha aton an padayon nga pag-abat hin kakonsensya. (Sal. 31:10) Kon sobra kita nga masubo, bangin umundang kita ha pagdalagan ha rumba han kinabuhi.—2 Cor. 2:7.

15. Ano an makakabulig ha imo nga maatohan an sobra nga kakonsensya? (1 Juan 3:19, 20) (Kitaa liwat an piktyur.)

¹⁵ Paonan-o mo makukuha ito nga dara? Kon padayon ka la gihap nga nakukonsensya, pagpokus ha ‘tinuod nga pagpasaylo’ nga iginhahatag han Dios. (Sal. 130:4) Kon ginpapasaylo niya adton tinuod nga nagbabasol, nagsasaad hiya: “Diri ko na dudumdumon an ira sala.” (Jer. 31:34) Nagpapasabot ini nga diri na gud dudumdumon ni Jehova an imo mga sala nga iya na ginpasaylo. Salit ayaw hunahunaa nga waray ka pa niya pasayloa tungod la kay naieksperyensyahan mo an mga resulta han imo sala. Ngan ayaw sobra kasubo tungod kay bangin nawad-an ka hin mga pribilehiyo ha kongregasyon tungod han imo nahimo nga sala. Diri gindudumdom ni Jehova an imo mga sala, ngan dapat ikaw liwat.—Basaha an 1 Juan 3:19, 20.

16. Sugad nga mga paradalagan, ano an aton kinahanglan masabtan?

¹⁶ Samtang nadalagan kita ha rumba han kinabuhi, kinahanglan ‘dumalagan kita ha paagi nga kita an magdaog hito.’ (1 Cor. 9:24) Mahihimo ta ito kon masabtan naton an kaibahan han mga butang nga kinahanglan ta dad-on ngan han mga butang nga kinahanglan naton kuhaon. Hini nga artikulo, ginhisgotan naton an pipira la nga butang nga kinahanglan naton dad-on ngan an kinahanglan ta tanggalon. Pero may-ada pa iba nga puydi mahisgotan. Hi Jesus nagsiring nga puydi kita “mabug-atan han sobra nga pagkinaon ngan sobra nga pag-ininom ngan mga kabaraka ha kinabuhi.” (Luc. 21:34) Ini ngan an iba pa nga teksto makakabulig ha imo nga mahibaroan an mga pagbag-o nga bangin kinahanglan mo himoon samtang nadalagan ka ha rumba han kinabuhi.

17. Kay ano nga makakasiguro kita nga magdadaog kita ha rumba han kinabuhi?

¹⁷ Makakasiguro kita nga magdadaog kita ha rumba han kinabuhi tungod kay tatagan kita ni Jehova hin kusog nga aton ginkikinahanglan. (Isa. 40:29-31) Salit, ayaw panluya! Subara hi apostol Pablo, nga ginbuhat an bug-os niya nga mahihimo basi makarawat niya an premyo. (Fil. 3:13, 14) Waray iba nga puydi dumalagan hini nga rumba para ha imo, pero ha bulig ni Jehova mahimo ka maglampos. Mahimo ka buligan ni Jehova nga dad-on an imo pinas-an ngan kuhaon an diri ginkikinahanglan nga mga dara. (Sal. 68:19) Tungod kay kaupod mo hi Jehova, madadalagan mo an rumba nga may pagpailob ngan magdadaog ka!