• “Inabat ko nga an akon bana baga hin pauroutro nga nag-aadulteryo.”

• “Naalohan ako. Ngan inabat ko nga waray na ako pulos ngan diri na makaruruyag ha iya.”

• “Naaawod ako pagsumat ha iba mahitungod hito. Salit ginsolo ko la ito.”

• “Inabat ko nga diri na ako hinigugma ni Jehova.”

Ito nga mga komento nagpapakita nga nag-aantos gud an asawa kon an iya bana nagkikinita hin pornograpiya. Ngan kon sekreto nga ginbibinuhat ito han bana, bangin ha sulod hin mga bulan o mga tuig, posible nga diri na hiya tumapod ha iya bana. Usa nga asawa an nagsiring, “Naghuhunahuna ako: ‘Diri ko na kilala ini nga lalaki nga akon ginpakasalan. Ano pa daw la an iya gintatago ha akon?’”

Ini nga artikulo gindisenyo para ha asawa nga an bana nagkikinita hin pornograpiya. a Hihisgotan hini an mga prinsipyo ha Biblia nga makakaliaw ha iya, magpapasarig nga hinigugma hiya ni Jehova, ngan makakabulig ha iya nga makarekober ha iya inaabat ngan makapabilin nga duok kan Jehova. b

Bisan kon diri mo makukontrol an ngatanan nga ginbubuhat han imo bana, may-ada ka mahihimo basi maibanan an imo kasakit ngan magkaada murayaw nga hunahuna. Kitaa an masunod.

Ayaw basola an imo kalugaringon. Bangin abaton han asawa nga hiya an may sayop salit nagkikinita hin pornograpiya an iya bana. Inabat ni Alice c nga may-ada kulang ha iya. Naghunahuna hiya, ‘Kay ano nga mas karuyag han akon bana nga magkinita ha iba nga babaye imbes nga ha akon?’ Ginbabasol han iba nga asawa an ira kalugaringon, kay naghuhunahuna hira nga mas ginpapagrabe la nira an sitwasyon tungod han ira reaksyon. Hi Danielle nagsiring: “An akon duro nga kasina mas nakadugang la ha problema ha amon pag-asawa.”

Kon sugad hito an imo inaabat, hinumdumi nga diri ka ginbabasol ni Jehova ha mga ginbubuhat han imo bana. An Santiago 1:14 nasiring: “An kada tagsa nasasarihan kon nadadara ngan nadadani  han iya kalugaringon nga hingyap.” (Roma 14:12; Fil. 2:12) Imbes nga basulon ka ni Jehova, gin-aapresyar niya an imo pagkamaunungon ha iya.—2 Cron. 16:9.

Bangin liwat makabulig an paghibaro nga kon an bana nagkikita hin pornograpiya, diri karuyag sidngon nga may kulang ha iya asawa. An mga eksperto nagsaysay nga an pornograpiya nakakahatag hin seksuwal nga mga pantasya nga diri maihahatag han bisan hin-o nga babaye.

Ayaw pagkinabaraka hin sobra. Hi Catherine nagsiring nga pirme niya ginhihinunahuna an pagkinita hin pornograpiya han iya bana. Hi Frances nagsiring: “Nalilisang ako kon nawawara an akon bana. Bug-os nga adlaw ako ginkikinulba.” An iba nga mga asawa nagsiring nga naaawod hira kon kaupod nira an kabugtoan nga maaram han ginbubuhat han ira bana. An iba naman nagsiring nga inaabat nira nga nag-uusahan hira kay ginhuhunahuna nira nga waray nakakaintindi han ira kahimtang.

Normal la ito nga mga pag-abat. Pero kon ito na la an imo paghihinunahunaon, mas mababaraka ka la. Lugod, paningkamot nga magpokus ha imo relasyon kan Jehova. Mabulig ito ha imo nga makaya an imo problema.—Sal. 62:2; Efe. 6:10.

Bangin makabulig ha imo an pagbasa ngan pagpamalandong ha mga rekord ha Biblia parte ha kababayin-an nga nabaraka pero naliaw kay nag-ampo hira kan Jehova. Diri niya pirme ginkukuha an ira mga problema, pero gintatagan niya hira hin kamurayawan. Pananglitan, hi Hana nagin “masurub-on hinduro” tungod han iya kahimtang. Pero katapos niya ‘mag-ampo hin maiha ha atubangan ni Jehova,’ nagin murayaw hiya, bisan kon diri pa hiya maaram kon ano an mahitatabo ha tiarabot.—1 Sam. 1:10, 12, 18; 2 Cor. 1:3, 4.

Pangaro hin bulig ha mga tigurang ha kongregasyon. Mahimo hira magin “taragoan tikang ha hangin, usa nga arayopan tikang ha makusog nga uran.” (Isa. 32:2, ftn.) Bangin magrekomendar pa ngani hira hin sister nga imo masusumatan han imo mga problema ngan makakaliaw ha imo.—Prob. 17:17.

Mabubuligan mo ba an imo bana nga maiundang niya an pagkinita hin pornograpiya? Posible. An Biblia nasiring nga ha pagsulbad ha usa nga problema o ha pag-ato ha usa nga gamhanan nga kaaway, “an duha mas maopay kay ha usa.” (Ecles. 4:9-12) Iginpapakita han mga pag-aram nga agsob nga  maopay an resulta kon an mag-asawa nagbubuligay basi malamposan an pagkaadik ha pornograpiya ngan maibalik an pagtapod ha ira pag-asawa.

Syempre, nakadepende gud ito kon an imo padis seryoso ngan determinado nga atohan an iya hingyap ha pagkinita hin pornograpiya. Nangamuyo na ba hiya kan Jehova para hin kusog ngan nangaro hin bulig ha mga tigurang? (2 Cor. 4:7; San. 5:14, 15) Naghimo na ba hiya hin mga paagi basi malikyan an mga pagsulay—pananglitan, ginlilimitahan ba niya an paggamit hin gadyet ngan ginlilikyan an alanganin nga mga sitwasyon? (Prob. 27:12) Ginkakarawat ba niya an imo bulig ngan waray igintatago ha imo? Kon sugad, bangin mabuligan mo hiya.

Paonan-o? Pansina an usa nga ehemplo. Hi Ethan, nga asawa ni Felicia, nagin adik ha pornograpiya han bata pa hiya. Ginbuligan hiya ni Felicia nga diri mag-alang pagsumat kon nabalik an iya hingyap nga magkita hin pornograpiya. Hi Ethan nagsiring: “Diri ako nag-aalang pagsumat han ngatanan ha akon asawa. Mahigugmaon nga ginbubuligan niya ako nga malikyan an mga pagsulay ngan pirme niya ako ginkukumusta. Ngan ginbubuligan niya ako nga limitahan an paggamit han Internet.” Syempre, nasasakitan gud hi Felicia ha pagin adik ni Ethan ha pornograpiya. “Pero,” siring niya, “an akon kasina ngan kasakit diri nakakabulig ha iya nga maiundang an iya bisyo. Katapos namon istoryahan an iya problema, andam na hiya nga buligan ako nga malamposan an akon mga kasakit.”

An sugad nga pag-istorya diri la kay makakabulig ha bana nga maiundang an pagkinita hin pornograpiya kondi makakabulig liwat ha iya asawa nga tumapod utro ha iya. Kon an bana andam ha pagsumat han iya mga hingyap, mga ginbubuhat adlaw-adlaw, ngan kon hain hiya, nawawara an mga pagduda ha iya.

Natoo ka ba nga puydi mo mabuligan an imo bana ha pariho nga paagi? Kon oo, puydi niyo nga duha basahon ngan hisgotan ini nga artikulo. An iya magigin tumong amo an pag-undang ha pagkinita hin pornograpiya ngan paghatag ha imo hin rason nga tumapod ha iya. Imbes nga masina hiya kay karuyag mo pag-istoryahan an problema, kinahanglan mangalimbasog hiya nga masabtan kon ano an epekto hito ha imo. Kinahanglan mo suportaran an iya mga paningkamot nga umundang ha iya bisyo ngan tagan hiya hin tsansa nga maibalik an imo pagtapod ha iya. Kinahanglan niyo nga duha mahibaroan kon ano an mga rason nga an mga tawo nagkikita hin pornograpiya ngan kon paonan-o malalamposan ito nga problema. d

 Kon nahahadlok ka nga an iyo pag-istorya diri magigin kalmado, puydi ka maghangyo hin usa nga tigurang nga duok ha iyo basi umupod ha iyo pag-istorya. Tigamni nga bisan kon nalamposan na han imo padis an pagkinita hin pornograpiya, bangin magkinahanglan hin panahon basi maibalik an imo pagtapod ha iya. Ayaw kahulop. Pamiling hin gudti nga mga pag-uswag ha iyo relasyon. Laumi nga pinaagi han imo pagin mapailubon, maabot an panahon nga magigin marig-on utro an iyo pag-asawa.—Ecles. 7:8; 1 Cor. 13:4.

Kon an imo bana nagkita utro hin pornograpiya, nagpapasabot ba ito nga diri hiya nagbabasol o waray na paglaom nga magbag-o hiya? Diri man. Kon naadik hiya hadto, bangin makurian gud hiya nga ig-undang ito dayon. Bangin magkita hiya utro hin pornograpiya bisan kon damu na ka tuig nga waray niya ito buhata. Basi diri na ito mautro, kinahanglan niya magin mas determinado nga atohan ito, bangin kinahanglan niya magin istrikto ha pagsunod ha iya mga limitasyon bisan kon baga hin nalamposan na niya ito. (Prob. 28:14; Mat. 5:29; 1 Cor. 10:12) Kinahanglan niya kultibaron an bag-o nga “paagi han paghunahuna” ngan mahibaro nga ‘kangalasan an maraot’—an pornograpiya pati na an iba pa nga maghugaw nga buhat sugad han masturbasyon. (Efe. 4:23; Sal. 97:10; Roma 12:9) Andam ba hiya nga himoon ini nga mga butang? Kon oo, puydi pa niya maiundang hin bug-os an iya bisyo. e

Pero ano man kon an imo padis diri interesado nga atohan an iya bisyo? Natural la nga masubo ka, masina, ngan umabat nga diri hiya maunungon ha imo. Magkakaada ka kamurayawan ha hunahuna kon isasarig mo kan Jehova an imo problema. (1 Ped. 5:7) Padayon nga magin duok kan Jehova pinaagi han pag-aram, pag-ampo, ngan pagpamalandong. Kon bubuhaton mo ito, makakasiguro ka nga magigin duok liwat hiya ha imo. Sugad han siring ha Isaias 57:15, hiya naukoy kaupod han “mga gintatalumpigos ngan han mga mapainubsanon,” ngan karuyag niya nga buligan hira nga maibalik an ira kalipay. Paningkamot nga magin maopay gud nga Kristiano. Pangaro hin bulig ha mga tigurang. Ngan ayaw kawad-i hin paglaom nga maabot an panahon magbabag-o an imo bana.—Roma 2:4; 2 Ped. 3:9.