Hito nga artikulo, nahibaroan ta nga may usa gud la nga isyu nga gin-aatubang han ngatanan nga intelihente nga linarang: an pagbaraan han harangdon nga ngaran ni Jehova. An isyu han pagkasoberano—karuyag sidngon, kon an paagi ba han pagmando ni Jehova an pinakamaopay—usa la han nahiuupod ha importante gud nga isyu. Sugad man, an isyu parte ha integridad han tawo usa pa nga nahiuupod hito nga importante gud nga isyu.

Kay ano nga aton yana ginpapabug-atan nga an importante gud nga isyu amo an ngaran ni Jehova ngan an pagbaraan hito? Hisgotan naton an tulo nga rason.

Siyahan, gin-atake ni Satanas an ngaran, o reputasyon, ni Jehova ha garden han Eden. Karuyag ipagawas han pakiana ni Satanas kan Eva nga hi Jehova diri mahinatagon kay naghimo hiya hin diri makatadunganon nga mga restriksyon kanda Adan ngan Eva. Katapos, direkta nga ginkontra ni Satanas an ginsiring ni Jehova, nga baga hin nasiring hiya nga buwaon an Dios. Salit ginpakaraot niya an ngaran ni Jehova. Nagin “Yawa” hiya, nga nangangahulogan “parapakaraot.” (Juan 8:44) Tungod kay hi Eva tinuod kan Satanas, waray niya sugta an Dios ngan nagrebelde ha Iya pagkasoberano. (Gen. 3:1-6) Tubtob yana, ginpapakaraot ni Satanas an ngaran han Dios pinaagi ha pagpasarang hin mga buwa kon ano nga klase hin persona hi Jehova. Adton tinoo ha sugad nga mga buwa posible gud nga diri sumugot kan Jehova. Salit para ha katawohan han Dios, an pagpakaraot ha baraan nga ngaran ni Jehova amo an pinakagrabe nga kawaray-hustisya. Ito an nangunguna nga hinungdan nga duro an pag-antos ngan karaotan ha kalibotan.

Ikaduha, basi makapahimulos an ngatanan nga linarang, determinado hi Jehova nga ibindikar an iya ngaran, o limpyohan ito ha ngatanan nga pagpasipara. Ito an pinakaimportante kan Jehova. Salit nagsiring hiya: “Babaraanon ko gud an akon harangdon nga ngaran.” (Ezek. 36:23) Ngan ginklaro ni Jesus kon ano an dapat magin pinakaimportante ha mga pag-ampo han ngatanan nga matinumanon nga surugoon ni Jehova han hiya nagsiring: “Baraanon unta an imo ngaran.” (Mat. 6:9) Pauroutro nga ginpapabug-atan han Biblia an pagkaimportante han paghimaya han ngaran ni Jehova. Tagda an pipira nga ehemplo: “Ihatag kan Jehova an himaya nga angay ha iya ngaran.” (1 Cron. 16:29; Sal. 96:8) “Pagkanta hin mga pagdayaw ha iya mahimayaon nga ngaran.” (Sal. 66:2) “Paghihimayaon ko an imo ngaran ha kadayonan.” (Sal. 86:12) An usa han mga higayon nga hi Jehova mismo an nagyakan tikang ha langit nahitabo ha templo ha Jerusalem han hi Jesus nagsiring: “Amay, himayaa an imo ngaran.” Ngan hi Jehova binaton: “Ginhimaya ko na ito ngan hihimayaon ko utro ito.”—Juan 12:28. a

Ikatulo, an kan Jehova katuyoan pirme konektado ha iya ngaran, o reputasyon. Hunahunaa ini: Ano an mahitatabo katapos han ultimo nga pagsari ha kataposan han Usa ka Yukot ka Tuig nga Pagmando han Kristo? Padayon ba nga mababahin an intelihente nga mga linarang ha importante gud nga isyu —an pagbaraan han ngaran ni Jehova? Basi mabuligan kita ha pagbaton hito nga pakiana, hinumdoman ta an duha nga nahiuupod hiton importante gud nga isyu—an integridad han tawo ngan an pagkasoberano ha uniberso. Padayon ba nga sasarihan an integridad han mga tawo nga napamatud-an na nga matinumanon? Diri. Hito nga panahon, perpekto na hira ngan bug-os nga nasarihan. Nakarawat na nira an kinabuhi nga waray kataposan. An pagkasoberano ha uniberso padayon ba nga magigin isyu o hinungdan pa ngani ha pagkabahin-bahin han intelihente nga mga linarang? Diri. Diri na kinahanglan pamatud-an kon an paagi ba ni Jehova ha pagmando an pinakamaopay. Pero kumusta man an ngaran ni Jehova?

An ngaran ni Jehova hito nga panahon bug-os na nga nabaraan, karuyag sidngon, bug-os na nga nalimpyohan ha pakaraot. Pero an iya ngaran padayon nga magigin pinakaimportante nga butang ha ngatanan niya nga surugoon ha langit ngan ha tuna. Kay ano? Kay makikita nira nga hi Jehova padayon nga nagbubuhat hin mag-opay gud nga mga butang. Hunahunaa ini: Tungod kay mapainubsanon nga ipapasa ni Jesus kan Jehova an ngatanan nga pagmando, an Dios gud la ‘an magmamando han ngatanan.’ (1 Cor. 15:28) Katapos hito, an mga tawo ha tuna mag-i-enjoy ha “mahimayaon nga kagawasan han mga anak han Dios.” (Roma 8:21) Ngan tutumanon ni Jehova an iya maiha na nga katuyoan nga pag-urusahon an ngatanan nga intelihente nga linarang ha langit ngan ha tuna sugad nga usa nga daku nga pamilya.—Efe. 1:10.

Kon matuman na ito ngatanan, ano an magigin epekto hito ha pamilya ni Jehova ha langit ngan ha tuna? Sigurado nga magkakaada la gihap kita makusog nga hingyap ha pagdayaw kan Jehova ngaran. An salmista nga hi David giniyahan ha pagsurat: “Hinaot dayawon hi Jehova nga Dios . . . Hinaot an iya mahimayaon nga ngaran dayawon ha kadayonan.” (Sal. 72:18, 19) Tubtob ha waray kataposan, padayon kita nga magbibiling hin bag-o ngan magpakaruruyag nga rason nga buhaton ito.

An ngaran ni Jehova nagrirepresentar han ngatanan mahitungod ha iya. Kon nahuhunahuna ta ito, nahinunumdoman naton an iya gugma. (1 Juan 4:8) Pirme naton mahinunumdoman nga ginlarang kita ni Jehova tungod han gugma, nga ginhatag niya an halad lukat tungod han gugma, ngan iginpakita niya an pagkamatadong han iya paagi han pagmando tungod han gugma. Ngan padayon nga aabaton la gihap naton an iya gugma ha kadayonan. Tubtob ha waray kataposan, mapapagios kita nga magin mas duok ha iya sugad nga aton Amay ngan magkanta hin mga pagdayaw ha iya mahimayaon nga ngaran.—Sal. 73:28.