1. Kay ano nga gin-aapresyar mo an mga tawo nga pasensyoso?

 GIN-AAPRESYAR naton ngatanan an mga tawo nga pasensyoso. Ginrirespeto naton adton nakakahulat nga diri naaaringit. Gin-aapresyar ta nga pasensyoso ha aton an iba kon nakakasayop kita. Ngan mapasalamaton liwat kita nga nagin pasensyoso an nag-Bible study ha aton han nakukurian kita paghibaro, pagkarawat, o pag-aplikar han usa nga katutdoan ha Biblia. Labaw ha ngatanan, mapasalamaton kita kay hi Jehova nga Dios pasensyoso ha aton!—Roma 2:4.

2. Ha ano nga mga sitwasyon bangin makurian kita nga magin pasensyoso?

² Bisan kon gin-aapresyar naton an pagin pasensyoso han iba, kita mismo bangin nakukurian nga magin pasensyoso pirme. Pananglitan, bangin makurian kita pagpabilin nga kalmado kon natatrapik, labi na kon late na kita. Bangin masina kita kon may tawo nga nakakapaaringit ha aton. Ngan usahay, bangin makurian kita paghinulat ha saad ni Jehova nga bag-o nga kalibotan. Karuyag mo ba magin mas pasensyoso? Hini nga artikulo, hihisgotan ta kon ano an iginpapasabot han pagin pasensyoso ngan kon kay ano nga importante gud ito. Aton liwat rirepasuhon kon ano an makakabulig ha aton nga magin mas pasensyoso.

3. Ano an reaksyon han pasensyoso nga tawo kon may nakakapasina ha iya?

³ Pansina an upat nga paagi nga maipapakita ta an pagin pasensyoso. Siyahan, an pasensyoso nga tawo diri madagmit masina. Naniningkamot hiya nga magpabilin nga kalmado ngan diri bumulos kon may nakakapasina ha iya o naiistres hiya. An mga pulong nga “diri madagmit masina” siyahan nga mababasa ha Biblia han hi Jehova iginhulagway sugad nga “Dios nga maloloy-on ngan mapinairon, diri madagmit masina ngan hura  hin maunungon nga gugma ngan kamatuoran.”—Ex. 34:6.

4. Ano an reaksyon han pasensyoso nga tawo kon kinahanglan niya maghulat?

⁴ Ikaduha, an pasensyoso nga tawo nakakahulat hin kalmado. Kon an usa nga butang nag-iiha kay han ginlalaoman, an pasensyoso nga tawo diri nauuyam o naaaringit. (Mat. 18:26, 27) Damu an sitwasyon nga kinahanglan kita maghulat hin kalmado. Pananglitan, kon may nagyayakan, kinahanglan naton mapailubon nga mamati nga diri nasagbang. (Job 36:2) Bangin kinahanglan magin mapailubon liwat kita kon ginbubuligan an usa nga Bible study nga masabtan an usa nga katutdoan ha Biblia o malamposan an usa nga maraot nga batasan.

5. Ano an usa pa nga paagi nga maipapakita an pagkapasensyoso?

⁵ Ikatulo, an pasensyoso nga tawo naghuhunahuna anay antes gumios. Syempre, may mga sitwasyon nga kinahanglan gumios dayon. Pero kon an pasensyoso nga tawo may importante nga bubuhaton, diri hiya nag-aapura ha pagtikang hito o ha pagtapos hito. Lugod, naggagahin hiya hin igo nga panahon ha pagplano kon ano an iya bubuhaton. Katapos, naghahatag hiya hin panahon para buhaton hin maopay an trabaho.

6. Ano an reaksyon han pasensyoso nga tawo kon naatubang hiya hin mga problema o kakurian?

⁶ Ikaupat, an pasensyoso nga tawo naniningkamot nga mailob an mga problema nga diri nagrireklamo. Hini nga kahimtang, an pagin pasensyoso konektado gud ha pagin mapailubon. Syempre, diri man sayop nga isumat ha usa nga duok nga sangkay kon ano an aton inaabat parte ha usa nga problema. Pero bubuhaton han pasensyoso nga tawo an iya pinakamaopay basi padayon nga makailob samtang gintitipigan niya an pagin positibo. (Col. 1:11) Sugad nga mga Kristiano, kinahanglan naton ipakita an pagin pasensyoso hini ngatanan nga paagi. Kay ano? Hisgotan ta an pipira nga rason.

7. Sumala ha Santiago 5:7, 8, kay ano nga importante gud an pagkapasensyoso? (Kitaa liwat an piktyur.)

⁷ An pagkapasensyoso importante ha aton katalwasan. Pariho han matinumanon nga mga surugoon han naglabay, dapat mapailubon nga maghulat kita nga tumanon han Dios an iya mga saad. (Heb. 6:11, 12) Ha Biblia, iginkukompara an aton sitwasyon ha sitwasyon han usa nga parag-uma. (Basaha an Santiago 5:7, 8.) An parag-uma maduruto gud nga nagtatanom ngan nananaribo han iya mga tanom, pero diri hiya maaram han eksakto nga panahon han pagtubo hito. Salit mapailubon hiya nga naghuhulat ngan naglalaom nga may aanihon hiya. Ha pariho nga paagi, nagpapabilin kita nga busy ha espirituwal nga mga buruhaton bisan kon “diri [kita] maaram kon ano nga adlaw maabot an [aton] Ginoo.” (Mat. 24:42) Naghuhulat kita hin mapailubon ngan nasarig nga ha itinanda nga panahon ni Jehova, tutumanon niya an ngatanan nga iya iginsaad. Kon diri kita magigin pasensyoso, bangin kapuyon kita paghinulat ngan hinay-hinay nga bumaya ha kamatuoran. Bangin maningkamot liwat kita nga makuha dayon an mga butang nga aton ginhihingyap. Pero kon pasensyoso kita, makakailob kita tubtob ha waray kataposan ngan matatalwas.—Mic. 7:7; Mat. 24:13.

8. Paonan-o an pagkapasensyoso nabulig ha aton pagtratar ha iba? (Colosas 3:12, 13)

⁸ An pagkapasensyoso nabulig ha aton pagtratar ha iba. Nabulig ito ha aton nga mamati hin maopay kon nagyayakan an iba. (San. 1:19) An pagkapasensyoso nabulig liwat nga magkaada kamurayawan ha iba. Kon pasensyoso kita, diri kita magrireak dayon ngan magyayakan hin diri maopay kon naiistres kita. Ngan kon pasensyoso kita, diri kita masisina dayon kon may nakakasakit ha aton. Imbes nga bumulos, padayon kita nga ‘magpapailob ha usa kag usa ngan hura nga magpapasaylo ha usa kag usa.’—Basaha an Colosas 3:12, 13.

9. Paonan-o an pagkapasensyoso nabulig ha aton kon kinahanglan ta maghimo hin mga desisyon? (Proberbios 21:5)

⁹ An pagkapasensyoso makakabulig liwat ha aton ha paghimo hin mas mag-opay nga desisyon. Imbes nga magdesisyon nga diri anay naghuhunahuna, maggagahin kita hin panahon ha pag-research ngan pagturotimbang han aton mga opsyon. (Basaha an Proberbios 21:5.) Pananglitan, kon nagbibiling kita hin trabaho, bangin maaghat kita nga karawaton an siyahan nga trabaho nga nabilngan naton, bisan kon makakaulang ito ha aton pag-alagad. Pero kon pasensyoso kita, maggagahin kita hin panahon nga hunahunaon an mga butang sugad han lokasyon, oras, ngan an epekto hito ha aton pamilya ngan espirituwal. Kon pasensyoso kita, malilikyan ta an paghimo hin maraot nga desisyon.

10. Paonan-o makukultibar ngan matitipigan han usa nga Kristiano an pagin pasensyoso?

¹⁰ Pag-ampo para magin mas pasensyoso. An pagin pasensyoso bahin han bunga han espiritu. (Gal. 5:22, 23) Salit puydi kita mag-ampo para han baraan nga espiritu ngan hangyoon hi Jehova nga buligan kita nga makultibar an bunga hito. Kon umatubang kita hin sitwasyon nga magsasari han aton pasensya, “padayon nga mangaro” kita han baraan nga espiritu para mabuligan kita nga magin pasensyoso. (Luc. 11:9, 13) Puydi liwat naton hangyoon hi Jehova nga buligan kita nga makita an mga butang uyon ha iya panhunahuna. Katapos mag-ampo, kinahanglan naton himoon an aton pinakamaopay basi magin pasensyoso kada adlaw. Kon padayon kita nga mag-aampo nga magin pasensyoso ngan maniningkamot  nga ipakita ito, mas makakagamot ito ha aton kasingkasing ngan magigin bahin han aton personalidad.

11-12. Paonan-o hi Jehova nagpapakita hin pagin pasensyoso?

¹¹ Pamalandonga an mga ehemplo ha Biblia. Ha Biblia, damu an ehemplo han mga tawo nga pasensyoso. Pinaagi ha pagpamalandong hito nga mga rekord, mahibabaro kita kon paonan-o magigin pasensyoso. Antes naton hisgotan an pipira hini nga ehemplo, aton anay hisgotan an pinakamaopay nga ehemplo han pagin pasensyoso—hi Jehova.

¹² Ha garden han Eden, ginpakaraot ni Satanas an ngaran ni Jehova ngan gin-atake an Iya reputasyon sugad nga patas ngan mahigugmaon nga Magmarando. Imbes nga bungkagon dayon an parapakaraot, hi Jehova nagpakita hin pagkapasensyoso ngan pagpugong ha kalugaringon, kay maaram hiya nga kinahanglan hin panahon basi pamatud-an nga an iya pagmando amo an pinakamaopay. Ngan samtang naghuhulat, gin-iilob niya an ngatanan nga pakaraot kontra ha iya ngaran. Dugang pa, hi Jehova mapailubon nga naghihinulat para damu nga tawo an magkaada oportunidad nga makakarawat hin kinabuhi nga waray kataposan. (2 Ped. 3:9, 15) Sugad nga resulta, minilyon nga tawo an nakakilala ha iya. Kon magpupokus kita ha mga kapulsanan han pagin pasensyoso ni Jehova, posible nga magigin mas masayon na la ha aton an paghulat nga pahinaboon niya an kataposan.

13. Paonan-o perpekto nga ginsubad ni Jesus an pagin pasensyoso han iya Amay? (Kitaa liwat an piktyur.)

¹³ Perpekto nga ginsusubad ni Jesus an pagin pasensyoso han iya Amay, ngan iginpakita niya ito nga kalidad samtang nakanhi hiya ha tuna. Sigurado nga diri pirme masayon ha iya nga magin pasensyoso, labi na ha hipokrito nga  mga eskriba ngan Pariseo. (Juan 8:25-27) Pero pariho ha iya Amay, hi Jesus diri madagmit masina. Waray hiya bumulos han gin-insulto hiya o gin-aghat nga masina. (1 Ped. 2:23) Gin-ilob ni Jesus an mga kakurian ngan waray magreklamo. Masasabtan naton kon kay ano nga ginsisidngan kita han Biblia nga ‘tagdon hin maopay hiya nga nag-ilob han sugad hito nga maraot nga panyakan han magpakasasala’! (Heb. 12:2, 3) Ha bulig ni Jehova, makakapailob liwat kita ha bisan ano nga pagsari nga aton aatubangon.

14. Ano an aton mahibabaroan ha pagkapasensyoso ni Abraham? (Hebreo 6:15) (Kitaa liwat an piktyur.)

¹⁴ Ano man kon an aton mga ginlalaoman parte ha kataposan waray pa matuman? Bangin maiha na kita nga naglalaom nga maabot an kataposan. Ngan yana bangin nababaraka kita nga diri na naton makita an pag-abot hito. Ano an makakabulig ha aton nga padayon nga maghulat hin mapailubon? Pansina an ehemplo ni Abraham. Han 75 anyos na hiya ngan waray pa anak, hi Jehova nagsaad ha iya: “Hihimoon ko ikaw nga daku nga nasud.” (Gen. 12:1-4) Nakita ba ni Abraham an katumanan hito nga saad? Oo, pero diri bug-os. Katapos makatabok ha Salog Eufrates ngan maghinulat hin 25 ka tuig, nakita niya an milagroso nga katawo han iya anak nga hi Isaac, ngan paglabay pa hin 60 ka tuig, natawo an iya mga apo nga hira Esau ngan Jacob. (Basaha an Hebreo 6:15.) Pero waray gud makita ni Abraham nga nagin daku nga nasud an iya mga tulin ngan nakapanunod ha Tuna nga Iginsaad. Pero ito nga matinumanon nga lalaki nagkaada duok nga pakigsangkay ha iya Maglalarang. (San. 2:23) Ngan kon banhawon na hi Abraham, malilipay gud hiya nga mahibaroan nga an iya pagtoo ngan pagkapasensyoso nagresulta hin mga bendisyon ha ngatanan nga nasud!  (Gen. 22:18) Ano an leksyon? Bangin diri naton personal nga makita yana an katumanan han ngatanan nga saad ni Jehova. Kondi kon pasensyoso kita pariho kan Abraham, makakasiguro kita nga babalosan kita ni Jehova yana ngan labi na gud ha Iya iginsaad nga bag-o nga kalibotan.—Mar. 10:29, 30.

15. Ano an puydi naton adman ha aton personal nga pag-aram?

¹⁵ Ha Biblia, damu pa an ehemplo han mga tawo nga pasensyoso. (San. 5:10) Bangin maopay nga mag-research ka mahitungod ha ira. b Pananglitan, bisan kon hi David gindihogan han bata pa hiya para magin hadi ha Israel ha tiarabot, kinahanglan hiya maghulat hin damu ka tuig antes hiya magin hadi. Hira Simeon ngan Ana matinumanon nga nagsingba kan Jehova samtang ira ginhuhulat an iginsaad nga Mesias. (Luc. 2:25, 36-38) Samtang imo gin-aadman an sugad nga mga rekord, pamilnga an mga baton ha masunod nga mga pakiana: Ano an posible nga nakabulig hini nga tawo basi magin pasensyoso? Paonan-o hiya nagpahimulos ha pagin pasensyoso? Paonan-o ko hiya masusubad? Bangin magpahimulos ka liwat ha pag-aram mahitungod hadton waray magin pasensyoso. (1 Sam. 13:8-14) Mahimo mo ini ipakiana: ‘Kay ano daw la nga waray hira magin pasensyoso? Ano an nagin maraot nga mga resulta hito?’

16. Ano an pipira nga kapulsanan han pagin pasensyoso?

¹⁶ Tagda an mga kapulsanan han pagin pasensyoso. Kon pasensyoso kita, mas malipayon kita ngan kalmado. Salit an pagin pasensyoso nakakaopay ha mental ngan pisikal nga kahimsog. Kon pasensyoso kita ha iba, may maopay kita nga relasyon ha ira. An aton kongregasyon mas nagkakaurosa. Kon may nakakapaaringit ha aton ngan diri kita masisina dayon, malilikyan ta nga magdaku an problema. (Sal. 37:8, ftn.; Prob. 14:29) Pero labaw ha ngatanan, kon pasensyoso kita, ginsusubad naton an aton langitnon nga Amay ngan nagigin mas duok ha iya.

17. Ano an angay naton magin determinasyon?

¹⁷ Usa gud nga maopay ngan mapulsanon nga kalidad an pagin pasensyoso! Bisan kon bangin diri pirme masayon an pagin pasensyoso, ha bulig ni Jehova, makakapadayon kita ha pagkultibar hini nga kalidad. Ngan samtang mapailubon nga ginhuhulat naton an bag-o nga kalibotan, makakasarig kita nga “an mata ni Jehova nagkikita ha mga may kahadlok ha iya, ha mga naghuhulat han iya maunungon nga gugma.” (Sal. 33:18) Hinaot kita ngatanan magin determinado nga padayon nga isul-ot an pagin pasensyoso.