1. Ano an ginbubuhat han usa nga tawo kon nagbabasol hiya?

 KON may nabubuhat kita nga sayop, importante nga magbasol kita. An Biblia nasiring nga ginbabag-o han nagbabasol nga tawo an iya panhunahuna ha espisipiko nga panggawi, gin-uundang na an pagbuhat hito, ngan determinado nga diri ito utruhon.​—Kitaa ha Glossary an “Pagbasol.”

2. Kay ano nga dapat mahibaro kita ngatanan mahitungod han pagbasol? (Nehemias 8:​9-11)

² An tagsa nga buhi nga tawo dapat mahibaro mahitungod han pagbasol. Kay ano? Kay kita ngatanan nakakasala kada adlaw. Sugad nga mga tulin nira Adan ngan Eva, an tagsa ha aton nakapanunod han sala ngan kamatayon. (Roma 3:23; 5:12) Waray ha aton makakalikay hito. Bisan an kalalakin-an nga marig-on an pagtoo, sugad kan apostol Pablo, nakurian ha pakig-away ha sala. (Roma 7:​21-24) Karuyag sidngon ba hini nga pirme na la kita magigin masurub-on tungod han aton mga sala? Diri, maloloy-on hi Jehova, ngan karuyag niya nga magin malipayon kita. Tagda an eksperyensya han mga Judio ha panahon ni Nehemias. (Basaha an Nehemias 8:​9-11.) Diri karuyag ni Jehova nga sobra hira nga masubo han ira naglabay nga mga sala kondi karuyag niya nga magin malipayon hira ha ira pagsingba ha iya. Maaram hi Jehova nga an pagbasol nagriresulta hin kalipay. Salit gintututdoan kita niya mahitungod hito. Kon magbabasol kita han aton mga sala, makakasarig kita nga papasayloon kita han aton maloloy-on nga Amay.

3. Ano an aton hihisgotan hini nga artikulo?

³ Hisgotan pa naton an mahitungod han pagbasol. Hini nga artikulo, hihisgotan naton an tulo nga butang. Siyahan, mahibabaroan naton kon ano an igintutdo ni Jehova ha Israel mahitungod han pagbasol. Sunod, magpupokus kita kon paonan-o ginbuligan ni Jehova nga magbasol an magpakasasala. Katapos, hihisgotan naton an nahibaroan han mga disipulo ni Jesus mahitungod han pagbasol.

 KON ANO AN IGINTUTDO NI JEHOVA HA ISRAEL MAHITUNGOD HAN PAGBASOL

4. Ano an igintutdo ni Jehova ha nasud han Israel mahitungod han pagbasol?

⁴ Han gin-organisar ni Jehova an mga Israelita nga magin usa nga nasud, naghimo hiya hin kasabotan ha ira, usa nga pormal nga kauyonan. Kon padayon nga susundon nira an iya mga balaud, puproteksyonan ngan bibendisyonan niya hira. Mahitungod hito nga mga balaud, iya hira ginpasarig: “Ini nga sugo nga akon iginsusugo ha imo yana nga adlaw diri sobra kakuri para ha imo, diri liwat ito makuri abuton para ha imo.” (Deut. 30:​11, 16) Pero kon magrebelde hira ha iya—pananglitan, pinaagi ha pagsingba ha iba nga mga dios—diri na hiya magbibendisyon ha ira, ngan mag-aantos hira. Kondi bisan kon buhaton nira ito, mahimo la gihapon hira magkaada utro han pag-uyon han Dios. Puydi hira ‘bumalik kan Jehova nga ira Dios ngan mamati ha iya tingog.’ (Deut. 30:​1-3, 17-20) Karuyag sidngon, puydi hira magbasol. Kon ito an ira buhaton, hi Jehova maduok ha ira ngan magbibendisyon utro.

5. Paonan-o iginpakita ni Jehova nga waray hiya mawad-i hin paglaom ha iya katawohan? (2 Hadi 17:​13, 14)

⁵ Pauroutro nga nagrebelde kan Jehova an iya pinili nga katawohan. Labot pa ha pagbuhat hin idolatriya, may iba pa hira nga ginbuhat nga magraot gud. Salit nag-antos hira. Pero padayon nga ginbuligan ni Jehova an iya katawohan nga mag-alagad utro ha iya. Pauroutro nga nagsugo hiya hin mga propeta basi aghaton an iya katawohan nga magbasol ngan bumalik ha iya.​—Basaha an 2 Hadi 17:​13, 14.

6. Ha ano nga paagi gin-gamit ni Jehova an iya mga propeta basi tutdoan an iya katawohan han pagkaimportante han pagbasol? (Kitaa liwat an piktyur.)

⁶ Agsob gamiton ni Jehova an iya mga propeta basi pahamangnoan ngan tadungon an iya katawohan. Pananglitan, an Dios nagsiring pinaagi kan Jeremias: “Balik, O rebelyoso nga Israel . . . Diri ako magkikita nga nasisina ha iyo, kay maunungon ako . . . Diri ako magtitipig hin kasina ha kadayonan. Basta karawata la an imo sala, kay nagrebelde ka kan Jehova.” (Jer. 3:​12, 13) Pinaagi kan Joel, hi Jehova nagsiring: “Balik ha akon ha bug-os niyo nga kasingkasing.” (Joel 2:​12, 13) Ginsugo niya hi Isaias nga magsiring: “Limpyuhi  an iyo kalugaringon; kuhaa tikang ha akon atubangan an iyo magraot nga mga buhat; ayaw na kamo pagbuhat hin maraot.” (Isa. 1:​16-19) Ngan pinaagi kan Ezekiel, hi Jehova nagpakiana: “Nalilipay gud ba ako ha kamatayon han maraot nga tawo? . . . Diri ba mas karuyag ko nga bayaan niya an iya mga binuhatan ngan padayon nga mabuhi? Diri ako nalilipay ha kamatayon han bisan hin-o, . . . salit balik kamo ngan mabuhi.” (Ezek. 18:​23, 32) Nalilipay hi Jehova nga makita an mga tawo nga nagbabasol kay karuyag niya hira nga padayon nga mabuhi—ha waray kataposan! Salit hi Jehova diri la basta nga naghuhulat nga magbag-o an magpakasasala nga tawo antes niya hira buligan. Kitaon ta an pipira nga ehemplo hini.

7. Ano an igintutdo ni Jehova ha iya katawohan pinaagi han rekord mahitungod kan propeta Hosea ngan han iya asawa?

⁷ Pansina kon ano an igintutdo ni Jehova ha iya katawohan pinaagi han aktuwal nga nahitabo—kan Gomer nga asawa ni propeta Hosea. Katapos niya mag-adulteryo, ginbayaan niya hi Hosea kay inupod ha iba nga kalalakin-an. Posible pa ba hiya mabuligan? Hi Jehova, nga nakakabasa han mga kasingkasing, nagsiring kan Hosea: “Sige, higugmaa utro an babaye nga ginhihigugma hin iba nga lalaki ngan nag-aadulteryo, sugad han paghigugma ni Jehova ha katawohan han Israel bisan kon nadangop hira ha iba nga mga dios.” (Hos. 3:1; Prob. 16:2) Pansina nga an asawa ni Hosea nagbibinuhat la gihapon hin seryoso nga sala. Pero ginsidngan ni Jehova hi Hosea nga kadtoon hiya ngan pasayloon ngan makigbalik. a Sugad man, padayon nga ginbuligan ni Jehova an iya matinalapason nga katawohan. Bisan pa kon nagbibinuhat hira hin grabe nga mga sala, nahigugma la gihapon hiya ha ira ngan padayon nga ginkadto hira ngan ginbuligan nga magbasol ngan magbag-o han ira pagkinabuhi. Iginpapakita ba hini nga ehemplo nga hi Jehova, “an nag-uusisa han mga kasingkasing,” makadto ha indibiduwal nga nagbibinuhat pa hin seryoso nga sala ngan maniningkamot nga buligan hiya nga magbasol? (Prob. 17:3) Kitaon naton.

KON PAONAN-O GINBUBULIGAN NI JEHOVA NGA MAGBASOL AN MAGPAKASASALA

8. Ano an ginbuhat ni Jehova basi buligan hi Cain nga magbasol? (Genesis 4:​3-7) (Kitaa liwat an piktyur.)

⁸ Hi Cain an suhag nga anak nira Adan ngan Eva. Napanunod niya an pagin makasasala han iya mga kag-anak. Dugang pa, an Biblia nasiring mahitungod ha iya: “An iya mismo mga buhat magraot.” (1 Juan 3:12) Posible nga ito an rason kon kay ano nga hi Jehova ‘waray malipay kan Cain ngan ha iya halad’ han naghalad hiya. Imbes nga bag-uhon an iya panggawi, “nasina gud hi Cain ngan nabido.” Ano an sunod nga ginbuhat ni Jehova? Nakiistorya hiya kan Cain. (Basaha an Genesis 4:​3-7.) Pansina nga hi Jehova buotan nga nakiistorya kan Cain, nga naghatag ha iya hin paglaom, ngan nagpahamangno ha peligro nga makabuhat hin sala. Makasurubo, waray mamati hi Cain. Waray hiya magpabulig kan Jehova nga magbasol. Katapos hito nga negatibo nga reaksyon, inundang ba hi Jehova ha pagbulig nga magbasol an iba nga magpakasasala? Waray gud!

9. Paonan-o ginbuligan ni Jehova hi David nga magbasol?

⁹ Hinigugma gud ni Jehova hi Hadi David. Gintawag pa ngani Niya hiya nga “usa nga tawo nga nakakapalipay ha akon kasingkasing.” (Buh. 13:22) Pero nakabuhat hi David hin seryoso nga mga sala, upod na an pag-adulteryo ngan pagpatay. Sumala ha Mosaiko nga Balaud, hi David angay patayon. (Lev. 20:10; Num. 35:31) Pero karuyag ni Jehova nga buligan hi David nga  magbasol. b Ginsugo niya hi propeta Nathan nga bisitahon hi Hadi David, bisan kon diri pa hiya nagpapakita hin bisan ano nga tigaman han pagbasol. Naggamit hi Nathan hin ilustrasyon basi mabantad an kasingkasing ni David. Tungod kay hi David nabantad gud, nagbasol hiya. (2 Sam. 12:​1-14) Kinasingkasing nga nagsurat hiya hin salmo nga nagpapakita han iya mabinasulon nga disposisyon. (Sal. 51, superskripsyon) Damu na gud nga magpakasasala an naliaw hito nga salmo ngan napagios nga magbasol. Diri ba kita nalilipay nga mahigugmaon nga ginbuligan ni Jehova nga magbasol an iya hinigugma nga surugoon nga hi David?

10. Ano an imo inaabat ha pagin pasensyoso ngan pagpasaylo ni Jehova ha makasasala nga mga tawo?

¹⁰ Nangangalas hi Jehova ha sala, ngan diri niya ginkukonsinter an bisan ano nga klase hin sala. (Sal. 5:​4, 5) Pero maaram hiya nga makasasala kita ngatanan, ngan tungod han gugma niya ha aton, ginpipili niya nga buligan kita nga atohan an sala. Pirme hiya nangangalimbasog nga buligan nga magbasol ngan magin duok ha iya bisan an pinakamakasasala. Nakakaliaw gud nga sugad hito hi Jehova! Kon aton ginpapamalandong an pagin pasensyoso ngan pagpasaylo ni Jehova, nagigin determinado kita nga magpabilin nga matinumanon ha iya ngan magbasol dayon kon nakakasala kita. Hisgotan naman naton yana kon paonan-o pa gintutdoan an Kristiano nga kongregasyon mahitungod han pagbasol.

KON ANO AN NAHIBAROAN HAN MGA SUMURUNOD NI JESUS MAHITUNGOD HAN PAGBASOL

11-12. Ano an igintutdo ni Jesus ha iya mga mamarati mahitungod han pagin mapinasayloon han iya Amay? (Kitaa an piktyur.)

¹¹ Ha siyahan nga siglo C.E., inabot an panahon han pagkanhi han Mesias. Sugad han gin-unabi ha nahiuna nga artikulo, gin-gamit ni Jehova hira Juan Bawtista ngan Jesu-Kristo basi tutdoan an mga tawo kon ano kaimportante an pagbasol.​—Mat. 3:​1, 2; 4:17.

¹² Ha bug-os nga ministeryo ni Jesus, gintutdoan niya an iya mga mamarati mahitungod han pagin mapinasayloon han iya Amay. Ginbuhat ito ni Jesus ha nakakabantad gud nga paagi han igin-istorya niya an parabola mahitungod han nawara nga anak. Ha sulod hin pipira  ka panahon, ginpili hito nga batan-on an makasasala nga pagkinabuhi. Pero “nakapamurubuot hiya” ngan inuli. Ano an nagin reaksyon han tatay? Hi Jesus nagsiring nga “samtang hirayo pa [an anak], nakita hiya han iya tatay ngan nalooy ha iya, ngan dinalagan an iya tatay ngan ginhangkopan hiya ngan mahigugmaon nga ginharokan hiya.” Gusto unta maghangyo han anak nga himoon hiya nga surugoon ha panimalay han iya tatay, pero gintawag hiya han iya tatay nga “ini nga akon anak” ngan iginbalik hiya ha iya pamilya. Nagsiring an tatay: “Nawara hiya ngan naagian.” (Luc. 15:​11-32) Antes hi Jesus kumanhi ha tuna, sigurado nga nakita niya an pagpaid han iya Amay ha diri na maihap nga makasasala nga nagbasol. Makaruruyag gud ini ngan makapasarig nga paghulagway ni Jesus han aton maloloy-on nga Amay, hi Jehova!

13-14. Ano an nahibaroan ni apostol Pedro mahitungod han pagbasol, ngan ano an iya igintutdo ha iba mahitungod hito? (Kitaa liwat an piktyur.)

¹³ Nahibaro hi apostol Pedro hin importante nga mga leksyon tikang kan Jesus mahitungod han pagbasol ngan pagpasaylo. Makadamu magsayop hi Pedro, ngan pirme hi Jesus nagpapasaylo ha iya. Pananglitan, katapos ignigar ni Pedro hin tulo ka beses nga kilala niya an iya Ginoo, inabat hiya hin duro nga kakonsensya ha iya nabuhat. (Mat. 26:​34, 35, 69-75) Pero han ginbanhaw na hi Jesus, nagpakita hiya kan Pedro—posible ha pribado. (Luc. 24:​33, 34; 1 Cor. 15:​3-5) Sigurado nga hito nga takna, mahigugmaon nga ginpasaylo ngan ginpasarig ni Jesus an iya mabinasulon nga apostol.​—Kitaa an Marcos 16:7 ngan an study note nga “at kay Pedro.”

¹⁴ Tungod kay nakaeksperyensya gud mismo hi Pedro, makakatutdo na hiya yana ha iba mahitungod han pagbasol ngan pagpasaylo. May panahon katapos han piyesta han Pentekostes, nagpahayag hi Pedro ha grupo han diri tumuroo nga mga Judio ngan iginsaysay niya ha ira nga ginpatay nira an Mesias. Pero mahigugmaon nga gin-aghat niya hira: “Salit pagbasol kamo ngan pagbag-o basi mapara an iyo mga sala, basi umabot  an mga panahon han pagrepresko tikang kan Jehova mismo.” (Buh. 3:​14, 15, 17, 19) Pinaagi hito, iginpakita ni Pedro nga an pagbasol nagpapagios ha usa nga makasasala nga magbag-o—nga bag-uhon an iya sayop nga panhunahuna ngan paggawi—ngan sundon an bag-o nga pagkinabuhi nga nakakapalipay ha Dios. Iginpakita liwat han apostol nga paparaon, o wawad-on, ni Jehova an ira mga sala. Ngan paglabay hin mga dekada, ginpasarig ni Pedro an mga Kristiano: “Nagpapailob [hi Jehova] ha iyo kay diri niya karuyag nga mabungkag an bisan hin-o, lugod karuyag niya nga magbasol an ngatanan.” (2 Ped. 3:9) Nakakaliaw gud nga mahibaroan nga an mga Kristiano papasayloon ni Jehova kon nakakasala—bisan pa ngani an seryoso nga mga sala!

15-16. (a) Paonan-o nahibaro hi apostol Pablo mahitungod han pagpasaylo? (1 Timoteo 1:​12-15) (b) Ano an aton hihisgotan ha sunod nga artikulo?

¹⁵ Hi Saul han Tarso nakabuhat hin damu nga maraot nga butang. Mabangis hiya nga paratimaraot han hinigugma nga mga sumurunod han Kristo. Posible gud nga an kadam-an han mga Kristiano naghuhunahuna nga diri na gud hiya magbabag-o. Pero an binanhaw nga hi Jesus iba gud an panhunahuna kay ha diri perpekto nga panhunahuna han tawo. Nakita niya ngan han iya Amay an mag-opay nga kalidad ni Saul. Hi Jesus nagsiring: “Ini nga tawo usa nga pinili ko nga surudlan.” (Buh. 9:15) Naggamit pa ngani hi Jesus hin milagro basi buligan hi Saul nga magbasol. (Buh. 7:58–8:3; 9:​1-9, 17-20) Han nagin Kristiano na hi Saul—nga ha urhi nakilala sugad nga apostol Pablo—agsob hiya magpahayag hin apresasyon ha pagkabuotan ngan kalooy nga iginpakita ha iya ni Jehova ngan ni Jesus. (Basaha an 1 Timoteo 1:​12-15.) An mapasalamaton nga apostol nagtutdo: “Tungod han pagkabuotan han Dios nangangalimbasog hiya nga giyahan ka nga magbasol.”​—Roma 2:4.

¹⁶ Han nabatian ni Pablo an eskandaloso nga problema mahitungod ha imoralidad ha Kristiano nga kongregasyon ha Corinto, ano an ginsiring ha ira ni Pablo nga buhaton? Tikang hito nga iya ginsiring, may mahibabaroan kita nga importante nga leksyon mahitungod han mahigugmaon nga pagdisiplina ni Jehova ngan han pagkaimportante han pagpakita hin kalooy. Hihisgotan naton ito nga rekord hin mas detalyado ha sunod nga artikulo.