1. Ano an karuyag ni Jehova para ha ngatanan nga tawo?

 GINLARANG ni Jehova an mga tawo nga may kagawasan ha pagbuot. Pirme mo gin-gagamit ito nga regalo kon naghihimo ka hin mga desisyon. An pinakaimportante nga desisyon nga mahihimo han bisan hin-o amo an pagdedikar han iya kalugaringon kan Jehova ngan pagin bahin ha Iya pamilya han mga magsiringba. Karuyag ni Jehova nga ito an buhaton han ngatanan. Kay ano? Kay hinigugma niya an mga tawo ngan karuyag niya an pinakamaopay para ha ira. Karuyag niya nga malipay hira ha pakigsangkay ha iya ngan mabuhi hin waray kataposan.​—Deut. 30:​19, 20; Gal. 6:​7, 8.

2. Ano an inaabat ni Jehova ha mga diri mabinasulon nga nagbubuhat hin sala? (1 Juan 2:1)

² Pero diri ni Jehova ginpipirit an bisan hin-o nga mag-alagad ha iya. Ginpapabay-an niya an kada tagsa nga magdesisyon kon ano an iya bubuhaton. Ano man kon an usa nga bawtismado nga Kristiano nakabuhat hin seryoso nga sala? Kon diri hiya magbasol, dapat hiya tanggalon ha kongregasyon. (1 Cor. 5:13) Pero bisan pa hito, naglalaom gud hi Jehova nga an nagbubuhat hin sala mabalik ha Iya. Ngani, ito an usa han importante nga rason kon kay ano nga igintagana niya an lukat—basi magin posible an kapasayloan ha mga mabinasulon nga nakasala. (Basaha an 1 Juan 2:1.) An aton mahigugmaon nga Dios may pagkabuotan nga nanginginyupo ha mga nagbubuhat hin sala, nga gin-aaghat hira nga magbasol.​—Zac. 1:3; Roma 2:4; San. 4:8.

3. Ano an aton hihisgotan hini nga artikulo?

 ³ Karuyag ni Jehova nga magin pariho an aton abaton ha iya inaabat ha mga sala ngan ha mga nagbubuhat hin sala. Hihisgotan hini nga artikulo an paagi nga mahihimo ta ito. Samtang imo ginbabasa ini nga artikulo, kitaa (1) kon paonan-o gin-asikaso an usa nga kaso han seryoso nga sala ha kongregasyon ha Corinto han siyahan nga siglo, (2) kon ano nga instruksyon an ginhatag ni apostol Pablo han nagbasol an usa nga nakasala, ngan (3) kon ano an iginpapakita hini nga rekord han Biblia mahitungod ha inaabat ni Jehova ha mga Kristiano nga nagbubuhat hin seryoso nga sala.

KON PAONAN-O GIN-ASIKASO AN SERYOSO NGA SALA HA SIYAHAN NGA SIGLO

4. Ano an nahitabo ha kongregasyon ha Corinto han siyahan nga siglo? (1 Corinto 5:​1, 2)

⁴ Basaha an 1 Corinto 5:​1, 2. Ha ikatulo nga pagbiyahe ni Pablo sugad nga misyonero, may nahibaroan hiya nga balita mahitungod ha bag-o pa la nga naporma nga kongregasyon ha Corinto. Usa nga brother hito nga kongregasyon an nagkaada seksuwal nga relasyon ha asawa han iya tatay (stepmother). Maraot gud ito nga buhat ngan “diri ngani [ito] nahitatabo ha mga nasud”! Ginkonsinter ito han kongregasyon ngan posible liwat nga para ha ira okey la ito. Posible an pipira ha kongregasyon naghunahuna nga maloloy-on hira ha diri perpekto nga mga tawo pariho kan Jehova. Pero diri ginkukonsinter ni Jehova an sayop nga mga buhat han iya katawohan. Tungod han mapasiparahon nga panggawi hini nga tawo, sigurado nga gindadaot niya an maopay nga reputasyon han kongregasyon. Posible liwat nga gin-iimpluwensyahan niya an iba nga mga Kristiano nga nakikig-upod ha iya. Salit ano an iginsugo ni Pablo ha kongregasyon?

5. Ano an ginsiring ni Pablo ha kongregasyon nga buhaton, ngan ano an iya karuyag sidngon? (1 Corinto 5:13) (Kitaa liwat an piktyur.)

⁵ Basaha an 1 Corinto 5:13. Pinaagi ha paggiya han Dios, hi Pablo nagsurat basi maghatag hin instruksyon nga tanggalon ha kongregasyon an diri mabinasulon nga nagbubuhat hin sala. Ano an dapat nga pagtratar ha iya han matinumanon nga mga Kristiano? Ginsidngan hira ni Pablo nga “diri na . . . makig-upod” ha iya. Ano an karuyag sidngon hito? Iginsaysay ni Pablo nga upod hini nga sugo an ‘diri na pakig-upod bisan ha pagkaon ha sugad nga tawo.’ (1 Cor. 5:11) Kon nakikig-upod ka ha pagkaon ha usa, posible nga mas makagahin  ka hin panahon ha pakig-upod ha iya. Salit klaro nga karuyag ipasabot ni Pablo nga an kongregasyon diri dapat makig-upod hito nga tawo. Magpuprotektar ini ha kongregasyon tikang ha iya maraot nga impluwensya. (1 Cor. 5:​5-7) Dugang pa, an ira paglikay hito nga tawo makakapahunahuna ha iya nga nasakitan gud niya hi Jehova, ngan bangin umabat hiya hin kaawod ngan mapagios nga magbasol.

6. Ano an epekto han surat ni Pablo ha kongregasyon ngan ha nakasala?

⁶ Katapos ni Pablo ipadara an iya surat ha mga Kristiano ha Corinto, naghunahuna hiya kon ano an magigin reaksyon han kongregasyon. Ha urhi, hi Tito may iginbalita nga nakapalipay ha iya. Maopay gud an reaksyon han kongregasyon ha surat ni Pablo. (2 Cor. 7:​6, 7) Ginsunod nira an iya instruksyon. Paglabay  liwat hin mga bulan tikang han iginpadara ni Pablo an iya surat, an nakasala nagbasol! Ginbag-o niya an iya panggawi ngan disposisyon ngan ginsunod an matadong nga mga suruklan ni Jehova. (2 Cor. 7:​8-11) Ano naman an sunod nga iginpabuhat ni Pablo ha kongregasyon?

KON PAONAN-O TATRATARON HAN KONGREGASYON AN MABINASULON NGA NAKASALA

7. Ano an maopay nga resulta ha pagtanggal ha kongregasyon ha nagbubuhat hin sala? (2 Corinto 2:​5-8)

⁷ Basaha an 2 Corinto 2:​5-8. Hi Pablo nagsiring nga an “pagsaway nga ginhatag han kadam-an igo na para hito nga tawo.” Karuyag sidngon, natuman han disiplina an katuyoan hito ha iya. Ano nga katuyoan? Basi giyahan hiya nga magbasol.​—Heb. 12:11.

8. Ano an sunod nga ginsiring ni Pablo nga buhaton han kongregasyon?

⁸ Salit hi Pablo naghatag hin instruksyon ha kongregasyon: ‘Magin andam ha pagpasaylo ngan pagliaw’ ha nakasala nga bugto, ngan “pasarigon hiya han iyo gugma.” Tigamni nga karuyag ni Pablo nga diri la basta pabalikon han kongregasyon ito nga tawo nga magin kaupod utro han katawohan ni Jehova. Karuyag ni Pablo nga pasarigon nira an mabinasulon nga tawo pinaagi han ira mga pulong, pagtratar, ngan mga buhat nga ginpasaylo na gud nira hiya ngan hinigugma. Pinaagi hito maipapaabat nira nga welcome hiya ha iya pagbalik ha kongregasyon.

9. Kay ano nga an pipira bangin nag-aalang nga pasayloon an mabinasulon nga nakasala?

⁹ Nag-alang ba an pipira ha kongregasyon nga i-welcome an mabinasulon nga nakasala? Waray kita mababasa, pero posible ito. Ngani, an iya mga buhat naghatag hin problema ha bug-os nga kongregasyon ngan posible nga kaarawdan pa ngani ha pipira nga indibiduwal. An pipira bangin inabat nga diri patas nga mahigugmaon nga karawaton ito nga lalaki sugad nga bugto nga hira ngani naniguro gud ha pagpabilin nga limpyo ha moral. (Ikompara an Lucas 15:​28-30.) Pero kay ano nga importante nga ipakita han kongregasyon an tinuod nga gugma ha ira nabalik nga bugto?

10-11. Ano an mahimo mahitabo kon diri pasayloon han mga tigurang an mabinasulon nga nakasala?

¹⁰ Imadyina kon ano an mahimo mahitabo kon an mga tigurang nadiri pagpabalik ha mabinasulon gud nga lalaki o katapos han iya pagbalik, an kongregasyon diri magpakita hin gugma ha iya. Posible nga madaog hiya han “sobra nga kasubo.” Posible nga umabat hiya nga waray na paglaom an iya sitwasyon. Bangin pa ngani diri na hiya mangalimbasog nga ibalik an iya relasyon ha Dios.

¹¹ An mas maraot pa gud, kon diri pasayloon han kabugtoan ha kongregasyon an mabinasulon nga nakasala, mamimeligro an ira kalugaringon nga relasyon kan Jehova. Kay ano? Kay ginpapakita nira diri an mapinasayloon nga disposisyon ni Jehova ha mga mabinasulon, kondi an mapintas ngan waray kalooy nga disposisyon ni Satanas. Salit nagagamit hira han Yawa basi dauton an espirituwalidad hito nga tawo.​—2 Cor. 2:​10, 11; Efe. 4:27.

12. Ha ano nga paagi masusubad han kongregasyon hi Jehova?

¹² Salit ha ano nga paagi masusubad han kongregasyon ha Corinto hi Jehova, diri hi Satanas? Pinaagi ha pagsunod ha paagi ni Jehova ha pagtratar ha mga mabinasulon nga nakasala. Pansina an ginsiring han pipira nga parasurat han Biblia mahitungod kan Jehova. “Maopay [hiya] ngan andam magpasaylo,” siring ni David. (Sal. 86:5) Hi Micas nagsiring:  “Hin-o an Dios nga pariho ha imo, nagpapasaylo han sayop ngan nagpapasensya han pagtalapas?” (Mic. 7:18) Ngan hi Isaias nagsiring: “Bayaan han maraot nga tawo an iya dalan ngan han diri matadong nga tawo an iya mga panhunahuna; bumalik hiya kan Jehova, nga malolooy ha iya, ha aton Dios, kay hura hiya nga magpapasaylo.”​—Isa. 55:7.

13. Kay ano nga angayan nga ibalik ha kongregasyon an mabinasulon nga nakasala? (Kitaa an kahon nga “ Kakan-o Iginbalik an Nakasala nga Lalaki ha Corinto?”)

¹³ Basi masubad hi Jehova, kinahanglan i-welcome han kongregasyon ha Corinto an iginbalik nga mabinasulon nga lalaki ngan pasarigon hiya han ira gugma. Pinaagi ha pagsunod han instruksyon ni Pablo nga i-welcome an pagbalik han mabinasulon nga nakasala, iginpakita han kongregasyon an ira “pagkamasinugtanon ha ngatanan nga butang.” (2 Cor. 2:9) Oo, mga bulan pa la an naglabay tikang han gintanggal hiya, pero an disiplina malampuson nga naggiya ha iya nga magbasol. Salit waray rason nga idelatar an pagpabalik ha iya ha kongregasyon.

PAGSUBAD HAN KAN JEHOVA HUSTISYA NGAN KALOOY

14-15. Ano an aton nahibaroan ha paagi han pag-asikaso han kaso ha kadaan nga Corinto? (2 Pedro 3:9) (Kitaa liwat an piktyur.)

¹⁴ An rekord mahitungod han paagi han pag-asikaso han kaso ha kadaan nga Corinto ginsurat ngan ginpreserbar para ha “pagtutdo  ha aton.” (Roma 15:4) Tikang hito nga rekord, nahibaroan ta nga diri ginkukonsinter ni Jehova an seryoso nga sala ha iya katawohan. Diri niya ginhuhunahuna nga an mga nagbubuhat hin sala nga diri mabinasulon dapat tugotan tungod ha “kalooy” nga magpadayon ha pakig-upod ha iya matinumanon nga mga magsiringba. Maloloy-on hi Jehova, pero diri hiya konsintidor; o diri niya ginpapahamubo an iya mga suruklan. (Jud. 4) Lugod, an pagbuhat hito diri nagpapakita hin kalooy kay mamimeligro an ngatanan ha kongregasyon.​—Prob. 13:20; 1 Cor. 15:33.

¹⁵ Bisan pa hito, maaram kita nga diri ni Jehova karuyag nga mabungkag an bisan hin-o. Karuyag niya nga matalwas an mga tawo tubtob nga posible. Nagpapakita hiya hin kalooy ha mga nagbabag-o han ira panhunahuna ngan mga buhat ngan naruruyag nga ibalik an ira relasyon ha iya. (Ezek. 33:11; basaha an 2 Pedro 3:9.) Salit han an lalaki ha Corinto nagbasol ngan ginbayaan an iya makasasala nga buhat, gin-gamit ni Jehova hi Pablo nga isaysay ha kongregasyon nga ito nga lalaki dapat pasayloon ngan i-welcome.

16. Ano an imo inaabat mahitungod ha pag-asikaso han kaso ha Corinto?

¹⁶ An aton pagrepaso han paagi han pag-asikaso han kaso ha Corinto nakabulig ha aton nga makita an kan Jehova gugma, pagkamatadong, ngan hustisya. (Sal. 33:5) Diri ka ba napapagios nga mas dayawon an aton Dios? Kay kon huhunahunaon, magpakasasala kita—an kada tagsa ha aton—ngan kinahanglan naton an iya pagpasaylo. An kada tagsa ha aton may rason nga magin mapasalamaton kan Jehova ha lukat, nga tungod hito nagigin posible an pagpasaylo. Nakakaliaw gud nga hi Jehova tinuod nga nahigugma ha iya katawohan ngan karuyag niya an pinakamaopay ha ira!

17. Ano an hihisgotan ha masunod nga mga artikulo?

¹⁷ Pero kumusta naman an pag-asikaso han mga kaso han sala yana? Paonan-o maipapakita han mga tigurang ha kongregasyon an hingyap ni Jehova nga giyahan an nagbubuhat hin sala nga magbasol? Ano an dapat magin reaksyon han kongregasyon kon an mga tigurang magdesisyon nga tanggalon an usa o ibalik? Ini nga mga pakiana hihisgotan ha masunod nga mga artikulo.