Nabasa mo ba hin maopay an bag-o nga mga gowa han An Barantayan? Kitaa kon mababaton mo an masunod nga mga pakiana:

Basi mabuligan ha espirituwal han dayo nga mga kag-anak an ira mga anak, kay ano nga sadang nira tagdon kon ha ano nga linggwahe mag-uuswag an ira mga anak?

An kabataan posible nga mahibaro han lokal nga linggwahe ha ira eskwelahan ngan ha ira mga nakakaupod. Mahimo magin mapulsanon ha bata kon mahibaro hiya hin sobra usa nga linggwahe. Kinahanglan tagdon han mga kag-anak kon diin an ira mga anak bug-os nga makakasabot han kamatuoran ngan mag-uuswag ha espirituwal​—kon ha kongregasyon nga nagamit han lokal nga linggwahe o hadton nagamit han ira orihinal nga linggwahe. Gin-uuna han Kristiano nga mga kag-anak kon ano an makakaopay ha espirituwalidad han ira mga anak kay ha ira personal nga mga karuyag.​—w17.05, p. 9-11.

Han ginpakianhan ni Jesus hi Pedro: “Hinigugma mo ba ako labaw pa hini?” ano an iginpapasabot han pulong nga “hini”? (Juan 21:15)

Baga hin an iginpapasabot ni Jesus amo an mga isda nga nakada ha iya hirani ngan/​o an negosyo nga pagpangisda. Kamatay ni Jesus, binalik hi Pedro ha iya pakabuhi​—an pagpangisda. An mga Kristiano sadang magin timbang ha ira pagtagad ha sekular nga trabaho.​—w17.05, p. 22-23.

Kay ano nga ginhangyo ni Abraham hi Sarah nga magsiring nga magbugto hira? (Gen. 12:10-13)

Ha pagkamatuod, hi Sarah bugto ni Abraham ha amay. Kon nagsiring hi Sarah nga bana niya hi Abraham, posible nga patayon hi Abraham ngan tungod hito diri matatawo an binhi nga iginsaad han Dios kan Abraham.​—wp17.3, p. 14-15.

Ano nga teknik an gin-gamit ni Elias Hutter basi mabuligan adton naruruyag mahibaro hin Hebreo nga yinaknan?

Karuyag niya nga mahibaro an mga estudyante kon ano an Hebreo nga mga pulong (root word) ha Biblia ngan an igindudugtong nga mga prefix o suffix. Basi mahimo ito, gin-imprinta niya an root word ha solido nga mga letra pero an mga prefix ngan suffix ha outline nga mga letra. Ini nga pamaagi gin-gamit liwat ha mga footnote han New World Translation of the Holy Scriptures​—With References.​—wp17.4, p. 11-12.

Ano nga mga prinsipyo an sadang tagdon han usa nga Kristiano kon karuyag niya magkaada pusil basi panalipdan an iya kalugaringon kontra ha mga tawo?

Ini an pipira: Gintatagad han Dios nga sagrado an kinabuhi. Waray aghata ni Jesus an iya mga sumurunod nga magkaada mga espada basi gamiton sugad nga panalipod. (Luc. 22:36, 38) Kinahanglan naton himoon nga arado an aton mga espada. Mas importante an kinabuhi kay ha materyal nga mga butang. Ginrirespeto naton an konsensya han iba, ngan karuyag naton magin susbaranan kita. (2 Cor. 4:2)​—w17.07, p. 31-32.

Kay ano nga may kaibahan an asoy nira Mateo ngan Lucas mahitungod han temprano nga bahin han kinabuhi ni Jesus?

Hi Mateo nakapokus ha mga panhitabo may kalabotan kan Jose, sugad han reaksyon ni Jose han nagburod hi Maria ngan han sugo han Dios ha iya nga pumalagiw ngadto ha Ehipto ngan ha urhi han iya pagbalik. Hi Lucas mas nakapokus kan Maria; pananglitan, han pagbisita niya kan Elizabeth ngan han iya reaksyon han nagpabilin an bata nga hi Jesus ha templo.​—w17.08, p. 32.

Ano an pipira nga ulang nga kinahanglan malamposan han Biblia?

An kahulogan han mga pulong ngan mga termino nga ginagamit ha Biblia nagbabag-o paglabay han panahon. An pagbag-o ha mga kahimtang ha politika nakakaapekto ha komon nga linggwahe. May mga pagkontra ha paghubad han Biblia ha komon nga linggwahe.​—w17.09, p. 19-21.

May-ada ba kita magbarantay nga anghel?

Waray. Naghisgot hi Jesus mahitungod ha mga anghel han iya mga disipulo nga pirme aadto ha atubangan han Dios. (Mat. 18:10) Karuyag la niya sidngon nga interesado an mga anghel ha iya mga disipulo, diri kay milagroso nga ginpapanalipdan han mga anghel an tagsa ha ira.​—wp17.5, p. 5.

Ano an pinakahitaas nga klase han gugma?

An gugma nga basado ha husto nga mga prinsipyo, an a·gaʹpe, amo an pinakahitaas nga klase han gugma. Mahimo ini mag-upod hin pagpalangga ngan pagkabuotan. Pero iginpapakita hini an higtaas nga mga prinsipyo, sugad han mga buhat nga may pagsakripisyo para ha kaopayan han iba.​—w17.10, p. 7.