1. Kay ano nga importante nga pitad an bawtismo? (Kitaa an retrato hini nga pahina.)

KADA tuig yinukot nga mga estudyante ha Biblia an nababawtismohan. Damu ha ira an mga batan-on​—tin-edyer ngan mas bata pa. Bangin nagdaku hira ha kamatuoran. Usa ka ba ha ira? Kon oo, angay ka gud kumendasyonan. An bawtismo ginkikinahanglan ha mga Kristiano, ngan importante ini nga pitad basi matalwas.​—Mat. 28:19, 20; 1 Ped. 3:21.

2. Kay ano nga diri sadang kahadlokan o likyan an pagdedikar kan Jehova?

² An bawtismo nagtutugway ha damu nga bendisyon, pero nag-uupod liwat ito hin responsabilidad. Paonan-o? Ha adlaw han imo bawtismo, nagbaton ka hin oo ha pakiana nga, “Pinaagi han halad ni Jesu-Kristo, nagbasol ka na ba han imo mga sala ngan nagdedikar han imo kalugaringon kan Jehova ha pagbuhat han iya kaburut-on?” An imo bawtismo nagsisimbolo han imo dedikasyon. Usa ito nga seryoso nga saad nga imo iginsaad kan Jehova nga hihigugmaon mo hiya ngan uunahon mo an iya kaburut-on labaw ha bisan ano nga butang. Sadang ka ba magbasol nga ginbuhat mo ito? Diri gud. An paghatag han  imo kinabuhi kan Jehova diri gud sayop nga desisyon. Tagda an kabaliktaran hito. An usa nga diri nagpapagiya kan Jehova sakop ni Satanas. An Yawa diri interesado han imo katalwasan. Ngani, malilipay hiya kon mawara an imo paglaom nga mabuhi ha waray kataposan tungod han imo pagdapig ha iya ha pagsalikway han pagkasoberano ni Jehova.

3. Ano nga mga bendisyon an imo napapahimulosan tungod han imo pagdedikar kan Jehova?

³ Imbes nga suportaran hi Satanas, hunahunaa an mga bendisyon nga imo napapahimulosan sugad nga dedikado ngan bawtismado nga Kristiano. Yana nga imo na iginhatag an imo kinabuhi kan Jehova, mas may kompyansa nga makakasiring ka: “Hi Jehova aada mahatungud ha akon; diri ako mahahadluk: Ano ba an mabubuhat han tawo ha akon?” (Sal. 118:6) Waray na gud mas daku nga pribilehiyo kay ha pagin dapig ha Dios ngan pakakarawat han iya pag-uyon.

4, 5. (a) Ha ano nga paagi nga an dedikasyon usa nga personal nga responsabilidad? (b) Ano nga mga pagsari an naieksperyensyahan han mga Kristiano anoman an ira edad?

⁴ Sugad nga bawtismado nga Kristiano, an imo relasyon kan Jehova diri pariho hin propyedad han imo mga kag-anak nga mahimo mo mapanunod. Lugod, ikaw an may responsabilidad ha imo katalwasan, bisan kon naukoy ka pa kaupod han imo mga kag-anak. Kay ano nga importante nga hinumdoman mo ito pirme? Kay diri ka maaram kon ano nga mga pagsari an imo aatubangon ha tidaraon. Pananglitan, kon nabawtismohan ka antes pa magtin-edyer, posible nga makaeksperyensya ka hin pagbag-o han imo emosyon ngan hin bag-o nga mga problema samtang nagigin tin-edyer ka. Usa nga daragita an nagsiring: “Kasagaran na nga an usa nga bata diri nasusubo han iya pagin Saksi ni Jehova tungod la kay waray hiya magkaada birthday cake ha eskwelahan. Pero paglabay hin pipira ka tuig kon nagtitikakusog an hingyap ha pakig-sex, kinahanglan hiya magin kombinsido nga an pagsunod ha mga balaud ni Jehova amo pirme an pinakamaopay nga buhaton.”

⁵ Syempre, diri la an mga batan-on an nakakaeksperyensya hin mga pagsari. Bisan adton mga nabawtismohan nga adulto na nakakaeksperyensya hin diri ginlalaoman nga mga pagsari ha ira pagtoo. Ito nga mga pagsari mahimo mag-upod han problema ha pag-asawa, kahimsog, o trabaho. Oo, bisan hin-o, anoman an iya edad, maatubang hin mga kahimtang nga magsasari han iya pagin matinumanon kan Jehova.​—San. 1:12-14.

6. (a) Paonan-o mo maipapakita nga gintutuman mo an imo dedikasyon kan Jehova anoman an mahitabo? (b) Ano an imo mahibabaroan ha Filipos 4:11-13?

⁶ Basi mabuligan ka nga magpabilin nga matinumanon ha ngatanan nga kahimtang, ayaw hingalimti nga kinahanglan mo tumanon an imo saad kan Jehova anoman an mahitabo. Nagpapasabot ito nga ginsidngan mo an Soberano ha uniberso nga padayon ka nga mag-aalagad ha iya bisan kon umundang ha pag-alagad an imo kasangkayan o mga kag-anak. (Sal. 27:10) Ha ngatanan nga kahimtang, pangaro pirme hin bulig kan Jehova basi matuman mo an imo dedikasyon.​—Basaha an Filipos 4:11-13.

7. Ano an iginpapasabot han padayon nga pangalimbasog para ha imo katalwasan “nga may kahadlok ngan pangurog”?

⁷ Karuyag ni Jehova nga magin sangkay ka niya. Pero ginkikinahanglan an pangalimbasog basi matipigan mo an iyo pagin magsangkay ngan makarawat an imo katalwasan. Ngani, an Filipos 2:12 nasiring: “Padayon kamo nga mangalimbasog nga may kahadlok ngan pangurog para ha iyo katalwasan.” Ito nga mga pulong nagpapasabot nga kinahanglan mo hunahunaon kon paonan-o mo matitipigan an imo pakigsangkay kan Jehova ngan magpapabilin nga matinumanon anoman nga pagsari an imo atubangon. Diri ka puydi magin sobra kakampante. Bisan an pipira han mag-iha na nga surugoon ni Jehova waray makapabilin nga matinumanon. Salit, ano an mahimo mo buhaton basi makapadayon ha imo pangalimbasog para ha imo katalwasan?

8. Ano an nahiuupod ha personal nga pag-aram, ngan kay ano nga importante ito?

⁸ An pakigsangkay kan Jehova nag-uupod hin duha nga bahin han komunikasyon​—an pagpamati ngan pakiistorya. An personal nga pag-aram ha Biblia amo an nangunguna nga paagi han aton pagpamati kan Jehova. Nag-uupod ito han pagkuha hin kahibaro pinaagi ha pagbasa ngan pagpamalandong ha Pulong han Dios ngan basado ha Biblia nga mga publikasyon. Samtang ginhihimo mo ito, tigamni nga an pag-aram ha Biblia diri pariho hin pag-eskwela. Diri ito sadang himoon nga baga hin nagmimemorya ka la hin impormasyon basi makapasar ha eksamin. An mapulsanon nga pag-aram puropariho hin ekspedisyon diin mahimo ka mahibaro ngan makadiskobre hin bag-o nga mga aspekto han personalidad ni Jehova. Mabulig ini ha imo nga magin duok ha Dios, ngan hiya magigin duok ha imo.​—San. 4:8.

9. Ano nga mga garamiton an nakakabulig ha imo personal nga pag-aram?

⁹ An organisasyon ni Jehova nagtatagana hin damu nga garamiton nga mabulig ha imo nga magkaada mapulsanon nga programa ha pag-aram. Pananglitan, an “Activity Para sa Pag-aaral ng Bibliya” nga makikita ha seksyon nga “Tin-edyer” ha jw.org/tl makakabulig ha imo nga mahibaroan an praktikal nga mga leksyon han mga asoy ha Biblia. Makikita liwat ha jw.org/tl an mga giya ha pag-aram nga “Ano Ba Talaga ang Itinuturo ng Bibliya?” nga makakabulig ha imo nga magin kombinsido ha imo mga gintotoohan. Ini nga mga giya ha pag-aram makakabulig ha imo nga maisaysay ha iba an imo mga gintotoohan. May iba pa nga makakabulig ha imo personal nga pag-aram nga mababasa ha artikulo nga “Ang mga Kabataan ay Nagtatanong . . . Paano Ko Gagawing Kawili-wili ang Pagbabasa ng Bibliya?” ha Abril 2009 nga gowa han Gumising! An pag-aram ngan pagpamalandong may importante nga bahin ha imo pangalimbasog para ha imo katalwasan.​—Basaha an Salmos 119:105.

10. Kay ano nga importante ha usa nga bawtismado nga Kristiano an pag-ampo?

¹⁰ Oo, an personal nga pag-aram ha Biblia usa nga paagi han aton pagpamati kan Jehova, pero an pag-ampo usa nga paagi han aton pakiistorya ha iya. Diri sadang hunahunaon han usa nga Kristiano nga an pag-ampo usa la nga waray pulos nga rituwal o ‘panpaswerte’ basi magkaada daku nga tsansa nga maglampos ha iya mga pangalimbasog. Lugod, an pag-ampo usa nga tinuod nga pakigkomunikar ha aton Maglalarang. Karuyag ni Jehova  mamati ha imo. (Basaha an Filipos 4:6.) Kon may-ada ka mga ginkakabarak-an, an Biblia naghahatag hinin maaramon nga sagdon: “Ibutang an imo dinara ha bawbaw ni Jehova.” (Sal. 55:22) Natoo ka gud ba nga makakabulig ha imo ini nga sagdon? Minilyon nga kabugtoan an makakagpamatuod ha imo nga nakabulig ito ha ira. Makakabulig liwat ito ha imo!

11. Kay ano nga sadang ka magpasalamat pirme kan Jehova?

¹¹ An pag-ampo naghahatag ha imo hin higayon diri la basi mangaro hin bulig kan Jehova. An Biblia nasiring: “Ipakita an iyo pagkamapasalamaton.” (Col. 3:15) Usahay, sobra kita nga nababaraka ha aton mga problema nga tungod hito nangangalimtan na naton an mga bendisyon nga may-ada kita. Kay ano nga diri maggahin hin panahon kada adlaw ha paghunahuna bisan tulo la nga butang nga mapasalamaton ka? Katapos pinaagi ha pag-ampo, pasalamati hi Jehova tungod hito nga mga bendisyon. An tin-edyer nga hi Abigail nga nabawtismohan han 12 anyos hiya, nagsiring: “Para ha akon, hi Jehova gud an sadang pasalamatan labaw ha bisan hin-o ha uniberso. Sadang naton hiya pasalamatan ha ngatanan nga higayon tungod han mga regalo nga iya iginhahatag ha aton. Makausa, may nabatian ako nga maopay nga pahinumdom: Kon magmamata kita buwas nga may-ada la han mga butang nga aton ginpasalamatan kan Jehova yana, ano an mahisasalin ha aton?”

12, 13. Kay ano nga importante nga pamalandungon mo kon paonan-o mo personal nga natitilawan an pagkamaopay ni Jehova?

¹² Hi Hadi David ha kadaan nga panahon ginbuligan han Dios nga malamposan an damu nga pagsari, salit iginpahayag niya ini nga mga pulong pinaagi hin kanta: “Tilawi niyo ngan kita-a nga hi Jehova maopay: Bulahan an tawo nga naayup ha iya.” (Sal. 34:8) Ito nga bersikulo nagpapabug-at han kapulsanan han personal nga eksperyensya. Kon nagbabasa ka han Biblia ngan han aton mga publikasyon ngan natambong ha Kristiano nga katirok, nakakabati ka hin makaparig-on nga mga eksperyensya may kalabotan ha kon paonan-o ginbuligan han Dios an iba nga makapabilin nga matinumanon. Pero samtang nag-uuswag ka ha espirituwal, kinahanglan mo pamalandungon kon paonan-o ka ginbubuligan ni Jehova. Paonan-o mo personal nga natitilawan an pagkamaopay ni Jehova?

¹³ May usa nga paagi nga natitilawan han ngatanan nga Kristiano an pagkamaopay ni Jehova. Ano ito? An pakakarawat han imbitasyon nga magin duok ha Dios ngan ha iya Anak. Hi Jesus nagsiring: “Waray tawo nga makakakanhi ha akon gawas la kon igpahirani hiya han Amay nga nagsugo ha akon.” (Juan 6:44) Inaabat mo ba nga ito an nahitabo ha imo? Bangin mangatadongan an usa nga batan-on, ‘Iginpahirani ni Jehova an akon mga kag-anak ha iya, ngan sumunod la ako ha ira.’ Pero han nagdedikar ka kan Jehova ngan nagpabawtismo, iginpakita mo nga nagkaada ka duok nga relasyon ha iya. Yana, kilala ka na gud ni Jehova. An Biblia nagpapasarig ha aton: “Kon an usa nahigugma ha Dios, kilala hiya niya.” (1 Cor. 8:3) Ipakita pirme nga ginpapabilhan ngan gin-aapresyar mo an imo bahin ha organisasyon ni Jehova.

14, 15. Paonan-o an ministeryo makakabulig nga maparig-on an imo pagtoo?

¹⁴ Natitilawan mo liwat an pagkamaopay ni Jehova kon ginbubuligan ka niya nga maisumat ha iba an imo gintotoohan, ha ministeryo man ito o ha eskwelahan. An pipira nakukurian ha pagsangyaw ha ira mga kaeskwela. Bangin nasasabtan mo kon kay ano. Diri ka maaram kon ano an ira magigin reaksyon. Ngan bangin mas makuri an pakiistorya ha daku nga grupo kay ha personal nga pakiistorya ha usa nga kaklase. Ano an mahimo makabulig ha imo?

¹⁵ Siyahan, hunahunaa kon kay ano nga kombinsido ka ha imo mga gintotoohan. May-ada ba ha imo linggwahe an mga giya ha pag-aram nga makikita ha jw.org? Kon diri ka sigurado, paggahin hin panahon basi bilngon ito. Gindisenyo ito para mabuligan  ka nga mapamalandong an imo mga gintotoohan, kon kay ano nga natoo ka hito, ngan kon paonan-o mo ito maisasaysay ha iba. Kon kombinsido ka gud ha imo mga gintotoohan ngan nakag-andam ka hin maopay, mapapagios ka nga magsangyaw mahitungod kan Jehova.​—Jer. 20:8, 9.

16. Ano an mahimo makabulig ha imo kon nag-aalang ka pakiistorya ha iba mahitungod han imo mga gintotoohan?

¹⁶ Pero bisan kon andam ka, bangin mag-alang ka la gihapon pagsumat han imo mga gintotoohan. An 18 anyos nga sister nga nabawtismohan han 13 anyos hiya, nagsiring: “Kombinsido ako ha akon gintotoohan, pero usahay nakukurian ako pagyakan han akon ginhuhunahuna.” Paonan-o niya nalamposan ini nga ulang? “Nangalimbasog ako nga makiistorya ha paagi nga diri sobra ka pormal,” siring niya. “An akon mga kaklase diri nag-aalang pag-istorya mahitungod han ira mga ginhihimo. Sadang ko liwat ito buhaton. Salit igin-iistorya ko ha ira hin madaliay an sugad han, ‘Nagtutdo ako mahitungod ha Biblia han naglabay nga adlaw, ngan . . . ’ Katapos nagpapadayon ako pag-istorya han karuyag ko ipasabot. Bisan kon ha tinikangan diri mahitungod ha Biblia an amon gin-iistoryahan, kasagaran na nga naruruyag an iba nga mahibaroan kon ano an akon ginbubuhat kon nagtututdo may kalabotan ha Biblia. Usahay nagpapakiana hira mahitungod hito. Samtang nakikiistorya ako ha sugad nga paagi, nagigin mas masayon ito para ha akon. Ngan katapos hito, nalilipay gud ako!”

17. Paonan-o an imo pagtagad ha imo gintotoohan mahimo makabulig ha imo pakiistorya ha iba?

¹⁷ Kon inaabat han iba nga ginrirespeto mo hira ngan interesado ka ha ira kaopayan, daku an posibilidad nga magin positibo an ira reaksyon. “Nahahadlok ako pirme nga kon makikiistorya ako mahitungod ha Biblia, huhunahunaon han mga tawo nga panatiko ako.” Ito an ginsiring han 17 anyos nga hi Olivia, nga nabawtismohan antes pa magtin-edyer. Pero ginbag-o niya an iya panhunahuna. Imbes nga paghinunahunaon an iya kahadlok, nagsiring hiya: “Damu nga batan-on an diri maaram mahitungod han mga Saksi ni Jehova. Kami la an Saksi nga ira kilala. Salit an amon panggawi mahimo makaapekto ha ira magigin reaksyon. Ano man kon naoobserbaran nira nga naaawod o nakukurian kami pakiistorya mahitungod han amon gintotoohan, o ano man kon nakikita nira ha amon pakiistorya nga nahahadlok kami? Bangin hunahunaon nira nga diri kami proud kon hin-o gud kami. Bangin magin negatibo pa ngani an ira reaksyon tungod han amon kawaray-kompyansa ha kalugaringon. Pero, kon makikiistorya kami ha natural nga paagi ngan ipapakita nga kombinsido kami ha amon gintotoohan, ngan hihimoon ito nga normal nga paagi han pakiistorya, posible gud nga maaghat hira nga respetuhon kami.”

18. Ano an nahiuupod ha imo padayon nga pangalimbasog para ha imo katalwasan?

¹⁸ Sumala han aton nahisgotan na, an padayon nga pangalimbasog para ha imo katalwasan usa nga seryoso nga responsabilidad. Nag-uupod ini han pagbasa han Pulong han Dios ngan pagpamalandong hito, pag-ampo kan Jehova, ngan paghunahuna kon paonan-o ka ginbibendisyonan ni Jehova. An pagbuhat hini magpaparig-on han imo pagsarig nga may duok ka nga relasyon kan Jehova. Ngan tungod hito, mapapagios ka nga isumat an imo mga gintotoohan.—Basaha an Salmos 73:28.

19. Kay ano nga bawi gud an imo pangalimbasog para ha imo katalwasan?

¹⁹ Hi Jesus nagsiring: “An bisan hin-o nga naruruyag sumunod ha akon, isalikway niya an iya kalugaringon ngan pas-anon an iya pasakitan nga kahoy ngan padayon nga sumunod ha akon.” (Mat. 16:24) Matin-aw nga an pagin disipulo​—nga nag-uupod han dedikasyon ngan bawtismo—​obligasyon mo sugad nga Kristiano. Pero naghahatag ito ha imo hin higayon nga makakarawat hin hura nga bendisyon yana ngan kinabuhi nga waray kataposan ha bag-o nga kalibotan han Dios. Salit may maopay ka gud nga hinungdan nga padayon nga mangalimbasog para ha imo katalwasan!