Ha 2 Corinto 12:2, 3, may gintutudlok hi Pablo nga partikular nga tawo nga “gindara ha ikatulo nga langit.” Hin-o ito nga tawo? Han nagsurat hi Pablo ha kongregasyon ha Corinto, ginpabug-atan niya nga gin-gagamit hiya han Dios sugad nga apostol. (2 Cor. 11:5, 23) Katapos, nag-unabi hiya hin “mga bisyon ngan mga mensahe nga iginpahayag . . . han Ginoo.” Ha konteksto hito, waray gin-unabi hi Pablo nga iba nga kabugtoan. Salit makatadunganon an pagsiring nga an iya gintutudlok amo an iya kalugaringon sugad nga tawo nga nakakarawat hin mga bisyon ngan mga mensahe nga iginpahayag han Dios.​—2 Cor. 12:1, 5.

Salit an tawo nga “gindara ha ikatulo nga langit” ngan “ha paraiso” amo hi Pablo. (2 Cor. 12:2-4) Gin-gamit niya an mga pulong nga “mga mensahe nga iginpahayag,” nga nagpapakita nga ginsumatan hiya hin mga butang nga mahitatabo ha tidaraon.

Ano an nakita ni Pablo sugad nga “ikatulo nga langit”?

Ha Biblia, an pulong nga “langit” mahimo magtudlok ha literal nga mga langit. (Gen. 11:4; 27:28; Mat. 6:26) Pero may iba pa nga pagkagamit an pulong nga “langit.” Usahay, nagtutudlok ito ha pagmando han tawo. (Dan. 4:20-22) O mahimo ito magtudlok ha pagmando han Dios, pinaagi han iya Ginhadian.​—Pah. 21:1.

Nakita ni Pablo an “ikatulo nga langit.” Ano an iginpapasabot hini? Usahay, gin-uutro han Biblia hin tulo ka beses an usa nga butang sugad nga pagpabug-at o pagparig-on. (Isa. 6:3; Esek. 21:27; Pah. 4:8) Han gin-unabi ni Pablo an “ikatulo nga langit,” baga hin ginpapabug-atan niya an usa nga pinakamaopay ngan pinakalabaw nga klase hin pagmando​—an Mesianiko nga Ginhadian pinaagi kan Jesu-Kristo ngan han 144,000 nga iya igkasi-magmarando. (Kitaa an Kaunawaan sa Kasulatan, Tomo 2, p. 175, 182.) Uyon ha iginsurat ni apostol Pedro, ginpapamulat naton an iginsaad han Dios nga “bag-o nga mga langit.”​—2 Ped. 3:13.

Ano man an iginpapasabot ni Pablo han gin-unabi niya an “paraiso”?

An pulong nga “paraiso” mahimo liwat magpasabot hin iba-iba nga butang: (1) Kon tatagdon naton an orihinal nga urukyan han tawo, makakasiring kita nga an “paraiso” angayan la nga nagtutudlok ha literal nga Paraiso nga tuna ha tidaraon. (2) Mahimo ito magtudlok ha espirituwal nga kahimtang nga mapapahimulsan han katawohan han Dios ha bag-o nga kalibotan. (3) Dugang pa, mahimo ito magtudlok ha makaruruyag nga mga kahimtang ha langit, an “paraiso han Dios” nga gin-uunabi ha Pahayag 2:7.​—Kitaa an Barantayan, Hulyo 15, 2015, p. 8. par. 8.

Posible nga iton tulo nga punto an gintutudlok ni Pablo ha 2 Corinto 12:4 han iginhulagway niya an iya eksperyensya.

Sugad nga sumaryo:

An “ikatulo nga langit” nga gin-uunabi ha 2 Corinto 12:2 masisiring nga amo an Mesianiko nga Ginhadian ilarom han pagmando ni Jesu-Kristo ngan han 144,000, an “bag-o nga mga langit.”​—2 Ped. 3:13.

Ito an “ikatulo nga langit” tungod kay an Ginhadian usa nga pinakamaopay ngan pinakalabaw nga klase hin pagmando.

An “paraiso” diin “gindara” hi Pablo ha bisyon posible gud nga nagtutudlok (1) ha tiarabot nga literal nga Paraiso dinhi ha tuna, (2) ha espirituwal nga paraiso nga maeksister hito nga panahon, nga magigin mas labaw gud kay ha espirituwal nga paraiso nga naeksister yana, ngan (3) ha “paraiso han Dios” ha langit nga maeksister liwat ha bag-o nga kalibotan.

Salit an bag-o nga kalibotan magigin kombinasyon han bag-o nga mga langit ngan han bag-o nga tuna. Usa ini nga bag-o nga kahikayan, nga pariho nag-uupod han pagmando han langitnon nga Ginhadian ngan han katawohan nga nag-aalagad kan Jehova ha paraiso nga tuna.