HI Diana sobra 80 anyos na. An iya bana nagkasakit hin Alzheimer’s ngan gin-ataman ha usa nga nursing home ha sulod hin pipira ka tuig antes namatay. Kinahanglan liwat niya ilubon an kasakit tungod han kamatay han iya duha nga anak, ngan nagkaada liwat hiya kanser ha suso. Pero kon nakikita hiya han iya mga kakongregasyon ha Kingdom Hall o ha ministeryo, naoobserbaran nira nga pirme hiya malipayon.

Hi John nagin nagbibiyahe nga paramangno ha sulod hin sobra 43 ka tuig. Hinigugma gud niya ito nga pribilehiyo​—ito an iya kinabuhi! Pero inundang hiya hito nga toka basi atamanon an iya kapamilya nga may sakit, ngan nag-aalagad hiya yana ha usa nga kongregasyon. Kon nakikita hiya han iya mga kakilala hadto durante ha mga asembleya o kombensyon, naoobserbaran nira nga waray gud hiya magbag-o. Malipayon la gihapon hiya.

Paonan-o nagin malipayon hira Diana ngan John? Paonan-o magigin malipayon an usa nga nag-aantos hin kasakit ha emosyon ngan may sakit ha pisikal? Paonan-o an usa nga indibiduwal nga nawad-an han iya ginpapabilhan nga pribilehiyo padayon nga magigin malipayon? An Biblia naghahatag ha aton han baton: “An mga magtadung magmamalipay kan Jehova.” (Sal. 64:10) Mas masasabtan naton inin importante nga kamatuoran kon aton hibabaroan kon ano an naghahatag hin nagpapadayon nga kalipay ngan kon ano an diri.

An pipira nga butang kasagaran nga naghahatag pirme hin kalipay. Pananglitan, hunahunaa an mag-uyab nga naghihigugmaay nga ginkakasal. O an usa nga indibiduwal nga magigin kag-anak na o an usa nga nakakarawat hin pribilehiyo ha pag-alagad. Ini nga mga butang naghahatag gud hin kalipay kay regalo ini tikang kan Jehova. Hiya an gintikangan han kahikayan han pag-asawa, nagpahinabo nga magin posible an pagpanganak, ngan naghahatag hin mga toka pinaagi ha Kristiano nga kongregasyon.​—Gen. 2:18, 22; Sal. 127:3; 1 Tim. 3:1.

Pero an pipira nga butang nga naghahatag hin kalipay mahimo magin temporaryo la. Makasurubo, an bana o asawa mahimo magin diri matinumanon o mamatay. (Esek. 24:18; Hos. 3:1) An pipira nga anak nagigin diri masinugtanon ha ira mga kag-anak ngan ha Dios, bangin mapaiwas pa ngani ha kongregasyon. An mga anak ni Samuel nag-alagad kan  Jehova ha paagi nga diri Niya gin-uuyonan, ngan an mga ginbuhat ni David nagresulta hin kadaot ha iya pamilya. (1 Sam. 8:1-3; 2 Sam. 12:11) An sugad nga mga panhitabo diri gud naghahatag hin kalipay kondi hin kasubo ngan kasakit.

Sugad man, an mga pribilehiyo ha pag-alagad ha Dios mahimo mawara, bangin tungod han pagluya han kahimsog, responsabilidad ha pamilya, o mga pagbag-o ha organisasyon. Damu han nakaeksperyensya han sugad nga pagbag-o an nagsiring nga namimingaw hira ha kalipay nga ira inabat hadto han nakada pa hira ha ira pribilehiyo ha pag-alagad.

Matin-aw, an sugad nga mga hinungdan han kalipay usahay nagbabag-o o temporaryo la. Kon sugad, may-ada ba klase hin kalipay nga nagpapadayon bisan kon nagigin makuri an mga kahimtang? Oo, kay nagin malipayon hira Samuel, David, ngan an iba pa bisan kon nakaeksperyensya hira hin mga pagsari.

Maaram hi Jesus kon ano gud an tinuod nga kalipay. Antes hiya kumanhi ha tuna, han maopay gud an iya kahimtang ha langit, hiya “kanunay malipayon ha [kan Jehova] atubangan.” (Prob. 8:30) Pero han nakanhi hiya ha tuna, may mga panahon nga nakaeksperyensya hiya hin duro nga kakurian. Bisan pa hito, nalipay hiya ha pagbuhat han kaburut-on han iya Amay. (Juan 4:34) Kumusta man ha ultimo nga mga oras han iya kinabuhi han nagsasakit hiya? Ini an aton mababasa: “Tungod han kalipay nga iginbutang ha iya atubangan gin-ilob niya an pasakitan nga kahoy.” (Heb. 12:2) Salit angayan gud la nga tagdon naton an duha nga butang nga ginsiring ni Jesus may kalabotan ha tinuod nga kalipay.

Makausa, binalik kan Jesus an 70 nga disipulo katapos han ira pagsangyaw. Nalipay gud hira kay nakaghimo hira hin urusahon nga mga buhat, nakagpaiwas pa ngani hira hin mga demonyo. Katapos ginsidngan hira ni Jesus: “Ayaw kamo pagkalipay tungod kay nasugot ha iyo an magraot nga espiritu, lugod magkalipay kamo kay an iyo mga ngaran nahisurat na ha langit.” (Luc. 10:1-9, 17, 20) Oo, mas importante gud an pagkaada han pag-uyon ni Jehova kay han pagkaada hin espesyal nga pribilehiyo. Diri gud niya hingangalimtan an matinumanon nga mga disipulo​—naghahatag gud ini hin daku nga kalipay.

Ha usa pa nga higayon, han nakikiistorya hi Jesus ha damu nga tawo, iginpahayag han usa nga Judio nga babaye an iya pagbati pinaagi ha pagsiring nga sigurado nga malipayon an nanay hinin maopay gud nga magturutdo nga hi Jesus. Pero gintadong ni Jesus an panhunahuna han babaye, hiya nagsiring: “Diri, lugod, malipayon an mga namamati han pulong  han Dios ngan nagbubuhat hito!” (Luc. 11:27, 28) An pagkaada maopay nga anak nakakapalipay gud ha mga kag-anak; pero an pagkaada maopay nga relasyon kan Jehova tungod han pagin masinugtanon amo an naghahatag hin mas daku nga kalipay.

Oo, an pag-abat nga gin-uuyonan kita ni Jehova amo an naghahatag hin tinuod ngan nagpapadayon nga kalipay. Bisan kon diri makaruruyag an mga pagsari, diri ito nagwawara han sugad nga pag-abat. Lugod, an pagpailob ngan pagtipig han aton integridad durante han mga pagsari usa nga kadaogan nga magriresulta hin tinuod nga kalipay. (Roma 5:3-5) Dugang pa, gintatagan ni Jehova han iya espiritu an mga nasarig ha iya, ngan an kalipay bahin han bunga hito. (Gal. 5:22) Nabulig ini ha aton nga masabtan kon kay ano nga an Salmos 64:10 nagsiring: “An mga magtadung magmamalipay kan Jehova.”

Iginpapakita hini an rason kon kay ano nga natitipigan nira Diana ngan John, nga gin-unabi kanina, an tinuod nga kalipay bisan kon naatubang hira hin magkuri nga kahimtang. Hi Diana nagsiring: “Naayop ako kan Jehova, pariho hin bata nga naayop ha iya kag-anak.” Paonan-o niya inaabat nga gin-uuyonan hiya han Dios? “Inaabat ko nga gintatagan ako niya hin kusog nga makapadayon ha pagsangyaw hin regular nga may kalipay.” Hi John, nga nagpabilin nga aktibo ha pagministeryo katapos mawara an iya ginpapabilhan nga pribilehiyo sugad nga nagbibiyahe nga paramangno, nagsaysay kon ano gud an nakabulig ha iya: “Tikang han 1998 han igintoka ako pagtutdo ha Ministerial Training School, mas gindugangan ko an akon personal nga pag-aram kay han akon ginbubuhat hadto.” Ha paghulagway han inaabat niya ngan han iya asawa, hiya dugang nga nagsiring: “An amon panhunahuna mahitungod ha pag-alagad kan Jehova han naglabay nga katuigan ha anoman nga kapasidad nga amon mahihimo nakabulig nga magin masayon ha amon ini nga pagbag-o. Waray kami ginbabasolan.”

Naeksperyensyahan liwat han damu nga iba pa nga tinuod gud an ginsisiring han Salmos 64:10. Pananglitan, tagda an usa nga mag-asawa nga nag-alagad hin sobra 30 ka tuig ha Bethel ha Estados Unidos. Katapos, igintoka hira sugad nga mga espesyal payunir. Hira nagsiring: “Normal la nga masubo kon nawara ha imo an usa nga butang nga imo hinigugma,” pero hira nagdugang: “Diri puydi nga padayon ka na la nga masubo.” Nakigbahin dayon hira ha pagministeryo kaupod han kongregasyon. Nagsiring liwat hira: “Nag-ampo liwat kami mahitungod han pipira nga espisipiko nga butang. Ngan kon ginbabaton an amon mga pag-ampo, napaparig-on ngan nalilipay kami. Waray pag-iha pag-abot namon ha amon toka, nagpayunir an pipira ha kongregasyon, ngan ginbendisyonan kami hin duha nga nag-uuswag nga Bible study.”

Syempre, diri pirme masayon nga magin malipayon. May mga higayon nga nasusubo kita. Pero ginpapasarig kita ni Jehova pinaagi han giniyahan nga mga pulong ha Salmos 64:10. Bisan ha mga panahon nga nasusubo kita, makakasarig kita nga kon mangangalimbasog kita nga magin ‘matadong’ pinaagi ha pagpabilin nga matinumanon bisan pa han mga pagbag-o han aton kahimtang, kita “magmamalipay kan Jehova.” Dugang pa, makakalaom liwat kita nga matutuman an mga saad ni Jehova may kalabotan ha “bag-o nga langit ngan hin bag-o nga tuna.” Katapos, bug-os na nga wawad-on an pagkadiri-perpekto. An ngatanan nga katawohan han Dios ‘magkakalipay ngan magrarayhak’ ha waray kataposan tungod han iya mga ginhihimo ngan igintatagana.​—Isa. 65:17, 18.

Hunahunaa la an magigin epekto hini ha imo: Magpapahimulos ka hin perpekto nga kahimsog ngan magmamata ka kada adlaw nga makusog. Anoman nga makasurubo nga hitabo an imo naeksperyensyahan han naglabay, diri na ito maghahatag ha imo hin kasakit. Ginpapasarig kita nga “an una nga mga butang diri na hinunumduman, o diri na maabut ha panumduman.” Pinaagi han pagkabanhaw, makakaupod utro naton an aton mga hinigugma. Aabaton han minilyon an gin-abat han mga kag-anak han 12 anyos nga daragita nga ginbanhaw ni Jesus: “Nahipausa gud hira ngan duro an ira kalipay.” (Mar. 5:42) Ha urhi, an ngatanan nga tawo ha tuna magigin bug-os na nga ‘matadong’ ngan “magmamalipay kan Jehova” ha waray kataposan.