Nabasa mo ba hin maopay an bag-o nga mga gowa han An Barantayan? Kitaa kon mababaton mo an masunod nga mga pakiana:

Ano an Kasuratanhon nga ebidensya nga may empatiya an Dios ha aton?

Han an kadaan nga Israel nag-antos hin duro nga panalumpigos ha Ehipto, nakita ngan inabat han Dios an ira kasakit. (Eks. 3:7; Isa. 63:9) Ginlarang kita ha dagway han Dios salit maipapakita naton an empatiya. May empatiya hiya ha aton bisan kon bangin inaabat naton nga diri kita takos han iya gugma.​—wp18.3, p. 8-9.

Paonan-o an katutdoan ni Jesus nabulig ha mga tawo nga wad-on an diskriminasyon?

Damu nga Judio ha panahon ni Jesus an may diskriminasyon. Ginpabug-atan han Kristo an pagkaimportante han pagpaubos ngan igintutdo niya nga sayop an pagpahitaas tungod han lahi. Iya gin-aghat an iya mga sumurunod nga tagdon an kada tagsa sugad nga bugto.​—w18.06, p. 9-10.

Ano an aton hibabaroan ha diri pagtugot han Dios kan Moises nga makasulod ha Tuna nga Iginsaad?

Hi Moises may duok nga relasyon kan Jehova. (Deut. 34:10) Ha ikatarapos han 40 ka tuig ha kamingawan, an mga tawo nagreklamo ha ikaduha nga higayon tungod han kawaray tubig. Ginsugo han Dios hi Moises nga yaknan an bato. Pero, ginbalbag ni Moises an bato. Posible nga nasina gud hi Jehova kan Moises kay waray niya sunda an Iya instruksyon o waray ni Moises pasidunggi hi Jehova para hito nga milagro. (Num. 20:6-12) Nagtututdo ini ha aton han pagkaimportante han pagin masinugtanon kan Jehova ngan paghatag ha iya han pasidungog.​—w18.07, p. 13-14.

Kay ano nga masayon la kita magsayop kon maghuhukom kita sumala han aton nakikita?

May tulo nga butang nga nakakaimpluwensya ha mga opinyon han damu: lahi o nasyonalidad, pagin riko o pobre, ngan edad. Kinahanglan mangalimbasog kita nga kitaon an iba pariho han pagkita ha ira ni Jehova, nga waray pinaurog! (Buh. 10:34, 35)​—w18.08, p. 8-12.

Ano an pipira nga paagi nga makakabulig ha iba an lagas nga mga Kristiano?

An usa nga lagas nga Kristiano nga nagkaada hin bag-o nga toka ginpapabilhan pa gihapon han Dios ngan damu pa an mahihimo ha pagbulig ha iba. Mahimo niya buligan an diri Saksi nga mga bana, buligan an diri aktibo nga kabugtoan, magdumara hin pag-aram ha Biblia, ngan pahaluagon an iya ministeryo.​—w18.09, p. 8-11.

Ano an aada ha aton Toolbox ha Pagpanutdo?

May-ada ito contact card ngan imbitasyon. Aada liwat an walo nga tract nga maopay an pagkadisenyo pati an magasin nga Barantayan ngan Pagpamata! May-ada liwat ito pipira nga brosyur, duha nga nangunguna nga libro nga ginagamit ha pag-aram, ngan upat nga mag-opay nga video, upod na an Kay Ano nga Kinahanglan Pag-adman an Biblia?​—w18.10, p. 16.

Paonan-o mahimo paliton han usa nga Kristiano an kamatuoran, sugad han igin-aaghat han Proberbios 23:23?

Diri kita napalit han kamatuoran pinaagi hin kwarta. Pero kinahanglan naton maggasto hin panahon ngan mangalimbasog basi makuha ito.​—w18.11, p. 4.

Ano an aton hibabaroan ha paagi han pagtratar ni Hosea ha iya asawa nga hi Gomer?

Hi Gomer pauroutro nga nag-adulteryo, pero ginpasaylo hiya ni Hosea ngan waray hi Hosea makigbulag ha iya. Kon makabuhat hin seksuwal nga imoralidad an usa nga Kristiano, an iya inosente nga padis mahimo magpasaylo ha iya. Kon ibalik han inosente nga padis an iya seksuwal nga relasyon ha iya nakasala nga padis, mawawara na an basihan para ha Kasuratanhon nga pagdiborsyo.​—w18.12, p. 13.