1-2. Ano an aton hihisgotan hini nga artikulo?

USAHAY bangin mahunahuna naton nga halipot gud la an kinabuhi ngan “damu an problema.” (Job 14:1) Salit normal la nga may mga panahon nga nanluluya kita. Damu nga surugoon ni Jehova ha naglabay an inabat liwat hin sugad hito. An iba ha ira karuyag pa ngani mamatay. (1 Hadi 19:2-4; Job 3:1-3, 11; 7:15, 16) Pero pauroutro nga ginliaw ngan ginparig-on hira ni Jehova​—an Dios nga ira ginsasarigan. Iginrekord an ira mga eksperyensya basi maliaw ngan matutdoan kita.​—Roma 15:4.

² Hini nga artikulo, hihisgotan naton an pipira nga surugoon ni Jehova nga inatubang hin nakakapanluya nga mga sitwasyon​—hi Jose nga anak ni Jacob, an balo nga hi Noemi ngan an iya umagad nga hi Ruth, an Levita nga nagsurat han Salmo 73, ngan hi apostol Pedro. Paonan-o hira ginparig-on ni Jehova? Ngan ano an aton mahibabaroan tikang ha ira ehemplo? An baton hito nagpapasarig ha aton nga “hi Jehova hirani ha mga ruba an kasingkasing” ngan “iya gintatalwas an mga nanluluya.”​—Sal. 34:18, ftn.

3-4. Ano an nahitabo kan Jose han batan-on pa hiya?

³ Mga 17 anyos hi Jose han nagkaada hiya duha nga inop nga tikang ha Dios. Ini nga mga inop nangangahulogan nga maabot an panahon, hi Jose magigin importante ha ira pamilya ngan rirespetuhon hiya. (Gen. 37:5-10) Pero waray pag-iha tikang han nag-inop hiya, nagbag-o gud an iya kinabuhi. Imbes nga respetuhon, ginbaligya lugod hiya han iya kabugtoan basi magin uripon. Nagtrabaho hiya ha panimalay han usa nga opisyal han Ehipto nga hi Potipar. (Gen. 37:21-28) Ha halipot la nga panahon, nabag-o gud  an kinabuhi ni Jose​—tikang ha pagin pinaura nga anak han iya tatay ngadto ha pagin uripon han usa nga pagano nga opisyal han palasyo ha Ehipto.​—Gen. 39:1.

⁴ Katapos, mas nagtikaraot pa an kahimtang ni Jose. Sayop nga gin-akusaran hi Jose han asawa ni Potipar nga karuyag kuno hiya luguson ni Jose. Iginpapriso dayon ni Potipar hi Jose nga waray man la ginhimo nga imbistigasyon, ngan gin-gapos hiya hin kadena. (Gen. 39:14-20; Sal. 105:17, 18) Hunahunaa la an inabat han batan-on nga hi Jose han sayop nga gin-akusaran hiya. Ngan hunahunaa liwat an pasipara nga iginhatag ha ngaran ni Jehova hito nga akusasyon. Oo, may rason gud hi Jose nga umabat hin panluya!

5. Ano an nakabulig kan Jose basi diri hiya madaog han panluya?

⁵ Sugad nga uripon ngan priso, waray mahihimo hi Jose basi mabag-o an iya sitwasyon. Ano an nakabulig ha iya basi diri madaog han panluya? Imbes nga magpokus ha diri niya mahihimo, maduruto nga ginbuhat niya an buruhaton nga igintoka ha iya. Labaw ha ngatanan, nagpokus hi Jose ha pagpalipay ha pinakaimportante nga Persona ha iya kinabuhi, hi Jehova. Tungod hito, ginbendisyonan ni Jehova an ngatanan nga ginbuhat ni Jose.​—Gen. 39:21-23.

6. Kay ano nga posible nga naliaw hi Jose han iya mga inop?

⁶ Posible nga naparig-on liwat hi Jose pinaagi ha pagpamalandong han iya mga inop hadto nga tikang kan Jehova. Ito nga mga inop nagpapasabot nga makikita niya utro an iya pamilya ngan magigin okey an iya sitwasyon. Ngan ito gud an nahitabo. Han mga 37 anyos hi Jose, ito nga iya mga inop nagtikang matuman ha urusahon gud nga paagi!​—Gen. 37:7, 9, 10; 42:6, 9.

7. Sumala ha 1 Pedro 5:10, ano an makakabulig ha aton nga makaya an mga pagsari?

⁷ Leksyon para ha aton. An nahitabo kan Jose nagpapahinumdom ha aton nga maraot gud ini nga kalibotan ngan magigin diri patas an pagtratar ha aton han mga tawo. Bisan an aton  kabugtoan mahimo makasakit ha aton. Pero kon huhunahunaon naton hi Jehova sugad nga aton Bato, o Arayopan, diri kita manluluya o maundang ha pag-alagad ha iya. (Sal. 62:6, 7; basaha an 1 Pedro 5:10.) Hinumdumi liwat nga posible nga mga 17 anyos pa la hi Jose han gintratar hiya ni Jehova ha espesyal nga paagi. Matin-aw, may pagsarig hi Jehova ha iya mga surugoon nga batan-on pa. Yana, damu nga batan-on an pariho kan Jose. May marig-on liwat hira nga pagtoo kan Jehova. An iba ha ira ginpriso pa ngani tungod han ira pagpabilin nga maunungon ha Dios.​—Sal. 110:3.

8. Ano an nahitabo kanda Noemi ngan Ruth?

⁸ Tungod han duro nga gutom, ginbayaan han pamilya ni Noemi an ira panimalay ha Juda ngan nag-ukoy ha Moab sugad nga dayo. Didto, namatay an asawa ni Noemi nga hi Elimelec, ngan an iya na la kaupod an iya duha nga anak. Inabot an panahon, an iya mga anak nag-asawa hin mga Moabita, hira Ruth ngan Orpa. Paglabay hin mga napulo ka tuig, namatay liwat an mga anak ni Noemi, ngan waray hira mga anak. (Ruth 1:1-5) Hunahunaa la an duro nga kasubo hinin tulo nga babaye! Syempre, hira Ruth ngan Orpa mahimo mag-asawa utro. Pero hin-o an mag-aataman ha nagtitikalagas nga hi Noemi? Nadepres gud hi Noemi salit nagsiring hiya: “Ayaw ako tawaga nga Noemi. Tawaga ako nga Mara, kay ginpaantos gud ako han Makagarahum-ha-ngatanan.” Samtang duro pa nga nasusubo, nagdesisyon hiya nga bumalik ha Bethlehem, ngan inupod ha iya hi Ruth.​—Ruth 1:7, 18-20.

9. Sumala ha Ruth 1:16, 17, 22, paonan-o ginparig-on ni Ruth hi Noemi?

⁹ Tungod han maunungon nga gugma, nalamposan ni Noemi an duro nga kasubo. Pananglitan, iginpakita ni Ruth kan Noemi an iya maunungon nga gugma pinaagi ha diri pagbaya ha iya. (Basaha an Ruth 1:16, 17, 22.) Ha Bethlehem, nagin maduruto gud hi Ruth ha pagtirok han mga salin nga sebada para ha ira ni Noemi. Tungod hito, inin batan-on nga babaye nagkaada maopay nga reputasyon.​—Ruth 3:11; 4:15.

10. Paonan-o iginpakita ni Jehova an iya gugma ha mga pobre pariho kanda Noemi ngan Ruth?

¹⁰ Naghatag hi Jehova ha mga Israelita hin balaud nga nagpapakita han iya kalooy ha mga pobre pariho kanda Noemi ngan Ruth. Ginsugo niya an iya katawohan nga kon nag-aani hira kinahanglan diri nira ubuson pag-ani an ligid han ira uma basi may mahisalin ha mga pobre. (Lev. 19:9, 10) Salit hira Noemi ngan Ruth diri kinahanglan makilimos hin pagkaon. Magkakaada hira hito ha paagi nga diri mawawara an ira dignidad.

11-12. Ano an ginbuhat ni Boaz nga nakapalipay kanda Noemi ngan Ruth?

¹¹ An tag-iya han uma diin naninirok hi Ruth hin lugas amo an riko nga hi Boaz. Binilib gud hi Boaz ha pagin maunungon ni Ruth kan Noemi ngan han gugma nga iya iginpakita ha iya ugangan salit gintubos niya an panurundon han ira pamilya ngan ginkuha hi Ruth sugad nga asawa. (Ruth 4:9-13) Katapos, nagkaanak hira ngan ginngaranan hiya hin Obed; nagin lolo hiya ni Hadi David.​—Ruth 4:17.

¹² Hunahunaa an daku nga kalipay ni Noemi samtang ginkukugos niya an bata nga hi Obed ngan kinasingkasing nga nagpapasalamat kan Jehova! Pero may-ada pa mas makakapalipay kanda Noemi ngan Ruth. Kon banhawon na hira, mahibabaroan nira nga hi Obed nagin kaapoy-apoyan han Iginsaad nga Mesias nga hi Jesu-Kristo!

13. Ano nga importante nga mga leksyon an aton mahibabaroan ha nahitabo kanda Noemi ngan Ruth?

¹³ Leksyon para ha aton. Kon naatubang kita hin magkuri nga problema, bangin masubo gud kita o manluya pa ngani. Bangin maghunahuna kita nga waray na solusyon an aton mga problema.  Ha sugad nga sitwasyon, kinahanglan bug-os nga sumarig kita ha aton langitnon nga Amay ngan magpabilin nga duok ha aton kabugtoan. Oo, bangin diri wad-on ni Jehova an aton problema. Pananglitan, waray niya banhawa an asawa ngan mga anak ni Noemi. Pero bubuligan kita niya nga makailob, bangin pinaagi han mag-opay nga ginbubuhat ha aton han kabugtoan tungod han ira maunungon nga gugma.​—Prob. 17:17.

14. Kay ano nga nanluya gud an usa nga Levita?

¹⁴ An nagsurat han Salmo 73 usa nga Levita. Salit may talagsahon hiya nga pribilehiyo nga mag-alagad ha lugar para ha pagsingba kan Jehova. Bisan pa hito, may panahon nga nanluya gud hiya. Kay ano? Naawa hiya ha mga magraot ngan mapahitas-on, diri tungod han ira karaotan, kondi tungod kay mas maopay an ira kinabuhi. (Sal. 73:2-9, 11-14) Baga hin aada na ha ira an ngatanan​—karikohan, maopay nga kinabuhi, ngan waray ginkakabarak-an. Han nakita han salmista ito nga ira kalamposan, nanluya gud hiya ngan nagsiring: “Waray gud pulos an akon pagtipig han akon kasingkasing nga putli ngan paghugas han akon mga kamot basi ipakita nga inosente ako.” Matin-aw, namimeligro gud an iya relasyon kan Jehova.

15. Sumala ha Salmo 73:16-19, 22-25, paonan-o nalamposan han Levita nga nagsurat hini nga salmo an iya panluya?

¹⁵ Basaha an Salmo 73:16-19, 22-25. An Levita “sinulod . . . ha baraan nga santuaryo han Dios.” Didto, diin kaupod niya an iba pa nga nagsisingba kan Jehova, kalmado nga gin-usisa niya hin maopay an iya sitwasyon ngan igin-ampo ito. Tungod hito, nasantop niya nga nagigin diri na hiya maaramon, ngan nasimang na hiya ngadto ha peligroso nga dalan pahirayo kan Jehova. Nasantop liwat niya nga an mga magraot aada ha “madalunot nga tuna” ngan “makangingirhat nga kataposan” an ira dadangatan. Basi diri na maawa ngan manluya, kinahanglan kitaon hini nga salmista an mga butang uyon ha panhunahuna ni Jehova. Han ginbuhat niya ito, nagin kalmado utro hiya ngan nagin malipayon. Hiya nagsiring: “Waray ako iba nga ginhihingyap ha tuna kondi [hi Jehova] gud la.”

16. Ano nga mga leksyon an aton mahibabaroan tikang ha usa nga Levita?

 ¹⁶ Leksyon para ha aton. Diri gud kita maawa ha magraot nga tawo nga baga hin maopay an kinabuhi. An ira kalipay diri tinuod ngan temporaryo la; diri hira mabubuhi ha waray kataposan. (Ecles. 8:12, 13) Kon maaawa kita ha ira, manluluya la kita ngan madadaot an aton espirituwalidad. Salit kon mapansin mo nga nagtitikang ka na maawa ha kalamposan han magraot, himoa an ginbuhat han Levita. Sunda an mahigugmaon nga sagdon ni Jehova, ngan pakig-upod ha mga nagbubuhat han iya kaburut-on. Kon hinigugma mo hi Jehova labaw ha ngatanan, magkakaada ka tinuod nga kalipay. Ngan magpapabilin ka ha dalan ngadto ha “tinuod nga kinabuhi.”​—1 Tim. 6:19.

17. Kay ano nga nanluya hi Pedro?

¹⁷ Makasikasi hi apostol Pedro; pero patigda-tigda liwat hiya gumios ngan usahay, diri nag-aalang pagyakan han iya inaabat. Salit danay may nayayakan hiya o nabubuhat nga iya ginbabasolan. Pananglitan, han ginsumatan ni Jesus an iya mga apostol nga mag-aantos hiya ngan mamamatay, ginsaway hiya ni Pedro: “Diri gud ini mahitatabo ha imo.” (Mat. 16:21-23) Tungod hito, gintadong hiya ni Jesus. Han may inabot nga grupo basi arestuhon hi Jesus, tigda nga gintigbas ni Pedro an talinga han uripon han hitaas nga saserdote salit napalong ito. (Juan 18:10, 11) Gintadong utro ni Jesus an apostol. Naghambog liwat hi Pedro nga diri gud hiya mahipapakdol tungod ha mahitatabo ha Kristo bisan kon mahipakdol an iba nga apostol! (Mat. 26:33) Pero tungod hiton iya sobra nga kompyansa, nadaog hiya han kahadlok ha tawo, salit makatulo niya ignigar an iya Agaron. Nanluya gud hi Pedro ngan “ginawas hiya ngan nagtangis tungod han duro nga kasubo.” (Mat. 26:69-75) Sigurado nga naghunahuna hiya kon mapapasaylo pa ba hiya ni Jesus.

18. Paonan-o ginbuligan ni Jesus hi Pedro nga malamposan an panluya?

¹⁸ Pero waray tuguti ni Pedro nga madaog  hiya han panluya. Katapos niya mahipakdol, binangon hiya ngan nakig-upod utro ha iba nga mga apostol. (Juan 21:1-3; Buh. 1:15, 16) Ano an nakabulig ha iya? Nahinumdoman ni Pedro nga antes pa hito, nag-ampo hi Jesus nga diri magluya an pagtoo ni Pedro ngan gin-aghat hiya nga bumalik ngan parig-unon an iya kabugtoan. Ginbaton ni Jehova iton kinasingkasing nga pag-ampo. Ha urhi, nagpakita mismo hi Jesus kan Pedro, nga posible gud basi parig-unon hiya. (Luc. 22:32; 24:33, 34; 1 Cor. 15:5) Nagpakita liwat hi Jesus ha ngatanan nga apostol katapos nira mangisda ha bug-os nga gab-i ngan waray hira nadakop. Hito nga takna, gintagan ni Jesus hi Pedro hin higayon nga ipahayag utro an iya gugma ha iya. Ginpasaylo ni Jesus ini nga iya hinigugma nga sangkay ngan gintaporan hin dugang pa nga buruhaton.​—Juan 21:15-17.

19. Paonan-o an Salmo 103:13, 14 nabulig ha aton nga makita an aton mga sala uyon ha pagkita hito ni Jehova?

¹⁹ Leksyon para ha aton. An paagi han pagtratar ni Jesus kan Pedro nagpapakita nga maloloy-on gud hi Jesus pariho han iya Amay. Salit kon nakakasayop kita, diri naton angay hukman an aton kalugaringon sugad nga waray na paglaom. Hinumdoman naton nga karuyag ni Satanas nga ito an aton abaton. Lugod, paningkamotan naton nga kitaon an aton kalugaringon​—ngan adton nakasala ha aton​—pariho han pagkita han aton maloloy-on ngan mahigugmaon nga Amay ha langit.​—Basaha an Salmo 103:13, 14.

20. Ano an aton hihisgotan ha sunod nga artikulo?

²⁰ An ehemplo ni Jose, nira Noemi ngan Ruth, han Levita, ngan ni Pedro nagpapasarig ha aton nga “hi Jehova hirani ha mga ruba an kasingkasing.” (Sal. 34:18) Usahay, gintutugotan niya nga makaeksperyensya kita hin mga problema ngan umabat hin panluya. Pero kon nalalamposan naton ito nga mga problema ha bulig ni Jehova, nagririg-on an aton pagtoo. (1 Ped. 1:6, 7) Ha sunod nga artikulo, mahibabaroan pa naton kon paonan-o ginbubuligan ni Jehova an iya maunungon nga mga surugoon nga nanluluya, bangin tungod han ira mga kaluyahan o han magkuri nga sitwasyon.