1. Ano an mahimo magin epekto ha aton han panluya?

KADA adlaw, naatubang kita hin mga problema ngan naniningkamot gud kita nga makaya ito. Pero diri ba mas masayon an pag-atubang ha mga problema kon diri kita nanluluya? Salit kinahanglan naton hunahunaon an panluya sugad hin kawatan nga nagkukuha han aton kompyansa, kaisog, ngan kalipay. An Proberbios 24:10 ngan an footnote nasiring: “Kon manluya ka ha mga panahon han kakurian, magigin gutiay gud an imo kusog.” Oo, an panluya makakaubos han aton kusog nga ginkikinahanglan basi malamposan an aton mga problema.

2. Ano an mahimo magin hinungdan han aton panluya, ngan ano an aton hihisgotan hini nga artikulo?

² Mahimo kita manluya tungod ha damu nga butang​—an pipira hito tungod mismo ha aton, an iba naman tungod ha nahitatabo ha palibot. Kaapi hito nga mga hinungdan an aton mga kaluyahan, mga sayop, ngan sakit. Mahimo liwat kita manluya kon diri naton nakakarawat an karuyag naton nga toka ha pag-alagad kan Jehova o kon nagsisinangyaw kita ha teritoryo nga diri makinarawaton an mga tawo. Hini nga artikulo, hihisgotan naton an pipira nga butang nga mahimo naton buhaton basi maatohan an panluya.

3. Ano an mabulig ha aton nga magkaada timbang nga panhunahuna ha aton mga sayop ngan mga kaluyahan?

³ Masayon la ha aton nga magkaada diri timbang nga panhunahuna ha aton mga sayop ngan mga kaluyahan. Salit bangin maghunahuna kita nga tungod han aton mga sayop, diri gud kita kakarawaton ni Jehova ha bag-o nga kalibotan. Delikado gud ito nga panhunahuna. Ano an angay naton magin panhunahuna ha aton mga sayop? An Biblia nasiring nga labot kan Jesu-Kristo, an  ngatanan nga tawo ‘nakakasala.’ (Roma 3:23) Pero an Awtor han Biblia diri nagpupokus ha aton mga sayop o diri naglalaom hin kahingpitan. Lugod, mahigugmaon hiya nga Amay ngan karuyag niya nga buligan kita. Pasensyoso liwat hiya. Nakikita niya kon paonan-o kita naniningkamot nga atohan an aton mga kaluyahan ngan an diri timbang nga panhunahuna ha aton kalugaringon, ngan andam hiya ha pagbulig ha aton.​—Roma 7:18, 19.

4-5. Uyon ha 1 Juan 3:19, 20, ano an nakabulig ha duha nga sister nga maatohan an panluya?

⁴ Tagda an ehemplo nira Deborah ngan Maria. * Han bata pa hi Deborah, diri maopay an pagtratar ha iya han iya pamilya nga tungod hito naaalohan hiya. Talagsa la hiya kumendasyonan. Salit pagdaku niya, minos an iya pagkita ha iya kalugaringon. Kon nakakahimo hiya hin gutiay nga mga sayop, inaabat niya nga waray na hiya nahihimo nga tama. Pariho liwat hito an problema ni Maria. Pirme hiya ginpapakaalohan hadto han iya mga kapamilya. Salit inabat niya nga waray hiya pulos. Bisan han nabawtismohan na hiya, inabat niya nga diri la gihapon hiya angayan nga magin Saksi ni Jehova!

⁵ Bisan pa hito, inin duha nga sister waray umundang ha pag-alagad kan Jehova. Kay ano? Iginpasa nira kan Jehova an ira pinas-an pinaagi ha kinasingkasing nga pag-ampo. (Sal. 55:22) Nasantop nira nga an aton mahigugmaon nga Amay ha langit maaram kon paonan-o nakakaapekto ha aton an aton naglabay nga mga eksperyensya ngan an aton negatibo nga panhunahuna. Pero nakikita liwat niya an maopay nga sulod han aton kasingkasing​—mga kalidad nga bangin diri naton nakikita ha aton kalugaringon.​—Basaha an 1 Juan 3:19, 20.

6. Ano an mahimo abaton han usa kon nahihimo niya utro an usa nga sayop?

⁶ An usa bangin naniningkamot nga bayaan an usa nga maraot nga buhat pero bangin mabuhat niya ito utro, ngan umabat hiya nga pakyas hiya. Syempre, normal la nga makonsensya kon nakakasala kita. (2 Cor. 7:10) Pero kinahanglan diri kita sobra nga masubo ngan diri naton hukman an aton kalugaringon, nga tungod hito maghunahuna kita: ‘Waray ako pulos. Diri na gud ako mapapasaylo ni Jehova.’ Diri ito tinuod. Ito nga panhunahuna mahimo magin hinungdan nga diri na kita mag-alagad kan Jehova. Hinumdoman naton an ginsisiring ha Proberbios 24:10​—magigin gutiay gud an aton kusog kon manluluya kita. Lugod, ‘tadonga an mga butang’ kaupod hi Jehova pinaagi ha pag-ampo ha iya ngan pangaro hin kapasayloan. (Isa. 1:18) Kon nakikita niya nga sinsero ka nga nagbabasol, papasayloon ka niya. Dugang pa, pakiistorya ha mga tigurang. Mapailubon nga bubuligan ka nira nga magin marig-on utro an imo espirituwalidad.​—San. 5:14, 15.

7. Kay ano nga diri kita angay manluya kon nakukurian kita ha pagbuhat han maopay?

 ⁷ Ginsisidngan ni Jean-Luc, usa nga tigurang ha France, adton naniningkamot ha pag-ato hin kaluyahan: “An matadong nga tawo para kan Jehova, diri adton diri nakakasala, kondi amo adton nasusubo gud ha iya mga sayop ngan pirme nagbabasol.” (Roma 7:21-25) Salit ayaw hukmi an imo kalugaringon kon may gin-aatohan ka nga kaluyahan. Hinumdumi nga waray bisan usa ha aton an mahimo magin matadong ha atubangan han Dios ha aton la pangalimbasog. Kinahanglan naton ngatanan an diri matupngan nga pagkabuotan han Dios pinaagi han lukat.​—Efe. 1:7; 1 Juan 4:10.

8. Kon nanluluya kita, hin-o an aton maaaroan hin bulig?

⁸ Mapaparig-on kita han aton kabugtoan ha kongregasyon! Mahimo hira mamati ha aton kon kinahanglan naton hin kaistorya ngan maghatag hin mga pagparig-on. (Prob. 12:25; 1 Tes. 5:14) Hi Joy, nga usa nga sister ha Nigeria nga gin-aatohan an panluya, nagsiring: “Ano daw la an nahitabo ha akon kon waray an kabugtoan? An akon kabugtoan pamatuod nga ginbabaton ni Jehova an akon mga pag-ampo. Nahibaro pa ngani ako ha ira kon paonan-o paparig-unon an mga nanluluya.” Pero kinahanglan naton hinumdoman nga an aton kabugtoan bangin diri pirme maaram nga kinahanglan naton an pagparig-on. Salit bangin kinahanglan kita dumaop ha usa nga hamtong nga bugto ngan isumat ha iya an aton ginkikinahanglan nga bulig.

9. Paonan-o kita napaparig-on han Salmo 41:3 ngan 94:19?

⁹ Pangaro hin bulig kan Jehova. Kon diri maopay an aton pag-abat, labi na kon may grabe kita nga sakit, bangin makurian kita nga magin positibo. Bisan kon diri kita yana milagroso nga gintatambal ni Jehova, ginliliaw kita niya ngan gintatagan hin kusog nga aton kinahanglan basi makailob. (Basaha an Salmo 41:3; 94:19.) Pananglitan, mahimo niya pagiuson an aton kabugtoan nga buligan kita ha mga trabahoon ha balay o ha pagpalit han aton mga kinahanglan. Mahimo liwat niya hira pagiuson nga mag-ampo para ha aton. O mahimo niya ipahinumdom ha aton an nakakaliaw nga mga mensahe ha Biblia, sugad han makalilipay nga paglaom nga perpekto nga kinabuhi ha bag-o nga kalibotan diin waray na sakit ngan kaul-ol.​—Roma 15:4.

10. Ano an nakabulig kan Isang nga maatohan an duro nga kasubo katapos niya maaksidente?

¹⁰ Hi Isang nga taga-Nigeria naaksidente, salit nabalda hiya. Ginsidngan hiya han doktor nga diri na hiya makakalakat. “Nasubo gud ako ngan nanluya,” siring ni Isang. Pero padayon ba hiya nga nanluya? Waray! Ano an nakabulig ha iya? Hi Isang nagsiring: “Kami nga mag-asawa waray gud umundang ha pag-ampo kan Jehova ngan ha pag-aram han iya Pulong. Nagin determinado liwat kami nga magin mapasalamaton ha mga bendisyon nga amon nakakarawat, upod na an paglaom nga mabuhi ha bag-o nga kalibotan han Dios.”

11. Ano an nakabulig kan Cindy nga magin malipayon bisan pa kon may sakit hiya?

¹¹ Hi Cindy nga taga-Mexico nadayagnos nga may grabe nga sakit. Paonan-o niya nakaya an iya sitwasyon? Han nagpapatambal hiya, ginhimo niya nga tumong nga makasangyaw kada adlaw. Hiya nagsiring: “Pinaagi hito, nakagpokus ako ha iba imbes nga ha akon operasyon, kaul-ol, o kon ano kagrabe an akon sakit. Ini an akon ginhihimo: Kon kaistorya ko an mga doktor o mga nars, ginkukumusta ko an ira pamilya. Katapos, ginpapakianhan ko hira kon kay ano nga inin makuri nga trabaho an ira ginpili. Pinaagi hito, nahibabaroan ko kon ano nga topiko an makakapainteres ha ira. An iba nasiring nga talagsa la nga pasyente an nangungumusta ha ira. Ngan damu an nagpasalamat ha akon tungod han akon pagin mahunahunaon ha ira. May pipira pa ngani nga naghatag ha akon han ira adres  o numero han telepono. Salit hinin makuri nga panahon ha akon kinabuhi, gintagan ako ni Jehova hin daku gud nga kalipay nga bisan ako waray maglaom nga aabaton ko ito!”​—Prob. 15:15.

12-13. Paonan-o nakikigbahin ha ministeryo adton mga may sakit o edaran na, ngan ano an resulta hito?

¹² An mga may sakit o edaran na bangin umabat hin panluya tungod kay limitado na la an ira nahihimo ha ministeryo. Bisan pa hito, damu ha ira an nakakabiling hin paagi nga makasangyaw. Ha United States, an sister nga hi Laurel 37 ka tuig na nga nakahigda ha usa nga machine nga nabulig ha iya basi makaginhawa! May kanser liwat hiya, mga sakit ha panit, ngan pipira ka beses na nga gin-operahan. Pero bisan pa hinin makuri gud nga kahimtang, waray hiya umundang ha pagsangyaw. Ginsasangyawan niya an mga nars ngan iba pa nga nabisita ha iya ha ira balay. Ano an resulta? Nabuligan niya an diri maminos 17 ka tawo nga magkaada husto nga kahibaro ha Biblia! *

¹³ Hi Richard nga usa nga tigurang ha France, may praktikal nga suhestyon para ha mga diri na nakakagawas ha balay o ha mga naukoy ha nursing home. “Suhestyon ko nga magdispley hira hin pipira han aton mga literatura. An mga nalabay mahimo mainteres hito nga displey ngan maaghat nga makiistorya ha ira. Makakadasig ini ha aton hinigugma nga kabugtoan nga diri na nakakasangyaw ha balay-balay.” Adton diri na nakakagawas ha balay mahimo liwat makigbahin ha ministeryo pinaagi ha surat ngan ha telepono.

14. Ano nga maopay nga susbaranan an iginpakita ni Hadi David?

¹⁴ Adton limitado na an nahihimo tungod han edad, kahimsog, o iba pa nga hinungdan bangin diri makakarawat hin toka o pribilehiyo ha kongregasyon o ha sirkito. Kon ito an aton sitwasyon, may mahibabaroan kita ha ehemplo ni Hadi David. Han ginsidngan hiya nga diri hiya an ginpili ha pagtukod han templo han Dios​—usa nga butang nga karuyag gud niya buhaton—​bug-os nga ginsuportaran niya an ginpili han Dios para hito nga toka. Damu pa ngani an iya igindonar para hito nga proyekto. Maopay gud hiya nga susbaranan!​—2 Sam. 7:12, 13; 1 Cron. 29:1, 3-5.

15. Paonan-o naatohan ni Hugues an panluya?

¹⁵ Tungod han sakit, an brother nga hi Hugues nga taga-France inundang ha pag-alagad sugad nga tigurang, ngan diri na ngani niya naaasikaso bisan an simple la nga mga buruhaton ha balay. Nagsiring hiya: “Ha siyahan, inabat ko nga waray ako pulos, ngan nanluya gud ako. Pero waray pag-iha, nakita ko nga importante nga karawaton ko an akon mga limitasyon, ngan  nagkaada ako kalipay ha pag-alagad kan Jehova bisan pa hito nga mga limitasyon. Determinado ako nga magpadayon. Pariho kan Gideon ngan ha iya 300 nga sundalo​—nga kapoy na ngatanan—​diri gud ako masurender!”​—Huk. 8:4.

16. Ano an aton mahibabaroan ha ehemplo han mga anghel?

¹⁶ An matinumanon nga mga anghel maopay nga ehemplo. Ha panahon han pagmando ni Hadi Ahab, gin-aghat ni Jehova an mga anghel nga magsuhestyon kon paonan-o malilimbongan inin maraot nga hadi. An pipira nga anghel naghatag hin suhestyon. Pero usa la nga anghel an ginpili han Dios ngan ginsidngan hiya nga maglalampos an iya suhestyon. (1 Hadi 22:19-22) Nasubo ba an iba nga matinumanon nga anghel ngan naghunahuna, ‘Kay ano nga ginkaragan ko la an akon panahon ha pagsuhestyon?’ Sigurado nga waray gud. An mga anghel mapainubsanon gud ngan karuyag nira ihatag kan Jehova an ngatanan nga kadungganan.​—Huk. 13:16-18; Pah. 19:10.

17. Ano an angay naton buhaton kon naabat kita hin panluya tungod kay diri kita nakakakarawat hin mga pribilehiyo?

¹⁷ Pagpokus ha pribilehiyo nga magin usa han mga Saksi ni Jehova ngan ha pagpasamwak han iya Ginhadian. An mga toka mahimo umabot ngan mawara, pero ito nga mga toka diri amo an rason nga nagigin presyoso kita ha Dios. Lugod, nagigin presyoso kita ha iya ngan ha aton kabugtoan tungod han aton pagin mapainubsanon. Salit pangamuyo kan Jehova nga buligan ka niya nga magpabilin nga mapainubsanon. Pamalandonga an damu nga maopay nga ehemplo han mapainubsanon nga mga surugoon ni Jehova nga nakarekord ha Biblia. Kinaburut-on nga magserbi ha imo kabugtoan ha anoman nga paagi nga imo mahihimo.​—Sal. 138:6; 1 Ped. 5:5.

18-19. Paonan-o ka magigin malipayon ha imo ministeryo bisan kon baga hin diri makinarawaton an mga tawo ha iyo teritoryo?

¹⁸ Nanluluya ka ba usahay tungod kay an mga tawo ha iyo teritoryo baga hin diri makinarawaton o tungod kay gutiay la ha ira an iyo naaabtan ha balay? Ha sugad nga sitwasyon, ano an mahimo naton buhaton basi matipigan o madugangan an aton kalipay? May praktikal nga mga suhestyon ha kahon nga “ Mga Paagi Basi Mapauswag an Imo Ministeryo.” Importante liwat nga magkaada husto nga panhunahuna ha ministeryo. Ano an karuyag sidngon hito?

¹⁹ Padayon nga magpokus ha pagpasamwak ha  ngaran han Dios ngan ha Ginhadian. Hi Jesus nagsiring nga gutiay la an makakabiling ha dalan ngadto ha kinabuhi. (Mat. 7:13, 14) Kon nakikigbahin kita ha ministeryo, may-ada kita pribilehiyo nga magbuhat kaupod ni Jehova, ni Jesus, ngan han mga anghel. (Mat. 28:19, 20; 1 Cor. 3:9; Pah. 14:6, 7) Iginpapahirani ni Jehova ngada ha iya an mga naruruyag mag-alagad ha iya. (Juan 6:44) Salit kon an usa diri mamati yana han aton mensahe, bangin ha sunod nga makaistorya naton hiya mamati na hiya.

20. Ano an igintututdo ha aton han Jeremias 20:8, 9 mahitungod ha pag-ato ha panluya?

²⁰ Damu an aton mahibabaroan kan propeta Jeremias. Igintoka hiya ha usa nga makuri gud nga teritoryo. Gin-insulto ngan ginyaangyaangan hiya han mga tawo “ha bug-os nga adlaw.” (Basaha an Jeremias 20:8, 9.) Makausa, nanluya gud hiya ngan diri na niya karuyag magsangyaw. Pero waray niya ito buhata. Kay ano? “An pulong ni Jehova” nagin sugad hin kalayo ha sulod han lawas ni Jeremias, ngan diri na gud niya ito kaya pugngan! Ito liwat an aton aabaton kon an aton hunahuna ngan kasingkasing puno han Pulong han Dios. Salit usa pa ito nga rason nga kinahanglan naton pag-adman an Biblia kada adlaw ngan pamalandungon ito. Kon bubuhaton naton ito, magigin mas malipayon kita, ngan magigin mas mabungahon an aton ministeryo.​—Jer. 15:16.

21. Paonan-o kita magdadaog kontra ha panluya?

²¹ “An panluya mahimo magin usa nga makusog nga armas nga ginagamit ni Satanas,” siring ni Deborah, nga gin-unabi kanina. Pero mas gamhanan hi Jehova nga Dios kay ha bisan ano nga armas ni Satanas. Salit kon nanluluya ka ha anoman nga hinungdan, pangamuyo kan Jehova nga buligan ka niya. Bubuligan ka niya nga magkaada timbang nga panhunahuna ha imo mga sayop ngan mga kaluyahan. Bubuligan ka niya nga makaya an imo sakit. Bubuligan ka niya nga padayon nga magkaada timbang nga panhunahuna ha imo mga toka ha pag-alagad. Ngan bubuligan ka niya nga magkaada positibo nga panhunahuna ha imo ministeryo. Dugang pa, isumat ha imo langitnon nga Amay an ngatanan nga imo ginkakabarak-an. Pinaagi han iya bulig, magdadaog ka kontra ha panluya.