Diri. Waray rekord ha Biblia o ha kasaysayan nga nagpapakita nga ginbuhat ito.

Tungod han pagkahubad han damu nga Biblia hini nga teksto, may mga naghunahuna nga an bawtismo ha tubig para ha mga patay ginbuhat ha panahon ni Pablo. Pananglitan, ini an pagkahubad han pipira nga Biblia: “Kon sugad, kon waray pagkabanhaw, ano an bubuhaton han mga ginbawtismohan para ha mga patay?”

Pero, tigamni an ginsiring han duha nga eskolar ha Biblia. Hi Dr. Gregory Lockwood nagsiring nga waray ebidensya ha Biblia o ha kasaysayan nga may usa nga ginbawtismohan para ha patay na nga tawo. Sugad man, hi Propesor Gordon D. Fee nagsurat nga waray rekord ha kasaysayan o ha Biblia nga may sugad hito nga bawtismo. Nagsiring hiya nga an Bag-o nga Tugon waray liwat gin-uunabi mahitungod hito ngan waray ebidensya nga ginbuhat ito han bisan hin-o nga Kristiano ha siyahan nga siglo o han bisan ano nga singbahan nga naporma waray pag-iha kamatay han mga apostol.

An Biblia nasiring nga an mga sumurunod ni Jesus kinahanglan ‘manhimo hin mga disipulo ha mga tawo han ngatanan nga nasud, bawtismohan hira, tutdoan hira ha pagtuman han ngatanan’ nga iya iginsugo. (Mat. 28:19, 20) Antes mabawtismohan an usa sugad nga disipulo, kinahanglan anay niya mahibaro mahitungod kan Jehova ngan ha Iya Anak, tumoo, ngan sumugot ha ira. Diri gud ito mahihimo han usa nga patay na o aadto na ha lubnganan. An buhi nga Kristiano diri liwat makakahimo hito para ha patay na nga tawo.​—Ecles. 9:5, 10; Juan 4:1; 1 Cor. 1:14-16.

Kon sugad, ano gud an ginsisiring ni Pablo?

An iba nga mga taga-Corinto nasiring nga diri mababanhaw an mga patay. (1 Cor. 15:12) Iginpakita ni Pablo nga sayop ito. Nagsiring hiya nga ‘kada adlaw hiya naatubang ha kamatayon.’ Syempre, buhi la gihapon hiya. Pero bisan kon namimeligro an iya kinabuhi, nasarig hiya nga kon mamatay hiya babanhawon hiya sugad nga gamhanan nga espiritu, pariho kan Jesus.​—1 Cor. 15:30-32, 42-44.

Kinahanglan masabtan han mga taga-Corinto nga an pagin dinihogan nga mga Kristiano nagpapasabot nga maatubang hira hin mga pagsari kada adlaw ngan mamamatay hira antes banhawon. An pagin ‘binawtismohan kahiusa ni Kristo Jesus’ nag-uupod ha pagin ‘binawtismohan basi magin kaangbit han iya kamatayon.’ (Roma 6:3) Nagpapasabot ito nga pariho kan Jesus, makakaeksperyensya hira hin mga pagsari ngan mamamatay basi banhawon ngadto ha langit.

Sobra duha ka tuig tikang han nabawtismohan hi Jesus ha tubig, ginsidngan niya an duha niya nga apostol: “Ha bawtismo nga iginbabawtismo ha akon, babawtismohan kamo.” (Mar. 10:38, 39) Han ginsiring ito ni Jesus, diri hiya ginbabawtismohan ha tubig. Lugod, iginpapasabot niya dinhi nga an iya padayon nga pagin matinumanon ha Dios magriresulta han iya kamatayon. Hi Pablo nagsurat nga an mga dinihogan ‘mag-aantos pariho han Kristo basi [mahimo] liwat hira paghimayaon upod han Kristo.’ (Roma 8:16, 17; 2 Cor. 4:17) Salit kinahanglan liwat nira mamatay basi banhawon ngadto ha langit.

Salit, ini an husto nga pagkahubad han ginsiring ni Pablo: “Kay kon diri, ano an mapapahimulsan nira nga mga ginbawtismohan basi magin mga patay? Kon an mga patay diri gud bubuhion, kay ano nga ginbawtismohan man hira basi magin mga patay?”