Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Ano an angay naton magin pagtratar ha dinihogan nga mga Kristiano?

Gin-aapresyar naton an ira pagtoo; pero, diri naton hira gintatagan hin sobra nga atensyon. Ginlilikyan naton an ‘pagdayaw ha mga tawo.’ (Jud. 16, ftn.) Diri naton hira ginpapakianhan hin personal nga mga pakiana mahitungod han ira paglaom.​—w20.01, p. 28-29.

Ano an angay makakombinse ha imo nga napapansin ka ni Jehova?

Iginsusumat han Biblia nga nakita ka na niya antes ka pa ig-anak. Namamati liwat hiya ha imo mga pag-ampo. Maaram hiya kon ano an imo ginhuhunahuna ngan kon ano an aada ha imo kasingkasing, ngan an imo mga buhat nakakaapekto ha iya. (1 Cron. 28:9; Prob. 27:11) Iya ka iginpahirani ngada ha iya.​—w20.02, p. 12.

San-o kita angay magyakan ngan san-o kita diri angay magyakan?

Nalilipay kita pagyakan parte kan Jehova. Nagyayakan kita kon nakikita naton nga may ginbubuhat an usa nga mahimo magresulta hin pakasala. An mga tigurang nagyayakan kon an usa kinahanglan sagdonan. Diri kita nagyayakan basi makakuha (o magsumat) hin mga impormasyon mahitungod han aton buruhaton ha mga lugar nga igindidiri an aton buruhaton. Diri naton igin-iistorya an kompidensyal nga mga butang.​—w20.03, p. 20-21.

Ano an kaibahan han mga duron ha Joel kapitulo 2 ngan han mga duron ha Pahayag kapitulo 9?

An Joel 2:20-29 nasiring nga tatabugon han Dios an mga duron ngan nagsasaad hiya nga babayaran niya an kadaot nga ginhimo hito. Katapos hito, igbububo han Dios an iya espiritu. Ito nga mga detalye natuman han ginsulong han Babilonya an Israel ngan ha paglabay han panahon. An Pahayag 9:1-11 naghihisgot naman han sugad-duron nga mga dinihogan ha aton panahon samtang iginpapasamwak nira an paghukom han Dios hinin maraot nga sistema, salit an mga nadapig hini nga sistema diri gud nalilipay.​—w20.04, p. 3-6.

Hin-o yana an hadi han norte?

An Russia ngan an mga kaalyado hito. Gintitimaraot nira an katawohan han Dios​—igindidiri nira an pagsangyaw nga buruhaton ngan nasisina gud hira ha mga Saksi. An hadi han norte nakikigkompetensya ha hadi han sur.​—w20.05, p. 13.

An siyam ba nga kalidad nga gin-uunabi ha Galacia 5:22, 23 amo la an mga bahin han “bunga han espiritu”?

Diri. An baraan nga espiritu nabulig ha aton nga magkaada iba pa nga mag-opay nga kalidad, sugad han pagkamatadong. (Efe. 5:8, 9)​—w20.06, p. 17.

Ano an usa nga peligro han pag-post ha online hin bisan ano mahitungod ha imo kalugaringon?

An imo iginpu-post mahimo maghatag hin impresyon nga naghahambog ka ngan diri ka mapainubsanon.​—w20.07, p. 6-7.

Ano an mahibabaroan han Kristiano nga mga ministro ha ehemplo han maopay nga mga parapangisda?

Nagtatrabaho hira ha panahon ngan ha dapit diin posible may mga isda. Nabansay hira ha paggamit han angayan nga garamiton. Maisugon nga nagtatrabaho hira ha nagbuburobag-o nga klima. Ito liwat an mahimo naton buhaton ha aton ministeryo.​—w20.09, p. 5.

Paonan-o naton mabubuligan an aton mga estudyante ha Biblia nga maghilarom an ira gugma kan Jehova?

Mahimo naton hira aghaton nga basahon an Biblia kada adlaw ngan pamalandungon an ira nababasa. Ngan mahimo naton hira tutdoan nga mag-ampo.​—w20.11, p. 4.

Hin-o an gin-uunabi hini nga mga pulong: “Tungod han Kristo an ngatanan bubuhion”?​—1 Cor. 15:22.

Diri iginpapasabot ni apostol Pablo nga babanhawon an ngatanan nga tawo. An iya dinhi gin-uunabi amo an dinihogan nga mga Kristiano, adton “ginbaraan nga kahiusa ni Kristo Jesus.” (1 Cor. 1:2; 15:18)​—w20.12, p. 5-6.

Ano an bubuhaton han mga dinihogan katapos nira ‘mabag-o ha pagpirok han mata, durante han ultimo nga trumpeta’?​—1 Cor. 15:51-53.

Mabulig hira ha Kristo ha pagbantay ha mga tawo gamit an usa nga tungkod nga puthaw. (Pah. 2:26, 27)​—w20.12, p. 12-13.